Kam Na Kukukurei Ibukina Ngkai Kam Riki Bwa Kristian!

“Ane kamoamoa, ao ke e kamoamoa iroun Iehova.”​—1 I-KORINTO 1:31.

1. Tera aroaroia aomata ae tabe n ririkirake ngkai ni kaineti ma te onimaki?

E KABWARABWARAA aroaroia aomata n taai aikai, temanna te tia rabakau i aon aia waaki Aaro ni kaineti ma aia onimaki ni kangai: “Te waaki ae boou ae te kabanea ni korakora ni kaineti ma te onimaki ni boong aikai, bon tiaki katean te Aro ae boou, ma rikiraken te aki-bwerengaki irouia aomata ni kaineti ma te Atua.” E kabwarabwaraa bwa aomata a “a manga aki-bwerengaki n aia Aro.” E taku bwa a mwaiti aomata aika “a kakoauaa te Atua . . . ma a aki rangi n tabe ma ngaia.”

2. (a) E aera ngkai tiaki te kamimi aroia aomata n rikirake n aki-bwerengaki ni kaineti ma te onimaki? (b) Tera te kangaanga ae kona n reke irouia Kristian ni koaua ngkana a rotaki n te aki-bwerengaki aei?

² A aki mimi aomata aika a reiakina te Baibara ngkai e rikirake te aki-bwerengaki aei. (Ruka 18:8) N etina, e riai ni kaantaningaki ngkai ae aomata a na aki bati n tabe ma te Aro. E a rangi ni maan ngkai te tai are a mwamwanaia iai aomata Aaro aika kewe, ao ni karaoi waaki ake a un naba iai aomata. (Te Kaotioti 17:15, 16) Ma e karuanikai irouia Kristian ni koaua, rotakia n te aki-bwerengaki ma kerikakin te ingaingannano. Ti na rotaki n uaana ae kananokawaki, ngkana arona bwa ti a moanna naba n aki-bwerengaki n ara onimaki, ao ni kabuaa ingaingan nanora n ara beku iroun te Atua ao n te koaua man te Baibara. E kauringia aomata Iesu bwa a na aki karaoa te aro anne ngke e reireinia Kristian ake a mena i Raorikeia n te moan tienture ni kangai: “Ko aki maitoro ao ko aki kabuebue. Ai tera ngke ko maitoro ke ni kabuebue! Ngkai ko aabue.”​—Te Kaotioti 3:15-18, BK.

Ataakin ae Tera Arora ae Riai

3. Baikara aaro aika irekereke ma Kristian ni koaua ake a kona ni kamoamoaia iai?

³ Ngkana ti na tokanikai ni buakana te aki-bwerengaki n te onimaki, a riai n ataia raoi Kristian bwa tera aroia ae riai, ao a riai ni kamoamoa n ae riai, ibukin aroia ni Kristian. Iai n te Baibara kabwarabwaran raoi bwa tera arora ae riai ngkai ti beku iroun Iehova ao ti toua mwin Kristo. Bon “taani kakoaua” ngaira ibukin Iehova, ao ‘raao ni mwakuri ma te Atua,’ ngkai ti mwakuri ni kabuta te “Rongorongo ae e Raoiroi” nakoia aomata. (Itaia 43:10; 1 I-Korinto 3:9; Mataio 24:14, BK) Ti bon “i tangitangiri naba” i marenara. (Ioane 13:34) Kristian ni koaua bon aomata “akana a kataneiaki ni wanawana n ata te raoiroi ma te buakaka.” (Ebera 5:14) Ao ti “raneanea i aon te aba n ai aron taian ota.” (I-Biribi 2:15, BK) Ti kakorakoraira naba bwa ti aonga ni “kaoti aroaro aika a raraoi” ngkai ti mena i buakoia kaain te aonnaba.​—1 Betero 2:12, BK; 2 Betero 3:11, 14.

4. E na kanga te tia taromauria Iehova n atai aaro ake e aki riai n reitaki ma ngaai?

⁴ Taan taromauria Iehova ni koaua a riai naba n atai aaro ake a aki kan reitaki ma ngaai. “Tiaki ana bwai te aba ngaiia,” n aron naba aia tia Kairiri ae Iesu, ae bon tiaki naba ana bwai te aba. (Ioane 17:16) A teimatoa ni kaokoroia ma “beekan,” are nanona aomata aika “a ro nanoia, ao a raroa ma te maiu ae mairoun te Atua.” (I-Ebeto 4:17, 18, BK) Ibukin anne, taan rimwin Iesu a “rarawa nakon aki-tangiran te Atua, ao nakon tangirani bwain aon te aba, ao . . . ni maiu ni wanawana ma n raoiroi ma n tangira te Atua i aon te aba.”​—Tito 2:12.

5. Tera ae nanonaki n taeka ni kaungaunga aika, “kamoamoa iroun Iehova”?

⁵ E kairira ataakin raoi bwa tera arora ae riai ao ara iraorao ma te tia Tautaeka ae Rietata i aon bwaai ni kabane, bwa ti na “kamoamoa iroun Iehova.” (1 I-Korinto 1:31) Te aeka ni kamoamoa raa anne? A riai ni kamoamoa Kristian ni koaua, ibukina bwa Iehova bon Atuaia. Ti kakairi n taeka ni kaungaunga aikai: “Ane kamoamoa ao ke e kamoamoa n aei, ngkae e ataibwai, ma n ataai, ba Iehova Ngai ae I kakaraoa te atataiaomata, ma te motiki-taeka ae riai, ma te raoiroi, i aonaba: ba I kukurei ni baikai, bon ana taeka Iehova.” (Ieremia 9:24) Ti “kamoamoa” ibukina bwa ti kakabwaiaki n ataakin te Atua ao ni kabonganaki irouna ibukin buokaia aomata tabemwaang.

Kangaangan Kawakinan te Kaantaninga ae Riai

6. E aera ngkai e kangaanga irouia tabeman kateimatoan te kaantaninga ae riai ni kaineti ma aroia ni Kristian?

⁶ E koaua bwa e kona ni kangaanga naba kateimatoan te kaantaninga ae riai ni kaineti ma arora ni Kristian ae kaokoro. E uringnga te ataeinimwaane ae kaikawaaki bwa te Kristian bwa n te taina, e namakina te mamaara ni kaineti ma ana onimaki. E taku: “N taai tabetai ao I kona n aki ataia bwa bukin tera ngkai I a riki bwa kaain Ana tia Kakoaua Iehova. I a kaman reireinaki te koaua ma ngke I merimeri. N tabetai e rereke iangoan ae te Aro aei bon titeboo naba ma Aaro ake tabeua.” Aomata tabeman a kariaia kairan aia iango ni waaki ni kakibotu aika bwainaki n te aonnaba aei, ni botaki ni kanakorongorongo, ao n nanon aon te aba ae riribaakin te Atua. (I-Ebeto 2:2, 3) N taai tabetai, a kona n rotaki n te nanououa Kristian, ao a a manga rinanoi baika a taku bwa a kakawaki riki ao tiaia ake a uaiakin.

7. (a) Tera aroia taani beku iroun Iehova, n tutuoa aia onimaki ae riai? (b) Tera te waaki ae karuanikai?

⁷ E bure ngkana ti okioki n taai tabetai ni manga rinanoi iango ao tiara ake ti tabe n uaiakin? E aki. Tao ko uringa te abotoro Bauro ngke e kaungai nanoia Kristian bwa a na teimatoa n tuoi nanoia: “Kam na kataingkami, ba tao kam mena n te onimaki ke kam aki; kam na kataingkami ba ua ra.” (2 I-Korinto 13:5) E kaungaa te mwakuri ae raoiroi ma n uaana Bauro, ae Kristian a na tuoiia bwa a aonga n nori bwaai aika mamaara irouia ni kaineti ma te onimaki, i aan te kaantaninga ae a na manga kaetii. Te Kristian are e tuoa ana onimaki, e riai n taraa ana mwakuri ao ana taeka, ma n iangoia bwa a boraoi ma ana onimaki ke a aki. Ma, te tutuo ae karaoaki n te aro ae aki-raoiroi e kona ni kairira bwa ti na kakaaea arora ni bwaai aika aki-reitaki ma ara iraorao ma Iehova ke te ekaretia ni Kristian. Bon akea manen waaki aikai, ao a karuanikai nakon ara onimaki.a Ti aki tangiria bwa ‘e na kabuanibwai ara onimaki’!​—1 Timoteo 1:19, BK.

A Rotaki Naba Kristian n Taiani Kangaanga

8, 9. (a) E kanga Mote ni kaotia bwa e nanououa ni kaineti ma ana konabwai? (b) Tera ae karaoia Iehova ni kaineti ma baike e tabeaianga iai Mote? (c) Tera aron rotakim n ana taeka ni karaunano Iehova?

⁸ A riai Kristian aika rotaki n te nanououa n taai tabetai, n namakinna bwa a kabwaka n te onimaki? A aki! A kona n rauaki nanoia n ataakin ae namakin aikai, a a boni kaman reke naba irouia taani kakoauaa Iehova rimoa aika kakaonimaki. Iangoa Mote, are e korakora onimakinan ao tangiran te Atua irouna. Ngke e mwiokoaki n te mwakuri ae rangi ni kangaanga karaoana irouna, e nanorinano ma n nanokokoraki ngke e titiraki ni kangai: “Kanga antai ngai?” (Te Otinako 3:11) E mataata bwa e iangoa ae kangai i bon irouna, ‘Bon akea arou!’ ke ‘I babanga karaoan anne!’ Tao a mwaiti aron Mote ake tao a kairia bwa e na nanououa n aron ana konabwai: Boni kaain te botannaomata ngaia are tautoronaki n te tai anne. E a tia naba ni kakeaaki irouia tibun Iteraera. E aki bwaati naba n tataetae. (Te Otinako 1:13, 14; 2:11-14; 4:10) Bon te tia kawakin tiibu ngaia, ae te mwakuri ae riribaaki irouia kaain Aikubita. (Karikani Bwaai 46:34) Maroaka ae e a bon namakinna iai bwa e aki tau n riki bwa te tia kainaaomataia ana aomata te Atua aika tautoronaki!

⁹ E karaua nanon Mote Iehova ngke e anganna berita aika uoua: “N na boni memena i roum; ao aio te kanikina nako im, ngkai I kanakoko: Ngkana ko a tia ni kaotinakoia aomata akekei mai Aikubita, ao kam na toro iroun te Atua i aon te maunga aei.” (Te Otinako 3:12) E kaongoa ana toro te Atua, bwa e na memena i rarikina n taai nako. Irarikin anne, e kaotia naba Iehova bwa e na bon aki kabwaka ni kamaiuia ana aomata. A mwaiti ana tai Iehova imwin anne, n anga berita n aron anne, aika a boutokaia ana aomata. N te katoto teuana, e taetae rinanon Mote nakon te botannaomata ae Iteraera ake a nang rin n te Aba ni Berita, ni kangai: “Kam na korakora ao kam na ninikoria, . . . ba Iehova ae Atuam, boni Ngaia ae airi ma ngkoe; E na bon aki kakiko, ao E na bon aki kitaniko.” (Te Tua-Kaua 31:6) E karaua naba nanon Iotua Iehova ni kangai: “Bon akea te aomata temanna ae kona n tei i matam ni kabane am bong ni maiu . . . [N na] memena i roum: N na bon aki kakiko, ao N na bon aki kitaniko.” (Iotua 1:5) Ao e berita ni kangai nakoia Kristian: “N na aki kaki taekam, N na aki kitaniko.” (Ebera 13:5, BK) Ti riai ni kamoamoa naba ngkai Kristian ngaira, ibukin te boutoka ae korakora aei!

10, 11. E a kanga te I-Rewi ae Ataba, ni buokaki bwa e na bwaina te kaantaninga ae riai ni kaineti ma ana beku iroun Iehova?

¹⁰ Tao nimabubua te ririki imwin ana tai Mote, temanna tibun Rewi ae kakaonimaki e korei naba taeka ake a kaota nanououana ni kaineti ma kaakaraoan ae raoiroi. Ngke e tabe ni kakorakoraa Ataba ni beku iroun te Atua rinanon taiani kataaki ao kariri, ao e noria tabeman ake a kakeaa te Atua, bwa a a ririkirake ni korakora ao ni kaubwai riki. E kanga n rotaki Ataba iai? E taku: “Ao ngai, a kuri ni bwaka waeu; a kuri kanga nakonakou ni maran nako. Ba I bakantang irouia akana kainikatonga, ngke I nora kabaiaia akana buakaka.” E a moanna n nanokokoraki ni kaineti ma manenan taromaurian Iehova. E iango ni kangai: “E boni matebuaka kaitiakan nanou i rou, ma tebokani baiu n aki bure; ba I ororeaki ni kabongnga.”​—Taian Areru 73:2, 3, 13, 14.

¹¹ Tera are e karaoia Ataba ibukin iango aika aki-karaunano aikai? E mwanuokini? E aki. E kaotii iango aikai nakon te Atua rinanon ana tataro, n aron are noraki n te ka-73 n Areru. E kaetaki ana kaantaninga Ataba ngke e kawara te tembora. Ngke e mena iai, e reke otana, bwa akea te bwai ae manena riki nakon maiuakinan tangiran te Atua. Ngke e a manga reke irouna ataakin manenan te beku iroun Iehova, e a mataata riki bwa e bon ribaa te buakaka Iehova, ao e na katuuaeia aomata aika buakaka, n taina ae riai. (Taian Areru 73:17-19) Ngke e a kaetaki ana kaantaninga Ataba, ao e a korakora irouna kakoauaan ae e rangi ni kakabwaiaki ibukina bwa e bebeku iroun Iehova. E taekina ae kangai nakon te Atua: “I boni memena naba i Roum: Ko tautaua ataiu. Ane Ko na kairirai n am taeka n reirei, ao rimwi Ko na mwaneai nakon te neboaki.” (Taian Areru 73:23, 24) E a manga rau nanon Ataba ao e kamoamoa iroun Atuana.​—Taian Areru 34:2.

A Atai Raoi Aroia Aika Riai

12, 13. Taekinia aomata tabeman ake a karakinaki n te Baibara ake a kamoamoa n aia iraorao ma te Atua.

¹² Te anga teuana ae ti kona ni kakorakoraa riki iai ataakin arora ni Kristian, ngkana ti nenera ma ni kakairi n aia onimaki taan taromauria te Atua aika kakaonimaki, ake a kamoamoa n aia iraorao ma te Atua, rinanon rawawata aika bati. Iangoa Ioteba are natin Iakoba. Ngke e roro-n-rikirake, e karaoaki te ribuaka nakoina ngke e kabooaki nako bwa te kaaunga, ao e kairaki nako Aikubita ae rangi n raroa kinokino ma ana karo are tangira te Atua, ao mwengana are e tatangiraki ma ni mweeraoi iai. Ngke e mena i Aikubita, akea te aomata are e kona ni kawaria Ioteba, ni bubutii bwa e na anganna taeka n reirei aika boraoi ma ana kaantaninga te Atua. Iai naba kangaanga aika korakora ake e kaaitara ma aroarona ni maiuakina te raoiroi, ao onimakinan te Atua irouna. Ma e ngae n anne, e motika nanona bwa e na kakorakoraa ni kawakina arona ni beku iroun te Atua, ao e kakaonimaki ni kaakaraoa ae raoiroi. E kamoamoa ngkai e kona n taromauria Iehova, e ngae ngke e mena n te tabo ae e kangaanga karaoan anne iai, ao e aki maaku ni kaotiota raoi ana koaua iai.​—Karikani Bwaai 39:7-10.

¹³ Tao wanibubua te ririki imwin anne, e a riki ataeinnainen Iteraera ae te taenikai, bwa ana toro mataniwin ana taanga ni buaka Turia are arana Naaman. Neiei, e aki mwanuokina naba arona n taromauria Iehova. N reken te tai, e ninikoria ni kaotioti ibukin Iehova, ao e taekinna bwa Eritai bon ana burabeti te Atua ni koaua. (2 Uea 5:1-19) Tabeua te ririki imwin anne, ao te Uea ae Iotia ae rangi n ataei, e karaoi bitaki ibukin katamaroaan te waaki n taromauri, ike e a manga karaoa te onobwai nakon ana tembora te Atua, ao e a manga kamaiua taromaurian Iehova irouia ana botannaomata. E kamoamoa n ana onimaki ao n ana taromauri. (2 Rongorongo, mwakorona 34, 35) Taniera ma raona ake I-Ebera ake teniman a aki mwanuokina naba are ngaiia taan toro iroun Iehova. E ngae ngke e korakora te kataaki ao te kariri nakoia ngke a mena i Baburon, ma a teimatoa ni kakaonimaki iai. E teretere bwa a kamoamoa n aroia n riki bwa taani beku iroun Iehova.​—Taniera 1:8-20.

Kamoamoa Ngkai Ko a Kristian

14, 15. Tera riki ae irekereke ma te kamoamoa n arora ni Kristian?

¹⁴ E waaki raoi aia onimaki taani beku iroun te Atua aikai, ibukina bwa a karikirakea i nanoia te kani kamoamoa n te aro ae riai, n akoakia iroun te Atua. Tera ae ti riai ni karaoia n taai aikai? Tera ae irekereke ma te kamoamoa n arora ni Kristian?

¹⁵ E nanonaki riki iai, bwainan te nano ni kani kaitau ngkai ti a riki bwa ana aomata Iehova aika uouota arana, ao ti kakabwaiaki ma n tangiraki irouna. E bon kinaia raoi ana aomata te Atua. E korea ae kangai te abotoro Bauro, are e maiu n te tai are e bati iai te kamangaongao ibukin Aaro aika kakaokoro aika waaki: “E kinaia ana aomata te Uea [“Iehova,” NW].” (2 Timoteo 2:19, BK; Warekaia Iteraera 16:5) E kamoamoa naba Iehova irouia “ana aomata.” E taku: “Ane ringingkami ao e ringa naba ataeini” matau. (Tekaria 2:8) E mataata bwa e tangirira te Atua. Ibukin anne, ara iraorao ma ngaia e riai naba ni boto i aon tangirana ae korakora. E kangai Bauro: “Ngkana e tangira te Atua te aomata, ao e bon ataki i Rouna.”​—1 I-Korinto 8:3.

16, 17. E aera ngkai a kona ni kamoamoa Kristian aika ataei ao ikawai, ni korakoran aia onimaki ae a anganaki?

¹⁶ A riai n tuoiia te koraki ake a ataei riki ake a ikawairake i buakoia Ana tia Kakoaua Iehova, bwa e tabe ni korakora tangiran aroia ni Kristian n aia iraorao ma Iehova, ke e aki. E aki kona ni boboto aia onimaki i aan aia onimaki aia karo. E taekina ae kangai Bauro ibukia taani beku iroun te Atua n tatabemania nako: “Bon ana bai ana mataniwi bairean taekana.” Mangaia are e reitia ni kangai Bauro: “Ti na bane ni kaeka te Atua i bukin arora.” (I-Rom 14:4, 12, BK) E teretere bwa te aomata are e taromauria Iehova ibukina bwa a taneiai ni kaakaraoa anne kaain ana utu, e aki kona ni karekea oin ana iraorao ma Iehova.

¹⁷ N taai ake rimoa ni karokoa ngkai, a rangi ni mwaiti aomata ake a kaotioti ibukin Iehova. E moa mairoun te aomata ae kakaonimaki ae Abera are e maiu tao 6,000 te ririki n nako, ni karokoa “te koraki ae uanao” ae kaainaki irouia taani Kakoaua aika maiu ngkai, ao nakoia taan taromauria Iehova aika mwaiti kurikuri, aika a na maiu n aki totoki. (Te Kaotioti 7:9; Ebera 11:4) Ngaira boni kaain te koraki n aomata ae abwabwaki ae kakaonimaki n taromauria Iehova n taai aikai. Ai korakora ra ara onimaki ae ti anganaki!

18. A kanga baika ti taku bwa a kakawaki ao kaetieti ake ti maiuakin, ni kaokoroira ma kaain te aonnaba aei?

¹⁸ Arora ni Kristian e irekereke naba ma baike ti taku bwa a kakawaki, aroaro ao kaetieti aika riai aika ti bwaini, ao waaki aika kakoauaa bwa Kristian ngaira. Bon “te Kawai” ae tii teuana ae e na nakoraoi maiura iai, ma ni kakukureia naba te Atua. (Mwakuri 9:2; I-Ebeto 4:22-24) Kristian a “tuoi raoi bai ni kabane,” ao a “taua ae e raoiroi”! (1 I-Tetaronike 5:21, BK) Ti a ota raoi ngkai bwa e rangi n raroa kinokino te waaki ni Kristian ma te waaki ae ianena ma te Atua. E katereterea raoi te kaokoro Iehova i marenan te taromauri ae koaua ao te taromauri ae kewe. E katanoata ni kangai rinanon ana burabeti ae Maraki: “Kam na manga nora okoron te aomata ae e raoiroi ma te aomata ae e buakaka, ao okoron ane e toro iroun te Atua ma ane e aki”​—Maraki 3:18, BK.

19. Tera ae aki kona n riki nakoia Kristian ni koaua?

¹⁹ Ibukina bwa moan te kakawaki ae ti na kamoamoa iroun Iehova ngkai ti mena n te aonnaba ae e bati te mangaongao iai, tera ae kona ni buokira ni kateimatoa i nanora te kani kamoamoa iroun te Atua ao n arora ni Kristian? Iai reirei n ibuobuoki tabeua aika a na kuneaki n te kaongora ae imwin aei. Ngkana ko tabe n rinanon reirei aikai, ko na aki nanououa n ae kangai: Kristian ni koaua a na bon aki kona ni bwaina te nano n aki-bwerengaki n aia onimaki.

[Kabwarabwara ae nano]

Ko Uringnga?

• A na kanga Kristian ni koaua “ni kamoamoa iroun Iehova”?

• Tera reireiam man aia katoto Mote ao Ataba?

• Antai aomata tabeman ake a karakinaki n te Baibara ake a kamoamoa ibukin aia beku iroun te Atua?

• Tera ae irekereke ma te kamoamoa ibukin arora ni Kristian?