E Maiu Ana Taeka Iehova
Reirei Aika Kakawaki Man te Kauoua n Itera n te Boki ae Taian Areru
KIOINA ngkai ana toro Iehova ngaira, ti ataia bwa e na roroko kataakira. E korea ae kangai te abotoro Bauro: “A na bane ni bainikirinaki naba akana kani kabane aia bongi ni maiu n tangiran te Atua i nanoni Kristo Iesu.” (2 Timoteo 3:12) Tera ae e na buokira n nanomwaaka ribuakoni kataaki ao taiani bwainikirinaki, are e na kakoauaki iai bwa ti boni kakaonimaki nakon te Atua?
Iai te ibuobuoki n anne ae mena n te kauoua ni boota-n-anene mai buakon ake nimaua. E oti n Taian Areru 42 nakon 72 bwa ngkana ti kan nanomwaaka raoi n taiani kataaki, ti riai n onimakina Iehova ma nanora ni kabane, ao n reireinira kaantaningan ana kakamaiu. Ai kakawakira te reirei aei nakoira! “E maiu, ao e mwaka” te rongorongo ae n te Kauoua n Itera n te boki ae Taian Areru, n ai aron naba Ana Taeka te Atua ake nikirana, ni boong naba aikai.—Ebera 4:12.
IEHOVA, “NERA NI KAMAIU MA KORAKORARA”
E a taenikai tibun Rewi. E a nanokawaki bwa e a aki kona n nako n umwan Iehova ae tabu n taromauri iai, ma e kabebetea nanona ni kangai: “Ko aera ngkai ko bobaraki ni karawawataki, tamneiu? Ao ko aera ngkai ko aki rau i nanou? Ko na kaantaninga te Atua.” (Taian Areru 42:5, 11; 43:5) Te kibu ae okioki aei, e ikoti itera aika tenua aika kaotaki n Areru 42 ao 43, nakon teuana te kario. Te Areru 44, bon te bubutii ibukin Iuta, ae te natannaomata ae karawawataki, tao i aan ana waaki Aturia n taua te aba n ana tai te Uea ae Etekia.
Te Areru 45 bon te anene ibukin te mare n uea, are taetae ni burabetinaki iai te Uea ae te Mesia. Areru ake tenua ake imwina a kaikonaka Iehova bwa “nera ni kamaiu ma korakorara,” “te Uea ae kakanato i aonaba ni bane,” ao “te ne ni kamaiu ae rietata.” (Taian Areru 46:1; 47:2; 48:3) Ai raoiroira te Areru 49 ni kaotakin ae e “aki kona temanna i buakoia ni kaboa kamaiuana”! (Taian Areru 49:7) Moan areru ake wanua ake n te kauoua n itera, a reke mairouia natin Kora. Te karuaiwa ae te Areru 50, e koreaki iroun Ataba.
A Kaekaaki Titiraki Aika Boto i Aon te Baibara:
44:19—Tera “aia tabo Tiakaore”? Tao e taekina ikai te marae ni buaka te tia areru, ike a a riki iai ake a mate bwa kanaia tiakaore.
45:13, 14a—Antai “natin te uea te aine” are “e na kairaki nakon te uea”? Bon natin te “Uea n aki totoki,” ae Iehova ae te Atua. (Te Kaotioti 15:3, NW) E tei ibukin te ekaretia ae kaainaki irouia Kristian ake 144,000 ake a uotaki nako karawa, are e natinia Iehova ngke e kabiriia n taamneina. (I-Rom 8:16) “Natin” Iehova ae “e katauraoaki n ai aron te aine ae nangi tiba mareaki ae katamaraoaki i mwaini buna,” e na kairaki nakon te tia mare te mwaane, ae te Uea ae te Mesia.—Te Kaotioti 21:2.
45:14b, 15—Antai ae tei ibukia “kibono”? Bon “te koraki ae uanao” aika taan taromauria te Atua ae koaua, ake a raonia kaain te nikira aika kabiraki ma ni buokiia. Kioina ngkai a “nako mai buakon te rawawata are korakora,” a na mena i aon te aba ngkana e a kakororaoaki ana mare te Uea ae te Mesia i karawa. (Te Kaotioti 7:9, 13, 14) N te tai anne, ao a na kaonaki n “te kukurei ma te kakatonga.”
45:16—N te aro raa ae a na ruamwin ana bakatibu te uea naati? Ngke e bungiaki Iesu i aon te aba, ao iai ana bakatibu aika aomata. A na manga riki bwa natina ngkana e a kautiia man te mate n ana tai n Tautaeka ae Manna Tenga te Ririki. Tabeman mai buakoia a na kaaina buakoia ake a rineaki bwa “uea i aonnaba ni kabane.”
50:2—E aera ngkai e aranaki Ierutarem bwa “moaniban te tamaroa”? Tiaki ibukin taraaraoin te kaawa. Ma ibukina bwa e kabongana Iehova ao e anganna kanikanna ni katean ana tembora iai ma kautun ana tautaeka, are a tautaeka iai uea aika kabiraki.
Reireiara:
42:1-3. E kaantaningaa Iehova tibun Rewi n aron te ria aine ae mena n te tabo ae mwautakataka ae kaantaningaa reken te ran. Moan te korakora nanokawakin te mwaane aei ngkai e a aki kona n taromauria Iehova n Umwana ae tabu, n te aro are e a reke ‘rannimatana bwa kanana ni ngaina ao ni bong,’ bwa e a aki rin kanana. Tiaki ti riai ni kaota ara kakaitau ae moan te bati ngkai ti taromauria Iehova n reitaki ma raora n onimaki?
42:4, 5, 11; 43:3-5. Ngkana arona bwa ti a maenako ma te ekaretia ni Kristian n te tai ae uarereke ibukin te bwai teuana ae e a riaon ara konaa, e bae ni kateimatoaira ururingan kimwareireira ngkoa n ara tai ni bobotaki. Ngkana tao karaoan aei n te moantai e kauekea te maroaa ae iriana te uringaba, ma imwina, ti na kauringaki iai bwa Atuara bon ara tabo ni kamanomano, ao ti riai ni kaantaningaa kabebeteara mairouna.
46:1-3. N aki ongeia bwa baikara kataaki aika ti kaaitarai, ma e riai ni korakora onimakinan are “boni nera ni kamaiu ma korakorara te Atua.”
50:16-19. Ane mwamwana te aba ma n tataekin baika bubuaka, ao e bon aki kona n tei ibukin te Atua.
50:20. N onean mwin are ti na tataekina aia kaairua tabemwaang, ti riai n tarariaoi.—I-Korote 3:13.
“TAMNEIU, KO NA KAANTANINGA TI TE ATUA N AKI TAETAE”
A moanaki Areru aikai man ana tataro Tawita ae bunra raoi iai nanona imwin ana bure ma Nei Bata-teba. E oti n Taian Areru 52 nakon 57 bwa Iehova e na kamaiuia ake a bunri rawawatan nanoia nakoina, ao ni kaantaningaia ibukin kamaiuaia. N aron ae kabwarabwaraki n Taian Areru 58-64, e karika Iehova Tawita bwa ana tabo ni kamaiu n ana tai n rawawata ni kabane. E anene ni kangai: “Tamneiu, ko na kaantaninga ti te Atua n aki taetae; ba e riki au kaantaninga mairouna.”—Taian Areru 62:5.
E riai ni kairira reitakira ae kaan ma ara tia Kamaiu, bwa ti na “anenea karinean arana.” (Taian Areru 66:2) E neboaki Iehova bwa te tia katauraoi bwaai ibukira ae atataiaomata n te Areru 65, te Atua ae te tia Kamaiu n te Areru 67 ao 68, ao te tia Kawakinira n te Areru 70 ao 71.
A Kaekaaki Titiraki Aika Boto i Aon te Baibara:
51:12—Antai nanona ae “tae nangina” are e bubutii Tawita bwa e na buokaki iai? E aki kaineti aei ma kukurein nanon te Atua ni buoka Tawita, ke ana taamnei ae raoiroi Iehova, ma e kaineti nakon nanon Tawita, are te aroaro ae kairia ma n taua arona. E butiia te Atua bwa e na anganaki te ingaingannano ni kani karaoa ae eti.
53:1—E kanga te aomata are e kakeaa te Atua n riki bwa “te nanobaba”? Te nanobaba aei e aki irekereke ma te kabitaia. Ma e nanonaki iai te nanobaba ni kaineti ma ataakin te aroaro ni maiu ae riai, ao e kariki uaana aika bubuaka aika kabwarabwaraki n Taian Areru 53:1-4.
58:3-5—N te aro raa ae ai aroia naeta aomata aika buakaka? Aia kewe ibukia tabemwaang ai aron ana boitin te naeta. A kaboitina raoiroin aroaroia aomata. Aomata aika buakaka a katotonga “te naeta ae te atibi [“cobra,” NW]... ae bonoti taningana,” n aroia n aki kan ongo nakon te kairiri ke te kaetietaki.
58:7—A kanga aomata aika buakaka n “neinei nako n ai aron te ran ae raanga ni waetata”? Tao e iangoa taekan te karaanga n ran Tawita are rangi ni korakora raanganakona i marenan maungan te Aba ni Berita. A a kona ni kabatiaaki riki ranin te karaanga are i buakoni maunga n te ieka, ma a na waetata raan aikai ni bwaro nakon taabo tabeua ao ni bane, ma n aki manga noraki. E tataro Tawita ibukin waetatan maunaia aomata aika buakaka.
68:13—Tera aron “bain te taobe ae rabunaki n te tirewa, ma buraena aika rabunaki n te koora ae meamea”? Taobe tabeua a buruu ni kaakee karaia ao iai buraeia tabeua aika kirimatamata man tokatoka karaia ae taraa ni bibitaki. E takiakia karan rabwataia n aroni karan te biti ae mata n tirewa ma e mata ni koora i aan te riringa. E kabotaua tokanikaia tibun Iteraera n te buaka Tawita, ma te aeka n taobe anne, ae korakora baina ni kiba ao e kantara taraakina. N aron ae a taku taan rabakau n te Baibara tabeman, e kona ni botau naba kabwarabwarana ma te koro-taamnei ae tao te bwai ni kuri ae anaaki irouia tautia aika tokanikai n te buaka. Ni kaineti ma anne, e taekini tokanikai Tawita ake e angania ana aomata Iehova i aoia aia kairiribai.
68:18, NW—Antai “bwaai n tituaraoi aika mwaane”? Mwaane aikai ake a mena i buakoia ake a uotaki nako bwa taenikai n tain uneuneakinan te Aba ni Berita. Rimwi riki, mwaane akanne a a manga mwiokoaki bwa a na buokiia tibun Rewi n aia mwakuri.—Etira 8:20.
68:30—Tera ae nanonaki n te bubutii ibukin ‘boakiia manin maunei’ aika tiritiri? N te taetae ni kaikonaki aei, a kabotauaki aia kairiribai ana aomata Iehova ma maan aika tiritiri. E butiia te Atua ikai Tawita bwa e na boaiia, ke n tutuka korakoraia ni karaoa ae karuanikai.
69:23—Tera ae nanonaki n ‘ae e na ruru beebeeia’? A kakawaki mwatireti ake n te beebee ibukin te mwakuri korakora, n aron tabekakin baika a rawawata ao uouotakia. Te beebee ae ruru e nanona te beebee ae akea korakorana. E tataro Tawita bwa e na kaakeaki korakoraia ana kairiribai.
Reireiara:
51:1-4, 17. E aki riai n uruana ara iraorao ma Iehova ae te Atua karaoan te bure iroura. Ngkana ti raraoma, ao ti onimakinna bwa e na bon nanoangaira.
51:5, 7-10. Ngkana ti a tia ni karaoa te bure, ti kona n onnon nakon Iehova bwa e na kabwarai ara bure ake a riki man rikiara n te bure. Ti riai n tataro naba nakoina bwa e na kaitiakira, ni kamarurungira, ni buokira ni kanakoi betin nako ara bure mai nanora, ao ni kakorakorai ara onimaki.
51:18. E karuanikai ana bure Tawita nakoia natannaomata nako. Mangaia are e tataroakina ana raoiroi te Atua bwa e na ruona Tion. Ngkana ti karaoa te bure ae kakaiaki, e kona naba ni kabarekaki iai aran Iehova ao te ekaretia. Ti riai n tataro nakon te Atua bwa e na kanakoraoa are ti a tia n uruanna.
52:8. Ti kona n riki “n ai aron te kai ae te oriwa ae mawawa n uman te Atua,” are nanona bwa ti kaan ma Iehova ao ti kabatiai uaara n ana mwakuri, n arora n ongeaba irouna ao ni butimwaea ana kaetieti.—Ebera 12:5, 6.
55:4, 5, 12-14, 16-18. E korakora rawawatan nanon Tawita n ana kakarabakau natina ae Abetarom, ao ni kamwaneana iroun raoraona ae rangi n onimakinna ae Aitobera are te tia reireia n ana kangaanga. Ma e aki kerikaki korakoran onimakinan Iehova iroun Tawita iai. Ti aki riai naba ni kariaia kamamaraan ara onimaki ni baika karawawatai nanora.
55:22. Ti na kanga ni kaki rawawatara i aon Iehova? Ti karaoa aei (1) n ara tataro nakoina ni kaotii baike ti raraoma iai, (2) ni mwiokoan ana Taeka ao ana botaki bwa e na kairira ao e na boutokaira, ao (3) ni karaoan ara kabanea ni konaa ni kaeta te bwai are ti raraoma iai.—Taeka N Rabakau 3:5, 6; 11:14; 15:22; I-Biribi 4:6, 7.
56:8. E aki tii tabe Iehova ma arora, ma e tabeakina naba rotaki buakan nanora iai.
62:11. E aki boboto ana waaki Iehova i aon te korakora ae reke man te tabo teuana. Bon nibwan te korakora ngaia. ‘Bon ana bwai te mwaaka.’
63:3. ‘E raoiroi riki ana atataiaomata te Atua nakon te maiu’ ibukina bwa ngkana akea, ao akea uaan te maiu. Ti wanawana ngkai ti karekea ara iraorao ma Iehova.
63:6, BK. Te tairiki ae mabu ao akea katabetabean te iango iai, bon te tai ae nakoraoi ibukin kananoan te iango i aon te bwai teuana.
64:2-4. Te winnanti ae karuanikai, e kona n urua raoiroin aran te aomata. Ti aki riai n ongora n aeka ni winnanti akanne ke ni kabutii nako.
69:4. Ibukin kateimatoan te rau iroura, ti kaota te wanawana n tabetai ngkana ti ‘kaoka te bwai ae ti aki kuriia’ ae nanona, arora ni kabwarai ara bure, e ngae ngke ti aki koaua raoi bwa ti karaoa ae bure ke ti aki.
70:1-5. E ongo Iehova n ara bubutii ni kaumaki ibukin buokara. (1 I-Tetaronike 5:17; Iakobo 1:13; 2 Betero 2:9) E kona ni kariaia te kataaki te Atua bwa e na reitinako, ma e na anganira te wanawana bwa ti na kona ni kaitaraa te kangaanga, ao te korakora bwa ti na nanomwaaka iai. E aki kona ni kariaia bwa ti na kataaki n te aro ae e a riaon ara konaa.—1 I-Korinto 10:13; Ebera 10:36; Iakobo 1:5-8.
71:5, 17. E rikirake ninikorian Tawita ao korakorana ngke e karika Iehova bwa ana mwioko n ana tai n roro-n-rikirake, imwain are e aitara ni boo ma aintoan Biritia are Koria. (1 Tamuera 17:34-37) A riai naba rooro-n-rikirake ni mwiokoa Iehova ni bwaai ni kabane ake a karaoi ni katoabong.
“A na Buta Aonaba ni Bane ni Mimitongina”
Te kabanea n anene n te kauoua ni boota-n-anene ae Taian Areru 72, bon taekan ana tautaeka Toromon, are e riki bwa bannan te aroaro ni koaua i aan ana tautaeka te Mesia. Ai kakukureira kakabwaia aika kabwarabwaraki iai, n aron te rau ae bati, tokin te kakeru ao te iowawa, ao batin te amwarake i aon te aba! Ti na mena naba i buakoia akana a nang kimwareirei ni baikai, n ikotaki ma kakabwaia riki tabeua man te Tautaeka aei? Ti kona ngkana ti katotonga te tia areru ae kaantaningaa raoi Iehova, ni karikia bwa kamanoara ao korakorara.
‘E motikaki ana tataro Tawita’ n taeka aikai: “E na karaoiroaki Iehova ae te Atua, ae Atuaia Iteraera, ae kakaraoi bwaai ni kamimi n ti Ngaia. Ao e na karaoiroaki arana ae mimitong n aki toki. Ao a na buta aonaba ni bane ni mimitongina. Amene, ao Amene.” (Taian Areru 72:18-20) Ti bia katotongnga naba n neboa Iehova ma nanora ni kabane, ao ni kamoamoaa arana ae mimitong.