Ukoukoran Kaeka Aika Eti
N na kanga ni kawakina marurungiu?
N na kanga ni kanakoraoa riki au utu?
N na kanga ni kanakoraoa riki au mwakuri ni kareketianti, bwa I aonga n aki kabaneaki?
KO A TIA n titiraki n aron aikai? Ko a tia ni kunei raoi kaekaaia aika uaana? Ni katoa ririki ao a boretiaki booki aika 2,000 tabun mwaitiia aika kakaokoro ake a anga taeka n reirei i aon baikanne, ao baika kakawaki riki tabeua. A kabanea te mwaiti ni mwane kaain Buritan ae 80 te mirion te bwaun (tao $150 te mirion, te U.S.) ni katoa ririki, i aon booki ake a anga taeka n reirei ni kaineti ma aron kaitaraan kangaangan te maiu aei. N te United States, ao e kabaneaki $600 te mirion n te ririki ibukin kabonakoan booki aika koreaki iai taeka n ibuobuoki. Mangaia are tiaki tii ngkoe n ukoukora te kairiri ae raoiroi ibukin baika ti bo ma ngaai ni katoa bong i nanon maiura.
E taekin booki aika rangi ni bati aikai temanna te tia korea naba te boki ni kangai: “A bati booki aika boou aika manga korei rongorongo ake a a tia ni koreaki mai mwaina.” Ni koauana, a bati reirei aika kuneaki ni booki aikai aika katotong reirei aika kaman tia ni koreaki n te boki teuana ae e a rangi ni bongata. Tii te boki aei ae rangi ni mwaiti katotona aika tibwatibwaki n taabo aika bati. E a tia n rairaki mwakorona ae bwanin ke iterana tabeua n taetae aika 2,400 tabun. E raka riki nakon 4.6 te birion mwaitin katotona ake a a tia ni boretiaki ni katobibia te aonnaba. Te boki aei bon te Baibara.
E taekinaki ae kangai n te Baibara: “E anganaki te aba te Baibara ni kabanea iroun Tamnein te Atua, ao e manena nakon te reirei, ao nakoni kaotan ana buakaka te aomata nako ina, ao nakoni manga-kaetana, ao nakoni kawanawanana n te raoiroi.” (2 Timoteo 3:16) Te Baibara bon tiaki aron booki n ibuobuoki tabeua aika boretiaki. Bukin raoi koreana bwa e na kaota ana kaantaninga te Atua ibukia aomata. Ma e ngae n anne, a bati reirei n te Baibara ibukin kaitaraan kangaanga aika ti taneiai ni bo ma ngaai ngaira aomata, ao e berita bwa a na rabakau aroia ni karekea te kabwaia, te koraki ake a ira ae taekinaki iai. (Itaia 48:17, 18) Ngkana a maiuakinaki reirei aikai, e na nakoraoi iai maiun te aomata n aki ongea kaokoron ana reeti, kateina ke buburan ana reirei. E aera ko aki rinanon te kaongora ae imwina ao n iangoa ae taekinaki n te Baibara ni kaineti ma reirei aikai, marurungira, te utu, ao aron te kareketianti bwa e nakoraoi ke e aki?