E Na “Iri Taangaia” Iehova

“Ao te Atua tiaki E na bon iri taangaia ake a rineaki i Rouna, ake a tang nako Ina ni ngaina ao ni bong?”—RUKA 18:7.

1. Antai aika riki bwa nibwan te kaungaunga nakoim, ao bukin tera?

NI KATOBIBIA te aonnaba, ao a kukurei Ana Tia Kakoaua Iehova ni bobotaki ma mwaaneia ao taria n te onimaki ake a a tia n toro iroun Iehova ma te kakaonimaki i nanon ririki aika bati. Iai tabeman mai buakoia taari aika tangiraki aikai aika ko kinaia? Tao e kona n ae ko a uringa naba temanna te tari te aine ae e a kara are e bwabetitoaki n ririki aika bati rimoa, ae akea te botaki teuana n te Tabo n Taromauri ae e na aki roko iai. Ke tao ko kona n iangoa te tari te mwaane temanna ae e a kara naba, ae kakaonimaki ni buoka te mwakuri ni minita ni katoa wiki i nanon ririki aika bati. Ni koauana, a mwaiti mai buakoia aomata aika kakaonimaki aikai ae a iangoia bwa e a riai ngkai n tia n roko Aremaketon. Ma te koaua iai, bwa teimatoan te aonnaba ae ribuaka aei, e bon aki kamamaara onimakinan ana berita Iehova irouia ke tao ni kakerikaka nanomwaakaia “ni karokoa te toki.” (Mataio 24:13) Bon nibwan te kaungaunga nakon te ekaretia norakin korakoran aia onimaki ana toro Iehova aikai.—Taian Areru 147:11.

2. Tera ae e kananokawakira?

² Ma n taai tabetai, ti kona n nora te aroaro ae kaokoro. Tabeman taani Kakoaua, a a tia n uataboa te mwakuri ni minita i nanon ririki aika bati, ma n tokina e a manga mamaara onimakinan Iehova irouia ao a aikoa manga irii bobotakin te ekaretia ni Kristian. Ti nanokawaki ngkana a a manga kitana Iehova raoraora ngkoa aikai, ao e korakora nanora bwa ti na teimatoa ni buokiia ‘tiibu aika bua’ bwa a na oki nakon te nanai. (Taian Areru 119:176; I-Rom 15:1) Ma e ngae n anne, a rio titiraki man baika kauntaba aikai n aron ae a teimatoa ni kakaonimaki tabeman ao ake tabeman e kerikaki aia onimaki. Tera ae e kateimatoaia taani Kakoaua aika mwaiti bwa a na onimakina ana berita Iehova, ngkai a a kerikaki ake tabeman? Tera ae ti kona ni karaoia i bon iroura ibukin kakoauaan raoi ae e teimatoa n nene onimakinan ae e a kaan “ana bong Iehova ae kakanato”? (Tebania 1:14) Ti na maroroakina ngkai te kaikonaki ae mena n ana Euangkerio Ruka.

Te Kauring Ibukia te Koraki Aika Maiu “Ngkana E Roko Natin te Aomata”

3. Antai raoi ae kona ni kakabwaiaki man te kaikonaki ni kaineti ma te aine ae e a tia ni mate buuna ao te tia moti, ao bukin tera?

³ N Ruka mwakoro 18, ti nora iai ana kaikonaki Iesu ni kaineti ma te aine ae e a tia ni mate buuna ao te tia motiki-taeka. Titeboo aei ma te kaikonaki ibukin te aomata are e kabatiaa ana bubutii are ti maroroakinna n te kaongora are imwain aei. (Ruka 11:5-13) Ma te boto n iango ni mwakoron te Baibara are e taekinaki iai te kaikonaki ni kaineti ma te aine ae e a tia ni mate buuna ao te tia motiki-taeka, e oti iai bwa e kaineti riki aei nakoia te koraki aika maiu “ngkana E roko Natin te Aomata” ma mwaakan ana Tautaeka, are e moanaki n 1914.—Ruka 18:8.a

4. Tera are e maroroakinna Iesu imwain taekinan te kaikonaki are n Ruka mwakoro 18?

⁴ Imwain taekinan te kaikonaki aei iroun Iesu, e kabotaua taabangakin ataakin rokona ma mwaakana n Tautaeka “ba aron te iti” ae “iti mai rarikini karawa teuana, ao e iti nako rarikini karawa are teuana.” (Ruka 17:24; 21:10, 29-33) Ma e ngae n anne, angiia aomata aika maiu n “tain te toki” a na aki mutiakina te bwai ni kakoaua ae teretere raoi aei. (Taniera 12:4) E aera ngkai a na aki? Titeboo bukina naba ma are e riki irouia aomata ake n ana bong Noa ao Rota ngke a aki mutiakin ana kauring Iehova. N taai akanne, ao a tabe aomata n ‘amwamwarake, a momoi, a kabobwai, a bobwai, a ununiki ao ni katei baata ni karokoa te bong are a kamaunaki iai.’ (Ruka 17:26-29) A bua maiuia kioina ngke a rangi n tabeakin riki aroaroia ni katoa bong n te aro are a aikoa mutiakina nanon te Atua. (Mataio 24:39) Ni boong aikai, a na bon rekenako naba angiia aomata ni baike a taneiai ni kaakaraoi ni katoa bong n te aro are a a kabwaka n nora koauan ae e a kaan tokin te waaki ae buakaka ae ngkai.—Ruka 17:30.

5. (a) Antai are e kainetiia Iesu n ana kauring, ao bukin tera? (b) Tera are e a kabuaa aia onimaki aomata tabeman?

⁵ E teretere bwa e tabeaianga Iesu bwa a kona naba ni katikaki nako taan rimwina n te waaki n ana aonnaba Tatan, ni karokoa ae a a manga “oki rikaaki.” (Ruka 17:22, 31, BK) E boni koaua bwa e a tia n riki aei nakoia Kristian tabeman. I nanon ririki aika bati, ao a ingainga aeka n aomata akanne, ni kariariaa katokan te waaki ae buakaka n te aonnaba iroun Iehova. Ma ngke e aki roko Aremaketon n te tai are a kaantaningaia iai, e a rikirake iai ni bwara nanoia. E a mamaara onimakinan te koaua are e a kaan ana bong Iehova ni motikitaeka. E a kekerikaki kakaonimakia n aia mwakuri ni minita teutana imwin teutana ao a a tabe riki ma kabanean aia tai ibukin tabeia ni katoa bong ao ai tii teutana aia tai ibukin mwakuri aika kakukureia te Atua. (Ruka 8:11, 13, 14) Ai kananokawakira bwa a a “oki rikaki” imwin tabeua te tai!

E Riai te “Tataro n Aki Toki”

6-8. (a) Taekina te kaikonaki ni kaineti ma te aine are e a tia ni mate buuna ao te tia motiki-taeka. (b) E kanga Iesu ni kaota manenan te kaikonaki aei?

⁶ Tera ae ti na karaoia bwa ti aonga ni kakoauaa bwa e na aki mamaara onimakinan are e na kakoroi bukin ana berita Iehova? (Ebera 3:14) E tabeka te titiraki anne Iesu imwin raoi kauringakia taan rimwina bwa a na aki tanrikaki nakon ana aonnaba Tatan ae buakaka.

⁷ E taekinna Ruka bwa e “atonga te taetae ni kaikonaki nako ia [Iesu] ba e riai ba a na tataro n aki toki, man aki botu.” E taku: “Temanna te tia motiki-taeka n te kawa teuana, ae aki mamaka te Atua, ao e aki mutiakinia naba aomata: ao temanna te aine ae e mate buna n te kawa arei; ao e roroko iroun teuarei, ao e kangai, Ko na ira taangau nakon au kairiribai. Ao ngaia e kamaanna n rawa: ao rimwi e taku i nanona, I aki maka te Atua, ao I aki mutiakinia aomata; ma e katabeaiangai te aine ae e mate buna aei, ma ngaia ae N na ira taangana, ba e aonga n aki kabotuai n rorokona.”

⁸ Imwin ana kabwarabwara Iesu ao e kaota aroni kamanenana: “Kam na ongo ana taeka te tia motiki-taeka are buakaka arei. Ao te Atua tiaki E na bon iri taangaia ake a rineaki i Rouna, ake a tang nako Ina ni ngaina ao ni bong, ao E taotaona naba nanona i aoia? I tuangngkami ba E a boni barekia n iri taangaia. Ma ngkana E roko Natin te Aomata, ao E na kunea te onimaki aei i aon te aba, ke E na aki?”—Ruka 18:1-8, NW.

“Ko na Ira Taangau”

9. Tera te boto n iango ae katuruturuaki n te kaikonaki ni kaineti ma te aine ae e a tia ni mate buuna ao te tia motiki-taeka?

⁹ E rangi n teretere raoi te boto n iango n te kaikonaki aei. E kaai n taekinaki irouia aomata aika n te kaikonaki aei, ao ai uana naba ma Iesu. E kangai ana bubutii te aine are e a tia ni mate buna: “Ko na ira taangau.” E taku te tia motiki-taeka: “N na ira taangana.” E titiraki Iesu ni kangai: “Tiaki E na bon iri taangaia” te Atua? Ao e taku Iesu ibukin Iehova: “E a boni barekia n iri taangaia.” (Ruka 18:3, 5, 7, 8) N ningai ae e na “iri taangaia” iai te Atua?

10. (a) N ningai boongi ni kaetitaeka n te moan tienture? (b) N ningai ae a na kaetaki iai taekaia ana toro te Atua ni boong aikai, ao n te aro raa?

¹⁰ N te moan tienture, e bwakara 70 C.E. “boongi ni kareke kai” ngke e a uruakaki iai Ierutarem ma temborana. (Ruka 21:22) Ibukia ngkanne ana aomata te Atua ni boong aikai, e na karokoaki te kaetitaeka ae riai n “ana bong Iehova ae kakanato.” (Tebania 1:14; Mataio 24:21) N te tai anne, ao Iehova e nang “manga angania ake a karawawataingkami te rawawata” ao “ni kareke kaiia te koraki ake a aki ataa te Atua, ma ake a aki ira nanon euangkerion are Uea are Iesu Kristo.”—2 I-Tetaronike 1:6-8; I-Rom 12:19.

11. N te aro raa, are e na “barekia” iai ni karokoa te motiki-taeka?

¹¹ Ma ti na kanga ngkanne n ota n ana karaunano Iesu are e na “barekia” Iehova n iri taangaia? E kaotaki n Ana Taeka te Atua bwa e ngae ngke e “taotaona naba nanona” [Iehova] ma e na waekoa ni karaoa te motiki-taeka ae eti ngkana e a boo taina. (Ruka 18:7, 8; 2 Betero 3:9, 10) N ana tai Noa n rokon te Ieka, ao e aki baenikai kamaunaaia aomata aika buakaka. N aron naba anne n ana bong Rota, ngke e a bwaka ni karau te ai mai karawa, e a mauna iai te buakaka. E taku Iesu: “Ai aron naba aon te aba n te bong are E na kaotaki iai Natin te Aomata.” (Ruka 17:27-30) A na manga kaaitara naba aomata aika buakaka ma “te mate ae e aki ataki rokona.” (1 I-Tetaronike 5:2, 3, BK) Ti kona ni kakoauaa raoi bwa e na aki kariaia Iehova bwa e na tiku riki ana aonnaba Tatan tebongina nakon are e kainnanoaki ibukin kakoroan raoi te kaetitaeka ae riai.

“E a Boni Barekia n Iri Taangaia”

12, 13. (a) E kanga n reke reireiara man ana kaikonaki Iesu ni kaineti ma te aine are e a tia ni mate buuna ao te tia motiki-taeka? (b) E aera ngkai ti kona ni kakoauaa bwa e na ongoraei ara tataro Iehova ao ni bareka irakin taangara?

¹² Iai riki koaua aika kakawaki ake a kaotaki naba n ana kaikonaki Iesu ibukin te aine are e a tia ni mate buuna ao te tia motiki-taeka. E taku Iesu ngke e kaota manenan ana kaikonaki: “Kam na ongo ana taeka te tia motiki-taeka are buakaka arei! Ao te Atua tiaki E na bon iri taangaia ake a rineaki i Rouna?” Ni koauana, e aki kabotaua Iehova Iesu ma te tia motiki-taeka n taekina ae e na karaoa naba aron anne te Atua nakoia taan onimaki. N onean mwin anne, e reireinia taan rimwina Iesu taekan Iehova rinanon katuruturuan te kaokoro i marenan te tia motiki-taeka ao te Atua. Baikara aaro tabeua ake a kona n rangi ni kaokoro iai?

¹³ E “buakaka” te tia motiki-taeka are n ana kaikonaki Iesu, ma bon “te tia Motiki-taeka ae raoiroi te Atua.” (Taian Areru 7:11; 33:5) Akea tabeakinan te aine ae e a tia ni mate buuna iroun te tia motiki-taeka, ma Iehova e tabeakinia aomata n tatabemania nako. (2 Rongorongo 6:29, 30) E rawa te tia motiki-taeka ni buoka te aine are e a tia ni mate buuna, ma e tauraoi Iehova eng, e ingainga ni kani buokiia te koraki ake a toro irouna. (Itaia 30:18, 19) Tera te reirei mai iai? Ngkana ngaia bwa e ongora te tia motiki-taeka n ana bubutii te aine aei ao e ira taangana, a na mwaitira riki nanon Iehova ni kan ongoraei aia tataro ana aomata ao ni bareka irakin taangaia!—Taeka N Rabakau 15:29.

14. E aera ngkai ti aki riai ni kabuaa ara onimaki ni kaineti ma rokon ana bong te Atua ni motiki-taeka?

¹⁴ Mangaia are, a karaoa te bure ae kakaiaki te koraki ake a a bua aia onimaki n rokon ana bong te Atua ni motiki-taeka. Bukin tera? Ibukin bwaran nanoia are e nene ngkoa n onimakinan are e a kaan “ana bong Iehova ae kakanato,” a kaotia man aia mwakuri bwa a aikoa onimakina Iehova bwa e na kakoroi bukin ana berita. Bon akea te aomata ae riai n nanououa ibukin kakaonimakin te Atua. (Iobi 9:12) E kangai te titiraki ae kakawaki iai: Te koaua bwa ti teimatoa ni kakaonimaki? Ao bon anne raoi te boto n iango are e tabekia Iesu ni banen ana kaikonaki ibukin te aine ae e a tia ni mate buuna ao te tia motiki-taeka.

“E na Kunea te Onimaki Aei i Aon te Aba?”

15. (a) Tera te titiraki are e tabekia Iesu, ao bukin tera? (b) Tera ae ti riai n titirakinira iai?

¹⁵ E tabeka te titiraki ae kakannongora Iesu ae kangai: “Ngkana e roko Natin te aomata, te koaua bwa e na kunea te onimaki aei i aon te aba, ke e na aki?” (Ruka 18:8, NW) E kaotaki n te taeka ae “te onimaki aei” bwa e taekina te aeka n onimaki teuana ae kaokoro, are aron are iroun te aine are e a tia ni mate buuna. E aki kaekaa ana titiraki Iesu. E tabekia ibukia taan rimwina bwa a aonga n iangoa aia onimaki bwa titeboo ma te aekaki aei ke tiaki. E tabe ni kerikaki aia onimaki n te aro ae a nang bwara nanoia man okiri aroia rimoa? Ke iai irouia te aeka n onimaki are e kaotiotia te aine are e a tia ni mate buuna? Ti bon riai naba n titirakinira ni kangai ni boong aikai, ‘Te aeka n onimaki raa, ae e na noria “Natin te aomata” i nanou?’

16. Te aeka n onimaki raa, are iroun te aine are e a tia ni mate buuna?

¹⁶ Ngkana ti kani mena i buakoia te koraki ake a na iraki taangaia iroun Iehova, ti riai ni katotonga maiun te aine are e a tia ni mate buuna. Aekakira ana onimaki neienne? E kaota ana onimaki neiei ni kabatiaan ‘rorokona iroun [te tia motiki-taeka], ao e kangai, ‘Ko na ira taangau.’ E kabatiaa ana bubutii te aine ae e a tia ni mate buuna aei bwa e aonga n iraki taangana iroun te mwaane ae buakaka. N aron anne, a a kona ngkanne ana toro te Atua ni boong aikai ni kakoauaa raoi bwa e na ira taangaia naba Iehova, e ngae ngkana e maan riki taina nakon ae a kaantaningaia. Irarikin anne, a kaota onimakinan ana berita te Atua n aroia ni kabatiai aia tataro, rinanon ‘tangiia nakon Iehova ni ngaina ao ni bong.’ (Ruka 18:7) Ngkana e a katoka ana tataro te Kristian ibukin iran taangana, e kaotia iai ngkanne bwa e a bua onimakinan are e na bon irantaangaia ana toro Iehova.

17. Baikara bukina ae ti riai iai ni botumwaaka n tataro ao n teimatoa n onimakina rokon ana bong Iehova ni motiki-taeka?

¹⁷ E kaotaki naba nakoira man aroaron nako neiei, bwa iai riki bukina ae ti riai iai ni botumwaaka n tataro. Iangoi bwaai tabeua aika kaokoro iai aroarora ma ngaia. E teimatoa n okiokira te tia motiki-taeka neiei, e ngae ngke akea ae kaungaa bwa e na karaoia. Ma ngaira e bati te tai ae ti kaungaki iai n Ana Taeka te Atua bwa ti na “botumwaka n tataro.” (I-Rom 12:12) Akea te karaunano nakon te aine aei bwa e na kaekaaki ana bubutii, ma Iehova e a tia ni karau nanora bwa e na bon iri taangara. E taku Iehova rinanon ana burabeti: “E boni ngae ni waeremwe, ao tataningaia naba, ba e na tai roko, ao e na aki baenikai.” (Abakuka 2:3; Taian Areru 97:10) Akea naba te tia buoka te aine aei ni bubutii n te aro are e na kona n tabeakinaki riki ana bubutii. Ma ngaira, iai ara tia ibuobuoki ae korakora ae Iesu, “are E mena naba i angaatain te Atua, ao E kume naba n raraoi i bukira.” (I-Rom 8:34; Ebera 7:25) Mangaia are, ngkana ngaia bwa te aine aei, e teimatoa ni bubutiia te tia motiki-taeka bwa e na iraki taangana, n aki ongei kangaanga ake e na kaaitarai, a na mwaitira riki ngkanne riaira ni kawakina onimakinan are e na bon roko ana bong Iehova ni motiki-taeka!

18. E na kanga te tataro ni kakorakoraa ara onimaki ao ni buokira bwa ti na irantaangaki?

¹⁸ Ti reireiaki n te kaikonaki ni kaineti ma te aine aei bwa iai te reitaki i marenan te tataro ao te onimaki, ao kabatiaan ara tataro e kona n tuki baika a na kona ni kamamaara ara onimaki. Te koaua bwa e aki nanonaki n aei bwa totokoan buan te onimaki, bon tii man arora ni kaotiotira n tataro i mataia aomata. (Mataio 6:7, 8) Ngkana iai nanora ni kan tataro ibukin namakinan ae ti mwiokoa maiura iroun te Atua, ti na kaaniaki riki iai ngkanne n ara tataro ma te Atua ao e na kakorakoraa ara onimaki. Kioina ngkai e kainnanoaki te onimaki ibukin kamaiuara, maroaka are e a kaungaia taan rimwina Iesu bwa a na “tataro n aki toki, ma n aki botu.” (Ruka 18:1; 2 I-Tetaronike 3:13) Eng, e aki boto ara tataro i aon rokon “ana bong Iehova ae kakanato” bwa e na bon roko e ngae ngkana ti tataro ke ti aki. Ma ni koauana, irakin taangara ao kamaiuara man ana buaka te Atua, e boto i aon ara onimaki ao arora ni kaakaraoa ae raoiroi ae boraoi ma baika ti tataroi.

19. Ti na kanga ni kaotia bwa e nene onimakinan ae e ‘iri taangara’ te Atua”?

¹⁹ N aron ae ti kona n uringnga, e titiraki Iesu ni kangai: “Ngkana e roko Natin te aomata, te koaua bwa e na kunea te onimaki aei i aon te aba, ke e na aki?” Tera kaekaan te titiraki ae kakannongora aei? Ai kukureira ngaira ngkai ti ataia ae ana toro Iehova aika mirion ma mirion mwaitiia ni katobibia te aonnaba, a kaotia n aia tataro, aia taotaonakinnano, ao nanomwaakaia, bwa e a tia n reke te onimaki aei irouia! Mangaia are e kona ni kaekaki ana titiraki Iesu n eng! N aki ongei ribuaka ake e karokoi ana aonnaba Tatan i aora, ma ti teimatoa n onimakina te Atua bwa e na “iri taangaia ake a rineaki i Rouna.”

[Kabwarabwara ae nano]

Ko Uringnga?

• Tera ae karika buan aia onimaki Kristian tabeman?

• E aera ngkai e kona n nene onimakinan rokon ana bong ni motikitaeka Iehova?

• E aera ngkai ti botumwaaka n tataro?

• E na kanga n tuka buan ara onimaki kabatiaan te tataro?

[Taamnei n iteraniba 18]

Tera ae katuruturuaki n te kaikonaki are ibukin te aine are e a tia ni mate buuna ma te tia motikitaeka?

[Taamnei n iteraniba 21]

E nene onimakinan ae e na “iri taangaia” te Atua irouia aomata aika mirion ma mirion mwaitiia