Ti Kona ni Kinaa Raoi te Atua?

“Aei aron reken te maiu are aki toki: a na ataiko, ngkoe te Atua ni koaua n ti ngkoe.”​—IOANE 17:3, BK.

“AI NANO ra kaubwain te Atua ma rabakauna ma atataina!” Aikai ana taeka te abotoro Bauro. E a manga taku riki: “Ai aki ataki ra ana moti, ao ai aki kuneaki ra kawaina!” (I-Rom 11:33) E nanonaki n taeka aikai bwa e a riaon aia konaa aomata kunean te rabakau ao te atatai i aon taekan te Atua, n te aro are e aki kona n reke kinaakina raoi ao ana kaantaninga nako?

A taku taan rabakau ni karekeiango tabeman bwa ti aki kona n ataa raoi aron te Atua. E taekinaki ae kangai ni kaineti ma te iango aei n The Encyclopedia of Religion: “E rangi n nano riki aron te Atua nakon ae e a tia n ataaki ibukina. . . . E aki kona n aranaki te Atua ke ni kabwarabwaraki raoi arona. Iai tian aara ao kabwarabwara ni kabane, ao akea tian te Atua. . . . E aki riai ni kinaaki ibukina bwa e aki kona ni kinaaki.”a

Ni kaineti ma te nutibeebwa ae te Newsweek, a mwaiti aomata man botaki ni mwakuri aika a boutokaa “te aeka n iango ae boou” are e iangoaki bwa “bon tii teuana te koaua, ao te koaua aei bwa bon akea te koaua.”

Ma, a mwaiti aika teimatoa naba n tiku ma aia titiraki aika tuai ni kaekaaki ibukin manenan te maiu. A namakina te nanokawaki ae korakora ibukin te maiu ni kainnano, aoraki aika kakaiaki ao te tiritiri ae riiriki ngkai. E a rangi ni korakora karawawataia aomata aikai ibukin nanououaia ni kaineti ma maiuia. A kona n ingainga nanoia n ukoukora kaekaan aia titiraki, ma ngkana a aki reke a a kona ngkanne ni motikia n aia iango bwa bon akea kaekaana. N tokina, a a mwaiti aomata aika ai aron aikai, ake a a tia ni buutii araia man aia Aaro aika baireaki raoi ao a ukoukori oini kawaia ni kawara te Atua, ngkana a bon teimatoa ni kakoauaa ae bon iai.

Ana Reirei te Baibara

A riai te koraki ake a onimakina raoi te Baibara ao ni kukurei ni butimwaea Iesu Kristo bwa ana tia Taetae te Atua, ni kan ataa ana iango te Baibara. Tao ko uringa naba are e taekin ngkoa kawai aika uaai Iesu ngke e kangai, “e rababa te kawai are nako n te mate” ao “e irariki te kawai are nako n te maiu.” E taekina aroni kinaakia te koraki ake a nakonako ni kawai aika uaai aikai ni kangai: “Kam na kinaia n uaaia.” Aekakira uaaia? Tiaki man baike a taekin, ma ni baike a karaoi, n aron are e kamataataa Iesu ni kangai: “A aki bane n rin n uean te Atua akana kangai nako Iu, Te Uea, Te Uea; ma e na rin iai ane taua ana taeka Tamau are i karawa.” E aki tau tii taekinan ae ko kakoauaa te Atua. Ti riai ni karaoa nanon te Atua. Mangaia are, ti riai ni karekea moa te atatai ae eti ni kaineti ma nanon te Atua.​—Mataio 7:13-​23.

E kamataataa n taekinna Iesu bwa a boni kona ni karekea te atatai ni kaineti ma te Atua aomata. E taku: “Aei aron reken te maiu ae e aki toki: a na ataiko, ngkoe te Atua ni koaua n ti ngkoe, ao a na ata Teuare ko kanakoa, ae Iesu Kristo.” (Ioane 17:3, BK) E teretere ngkanne, bwa ti kona ni karekea te wanawana ao te atatai ae e kaotiotia te Atua, ma tii ngkana ti kakorakoraira n ukoukoria. Ma e ngae n anne, ao ana bwaintangira te Atua nakoia te koraki ake a kakaraoa aei, bon te maiu are e aki toki. Mangaia are e bon rangi ni manena ukoukorana.

[Kabwarabwara ae nano]

[Taamnei n iteraniba 4]

E taekinna Iesu bwa e kairiri nakon te maiu te kawai ae irariki