Rannimata i Nanon te Bwatoro ae Karaoaki Mani Kunin te Man
E KARABARABAA te rorobuaka temanna. E taonaki nako n te maaku ao te rawawata ao a waanako rannimatana ao e butiia Atuana ae Iehova bwa e na akoia ao n nanoangaia ngke e onnonia ni kangai: “Ko na kaki rannimatau i nanon am batoro” ae karaoaki mani kunin te man. (Taian Areru 56:8) Bon Tawita te mwane aio are e a riki imwina bwa uean Iteraera. Ma tera raoi te bwatoro ae karaoaki mani kunin te man are e taekinna Tawita ao e kanga te Atua ni kawakin rannimatara iai?
E rangi n taneiai Tawita ma te bwatoro ae karaoaki mani kunin te man. Bon te bwatoro ae kawakinaki iai te ran, te oera, te wain ao te bwata naba. A bon teimatoa taan ririanna aika kaain te baronga ae te Tuareg n te rereua ae te Sahara ni kamanenai bwatoro aika karaoaki mani kunin temanna te man ni kabanea, n aron te kooti ke te tiibu. Aeka ni bwatoro aikai a kona n nneaki iai raan aika rangi ni bati ni kaineti ma buburan te man. A ataaki bwatoro akekei bwa a kamanenaaki ibukini kateimatoani mwaitoron te ran n taini korakorani kabuebuen taai n te rereua. A aki toki n uouotaki i aon taian aati ke kamero n taai ake rimoa. Ni boong aikai ko kona n noria n nim i moan te kaa ae bubura.
A uaana naba ibukira ana taeka Tawita aika ringa te nano ni kaineti ma te bwatoro ae karaoaki mani kunin te man. N te aro raa? E kabwarabwaraaki n te Baibara bwa Tatan e tautaekana te waaki n te aonnaba ae ngkai ao e “bati n unun” n ara bong aikai. N tokina, a a bati rekenikai aika rawawata n te aonnaba. (Te Kaotioti 12:12) Ibukin anne, a a mwaiti aomata aika ai aron Tawita aika kaaitara ma te rawawata ni kaineti ma aia namakin, aia iango ao rabwataia naba ao e a moamoa riki irouia akana kekeiaki ni kakukureia te Atua. E kaineti anne nakoim? A aki toki ni kekeiaki ni maiuakina te onimaki ma te ninikoria ‘ni katu rannimataia’ akana kakaonimaki. (Taian Areru 126:6) A kona ni karauaki nanoia aomata aikai bwa e aki tii nora kataakia Tamaia are i karawa, ma e nora naba aron rotakia iai. E bon ota raoi n rawawataia ana toro ao e uringi rannimataia ao karawawataia ma te nanoanga, n te aro ae e kaikoi n te aro ni kaikonaki n ana bwatoro ae karaoaki mani kunin te man.