E Karikaki te Mwaane ao te Aine Bwa A na Ibuobuoki i Marenaia

E AKI toki n ingainga nanon te mwaane ao te aine ni kani kaania aia iraorao, ao aei bon ana babaire te Atua. E noria Iehova bwa e aki riai bwa e na tiku n tii ngaia te moan aomata ae Atam. Ai ngaia are te Atua e a ‘karaoa te tia buoka te mwaane bwa raona ae riai.’

E kamatunakoa Atam Iehova, ao imwina e anaa rinikaokaona teaina ao e “karaoa te rinikaokao . . . ba te aine, ao E kairia nakon te aomata arei.” E rangi ni kimarimari Atam ngke e nora ana karikibwai Iehova ae rangi n tamaroa aei ao e taekina ae kangai: “Bon rin riu aei ngkai, ao irikon irikou.” E anainano te aine ae kororaoi aei ae Nei Ewa, ao e tatangiraki. E riai ni karineaki Atam ibukin kororaoina ni mwaane. A boni karikaki i bon ibukia. E taku te Baibara: “Ma ngaia ae e na kitana tamana ma tinana te aomata, ao e na nim ma buna: ao a na riki n ti te irikona nakai.”​—Karikani Bwaai 2:18-24.

Ni boong aikai, a bati utu aika uruaki, ao te reitaki i marenan te mwaane ao te aine e aki toki ni kairaki n te iowawa ke te bangaaomata. E kauekea te itabarara te nano ni kaiangatoa i marenan te mwaane ao te aine. A bane baikai ni kaitaraa ana kaantaninga te Atua ibukin te mwaane ao te aine. E karaoaki te mwaane bwa e na kakororaoa mwiokoana ae rine n te aonnaba. E anganaki te aine te mwioko ae kaokoro ma n rine naba, ae e na riki bwa te tia buoka te mwaane. Ma a riai n uaia ni mwamwakuri ma te rau. Ma ngke a moani karikaki aomata, a kakaonimaki mwaane ao aine aika tangira te Atua ni kataia ni kakororaoa mwiokoaia ake a anganaki iroun Iehova. Karaoan aei irouia e kabatiaa kukureia ao raun nanoia. Baikara mwioko aikai, ao ti na kanga ni kakoroi nanoia?

[Taamnei n iteraniba 3]

E karaoaki te mwaane ao te aine bwa a na kakoroa bukin mwiokoaia aika rine ake a anganaki iroun te Atua