E Maiu Ana Taeka Iehova
Reirei Aika Kakawaki Man Reeta Nakoia Kaaini Korinto
E RANGI n tabeaianga te abotoro Bauro ibukin nakoraoin aia onimaki kaain te ekaretia i Korinto. E a tia n ongo taekan te itabarara i marenaia taari ikekei, ae e a kariaiakaki iai mwakuri aika kamwara. A a tia naba kaain te ekaretia aei ni kororeta nakoni Bauro n titirakinna ibukini bwaai tabeua ake a riki. Ibukin aei, ao ni menan Bauro i Ebeto n ana katenua ni mwananga ni mitinare tao 55 C.E., e a korea iai ana moan reta mai buakon ana reta aika uoua nakoia kaaini Korinto.
E taraa n ae e koreaki te kauoua n reta, tii tabeua te namwakaina imwin te moan reta, ao bon reitana. A kaineti raoi baike a riki i nanon ao itinanikun te ekaretia are i Korinto n te moan tienture, ma baika bati aika a riki n ara tai aikai. Mangaia are a rangi ni kakawaki naba nakoira rongorongo ake n ana reta Bauro nakoia kaaini Korinto.—Ebera 4:12.
‘KAM NA MARURUNG, TEIMATOA, AO KAKORAKORAINGKAMI’
E kaungaunga ni kangai Bauro: “Kam na bane n atonga te taeka ae ti teuana.” (1 I-Korinto 1:10) ‘Akea ae kona ni kawenea aana riki teuana ma tii are e a tia ni kaweneaki are Iesu Kristo,’ are a karikirakeaki mai iai aroaro ni Kristian. (1 I-Korinto 3:11-13) E taku Bauro ni kaineti ma te tia wene ni bure n te ekaretia: “Tewea nako teuare buakaka mai buakomi.” (1 I-Korinto 5:13) E taekina naba aei: ‘E aki karaoaki te rabwata i bukin te wene ni bure, ma i bukin te Uea.’—1 I-Korinto 6:13.
Ni kaekaani “baike [a] koroi,” e angania Bauro reirei aika raraoi ao ni manena ni kaineti ma ake a a tia ni mare ao ake akea buuia. (1 I-Korinto 7:1) Imwini kabwarabwaraan te aro ni kairiri ae riai irouia Kristian, te babaire raoi n aia bobotaki, ao te koaua ibukin te mangauti, e a anga ana kaungaunga Bauro ae kangai: “Kam na marurung, kam na teimatoa n te onimaki, kam na mwaane, kam na korakora.”—1 I-Korinto 16:13.
A Kaekaaki Titiraki Aika Boto i Aon te Baibara:
1:21—E kabongana te ‘nanobaba’ Iehova ni kamaiuia te koraki ake a onimaki? E bon aki. Ma kioina ngkai “a aki ata te Atua aomata n oin rabakauia,” e a taraa ngkanne n nanobaba irouia kaain te aonnaba te bwai are e kamanena ni kamaiuia aomata iai.—Ioane 17:25.
5:5—Tera ae nanonaki n ‘anganakin Tatan te aomata ae buakaka bwa e na reke kain rabwatana, bwa e aonga ni maiu taamneina’? Ngkana e kabaneaki man te ekaretia te aomata ae karaoa te bure ae kakaiaki ae rawa n raraoma, e a manga riki ngkanne bwa kaain ana waaki Tatan ae buakaka. (1 Ioane 5:19) Ao n te aro anne, e a taekinaki bwa e a anga te aba ngaia nakon Tatan. Ni kabaneakin te aomata, e a katokaki iai ke ni kamwawaaki te aro ae buakaka man te ekaretia, bwa e aonga ni kateimatoaki te nano ae itiaki ke aroaro aika raraoi aika bwainaki irouia kaaina.—2 Timoteo 4:22.
7:33, 34—Tera ae nanonaki ni “bwain aon te aba” ake a tabeaianga iai mwaane ao aine aika mareaki? E nanonna Bauro iai baika kainnanoaki ibukin te maiu ake a riai n tabeaianga iai Kristian aika a a tia ni mare. Ibuakoni baikai bon amwarake, kunnikai ao mweenga, ma akea i buakoni baikai bwaikorakin te aonnaba aei aika buakaka, ake a rarawa nako iai Kristian.—1 Ioane 2:15-17.
11:26, BK—Ngke e taekinaki bwa e na karaoaki kauringani maten Iesu “n tai nako,” iraua te tai ae nanonaki iai, ao n “ua” n ningai? E aki nanonna Bauro bwa e na kakauringaki maten Iesu n taai nako. Te taetae ni Kuriiti ibukin te taeka ae “n tai nako” e nanonaki iai “n taai ni kabane ake” ke “ni katoaa te tai ake.” Mangaia are e bon taekinna Bauro bwa ni katoaa te tai are a katoong iai banna ni Kauring Kristian aika kabiraki, n tii te taina n te ririki n Nitian 14, a a “kaota iai maten te Uea.” A kakaraoa aei “n ua rokona,” ke ni karokoa te tai are e a butimwaaia iai i karawa imwini mangautia.—1 I-Tetaronike 4:14-17.
13:13—N te aro raa, ae e kakannato riki iai te tangira nakon te onimaki ao te kaantaninga? Ngkana a a noraki raoi “baika a kaantaningaki” ma “te aki-nanokokoraki,” e a toki naba iai te onimaki ao te kaantaninga ni kaineti ma baikai. (Ebera 11:1) Mangaia are e kakannato riki te tangira nakon te onimaki ao te kaantaninga ibukina bwa e teimatoa te tangira n aki toki.
15:29—Tera ae nanonaki n te ‘bwabetito ibukini kaantaningan ae a na mate’? E aki nanonna Bauro bwa aomata aika maiu a na bwabetitoaki ibukia te koraki ake a a tia ni mate ngke a tuai ni bwabetitoaki. Te bwai ae taekinna ikai Bauro, boni katebonakoaia Kristian aika kabiraki nakon te aroaro ni maiu are a a reitaki iai ma kateimatoan aia onimaki ni karokoa mateia, are e na taorimwiaki ni manga kautaia nakon te maiu n taamnei.
Reireiara:
1:26-31; 3:3-9; 4:7. Ngkana ti kananorinanoira n angan Iehova kamoamoana n oneani mwin ae ti kamoamoaira i bon iroura, e na rikirake iai ngkanne te katiteuanaki n te ekaretia.
2:3-5. Ngke e uarongorongo Bauro i Korinto, ae kautun te rabakau ni karekeiango ao te reirei ni Kuriiti, tao e bon tabeaianga naba bwa e na kona ni kairi aia iango aomata ake a ongoraa irouna ke e na aki. Ma e ngae n anne, e bon aki kariaia bwa e na tukaki mani karaoani mwiokoana mairoun te Atua n te mamaara teuana ke te maaku. N aron anne, ti riai naba n aki kariaia kangaanga aika karina n riki bwa a na tukira man tataekinan te rongorongo ae raoiroi ibukin Ana Tautaeka n Uea te Atua. Ti kona n onimakina Iehova ibukini buokara n aron naba Bauro.
2:16. Ngkana ti kani karekea iroura “nanoni Kristo,” ti riai n ata arona n iaiango ao bukin tera bwa e iaiango n aron anne, ti na kakairi n arona n iango, ti na atai raoi aroarona ao ni kakairi n ana katoto. (1 Betero 2:21; 4:1) Ai kakawakira ngkanne bwa ti na karauira raoi n reiakina maiun Iesu ao ana mwakuri ni minita!
3:10-15; 4:17. Ti riai n tuoi raoi ao ni katamaroai rabakaura n angareirei ao arora ni karekeia taan rimwini Kristo. (Mataio 28:19, 20) Ngkana ti aki rabakau raoi n angareirei, a kona ngkanne aomata ake ti reirei ma ngaiia n aki tokanikai ni kataakin aia onimaki, n te aro are a a maraki iai nanora ao titeboo ngkanne ma ti a kamaiuaki “mai buakon te ai.”
6:18. Ngkana ti na “biri nako man te wene ni bure” ti riai n rarawa tiaki tii nakoni mwakuri aika irekereke ma te por·neiʹa, ma ti riai naba n rarawa nakon te bwaitingako, aroaro aika kammaira, kauekean tangiran te wene ni bure n te iango, te kaitaataan ao bwaai ni kabane aika kona ni kairiri nakon te wene ni bure.—Mataio 5:28; Iakobo 3:17.
7:29. A riai taanga ni mare n taraia raoi bwa a na aki moanibwaia kakukureiaia i marenaia, n te aro are a a mwinibwai ni maiuiia baika irekereke ma te Tautaeka n Uea.
10:8-11. E rangi n un Iehova ngke a bwangantaeka kaain Iteraera ibukini Mote ao Aaron. Ngaia are ti wanawana ngkana ti kawakinira mani karikirakean te anua ae te bwangantaeka.
16:2. E kona ni boraoi n taai nako ara bwaintangira ae ti anganga ibukini boutokaan te mwakuri n uarongorongo ae katobibia te aonnaba, ngkana ti karaua ni baireia raoi.
‘TEIMATOA N RIKIRAKE N RAOIROI’
E tuangia kaaini Korinto Bauro bwa a riai ni “kabara ana bure ma ni kabebetea” nanon te tia bure ae raraoma are e a tia ni boaaki. E ngae ngke a nanokawaki n ana moan reta, ma e taekina te kimwareirei ni kaineti ma aei Bauro ibukina bwa a ‘karawawataki bwa a aonga n rairi nanoia.’—2 I-Korinto 2:6, 7; 7:8, 9.
E kaungaia kaaini Korinto Bauro bwa ‘ngkai a kabatii aia bwai ni bwaai ni kabane,’ a a riai ngkanne ni ‘kabatiaa naba te akoi’ n anganga. Imwini kaekaaia taani kakaitara, e a anga ana kabanea n reirei nakoia ni bane ni kangai: ‘Kam na kakatonga, kam na rikirake n raoiroi, kam na kabebetei nanomi, kam na kabobo nanomi, kam na raoi.’—2 I-Korinto 8:7; 13:11.
A Kaekaaki Titiraki Aika Boto i Aon te Baibara:
2:15, 16—Ti na kanga n riki bwa “boiararani Kristo”? E riki aei ngkai ti ongeaba n ana reirei te Baibara ao n tibwauaa te rongorongo ae i nanona. E ngae ngkai e kona te “boiarara” anne ni boiraa irouia aomata aika buakaka, ma e boni boiarara iroun Iehova ao aomata aika raoiroi nanoia.
5:16—A na kanga Kristian aika kabiraki n “aki manga ata te aomata temanna n irikona”? A aki taraia aomata n aroaroia n aroni kaotan te inanonano ibukin te kaubwai, te reeti, ke te baronga ke te aba. E kakawaki irouia aia iraorao ni Kristian ma raoia n onimaki.
11:1, 16; 12:11—E koaua bwa e aki wanawana Bauro n arona nakoia kaaini Korinto? Tiaki ngaia anne, e boni wanawana. Ibukina bwa e kairoroaki bwa e na kaitaraa kabuakakan nakoana n abotoro, tao e taraa iai ni kamoamoa ao n aki wanawana irouia tabeman.
12:1-4—Antai ae “uotaki rake nako Baretaiti”? Kioina ngkai e aki taekinaki n te Baibara temanna ae reke irouna te aeka ni miitara anne ao te rongorongo are e taorimwin aroni Bauro ni kaitaraa te kabuakaka ibukin nakoana n abotoro, tao e bon nanona ngkanne te bwai ae riki nakoina. Tao te bwai are e noria te abotoro n te miitara bon titeboo ma te bwaretaiti n taamnei are e reke iroun te ekaretia ni Kristian n “tain te toki.”—Taniera 12:4.
Reireiara:
3:5. N te boto n reirei man te kibu aei, ti reireiaki iai bwa e kataubobongaia Kristian Iehova ibukini karaoan te mwakuri ni minita rinanon ana Taeka, taamneina ae raoiroi ao ana botaki n te aonnaba. (Ioane 16:7; 2 Timoteo 3:16, 17) Ti riai n taningamarau n reiakina te Baibara ao booki aika aanaki n te Baibara ao n teimatoa n tataro ni bubutii te taamnei ae raoiroi, ao ni katoatai naba n iriri ni bobotaki ni Kristian ao n anga ara ibuobuoki iai.—Taian Areru 1:1-3; Ruka 11:10-13; Ebera 10:24, 25.
4:16. Kioina ngkai e kakorakoraki ‘aomatara ae i nanora n te bong ae koraki,’ iroun Iehova, ti riai ngkanne ni katoatai ni butimwaai baika a katauraoaki irouna, ao n aki kariaia bwa e na tibanako tebongina n aki karaoaki te bwai teuana ae na kakorakoraa ara iraorao ma te Atua.
4:17, 18. Ti kona ni buokaki bwa ti na teimatoa ni kakaonimaki nakon Iehova n taai ake ti taonaki iai ni kangaanga ngkana ti ururinga ae ‘a bebete ao a kai toki rawawatara’ aikai.
5:1-5. Ai kanra ana kabwarabwara Bauro ibukin nanoia Kristian aika kabiraki ni kaineti ma aia kaantaninga ibukin te maiu i karawa!
10:13. N angiin te tai, ti bon riai ni mwakuri n aono ake a a tia ni baireaki ibukin ara ekaretia. Ngkana ti a manga mwiokoaki bwa ti na ibuobuoki n taabo ake e korakora riki iai kainnanoan te buoka, ti a tibwa kona ngkanne n nako iai.
13:5. Ngkana ti na ‘kataira bwa tao ti mena n te onimaki,’ ke ti aki, ti riai ni kakoauaa raoi bwa a na boraoi aroarora ma baike ti reiakin man te Baibara. Ngkana ti na ‘kataira bwa ti uara,’ ti riai n tuoi raoi korakoran ara onimaki n ikotaki naba ma ‘wanawanara n ata te raoiroi ma te buakaka’ ao korakoran ara mwakuri n te onimaki. (Ebera 5:14; Iakobo 1:22-25) Ngkana ti maiuakina ana reirei Bauro ae manena aei, ti a kona iai n teimatoa n nakonako ni kawain te koaua.
[Taamnei n iteraniba 30]
Tera ae nanonaki n taeka aika “n tai nako ngkana kam kana te burawa aei ma ni moi n te mangko aei”?—1 I-Korinto 11:26, BK