Tuan Te Tangira Ae Mena N Te Nano
“N na karina au tua i nanoia, ao N na koroia i nanoia.”—IEREMIA 31:33.
1, 2. (a) Tera ae ti na rinanona ngkai? (b) Tera aron Iehova ni kaota mimitongina n te Maunga are Tinai?
NI KAONGORA aika uoua ake i mwain aei, ao ti reireiaki iai bwa ngke e ruo rikaaki Mote man te Maunga are Tinai, ao e nako te oota man ubuna ni kaota mimitongin Iehova. Ti maroroakina naba te rabuna-ni-mata are e kabongana Mote. Ti na rinanon ngkai te bwai ae iai kakawakina nakoia Kristian ni boong aikai.
2 Ngke e mena Mote i aon te maunga, ao e anganaki kaetieti mairoun Iehova. A bobotaki i rarikin te Maunga are Tinai tibun Iteraera ao a nora raoi kaotiotan mimitongin te Atua ae moan te kamimi. “Iai baa ma iiti, ma te nang ae matenten i aon te maunga, ao tangin te bu ae moan te korakora: ao a bane n ruru aomata ake n te ne ni maeka. . . . Ao e a buta te maunga are Tinai n te bubu, ba kioina ngke E ruonna Iehova ma te ai: ao bubuna e beti rake n ai aron ain te nenikanaiai, ao e a maeiei te maunga ni kabuta.”—Te Otinako 19:16-18.
3. E a kanga Iehova n angania tibun Iteraera Tuua Ake Tebwina, ao tera otaia iai?
3 E a taetae Iehova nakoia aomata rinanon te anera, n angania te tua are e a ataaki n arana ae Tuua Ake Tebwina. (Te Otinako 20:1-17) Mangaia are akea te nanokokoraki bwa a roko tuua aikai mairoun Teuare Moan te Mwaaka. E koroi tuua akanne Iehova ni baba aika atibu aika uoua, ake e urubekei Mote ngke e noriia tibun Iteraera n taromauria te kao-te-teei ae te koora. E a manga koroi riki tuua Iehova i aon baba aika atibu. E nako te oota man ubun Mote n te tai aei ngke e uotii rikaaki baba aikai. A nang bae n ataia n te tai aei tibun Iteraera ae tuua akekei, a bon rangi ni kakawaki.—Te Otinako 32:15-19; 34:1, 4, 29, 30.
4. Bukin tera bwa a rangi ni kakawaki Tuua Ake Tebwina?
4 Baba ake uoua ake a koreaki i aona Tuua Ake Tebwina, a katukaki i nanon te ati ni berita, ae mena n te ruu are Moan te Tabu n te umwa-n-rianna ae tabu, ao imwina riki, n te tembora. Tuua ake a koreaki i aon baba aika atibu, a kamataatai booto-n-reirei ake a aana te berita n Tua Rinanon Mote, ao a kabonganaki iroun te Atua ibukin kairan te tautaeka n Iteraera. E kakoauaki iai bwa e reitaki te Atua ma te botannaomata ae tii teuana, ae te botannaomata ae rineaki.
5. Baikara aanga ake e kaotaki iai ana tangira te Atua n ana tua nakoia I-Iteraera?
5 A rangi ni kaotaki taekan Iehova n tuua akanne, ao e moamoa riki ana tangira ibukia aomata. Ai kakawaki ra te bwaintangira anne nakoia te koraki ake a aantaeka iai! E korea ae kangai te tia rabakau temanna: “Tuan te aroaro ni maiu ae karaoaki imwain ke imwin ana tua te Atua akana tebwina akanne, . . . a aki kona n orea ke ni kuri n titeboo ke n raka riki nakon ana tua Iehova.” E taku Iehova ni kaineti ma te Tua Rinanon Mote: “Ngkana tao kam boni kan ongo bwanau, ma ni kawakina au berita, ao kam na riki iai ba bon au aomata mai buakoia botanaomata ni kabaneia: ba bon au bwai aonaba ni bane: ao kam na riki ba au koraki n ibonga, ma te botanaomata ae tabu.”—Te Otinako 19:5, 6.
E Koreaki te Tua n te Nano
6. Tera te tua are e a tia n ataaki bwa e rangi ni kakawaki nakon tuua ake a koreaki i aon baaba aika atibu?
6 A bon rangi ni kakawaki ana tua te Atua. Ma ko ataia ae iai irouia Kristian aika kabiraki, te bwai ae raka kakawakina nakon tuua ake a koreaki i aoni baba aika atibu? E a kaman taekina karaoan te berita ae boou Iehova, ae tiaki aron te berita n Tua are e karaoaki nakon te natannaomata ae Iteraera. “N na karina au tua i nanoia, ao N na koroia i nanoia.” (Ieremia 31:31-34) Iesu are te tia Raoi n te berita ae boou, e aki anga tuua aika koreaki nakoia taan rimwina. E karin ana tua Iehova n aia iango ma nanoia taan rimwina, rinanon baike e taekin ao ake e karaoi.
7. Antai are a moan anganaki “ana tua Kristo” ao antai are e butimwaeia imwina?
7 E aranaki te tua aei bwa “ana tua Kristo.” E moan anganaki tiaki te natannaomata ae Iteraera ake kanoan Iakoba, ma bon nakon te natannaomata n taamnei ae aranaki bwa, “ana Iteraera te Atua.” (I-Karatia 6:2, 16; I-Rom 2:28, 29) E kaainaki ana Iteraera te Atua irouia Kristian aika kabiraki. Imwina riki, a a raonaki irouia “te koraki ae uanao” mai buakoia natannaomata nako ake a ukoukora taromauriakin Iehova. (Te Kaotioti 7:9, 10; Tekaria 8:23) Ngkai a a riki koraki aika uoua aikai bwa “ti te nanaina” aika mena i aan “temanna te tia kawakin-tibu,” ao a butimwaea “ana tua Kristo” ni kariaia bwa e na tautaekan bwaai ake a karaoi.—Ioane 10:16.
8. Tera te kaokoro i marenan te Tua Rinanon Mote ma ana tua Kristo?
8 A teimatoa ni mena i aan ana tua Kristo Kristian ni koaua, ao e aki rangi ni kakawaki bwa tera aia reeti ao te tabo raa are a bungiaki iai, ao anne tiaki aroia tibun Iteraera ni koaua ake a kabaeaki nakon te Tua Rinanon Mote man bungiakia. A reiakina taekan Iehova ma aroarona nako, ao a ingainga ni kani karaoa nanona. Ibukina bwa e a tia ni karinaki ana tua te Atua “i nanoia” Kristian aika kabiraki, tiaki nanona ngkanne bwa a aantaeka iroun te Atua ibukina bwa e kona ni katuuaeia te koraki ake a aki aantaeka irouna; ao a aki aantaeka irouna tii ibukina bwa a kabaeaki iai. E boboto aia aantaeka i aon te bwai ae kakawaki ao ae korakora riki, ao a aantaeka naba te koraki ake tiibu tabemwaang ibukina bwa a mena i nanoia ana tua te Atua.
Tuua Aika Boboto i Aon te Tangira
9. E kanga Iesu ni kabwarabwaraa bwa te tangira boni ngaia te bwai ae kakawaki n ana tua Iehova?
9 Te bwai ae kakawaki riki i buakon ana tua nako Iehova ma ana kaetieti, e a kona ni kabwarabwaraki n te aroaro ae tii teuana: te tangira. Boni ngaia te bwai ae kakawaki ae reitaki ma te taromauri ma ngkoangkoa ao n aki totoki. Ngke e titirakinaki Iesu bwa tera te tua ae moan te kakannato i buakon te Tua, ao e kaeka ni kangai: “Tangira Iehova ae Atuam n nanom ni kabanea, ao n tamneim ni kabanea, ao ni wanawanam ni kabanea.” E kangai te kauoua: “Tangira raom n ai aron tangiram i bon i roum.” E a manga taku imwina: “E bane te Tua ma aia taeka burabeti nako n tauraki n tuua aika uoua aikai.” (Mataio 22:35-40) E kaotia Iesu bwa tiaki tii te Tua ao Tuua Ake Tebwina ake a boto i aon te tangira, ma e aanaki naba iai te Baibara n Ebera ni kabane.
10. Ti kanga n ataia bwa te tangira boni ngaia nibwan raoi ana tua Kristo?
10 Te koaua bwa tangiran te Atua ao aomata, e kakawaki naba ni kaineti ma te tua are e mena i nanoia Kristian? Eng! Ana tua Kristo, e nanona tangiran te Atua ae nako man te nano ao e nanona naba te kaetieti ae boou ae, a na kaota te tangira n anga boni ngaiia Kristian ibukia raoia ni Kristian. A na bwaina te tangira n aron naba Iesu are e kan anga maiuna ibukia raoraona. E reireinia taan rimwina bwa a na tangira te Atua ao n itangitangiri i marenaia, n arona n tangiriia. Te tangira ae rianako arona are a kaotia i marenaia, bon te aroaro ae kanikinaeia bwa Kristian ni koaua ngaiia. (Ioane 13:34, 35; 15:12, 13) E reireinia naba bwa a na tangiriia aia kairiribai.—Mataio 5:44.
11. E kanga Iesu ni kaotiota tangiran te Atua ao aomata?
11 E katea te banna ni katoto ae kororaoi Iesu ni kaotan te tangira. E ngae ngke ngaia te taamnei ae mwaaka i karawa, ma e ingainga nanona ni kan waakina ana mwakuri Tamana n te aonnaba. Irarikin are e anga maiuna n te aro bwa a na kamaiuaki aomata, e kaotia naba nakoia aomata bwa tera aroia ni maiu ae riai. E nanorinano, e akoi, e atataiaomata, ao e buokiia ake a karawawataki ao ake a bwainikirinaki. E kakorakoraa naba n anga “taekan te maiu are aki toki” nakoia aomata, bwa a na ataa Iehova.—Ioane 6:68.
12. Bukin tera bwa e kona n taekinaki, ae e aki kona ni maenako tangiran te Atua ma tangiraia aomata?
12 Ni koauana, e bon aki kona ni maenako tangiran te Atua ma tangiraia aomata. E taku te abotoro Ioane: “Mairoun te Atua te tangira; . . . Ngkana e kangai temanna, I tangira te Atua, ao ngkana e riba tarina, ao bon te tia kewe ngaia: ba ane aki tangira tarina ae e a tia n noria, ao e aki kona n tangira te Atua ae e tuai n noria.” (1 Ioane 4:7, 20) Iehova boni ngaia nibwan ao bannan raoi te tangira. Bwaai ni kabane ake E karaoi, a irekereke ma te tangira. Ti bwaina te tangira ibukina bwa ti karaoaki ni katotongana. (Karikani Bwaai 1:27) Ti kaotiota tangiran te Atua man kaotan ara tangira nakoia aomata.
Te Tangira E Nanona te Aantaeka
13. Tera moa ae ti riai ni karaoia ngkana ti na tangira te Atua?
13 Ti kanga n tangira te Atua ae ti tuai ma n noria? Te moan mwaneka ae riai n touaki, boni kinaakina. Ti aki kona n tangira te aomata ae ti aki kinaa. Mangaia are e kaungaira Ana Taeka te Atua bwa ti na kinaa te Atua rinanon warekan te Baibara, ara tataro, ao ni bobotakira ma te koraki ake a a kaman kinaa ao n tangiria. (Taian Areru 1:1, 2; I-Biribi 4:6; Ebera 10:25) A bon rangi ni kakawaki Euangkerio ake aua bwa a kaotiota anuan Iehova n aron kaotakina ni maiun Iesu Kristo ao n ana mwakuri ni minita. E a rikirake riki ni korakora nanora ni kan aantaeka nakon te Atua ao ni katotonga anuana, ngkai ti a kinaa ao n ataa kakawakin ana tangira are e kaotia ibukira. Eng, e irekereke tangiran te Atua ma te aantaeka.
14. Bukin tera bwa e kona n taekinaki bwa a aki rawawata ana tua te Atua?
14 Ngkana ti tangiriia aomata, ti atai baike a tangiri ma ake a ribai, ao ti maiuakina ae boraoi ma te atatai anne. Ti aki tangiria bwa a na aki kukurei te koraki aika ti tangiriia. E korea ae kangai te abotoro Ioane: “Ba bon tangiran te Atua te baei, ae tauan ana tua i roura: ao a aki rawawata ana tua.” (1 Ioane 5:3) A aki karawawata, ao a aki rangi ni bati. E kairi kawaira te tangira. Ti aki kainnanoa kamatenikunakin tuua aika mwaiti kurikuri aika a na kairira ni bwaai ni kabane ake ti karaoi, ma ti kairaki n tangiran te Atua. A aki rawawata ana tua te Atua iroura, bwa ti namakina te kimwareirei ngkana ti beku irouia akana ti tangiriia. E kakukurei karaoan nanon te Atua ngkana ti bon tangiria. Ti karekea iai akoakira irouna, ti karekei kakabwaiakira iai, ao e kanakoraoa aroni maiura ana kairiri.—Itaia 48:17.
15. Tera ae e na kairira bwa ti na katotonga Iehova? Kabwarabwaraa.
15 E kairira tangiran te Atua bwa ti na katotonga aroarona. Ngkana ti tangira te aomata, ti tangiri aroarona ao ni kataia n ukeri aanga ake ti na katotongnga iai. Iangoa te reitaki i marenan Iehova ao Iesu. A kaai ni mena i karawa i nanon birion ma birion te ririki. E a bwebwerake iai te tangira ae nano ao ae itiaki. E boni katotonga raoi Tamana are i karawa Iesu, ai ngaia are e taekina aei nakoia taan rimwina: “Ane e a tia n norai ao e a tia n nora naba te Tama.” (Ioane 14:9) Ngkai e a reke iroura te atatai ibukin Iehova ao Natina, ti a kairaki iai bwa ti na katotongia. Tangiran Iehova iroura n ikotaki ma ana buoka taamneina are raoiroi, e na kairira bwa ti na ‘kaaki te aomata nikawai ma ana mwakuri nako, ao ni karina [iroura] te aomata nabangkai.’—I-Korote 3:9, 10; I-Karatia 5:22, 23.
Mwakurian te Tangira
16. E a kanga ni kaotaki tangiran te Atua ao aomata n ara uarongorongo ao te mwakuri n angareirei?
16 Ngkai Kristian ngaira, ti kariaia tangiran te Atua ao aomata bwa e na kairira n uarongorongoan te Tautaeka n Uea ao te mwakuri ni karekeia taan rimwin Kristo. Ni karaoan anne, ti kakukureia iai Iehova ae te Atua are e “tangiriia aomata n kabaneia ba a na kamaiuaki, ma ni karekea atakin te koaua.” (1 Timoteo 2:3, 4) Ti a kona ngkanne ni karekea te kakukurei ni buokaia aomata bwa a na karina ana tua Kristo i nanoia. Ao ti kukurei n nora rikiraken tamaroan aroaroia ni kaotiota aroaron Iehova ae te Atua. (2 I-Korinto 3:18) Ni koauana, buokaia aomata bwa a na ataa te Atua bon te bwaintangira ae moan te kakawaki are ti kona n angania. Te koraki ake a butimwaea ana iraorao Iehova, a kona ni karekea te reitaki anne n aki toki.
17. Bukin tera bwa e raoiroi karikirakean tangiran te Atua ao aomata, nakon are ti na uaiakina kaubwain te maiu aei?
17 Ti maeka n te aonnaba ae e a rangi n taraaki iai te kaubwai bwa te bwai ae moan te kakawaki ma n tangiraki. Ma e na aki teimatoa te kaubwai. A kona n iraeaki ke ni mka. (Mataio 6:19) E kauringira ni kangai te Baibara: “E kume ni mauna aon te aba ma kaibabaruna: ma ane kakaraoa ae E tangiria te Atua, ao e teimatoa n aki toki.” (1 Ioane 2:16, 17) Eng e na teimatoa Iehova n aki toki ao ai aroia naba te koraki ake a tangiria ao ni beku irouna. E aki ngkanne raoiroi karikirakean tangiran te Atua ao aomata, nakon are ti na uaiakin bwaikorakin te aonnaba, aika aki-teimaan?
18. E kanga temanna te mitinare ni kaota te tangira are e anga iai boni ngaia?
18 A neboa Iehova te koraki ake a uaiakina te tangira. Iangoa Nei Sonia, ae te mitinare i Senegal. E reirei n te Baibara ma te aine ae arana Nei Heidi, are e reke irouna manin te aoraki ae te HIV mairoun buna ae tiaki kaain te onimaki. E bwabetitoaki Nei Heidi imwin maten buna, ma e waekoa ni kerikaki marurungina ao ni karinaki n te oo-n-aoraki ibukin te AIDS. E taku Nei Sonia: “A karaoa aia kabanea ni konaa taani mwakuri n te oo-n-aoraki, ma bon tii tabeman mwaitiia. A tuangaki taan ibuobuoki man te ekaretia bwa a na tabeakin baike e kainnanoi neiei n te oo-n-aoraki. I mena i rarikin ana kainiwene n te tairiki are imwina ao n tabeakinna ni karokoa matena. E taku ana taeka te taokita are e tei n te tai anne: ‘Ara kangaanga ae bubura bwa a aki toki aia koraki aoraki ni kitania aia utu ake a ataaki bwa a AIDS. Bukin tera bwa ko kariaia karuanikain maium, ngkoe ae tiaki te koraki, ao tiaki kaain te aba naba aei ao e okoro kunim?’ I kabwarabwaraa bwa Nei Heidi ai aron ae bon tariu ni kaan, ae kaanga titeboo tinara ma tamara. I namakinna bwa e kakukurei tabeakinana ngkai e a riki bwa kaanga ai bon tariu.” E bon aki rotaki buaka marurungin Nei Sonia n ana mwakuri n tangira n tabeakina Nei Heidi.
19. Tera ae ti riai ni karaoia ngkai e mena i nanora ana tua te Atua?
19 A mwaiti katoto ibukin te tangira n anga boni ngkoe, aika a kona n noraki irouia ana toro Iehova. Akea te tua ae koreaki n te bai, ae e kona riki ni kanikinaeia ana aomata te Atua ni boong aikai. Ma ti nora kakoroan bukin are e koreaki n Ebera 8:10. “Aio te berita ae N na karaoia ma te bata are Iteraera i mwini boong akekei, bon ana taeka Iehova; N na karina au tua i nanoia, ao N na koroia i nanoia; ao N na riki ba Atuaia, ao ngaiia a na riki ba au aomata.” Ti bia teimatoa n ataa kakawakin tuan te tangira are e a tia ni koroia Iehova i nanora, ao ni kaotiotia n taai nako.
20. Bukin tera bwa ana tua Kristo bon te bwai ae moanibaan te raoiroi?
20 Ai kakimwareirei ra te beku iroun te Atua n raonaki irouia tarira ni katobibia te aonnaba ake a kaotiota naba te aeka n tangira aei! Te koraki ake e mena ana tua Kristo i nanoia, a kukurei ngkai e a reke irouia te bwai ae moanibaan te raoiroi, e ngae ngkai a mena n te aonnaba ae akea iai te tangira. A aki tii tangiraki iroun Iehova, ma a kukurei naba ni korakoran te iraorao n itaritari. “Noria, ai raoiroi ra ao ai reirei ra maekaia taari n te tabo ae ti teuana ni kabo nanoia!” E ngae ngke Ana tia Kakoaua Iehova a nako mai buakoia natannaomata aika mwaiti, taetae ao katei aika bati, ma a katiteuanaki i nanon aia onimaki, ae te bwai ae akea kabotauana. A akoaki iroun Iehova ngkai a katiteuanaki. E korea ae kangai te tia areru: “E tua te kabaia Iehova ikanne [i buakoia aomata aika katiteuanaki n te tangira], are te maiu are aki toki.”—Taian Areru 133:1-3.
Ko Kona ni Kaeka?
• Tera aron kakawakin Tuua Ake Tebwina?
• Tera te tua are koreaki n te nano?
• Tera te bwai are e karaoia te tangira n “ana tua Kristo”?
• Baikara aanga ake ti kona ni kaotiota iai tangiran te Atua ao tangiraia aomata?
[Taamnei n iteraniba 19]
Iai irouia tibun Iteraera tuua aika koreaki i aoni baba aika atibu
[Taamnei n iteraniba 20]
A koreaki ana tua te Atua i nanoia Kristian