Titiraki Mairouia Taani Wareware

Tera te reirei ae reiakinaki n Taeka N Rabakau 24:27?

E taekina ae kangai te tia korea te boki ae Taeka N Rabakau n reireian te rorobuaka temanna: “Katauraoa moa am makuri i tinaniku, Ao kataea nangina n te tawana; Ao rimwi ko na katea am utu.” Tera te reirei ae taekinaki n te taeka n rabakau ae kairaki koreana rinanon te taamnei aei? E bon riai te mwaane ni katauraoia raoi imwain ana tai ni mare ao moani katean oin ana utu, ao n atai naba mwiokoana ake e kabaeaki iai n te mare.

E kabwarabwaraaki rimoa te kibu aei n taai tabetai bwa e nanonaki iai ae e na aki tii tabe ma ana mwakuri ni kareketianti te buu te mwaane ae te karo, ma e riai naba ni kakorakoraa ke ni kaungaa ana utu. N te katoto e kona ni karaoa aei rinanon reiakinaia taekan te Atua ao te Baibara. E ngae ngke e boni koaua te iango anne ao e boto naba man te Baibara, ma e taraa n ae tiaki anne te reirei ae kakawaki n te kibu aei. Bukin tera? Iangoi bukina aika uoua.

Te moan, e aki taekinaki n te kibu aei karikirakean te utu ae e a tia n tei ni kaineti ma te kaungaunga ke te kakorakora. Ma te iango ae kabonganaaki iai bon te kateitei ibukin te auti. E kona ni kabonganaaki te taeka ae rairaki bwa “katea” n te aro ni kaikonaki nakoni katean ke moanakin te utu rinanon te mare ao karikaia naati.

Te kauoua, e kamatataaki n te kibu aei karaoani mwakuri n aaro aika karinanaki raoi n aron ae kangai, “Karaoa moa aei, ao imwina anne.” E kona ngkanne n nanonaki n te taeka n rabakau anne bwa ti na kakororaoa moa mwiokoara n te mwakuri ni kareketianti imwain ae ti kakororaoi mwiokoara ake mairoun te Atua? Tiaki ngaia anne!

N taai aika karakinaki n te Baibara, ngkana e kani “katea [ana] utu” te mwaane n te aro are e na mare bwa e aonga ni katei utu, e riai n titirakinna ni kangai, ‘I a tauraoi n tararuaa ao ni boutokaa buu ao natira aika a kona n riki rimwi riki?’ E riai ni karaoa ana mwakuri te mwaane tao n te tawaana ke arokana imwain ae e katei utu. Mangaia are, e kamatataaki ao ni kainetaki raoi rairan te kibu aei n te Baibara ae Today’s English Version ni kangai: “Tai katea am auti ao tai katei utu ni karokoa a a tauraoi am tawaana, ao ko koaua raoi bwa iai am karekemwane ibukin te maiu.” E manena te boto n reirei anne ni boong aikai?

Eng. E riai te mwaane ae kani mare ni katauraoia raoi nakon te mwioko anne. E riai ni mwakuri ngkana akea toabuakan rabwatana. Ni koauana, e na aki tianaki mwakuri korakorana ibukin ana utu nakon tii tararuaan ana utu ni baika a kainnanoi ibukini maiuia. E kaotaki n Ana Taeka te Atua bwa e buakaka riki nakon ae aki onimaki te mwaane ae e aki katauraoi baika a kainnanoaki ibukin te maiu, te onimaki ao te kakukurei n ana utu! (1 Timoteo 5:8) Ai ngaia are, n ana tai ni katauraoia ibukin te mare ao te tekateka n taanga, e riai te rorobuaka n titirakinna n titiraki aikai: ‘I a bon tauraoi raoi ni karerekei baika a kainnanoaki ibukini maiuia kaain te utu? I a tauraoi ni waakina te kairiri ni kaineti ma baika a irekereke ma te taromauri n te utu? I kona ni kakoroa nanoni mwiokoau ae te katoatai ni kaira te reirei n te Baibara ma buu ao natiu?’ A kateretereaki raoi n Ana Taeka te Atua kakawakini mwioko aikai.​—Te Tua-Kaua 6:6-8; I-Ebeto 6:4.

Mangaia are, e riai te rorobuaka ae kani mare ni karaurau n iaiangoa raoi te boto n reirei ae n Taeka N Rabakau 24:27. N aron naba anne, e riai te ateiaine n titirakinna bwa e a tauraoi raoi nakoni mwiokoan te buu te aine ao te tina. A kona naba taanga n ataei n titirakinia n titiraki aika titeboo ma aikai ngkana a iangoa moa te kariki ao kaikawaaia natiia. (Ruka 14:28) Ngkana a maiuakini kairiri aika a kairaki koreaia rinanon te taamnei ana aomata te Atua, a a kona iai ni buokaki ni kararoaaki man taonakia n te rawawatannano ae korakora ao ni kukukurei naba n aia utu ae kakabwaiaaki.

[Kabwarabwaraan n iteraniba 31]

Baikara titiraki ibukin te mare ake e riai n titirakinna iai te rorobuaka?