Iesu​—Bon Te Banna Ni Katoto Ae Kororaoi Ae Ti Na Kakairi Irouna

KO KAN riki bwa te aomata ae raoiroi riki ae kukukurei? E kabwarabwaraa te abotoro Betero bwa ti na kanga n riki n aron anne. E korea ae kangai: “E kamarakaki naba Kristo i bukimi, ao E katuka te aro ae kam na kakairi iai, ba kam na tou mwini mwanekana.” (1 Betero 2:21) Ni koauana e rangi n rianako anuani maiun Iesu Kristo ao a a bati baika karaoaki irouna ake ti kona ni karekei reireiara mai iai. Ti kona n riki bwa aomata aika raoiroi riki ao ni kukukurei ngkana ti reiakina taekan Iesu ao ni kaboraoa maiura ma maiuna. Ti na rinanon ngkai aroaro tabeua ake e kaotiotii te aomata ae kakannato aei ao n taraia raoi bwa ti na kanga ni kabwaia n ana katoto.

Iesu bon te aomata ae e aki tabeitera maiuna. E ngae ngke e taekinna Iesu bwa ‘akea nneni kawenean atuna’ ma e bon aki naba maiuakina te kanibwaibwai ke te maiu ni kainnano. (Mataio 8:20) E kaei naba baka n amwarake. (Ruka 5:29) E koreaki taekan ana moani kakai are e karaoia n tain te mare ike e bita te ran nakon te wain are e oti iai bwa e aki rawa n iraorao ma aomata ao e aki kani maiu ni kainnano. (Ioane 2:1-11) Ma e ngae n anne e kamataataa te bwai ae moan te kakawaki Iesu ni maiuna ngke e kangai: “Kanau te tou mwin ana taeka Teuare kanakomaiai, ao te katia ana makuri.”—Ioane 4:34.

□ Ko a tia n tirotiroa maium ao n taraia bwa ko na kanga n aki tabeitera ni kaineti ma karekeani baika ko kainnanoi ni maium ao kateimatoaan am iraorao ae kaan ma te Atua?

Iesu bon te aomata ae kai kawaraki. E kabwarabwaraaki n te Baibara bwa Iesu bon te aomata ae iai irouna te nano n tangira ao n iraorao. E aki ebu irouia aomata ake a kawaria ma aia kangaanga ke aia titiraki aika matoatoa. N te taina ngke e karibwaaki irouia aomata aika bati ao akea bwa e ringa naba buruburuni kunnikaina temanna te aine ae nraraa i nanon 12 te ririki bwa n ana kantaninga neiei e na kamaiuaki man aorakina iai. E aki boaa neiei ibukin te bwai ae karaoia are a kona n taraia aomata bwa akea riaina ni karaoia ma e taetae nakoina ma te akoi ni kangai: “Natiu, e kamaiuko am onimaki.” (Mareko 5:25-34) A mwengaraoi naba ataei irarikina n akeani maakan ae e na aki kubariia. (Mareko 10:13-16) E rangi n ataaki arona nakoia taan rimwina n uaia ni mamaroro ma ngaiia ni kaotii nanoia ao n iraorao. A rangi ni kani kaaniaki ma ngaia.—Mareko 6:30-32.

□ A kai kawariko aomata ni maroro ma ngkoe?

E atataiaomata ao e nanoanga Iesu. Aroaron Iesu teuana ae rangi ni kakannato bon arona ni kona n ota n aia namakin ke n rawawataia aomata n uataboi rawawataia ao ni buokiia. E taekinna te abotoro Ioane bwa ngke e nora Maria Iesu bwa e tang ibukini mateni mwanena are Rataro ao e “ngirangira i nanona, ao E rawawata” ao “e tang” naba. E noraki korakoran ana tangira Iesu nakoia kaain te utu anne irouia taani mamataku ao ana namakin naba ae e aki maamaa ni kaotia i mataia aomata. Ao ai boni korakorara ana nanoanga teuaei ngke e manga kaoka maiun raoraona aei!—Ioane 11:33-44.

N te tai teuana ao e butiia Iesu te mwaane are karawawataaki ibukin aorakina ae kakamaaku ae te rebera are e kararoaki iai ni kangai: “Te Uea, ngkana Ko kani kaitiakai, ao Ko boni konai.” E rangi ni kaunganano ana kaeka Iesu ae kangai: “E arora baina, ao E ringnga, ao E taku, I kani kaitiakiko; ko na itiaki.” (Mataio 8:2, 3) E aki kamaiuia aomata Iesu tii ibukini kakoroan nanon taetae ni burabeti. E kani kaoi rannimataia. E kangai teuana ana taeka ae aki toki n ururingaki are e kairaki iai bwa e na karaoi bwaai ni kabane: “Ane kam tangiria ba e na karaoaki nako imi irouia aomata, ao kam na karaoa naba arona nako ia.”—Ruka 6:31.

□ E koaua bwa e kona n noraki am nanoanga ibukia aomata rinanoni baika ko karaoi?

Iesu bon te aomata ae ataibwai ao e wanawana. E ngae ngke bon te mwaane ae akea ana bure Iesu ma e aki kantaningaia aomata bwa a na kororaoi ao e aki naba kaotia bwa e raoiroi riki ana mwakuri nakoia. E aki naba karaoa te mwakuri teuana n akea ana ataibwai moa ae tabwanin i aona. N te tai teuana ao temanna te aine ae kinaaki n te kaawa bwa “te aine ae buakaka” e kaota ana onimaki ao nanona ni kakaitau n tebokani waen Iesu n rannimatana. E kariaia neiei Iesu bwa e na karaoa anne ao e mimi iai teuare e kakao are e kabuakakaa neiei n te aro ae riao. Ibukin ataan nanon neiei ni koaua iroun Iesu e aki kabuakakaa ibukin ana bure. Ma e taku: “E kamaiuko am onimaki; naako ma te rau.” Ibukin aron Iesu ni kaeka ae tatangira e a bae n anaaki iai nanon te aine anne bwa e na kitan aroaroni maiuna ngkoa.—Ruka 7:37-50.

□ Ko ataaki n arom ae ko waekoa ni kamoamoaia aomata ao ni baenikai ni kabuakaka?

E aki inanonano ao e karinerine Iesu. Tao ibukina bwa titeboo aroaroia ao iai irekerekeia n te utu, iai ngkanne okoron ana tangira Iesu nakon te tia rimwina ae Ioane.a Ma bon akea te tai ae e kaota iai te inanonano nakoina ke ni karakaa akoana i aoia taan rimwina ake tabeman. (Ioane 13:23) Ni koauana ngke a bubutii ibukini mwiokoaia aika moan raraoi n ana Tautaeka n Uea te Atua Ioane ma tarina are Iakobo ao e kaekaia Iesu ni kangai: “Tiaki au bwai te katekateka te aba i angaataiu ao i angamaingu.”—Mareko 10:35-40.

E kakarineia aomata n taai nako Iesu. E aki boutokaa aroaroia aomata aika inanonano ake n ana bong. N te katoto, e taabangaki kamangoraia aine nakoia mwaane. Ma Iesu e kakarineia aine n te aro ae riai. N te moan tai are e kaotia iai bwa boni ngaia te Mesia ao e taekinna nakon te aine ae tiaki te I-Iutaia bwa bon te I-Tamaria are e na bon aki kani kamauraki irouia I-Iutaia ao ni kakeaaki naba bongana. (Ioane 4:7-26) Ao e mwiokoia moa aine Iesu bwa a na riki bwa taani kakoauaa kautana.—Mataio 28:9, 10.

□ Ko aki inanonano n arom nakoia aomata ibukina bwa e kaokoro am reeti ma ngaiia, ke tao te mwaane ke te aine, ke e kaokoro ami taetae, ke e kaokoro abami?

Bon te nati ao te tari ae kakoroi bukini mwiokoana Iesu. N taraana e mate ai taman Iesu ae Iotebwa are e kaikawaaia ngke te roro n rikirake ngaia. E boni bae ni karekemwane teutana n ana mwakuri ni kabenta ibukini maiuia tinana ao tarina ao mwanena aika uarereke. (Mareko 6:3) Ngke e nangi mate ao e mwiokoa te tia rimwina ae Ioane bwa e na tabeakina tinana.—Ioane 19:26, 27.

□ Ko kona ni kakairi iroun Iesu ni kakoroi bukini mwiokoam n am utu n aron are e karaoia?

Iesu bon te rao ni koaua. Bon te rao ae rianako Iesu. N te aro raa? E aki rawa nakoia raoraona tii ibukini karaoan ae kairua irouia ao ngkana a okioki ni karaoa te kairua anne. A aki kakaraoa ae tangiria Iesu bwa a na karaoia taan rimwina n taai nako. Ma e kaotiotia n arona nakoia bwa bon raoraoia rinanoni kaatuuan iaiangoan aroaroia aika raraoi, n oneani mwin are e na iangoia bwa a bubuaka nanoia. (Mareko 9:33-35; Ruka 22:24-27) E aki kairoroia bwa a na ira ana iango ma e kaungaia n te aro are a na kona ni kaotii nanoia n akea tutukaia.—Mataio 16:13-15.

Moamoa riki e tangiriia raoraona Iesu. (Ioane 13:1) Tera aroni korakoran ana tangira nakoia? E kangai: “Akea te tangira iroun te aomata, ae korakora riki nakon ae te anga maiuna i bukiia raona.” (Ioane 15:13) Iai te bwai ae kakawaki riki nakoni maiun te aomata temanna ae e kona n anga ibukia raoraona?

□ Ko teimatoa n iraorao ma aomata e ngae ngke a kauniko ke ni kabwairangko?

E ninikoria ao bon te ooi ni mwaane Iesu. E rangi ni kaokoro Iesu ma te aomata ae kaotaki irouia taani koro banna ae mamaara ao ae kabuingoingo. E kaotaki taekan Iesu n taian Euangkerio bwa te aomata ae korakora ao e nano ni mwaane. E kakioianako taani kabobwai ma aia bwai nako Iesu man te tembora uoua te tai. (Mareko 11:15-17; Ioane 2:14-17) Ngke a roko aomata aika bati n taua “Iesu are te I-Natareta,” e ninikoria ni kaotia nakoia ao ni kamanoia taan rimwina ae kaotaki n ana taeka ae matoatoa ni kangai: “Boni Ngaia Ngai: ma ngaia aei, ngkana kam ukoukorai, ao kanakoia moa uakai.” (Ioane 18:4-9) Maroaka ae ngke e taraa ninikorian Iesu Bontio Birato ngke e tauaki ao ni bwainikirinaki ao e kangai: “Noria, te aomata!”—Ioane 19:4, 5.

□ Ko waekoa ni karaoa ae riai ma te ninikoria ngkana ko ataa te bwai ae ko riai ni karaoia?

E a riki bwa ara banna ni katoto ae kororaoi Iesu ni baikai ao aroarona riki aika rianako. Ngkana ti kariaia bwa ti na rotaki n aroni maiuna ti na riki bwa aomata aika raoiroi riki ao ni kukukurei. Boni ngaia aei bukina ae te abotoro Betero e kaumakiia iai Kristian bwa a na kakairi raoi ni mwanekan Iesu. Ko kekeiaki naba n tou mwini mwanekan Iesu n aron ae ko kona?

E Raka Riki Iesu Nakon ae Tii te Banna ni Katoto ae Ti na Kakairi Iai

Ma e raka riki Iesu nakon ae tii te banna ni katoto ae ti na kakairi iai. E taku: “Boni Ngai te kawai, ao te koaua, ao te maiu: akea ane nako n te Tama, ba ti i Rou.” (Ioane 14:6) Irarikin tataekinan te koaua ibukin te Atua iroun Iesu ao e a kauka te kawai ngkanne nakoira ni kaanian te Atua, ma e angania aomata aika kakaonimaki naba kantaningaan te maiu.—Ioane 3:16.

Ni kaineti ma bukin rokon Iesu i aon te aba n te itera teuana e a taekina ae kangai: ‘E aki nako mai Natin te Aomata bwa e na tautoronia aomata, ma e roko bwa e na toro irouia aomata, ao bwa e na anga maiuna bwa te kaboomwi ibukia aomata aika bati.’ (Mataio 20:28) N aron Iesu n anga maiuna bwa te karea, e a katea iai aani karekean te maiu are akea tokina ae kakukurei nakoia aomata. Tera ae ti riai ni karaoia n tatabemanira nako bwa ti aonga ni kakabwaiaki n te karea anne? E kabwarabwaraa ni kangai Iesu: “Aio te maiu are aki toki, te ataiko ae te Atua ae ti temanna ae koaua, ao Iesu Kristo, ae Ko kanakomaia.”—Ioane 17:3.

Eng, karekean ataakin Iesu ao katotongan aroni maiuna, onimakinani matena bwa te karea ni kaboomwi, boni baika riai ni karaoaki irouia aomata ni karekean te maiu ae aki toki. Ti kaoko bwa ko na kamwaawa am tai n ukeuke n reirei n nibwan te atatai anne ae te Baibara ao ni kakorakorako ni maiuakina ae taekinaki i nanona n aron naba Iesu.b

Maiun Iesu ae moan te tamaroa e reireinira aekan arora ae ti riai ni maiuakinna. Matena bwa te karea ni kaboomwi e kona ni kainaomataira man te bure ao boon te bure ae te mate. (I-Rom 6:23) Ai kananokawakira arora ngkana akea rotakira ae korakora iroun Iesu Kristo! Tai kariaia tabetabem ao tabeaiangam ni bwaikorakin te maiu aei bwa a na iraea am kona n iaiangoi ao ni kakairi raoi n ana banna ni katoto teuare te kabanea ni kakannato mai buakoia aomata, ae Iesu Kristo.

[Kabwarabwara ae nano]

[Bwaoki/​Taamnei n iteraniba 7]

◼ E aki inanonano ao e karineia aomata nako Iesu

◼ E riki bwa te rao ni koaua ni karokoa matena

◼ E ninikoria

Ko kekeiaki ni kakairi raoi ni mwanekan Iesu n aron ae ko kona?

[Taamnei n iteraniba 5]

Iesu bon te aomata ae aki tabeitera . . .

ae kai kawaraki . . .

ae nanoanga