Ti Boni Bane n Rotakibuaka n te Mate!

“MANI moani bungiakin te aomata ao e ataaki bwa e kona ni mate, ma e aki ataaki bwa n ningai,” aei ana rongorongo te tia korea rongorongon rimoa ae te I-Engiran ae Arnold Toynbee. E manga taku riki: “Ao e aki kona ni birinako man te koaua ae e na boni mate n te taina.” Ai rawawata ra ngaira ngkana e mate kaain ara utu temanna ae tangiraki iroura ke raoraora ni kaan!

E a tia n rangi n rotakibuaka te botannaomata n te mate i nanon ngaa ma ngaa te ririki. Ngkana e mate te aomata ae ti rangi n tangiria, ti bane n namakinna bwa akea korakorara. Akea ae e na aki rotaki n te nanokawaki, ao akea ae kona n totokoa te mate. E korea ae kangai te tia koro rongorongo n te ka-19 n tienture: “Ti a manga okiri arora n ataei ngkana ti nanokawaki, n aki ongeia bwa tao buburara rabakaura. Akea ana atatai iai te aomata ae te kabanea ni wanawana.” Are nanona bwa ai aron ae ti a manga okiri arora n ataei are akea iai korakorara, ao akea ara konabwai ni bita ae e a tia n riki. E aki kona naba ni bita te aro aei te kaubwai ke te korakora. Akea kaekan ara titiraki iai irouia akana rabakau ma akana wanawana. A tang akana korakora ao akana mamaara naba.

E aitara naba Uean Iteraera ngkoa are Tawita ma te aeka ni kauruakinano aei, ni maten natina are Abetarom. Ngke e ongo maten natina te uea aei, e tang ao e bwaebwaeti: “Natiu ae Abetarom, natiu, natiu ae Abetarom! I bia mate ni bonota mwim, Abetarom, ae natiu, natiu!” (2 Tamuera 18:33) E a tia te uea ae mwaaka aei ni kataea aia kai aiana aika rangi ni korakora. E ngae n anne, akea riki te bwai ae e kona ni karaoia ngke e a mate natina, ma tii te kan anga maiuna nakon ‘te kabanea ni kairiribai ae te mate,’ n onea mwin natina.​—1 I-Korinto 15:26, BK.

Iai katokan te mate? Ngkana ngaia anne, tera ngkanne te kaantaninga ibukia maate? Ti kona ni manga noriia aomata aika tangiraki iroura? N te kaongora ae imwin aei, ao iai kaekaan titiraki aikai aika nako man te Baibara.