Kakairi Iroun Te Mitinare Ae Te Kabanea Ni Kakannato
“Kam na kakairi i rou, n ai arou naba ngkai I kakairi irouni Kristo.”—1 I-KORINTO 11:1.
1. Bukin tera bwa ti riai ni kakairi iroun Iesu Kristo?
E KAKAIRI te abotoro Bauro iroun te Mitinare ae te kabanea ni kakannato ae Iesu Kristo. E kaumakiia naba raona ni Kristian Bauro ni kangai: “Kam na kakairi i rou, n ai arou naba ngkai I kakairi irouni Kristo.” (1 I-Korinto 11:1) E tua ae kangai Iesu imwin anganakia ana abotoro te reirei, ae kaineti raoi ma te nanorinano ngke e kananorinanoa n teboki waeia: “I anganingkami te bwai ni kakairi, ba kam na katotonga ae I karaoia nako imi.” (Ioane 13:12-15) Iai mwiokoara ngkai Kristian ngaira ni boong aikai, bwa ti na kakairi iroun Iesu Kristo n ara taetae ni kawai, ara mwakuri ao n aroarora aika ti kaotiotii.—1 Betero 2:21.
2. E ngae ngkana ko tuai ni mwiokoaki iroun te Rabwata n Tautaeka bwa ko na mitinare, ma tera aroarom ae ko kona ni kaotiotia?
2 N te kaongora are mai imwaina, ti reiakinaki iai bwa te mitinare bon te aomata ae kanakoaki bwa te tia uarongorongo, ae uota te rongorongo ae raoiroi nakoia aomata nako. E tabeki titiraki tabeua aika kakannongora Bauro ni kaineti ma aei. (Wareka I-Rom 10:11-15.) Nora ana titiraki te abotoro aei ae kangai: “A na iranna n ongo ngkana akea te tia taekinna?” Ao ngkanne, e mwanewei taeka aikai man ana taetae ni burabeti Itaia: “Ai tamaroa ra waeia ake a uarongorongoi baika raraoi!” (Itaia 52:7) E ngae ngkana ko aki mwiokoaki ke ni kanakoaki bwa ko na mitinare n te aba ae ko ianena iai, ma ko kona ni karikirakea ingaingannanom n uarongorongo. N aron anne ko kakairi iroun Iesu n riki bwa te tia tataekina te rongorongo ae raoiroi ae ingainga nanom iai. N te ririki ae nako, ‘a karaoa aia mwakuri taan tataekina te rongorongo ae raoiroi’ taan uarongorongoa te Tautaeka n Uea aika 6,957,852 mwaitiia, n aaba aika 236.—2 Timoteo 4:5.
“Ti Kitani Bwaai ni Kabane, ao Ti Iririko”
3, 4. Tera ae e kitanna Iesu i karawa, ao tera ae ti riai ni karaoia bwa ti aonga n riki bwa taan rimwina?
3 Ni kakororaoan mwiokoan Iesu i aon te aba, “e kaki oin arona, ao e arona aron te toro.” (I-Biribi 2:7, BK) A aki kona ni kabotauaki itera nako aika ti kakairi iai iroun Kristo ma are e karaoia ngke e roko i aon te aba. Ma ti kona n teimatoa n riki bwa taan rimwina n akea uringabara n taraakin baike ti karekei n ana waaki Tatan.—1 Ioane 5:19.
4 E taku te abotoro Betero nakon Iesu n te taina: “Noria, ti kitani bwaai ni kabane, ao ti iririko.” (Mataio 19:27) A waekoa ni kitan aia karaun Betero, Anterea, Iakobo ao Ioane ngke e kaoiia Iesu bwa a na iria. A kitan aia bitineti n akawa ao a moanibwaia karaoan te mwakuri ni minita. E taku Betero n ana Euangkerio Ruka: “Noria, ti kitan ara bwai nako, ao ti iririko.” (Ruka 18:28) A riai n aki kitan ‘aia bwai’ nako angiina mai buakora ibukin iriran Iesu. Ma ti riai ni ‘kaakeaira n taona nanora’ bwa ti aonga n riki bwa taan rimwin Kristo ao n toro iroun Iehova ma nanora ni kabane. (Mataio 16:24) A reke kakabwaia aika rangi ni bati mani karaoan aei. (Wareka Mataio 19:29.) Ti kimwareirei ngkana ti kakairi iroun Kristo ni kaotiotan te nano ni kan uarongorongo ma te ingaingannano, ma e a moamoa riki ngkana ti a tia ni buoka temanna bwa e na kaania te Atua ao Natina ae tangiraki irouna.
5. Taekina te rongorongo teuana ae katereterea bwa tera ae e kona ni motinnanoia te iabatera imwin ataakin ana koaua te Baibara.
5 E maeka Valmir, ae kaain Brazil i nukan te aba ae Suriname ao bon te tia keni koora ngaia. Bon te tia mamanging teuaei ao e wawaakina te aroaro ni maiu ae aki riai. N te taina ngke e mena n te kaawa ae bubura, e a moanaki te reirei man te Baibara ma ngaia irouia Ana Tia Kakoaua Iehova. E reirei ni katoabong ike e a korakora iai bitakin maiuna ao ni waekoa ni bwabetitoaki. Ngke e a ataia bwa ngaia ana mwakuri e kaangabuakaa arona ni maiuakina ana reirei te Baibara, ao e a kabooa nako ana bitineti ae korakora ana karekemwane iai, ma n okira Brazil ni buokiia ana utu ni karekea te koaua. A kukurei iabatera aika bati ni kitan aia mwakuri n aaba aika kaubwai ao n okiri oin abaia, imwin ataakin ana koaua te Baibara bwa a aonga ni buokia aia koraki ao tabeman riki bwa a na kaania Iehova. A kaotiota raoi te nano ni kan tataekina te rongorongo ae raoiroi taan uarongorongoa te Tautaeka n Uea aikai.
6. Tera ae ti kona ni karaoia ngkana ti aki kona ni mwaing nakon taabo ake e korakora riki iai kainnanoaia taan uarongorongoa te Tautaeka n Uea?
6 A a tia taani Kakoaua tabeman ni mwaing nakon taabo ake e korakora riki iai kainnanoaia taan uarongorongoa te Tautaeka n Uea. Iai tabeman aika a a tia ni mwaing nakon te aba ae a ianena iai ibukin te uarongorongo. Tao e kona ni kangaanga karaoan anne iroura, ma ti kona ni kakairi iroun Iesu ngkana ti kakaraoa ara kabanea ni konaa n te mwakuri ni minita n taai nako.
E Katauraoi Reirei ni Kataneiai Aika Kainnanoaki Iehova
7. Baikara kuura aika tauraoi ibukin kataneiaaia te koraki ake a kani karikirakei aia konabwai, ngkai taan uarongorongoa te Tautaeka n Uea ngaiia?
7 N aron ae e kataneiaki Iesu iroun Tamana, ti kona naba ngaira ni kakabwaiaki man reirei aika katauraoaki iroun Iehova. E taku Iesu: “E koreaki irouia burabeti ae kangai, ao ane a na bane n reireiaki iroun [Iehova].” (Ioane 6:45; Itaia 54:13) Iai kuura aika kateaki ni boong aikai ibukin kataubobongaara bwa taan uarongorongoa te Tautaeka n Uea. Akea te nanououa bwa ti a bane n tia ni karekei kakabwaiara n aanga tabeua man Te Kuura ni Kataneiai Ibukia Taan Uarongorongo n ara ekaretia nako. A kakabwaiaki bwaiania ngkai a kaea te Kuura Ibukin te Mwakuri ni Bwaiania. Iai tabeman aika a maan ni bwaiania aika kakabwaiaki n ira te reirei aei te kauatai. A a tia unimwaane ao tabonibai n te ekaretia n ira te Kuura ni Minita Ibukin te Tautaeka n Uea, bwa a na karikirakei iai rabakauia n angareirei ao aia beku ibukia raoia n onimaki. A rangi ni bati unimwaane ao tabonibai n te ekaretia aika roronga aika a a tia ni kataneiaki n te Kuura Ibukin Kataneiakiia Minita, ike a a kataubobongaaki iai ibukin buokaia aomata n te mwakuri n uarongorongo. Ao a mwaiti naba mai buakoia taari mwaane ao aine ake a tia ni mwiokoaki bwa mitinare n aaba aika a ianena iai, aika a a tia ni kataneiaaki n te Watchtower Bible School of Gilead.
8. Tera aron kakawakin te reirei ni kataneiai mairoun Iehova, irouia taari mwaane tabeman?
8 A mwaiti taani Kakoaua ibukin Iehova aika karaoi bitaki ibukin kaean kuura aikai. E butiaaina Yugu man ana mwakuri bwa e aonga ni kaea te Kuura Ibukin Kataneiakiia Minita i Kanata. E karaoa aei teuaei ibukina bwa e aki kariaiakaki ana motirawa iroun ana tia kammwakuri. E taku Yugu: “Bon akea uringaabau. Ni koauana, ngke arona bwa a anganai au motirawa, tao a na kona ni kaantaningaai ngkanne bwa N na teimatoa n tiku ni kakaonimaki ni mwakuri n te kambwana. Ma ngkai, I a tauraoi nakon te tibwanga are e na mwiokoai iai Iehova.” A mwaiti aika kukurei ni kaakeai baike a rangi ni kakawaki ngkoa ni maiuia ibukin karekean kakabwaiaaia man reirei ni kataneiai aika katauraoaki iroun te Atua.—Ruka 5:28.
9. Anga te katoto ae e oti iai nakoraoin mwin te angareirei n te Baibara ao te kakorakora.
9 E rangi n uaana te angareirei man te Baibara ma te kakorakora. (2 Timoteo 3:16, 17) Iangoa te bwai are e riki nakon Saulo i Guatemala. Iai aorakin ana iango te teinimwaane aei mangke e bungiaki. Ibukin aei, temanna mai buakoia ana tia reirei, e a tuanga tinana bwa e na aki taumatoaa natina bwa e na reireinna ni wareware, bwa n tokina ao e na kaunna. E kitana te reirei Saulo ma kabina ni wareware. Ma e a reireinaki ni wareware Saulo iroun te tari te mwaane ae te tia Kakoaua, man te boroutia ae Apply Yourself to Reading and Writing. N tokina, e a rikirake konabwain Saulo ni karokoa ae e a anganga reirei n Te Kuura ni Kataneiai Ibukia Taan Uarongorongo. Imwina riki, e a kaitiboo tinan Saulo ma ana tia reirei natina aei n te mwakuri ni minita ngke e kawari auti nako. Ngke e ongo te tia reirei aei bwa e a rabakau ni wareware Saulo, e a tuanga ngkanne tinan Saulo bwa e na airi ma ngaia n te wiki are imwina. N te wiki are imwina ao e a titirakina Saulo te tia reirei aei ni kangai, “Tera ae ko na reireinai?” E a wareka ngkanne te barakirabe teuana Saulo man te boki ae Tera Ana Reirei ni Koaua te Baibara? E taku te tia reirei aei: “I a bon aki kona ni kakoauaa ae ko a reireinai,” ao e rabwata Saulo ma rannimatana aika waawaanako ibukin kukureina.
Te Angareirei ae Riinga te Nano
10. Tera te bwai n mwakuri ae te kabanea n tamaroa ae ti kona ni kamanenaa ibukin te angareirei ni kaineti ma ana koaua te Baibara?
10 E boto ana angareirei Iesu ni baike e reiakinaki iai iroun Iehova ao ni kaetieti naba ake a reke man Ana Taeka te Atua. (Ruka 4:16-21; Ioane 8:28) Ti kakairi iroun Iesu ngkana ti maiuakin ana reirei ao ni kabotoi ara angareirei i aon te Baibara. Ti bane ni boraoi n aron ara taetae ao n ara iango, ae karikirakeaki iai katiteuanakira. (1 I-Korinto 1:10) Ai kakaaitaura ngaira iroun te “toro ae kakaonimaki ae wanawana” ngkai e katauraoi booki aika aanaki n te Baibara, aika a na buokira ni kateimatoaa katiteuanakin ara angareirei. A kakororaoa naba ara mwakuri booki aikai, ngkai taan tataekina te rongorongo ae raoiroi ngaira! (Mataio 24:45; 28:19, 20) Teuana mai buakon booki aikai bon te boki ae Ana Reirei te Baibara, ae tauraoi ngkai n taetae aika 179 mwaitiia.
11. E kanga n tokanikai i aon te waaki n totoko te tari te aine i Itiobia, ni kabonganakin te boki ae Ana Reirei te Baibara?
11 E kona ni bitaki nanoia taani kakaitaraira ngkana ti kamanena te boki ae Ana Reirei te Baibara n reiakinan te Baibara. N te taina, e kaira te reirei n te Baibara ma te aomata temanna Nei Lula, ae te bwaiania i Itiobia, ngke e a bon roko naba ana koraki te aomata are e reirei ma ngaia n un ao e tuangia bwa a na aki reirei. E aamarau Lula ni kaekaa te aine aei ni kabongana te kaikonaki ae taekan te mwane ni kewe n te boki ae Ana Reirei te Baibara ni mwakoro 15. E a rau nanon te aine aei ao e a kariaia naakai bwa a na reita nako aia reirei. Ni koauana, e a iri neiei n te reirei are imwina ao e a bubutii bwa e kan reirei n te Baibara, ao e kukurei ni kabooa reireina! N te tai ae waekoa ao e a reirei neiei tentai n te wiki ao n rikirake n te onimaki.
12. Anga te katoto ae e oti iai aroia rooro n rikirake ni kona n angareirei n te aro ae uaana n ana koaua te Baibara.
12 A kona rooro n rikirake ni buokia aomata ni kamanenan te boki ae Ana Reirei te Baibara. Ngke e tabe ni wareka te boki aei n te reirei Keanu, ae 11 ana ririki i Hawaii, ao e a titirakinna naba raona n reirei temanna ni kangai, “Bukin tera bwa kam aki bubukamarui boongi n Toa ni motirawa?” Ni kaekaana ao e a wareka te reirei Keanu are n te bukinibaa ae atuna “Ti Riai ni Bukamarui Boongi n Toa ke Boong ni Kauring?” Imwina e a kaira raona n reirei aei nakon te kaetieti ibukin kanoan te boki aei ao e tuangnga bwa te reirei raa ae e rangi ni kan ongora iai. E a moanaki te reirei n te Baibara. A kairi reirei man te Baibara Ana Tia Kakoaua Iehova aika 6,561,426 mwaitiia n te ririki ni mwakuri ae nako, ao a mwaiti aika kamanena raoi te boki ae Ana Reirei te Baibara. Ko kakamanena te bwai ni mwakuri aei ngkana ko angareirei n te Baibara?
13. N te aro raa, ae e kona ni korakora iai riingan nanoia aomata n reiakinan te Baibara?
13 E na rangi n rotaki anuan maiuia te koraki ake a boni kan karaoa nanon te Atua, ngkana a reiakina te Baibara ni kabonganan te boki ae Ana Reirei te Baibara. A moana aia reirei n te Baibara ma te utu teuana aika kaain Zambia, te taanga aika a special bwaiania i Norway. Iai natia te taanga ae kaain Zambia aei teniman ataeinnaine ao a aikoa manga kan kariki. Ngaia are ngke e a manga bikoukou, a a iangoia bwa a na kabwakaa natiia. Tabebong imwain kawaran te taokita, ao a a rinanon te mwakoro ae atunaki n “Iangoan te Maiu n Aron Iangoana Iroun te Atua.” E korakora riingan nanoia te taanga aei n noran taamnein te tei i nanon biroton tinana n te mwakoro aei, ngaia are a a iangoia bwa a na aki kabwakaa natia. A a rikirake n te onimaki ao a ingoana natiia are e a tibwa bungiaki, n aran aia tia reirei are te mwaane.
14. Kabwarabwaraa bwa e na kanga kaboraoan maiura ma baika ti reiakinia iai aomata ni kariki uaa aika raraoi.
14 Maiuakinan ae boraoi ma ana angareirei Iesu, bon iteran ana angareirei ae kakawaki. A mwaiti aomata aika anaaki nanoia n raoiroin aroaroia Ana Tia Kakoaua Iehova, ake a kakairi n aroaron Iesu n te itera aei. E uruakaki ana kaa temanna te tia bitineti i Nutiran ao e kimoaaki ana baeki. E ribootinna teuaei nakon te bureitiman ao e tuangaki ae kangai: “Te anga ae a kona n okiriko iai am bwai akanne, bon tii ngkana a kuneaki iroun temanna mai buakoia Ana Tia Kakoaua Iehova.” E kuneaki te baeki aei iroun te tia Kakoaua ae te tia tibwai nuutibeeba. Ngke e a ataia teuaei bwa e kuneaki ana baeki iroun te tari te aine temanna, ao e a nakon ana auti neiei. E oki nanon teuaei ngke e a noria bwa e aki bua ana beebwa teuana ae rangi ni kakawaki irouna. E taku te tari te aine aei nakon teuaei, “E bon riai bwa N na kaoka te bwai anne ma kanoana ngkai ngai temanna Ana Tia Kakoaua Iehova.” E mimi te tia bitineti aei ibukina bwa e a uringa ana taeka te bureitiman are e tuangnga n te moaningabong anne. E teretere n aei bwa a kaboraoa maiuia Kristian ni koaua ma reirei aika n te Baibara ao a kakairi naba n aroaron Iesu.—Ebera 13:18.
Kakairi n Aroaron Iesu Nakoia Aomata
15, 16. Ti na kanga ni burimaunia aomata nakon te rongorongo ae ti tataekinna?
15 A anaaki nanoia aomata bwa a na butimwaea ana rongorongo Iesu man aroarona. N te katoto, a burimauniaki nakoina aomata aika mangori n ana tangira ao nanorinanona. E kaotiota nanoangaaia te koraki ake a kawaria ao e kabebetei nanoia ma taeka n akoi ao e katoki aorakia. (Wareka Mareko 2:1-5.) Ti aki kona ni karaoi kakai ma ti kona ni kaotiota te tangira, te nanorinano ao te nanoanga aika aroaro ake a kona ni burimaunia aomata nakon te koaua.
16 E ibuobuoki te nanoanga ni kaira temanna te special bwaiania ae Nei Tariua bwa e na kawara ana auti temanna te unimwaane ae arana Beree, are e maeka n abamwakoron te aba ae Kiribati teuana n te Betebeke Maiaki. E ngae ngke e kaotia te mwaane aei bwa e aki kan ongora, ma e noria Tariua bwa e boo itera teuaei n te aro are e a kangaanga nakonakona ao e nanoangaia. Ngaia are e a titirakinna ni kangai: “Ko a tia n ongongo ana berita te Atua ibukia aomata aika aoraki ao kaara?” Imwina e a wareka ana taetae ni burabeti Itaia nakoina. (Wareka Itaia 35:5, 6.) E anaaki nanon te mwaane aei ao e taku: “I a tia ni wareka te Baibara ao ni kakawaraki naba iroun mitinaren au Aro i nanon ririki aika bati, ma I tuai man nora anne n te Baibara.” E a moanaki ngkanne te reirei n te Baibara ma Beree, ao e a noraki rikirakena n te onimaki. Eng, e kakaiaki ngkoa mwaukun teuaei, ma e a tia ngkai ni bwabetitoaki, e tararuaa te kurubu i aon te aba ae raroa nako aei, ao e a kona n nakonako ni kabutaa te aba aei n tataekina te rongorongo ae raoiroi.
Teimatoa ni Kakairi Iroun Kristo
17, 18. (a) Ko na kanga n riki bwa te tia uarongorongo ae uaana? (b) Tera ae e mena imwaia te koraki ake a karaoa aia mwakuri ni minita ma nanoia ni koaua?
17 Ibukina bwa e kaokiokaki rongorongon kakimwareirein te mwakuri ni minita, ti boni kona n riki bwa taan uarongorongo aika uaana ngkana ti karikirakei ao ni kaotiotii aroaron Iesu. Ai etira ngkanne ae ti kakairi iroun Kristo n riki bwa taan tataekina te rongorongo ae raoiroi aika ingainga nanora!
18 Ngke a a riki tabeman bwa taan rimwin Iesu n te moan tienture, ao e titiraki Betero ni kangai: “Ao tera ara bwai?” E kaeka Iesu ni kangai: “Ane kitana batana, ke tarina, ke mwanena, ke tamana, ke tinana, ke natina, ke abana, i bukin arau, ao e na anganaki tebubua, ao e na reke i rouna te maiu are aki toki.” (Mataio 19:27-29) Ti na bon nori koauan taeka aikai, ngkana ti teimatoa ni kakairi iroun te Mitinare ae te kabanea ni kakannato ae Iesu Kristo.
Ko na Kanga ni Kaeka?
• E kanga Iehova ni kataneiaira bwa taan tataekina te rongorongo ae raoiroi?
• Bukin tera bwa e uaana kamanenaan te boki ae Ana Reirei te Baibara, n ara mwakuri ni minita?
• Ti na kanga ni kakairi iroun Iesu n aroarora nakoia aomata?