Rooro-n-rikirake Aika-Tangira te Koaua

“E na kaitiaka kawaina te rorobuaka n te aro ra?” Anne ana titiraki te tia areru ae te I-Ebera are e tabekia ngaa ma ngaa te ririki n nako. (Taian Areru 119:9) E raoiroi naba te titiraki aei ni boong aikai, ibukina bwa a bati kangaanga aika a kakaaitarai kaain te roro-n-rikirake. Te wene ni bure e a tia ni kaaorakia rooro-n-rikirake aika mwaiti n te AIDS. Te katautau bwa iteran mwaitiia te koraki aika a ituaki n te aoraki ae kamamate aei e bwaka aiai ririki ni maiu i marenan 15 nakon 24. Kakabonganan taian drug n te aro ae riao, ngaia naba ae kabatiai kangaanga n te aro are e a kabuanibwai iai maiuia tabeman. Katangitang aika a bubuaka; birim, viteo teibi ao kamataku man te TV aika a kaotiota te iowawa ao te wene ni bure; taamnein taiani bwaitingako aika a mena n te Internet, boni ngaai ngakai aika a kakorakoraa te katikitiki nakoia rooro-n-rikirake. Ngaia are ana titiraki ngkoa te tia areru, a aki toki n iaiangoia naba ni boong aikai, kaaro aika a bati ao rooro-n-rikirake.

E a manga boni kaekaa ana titiraki te tia areru aei ngke e kangai: “E na tarataraia ni kakairi n am taeka.” Bon iai reirei aika raraoi ibukia rooro-n-rikirake n ana Taeka te Atua ae te Baibara, ao a bati rooro-n-rikirake ake a a tia n toua mwina ao a nora te kakukurei ni maiuia iai. (Taian Areru 119:105) Ti na nori aia katoto tabeman rooro-n-rikirake aika a tangira te Atua ao a kekeiaki mwaaka ni kateimatoaa korakoraia n te itera n taamnei n te aonnaba ae ukoukoraki iai te kakatia ni bwain te maiu aei ao te kaubwai.

A Kakaaitau n Aia Kairiri Aia Karo

Jacob Emmanuel bon te minita ae te bwaiania ae kabwanina ana tai iai i nanon tabeua te ririki, imwain mwakurina n aobitin aia botaki Ana Tia Kakoaua Iehova i Mexico. E uringa arona ni moan tangira te beku iroun te Atua ma te kakaaitau ngke e kangai: “A bon buokai raoi au karo n te waaki aei, e ngae ngke iai tabeman taari ake I iraorao ma ngaiia ae a rangi n ibuobuoki naba. A kaungaai bwa N na tangira te mwakuri n uarongorongo. Teutana imwin teutana ao a kairirai n te kawai ae eti; I aki roko n te namakinna bwa a kairoroai.”

David, ae e a tia ni kabanei ririki tabeua n te mwakuri ni minita ni kabwanina ana tai iai e uringa ungan nanona irouia ana karo, ngke a moani karaoa te mwakuri n special pioneer ngke a uarereke ngaia ma tarina. Ngke e a mate tamana ao e kateimatoaa ana beku tinana n te mwakuri n special pioneer. Irarikin tataekinan te rongorongo ae raoiroi, e tabeakinia naba natina. “A aki kairoroai bwa N na karaoa te mwakuri ni bwaiania,” e taekina anne David, “ma ngkana ti uaia ni bwaiania n ara utu ao ti rangi n unga iai, ai ngaia are e a kairai te aro anne bwa N na kani bwaiania naba.” Ni kaineti ma bonganan te kairiri ao te mwamwannano mairouia kaaro, e a manga taku riki David: “E kakaonimaki ni wareka te karaki tinara nakoira ni katoa tairiki man te boki ae atuna From Paradise Lost to Paradise Regained.a Arona ni kaongoraira e buokira bwa ti na karekea tangiran te amwarake n taamnei iroura.”

Kakaaitau Ibukin Bobotaki

Tabeman rooro-n-rikirake e kangaanga irouia bwa a na taatangiri bobotaki ni Kristian. A riki n roko ibukina bwa a kairaki irouia aia karo. Ma ngkana a kakaonimaki ni kaei, ao a na rikirake ngkanne n tangiri bobotaki. Iangoa Alfredo, are e moana ana mwakuri ni minita ni kabwanina ana tai iai ngke 11 ana ririki. E taekinna bwa ngke tao nimaua ana ririki, e kataia n aki kan iri n te bobotaki ibukina e rio matuna iai, ao ana karo a aki kon ni kariaia bwa e na matu n tain te botaki. E ururing ni kangai: “Ngke I a tabe n ikawairake teutana imwin teutana, ao I a moanna n nano n te bobotaki, ma ai moarea ra riki ngke I a bwaati ni koroboki ao ni wareware, ibukina bwa I a kona n anga au kaeka n oin au taeka.”

Nei Cintia ae 17 ana ririki a te regular bwaiania e taekinna bwa te iraorao ae raoiroi e rangi n irekereke ma karikirakean tangiran te kani beku ibukin te Atua ngke e kangai: “Te iraorao ae raoiroi ma taari n te ekaretia ao te kakaonimaki ni kaei bobotaki, a kairai bwa N na mwaninga taekaia raoraou aika kaain te aonnaba ao te mwakuri are e kakaraoaki irouia ataei, n aron te nanako n taabo ni katangitang. Ongongorau n taian reke ake a taekinaki ao rongorongoia taari tabeman n taiani bobotaki, e kaira nanou bwa N na angan Iehova bwaai ni kabane ake iai irou, ao I a namakinna bwa te kabanea n tamaroa ae N na anganna bon korakorau n au bong n ataei. Ngaia are I a iangoia bwa N na kabonganai n te beku i bukina.”

Ma e ngae n anne, e reitia nako ni kangai: “Ma imwain raoi bwabetitoakiu ao I a kunea bwa e a bebete aki kaean te bobotaki, ao I a bukina karaoakin au kamatebwai n te reirei ao tabeu riki ake tabeua bwa bukin aki rokou n te botaki. E bati te botaki ae I a aki kaea ao e a moanna n rotaki iai arou n te itera n taamnei. I a moana au iraorao ma te teinimwaane temanna ae aki reirei n te Baibara. Ma e rarabwa Iehova bwa e reke au tai ni kaeta arou imwain ae I reke n te kangaanga.”

Te Motinnano

Ngke e titirakinaki Pablo ae te roro-n-rikirake naba temanna ae e beku iroun Iehova ni kabwanina ana tai iai, bwa tera te bwai ae te kabanea ni kakawaki ni kaneti ma karikirakean tangiran ana Taeka te Atua, ao e kaeka ni kangai: “I taku bwa bon uoua bwaai iai: te kakaonimaki ni karaoa am reirei i bon iroum ao te uarongorongo ma te ingaingannano. I rangi ni kukurei irouia au karo n reireiakiu irouia taekan te koaua ibukin Iehova, ao I namakinna bwa aio te kabanea n tamaroa ni waaki ae a anganai. Ma e ngae n anne I riai ni motika nanou ni kaineti ma bukina tangiran Iehova irou. Karaoan anne e kainnanoa ataakin ‘rababan ma nanon’ te koaua n te Baibara. Tii n te aro aei ae ti kona n namakina iai tangiran ana Taeka Iehova ae rikirake i nanora bwa ‘te ai ae ura’ ae ti kan taekinna nakoia aomata. Te mwakuri n uarongorongo ma te ingaingannano e na karikirakea tangiran te koaua i nanora.”​—I-Ebeto 3:18; Ieremia 20:9.

Jacob Emmanuel are e a tia n taekinaki mai mwaina, e uringa naba kakawakin karaoan te rinerine ibukin te toro iroun Iehova. E taku bwa a aki kairoroia ana karo nakon te bwabetito. “I kakoauaa bwa aio te kabanea n nakoraoi ibukina bwa iai mwina ae nakoraoi. N te katoto, tabeman rooro-n-rikirake ake I rangi n irekereke ma ngaiia, a bane ni boonnanoia bwa a na uaia ni bwabetitoaki. E ngae ngke e raoiroi anne, ma I ataia bwa tabeman a karaoia ibukin rotakin nanoia, ma imwin tabeua te tai ao e a totonako naba ingaingan nanoia arei ni kaineti ma waakin te Tautaeka n Uea. I aki ngai imanonoaki irouia au karo bwa N na motinnanoia bwa N na katabua maiu nako Iehova. E bon nako mai nanou.”

Taben te Ekaretia

Tabeman ake a ataei riki, a reiakina te koaua n ana Taeka te Atua i bon irouia, n akea aia ibuobuoki aia karo. E bon aki bebete irouia reiakinan karaoan ae eti ao kateimatoan maiuakinana.

E uringa aron kakabwaiana Noé n te koaua, bwa ma ngke e rangi n uarereke, ao e rangi ni kai un ao e iowawa. Ma ngke e a moana ana reirei n te Baibara ngke ai 14 ana ririki, ao e a moanna ni kerikaki ununna, n te aro are a kubanako iai ana karo ake a aki kan reirei n te Baibara n te tai anne, ao a rangi ni kukurei iai. Ngke e a tabe n rikirake Noé n te itera n taamnei, e a kani kabanea maiuna ni beku iroun te Atua. E a riki ngkai teuaei bwa te minita ae kabwanina ana tai iai.

E karaoa naba anne Alejandro, bwa e moana kan ongorana n te koaua ni Kristian ma ngke e rangi n uarereke, e ngae ngke a aki kan ongora ana karo. E kamataataa nanona ni kani kaitau ibukin te koaua ngke e kangai: “I kaikawaaki n te utu ae e bwainaki te katei ni Katorika iai. Ma e rikirake i nanou tangiran te koaua ni Komuniti are akea iai te Atua, ibukina bwa au Aro e aki kona ni kaekai titiraki ake a a kaman aki karaua nanou boni ma ngke I rangi n uarereke. E buokai ana botaki Iehova ni karekea ataakin te Atua. E boni kamaiuai te atatai aei ibukina bwa ngke arona bwa I aki reirei n te Baibara, ao N na boni bae n irekereke ma te wene ni bure, te mamanging ke kabonganan taian drug. N na boni bae naba ni kaaina te kaeng ni karitei, ao ni karekei naba uana aika a kammaraki.”

E na kanga te roro-n-rikirake ni kateimatoaa ukoukoran te koaua irouna n akea te ibuobuoki mairouia ana karo? E teretere bwa e rangi ni kainnanoaki aia mwakuri unimwaane ao kaain te ekaretia tabeman riki. E kangai Noé: “I aki kona ni maroaa, ibukina bwa e teimatoa ni kaaniai Iehova. E bati naba te boutoka mairouia taari aika tatangira ake a a riki bwa tamau, tinau, tariu, ao mwaneu n te itera n taamnei.” E a beku ngkai i Beta-era ao e a kabongana ana tai ni beku ibukin te Atua. E taekina naba ae kangai Alejandro: “Te bwai ae I aki toki ni kimwareirei iai bon arou ni kakabwaiaki ngkai I a mena n te ekaretia are unimwaane iai a tabeakinai n te tangira. I rangi ni kukurei naba ibukina bwa ngke I moana reireiu n te Baibara ngke ai 16 au ririki, te kakan mwaairiri are a rorotaki iai kaain te roro-n-rikirake e bon rotai naba. Ma a aki katukai ma arou kaain te ekaretia. E na boni bae n iai n taai nako ae a kaotiota te akoi nakoiu n aki tii kairai nakon mwengaia ke ni kaamwarakeai, ma a tangirai naba.” Ai 13 tabun ana ririki ngkai Alejandro ni karaoa te mwakuri ni minita ni kabwanina ana tai iai.

Tabeman aomata a iangoia bwa te Aro e tii kaineti nakoia aomata ake a a ikawai riki. Ma e ngae n anne, a bati aika a rangi n ataei aika a a tia n reiakina ana koaua te Baibara ma ngke a rangi n uarereke ao a a tangira ngkai Iehova ma n teimatoa ni kakaonimaki irouna. E kona ni kabonganaki nakoia rooro-n-rikirake aikai ana taeka Tawita are e koreaki n Taian Areru 110:3: “A kan anga ngaiia am aomata ni bongini mwakam, n tamaroan te raoiroi: Bon iai aoin am bong n ataei mai nanoni biroton te karangaina.”

E bon rangi ni kangaanga bwa a na reiakina te koaua te koraki ake a ataei riki ao n teimatoa iai. Ai kakukurei ra norakiia aika a mwaiti bwa a teimatoa ni kaaina ana botaki Iehova, ni kaakaei botaki ni kabane, ao ni kakaonimaki n reirei te Baibara. Karaoana irouia a a tia iai ni karekea tangiran raoi ana Taeka te Atua ao te beku ibukina!​—Taian Areru 119:15, 16.

[Kabwarabwara ae nano]