Bukin Tera? ‘Te Atua, Bukin Tera bwa Ko Kariaia Rikin Aei?’
E teimatoa Ricardo n ururinga tekatekana ngkoa ma buuna ae Nei Maria, n te tabo are e taatataninga te aba iai imwain rokon te taokita.a Bon akea i buakoia ae ninikoria ni wareka ribootin ana kabanea n tutuo Maria n te tai arei. Ma e ngae n anne, e kauka te tinaniku Ricardo, ao a ienikuri ni wareka ana ribooti te taokita. A nora te taeka ae “kaentia,” ao a a uaia n tang ngkai a bon ataa raoi nanon te taeka anne.
E ururing rikaaki Ricardo ma n taku: “E rangi n akoi te taokita, ibukina bwa e bon ataa rawawatan te kangaanga ai ngaia are e aki toki n tuangira bwa ti na onimakina te Atua.”
Imwain waakinan ana bwainnaoraki Maria ibukin te kaentia, ao e a kaman noria te taokita bwa e a boni kaakakammwakuri naba waen Maria are te angaatai i bon irouna. E oti naba n tuoana ake imwina riki bwa ngaia e a tia naba n roko te kaentia aei ni kaburorona. E bwainnaorakiaki ibukin te kaentia i nanon tii teuana te wiki ao e a katokaki naba. E matu nako imwina riki Maria n te aro are e aki namakinaaba iai, ao e mate uoua te namwakaina imwina. E kabwarabwaraa ni kangai Ricardo: “I kukurei bwa e a toki kainnanona, ma e boni korakora ururingan raou ae tangiraki aei n te aro are I a baabareka naba tokini maiu. A a mwaiti taai aika I kona iai n tang nakon te Atua ni kangai: ‘Bukin tera bwa ko kariaia rikin aei?’”
A Bati Aia Titiraki Aomata Aika Rotaki n te Kabuanibwai
A mwaiti aomata ni katobibia te aonnaba aei, aika a kaaitara naba ma te aeka ni karawawataki are e riki nakon Ricardo. N taai aika mwaiti, bon aomata aika akea irekerekeia ma karikan kangaanga ake a a rotaki buaka iai. Iangoa te uruakinnano ae kananokawaki are e riki man taiani buaka ake a reke kaia iai aomata. Ke iangoa te maraki ae namakinaki irouia aomata aika mwaiti ake a tauaki n tiaki nanoia, ke ataei aika e karaoaki ae bwaitingako nakoia, te boo n un n te utu, ke mwakuri n iowawa riki tabeua aika a kaakaraoaki irouia aomata. E taraa n akea tian te ribuaka ao te maraki are a kaakarikii mwaane ao aine nakoia raoia mangkekei ni karokoa ngkai. (Te Minita 4:1-3) A taonaki naba n te rawawatannano aomata ni kabuanibwai aika a karina n riki n te aonnaba, ke rotakibuakan te namakin, te iango ao te rabwata. Mangaia are ti na bon aki mimi teutana ngkai a mwaiti aomata aika titiraki ni kangai: “Bukin tera bwa e kariaia rikin te aeka n rawawata aei te Atua?”
E ngae naba ngkana a kakaonimaki tabeman n aia Aro, ma bon akea te tai teuana ae e na bebete iai aron kaitaran te rawawata irouia. Ngkoe naba, ko kona ni mimi bwa bukin tera ngkai e kona ni kariaia karawawatakia aomata te Atua ae moan te tatangira ma ni korakora mwaakana. Kuneakin te kaeka ae karaunano ma ni koaua nakon te titiraki ae kaminonano aei, bon te bwai ae rangi ni kakawaki ibukin raun nanora ao ara iraorao ma te Atua. E katauraoa kaekaan te aeka n titiraki aei te Baibara. Taiaoka ma iangoa ana taeka te Baibara n aron ae e na kaotaki n te reirei ae imwin aei.
[Kabwarabwara ae nano]
a A a tia ni bitaki aara.
[Taamnei n iteraniba 3]
E aki toki n tuangira te taokita bwa ti na onimakina te Atua