E Oota Mimitongin Iehova I Aoia Ana Aomata
“Bon ootam ae akea tokina Iehova.”—ITAIA 60:20.
1. Tera aron Iehova ni kakabwaiaia ana aomata aika kakaonimaki?
“E KUKUREI Iehova iroun ana botanaomata: E na katamaroaia akana nimamanei n te maiu.” (Taian Areru 149:4) Ao anne ae e taekinna te tia areru ngkoa, ao e kamatoaki koauana n rongorongon rimoa. E tabeakinia ana aomata Iehova ao e kakabwaiaa aia mwakuri ma ni kamanoia naba, ngkana a kakaonimaki nakoina. N taai ake rimoa, ao e katokanikaiia i aoia aia kairiribai. Ni boong aikai, e kateimatoaia n te itera n taamnei ao e kakoauaa nakoia kamaiuakiia ae boto i aon ana karea ni kaboomwi Iesu. (I-Rom 5:9) E karaoa aei ibukina bwa a tamaroa i matana.
2. Tera ae a kakoauaa ana aomata te Atua, e ngae ngke a kaaitara ma waaki n totoko?
2 E koaua bwa n te aonnaba ae otabwaniniaki n te rotongitong aei, ao te koraki ake a “kani kabane aia bongi ni maiu n tangiran te Atua,” a na kaaitara ma kangaanga. (2 Timoteo 3:12) E ngae n anne, ma Iehova e nori aia mwakuri taani kairiribai, ao e kauringia ni kangai: “E na mauna te botanaomata ma te aba ae iai ueana, aika rawa n toro i Roum; eng, a na boni bati n uruaki botanaomata akanne.” (Itaia 60:12) A rangi ni mwaiti waaki n totoko ni boong aikai. N aaba tabeua, taani kaitaraa ara waaki, a kataia n tiatiana ke ni boni katoka aia taromauri Kristian ni koaua nakon Iehova. N aaba tabeua riki, taan iowawa a batiboia taan taromauria Iehova ao a kabueki naba aia bwai. Ma uringnga, bwa e a tia Iehova n iangoa rekenikaia taani kakaitaraa ana waaki. A na aki tokanikai te koraki ake a eekanako Tion, ae rabwatanaki irouia natina aika i aon te aba. Tiaki te koaua bwa a rangi ni kakukurei taeka ni kaungaunga aika roko mairoun Atuara ae kakannato ae Iehova?
Te Kakabwaia ae Riaon ae Kaantaningaki
3. E a kanga ni kabwarabwaraki aron tamaroaia ao uaan aia mwakuri taan taromauria Iehova?
3 Ni koauana, e a tia Iehova ni kakabwaiaia ana aomata n te aro ae e a riaon ae kaantaningaki, ni kabanean bongin te waaki ae buakaka aei. E moamoa riki bwa e a tia ni katamaroaa ana tabo n taromauri ao te koraki ake a taboa arana. N aron are e kaotaki n ana taetae ni burabeti Itaia, ao e taku Iehova nakon Tion: “E na nako im katamaroan Rebanon, ma te maiango, ma te bureen, ma te teatura; ba e aonga ni katamaroaki neni maneabau ae tabu, ao N na kamimitongia neni waeu.” (Itaia 60:13) E rangi ni kantara taraakin maunga aika rabunaki ni kaai aika manguroroo. Mangaia are kaai aika manguroroo aikai boni kanikinaean tamaroaia ao uaan aia mwakuri taan taromauria Iehova.—Itaia 41:19; 55:13.
4. Tera te ‘maneaba ae tabu’ ma ‘nneni waen Iehova,’ ao a kanga ni katamaroaki?
4 Tera te ‘maneaba ae tabu’ ma ‘nneni waen Iehova’ ake a taekinaki n Itaia 60:13? Taeka aikai a nanona te oo are i tinanikun ana tembora n taamnei are kakannato Iehova, are nanonaki iai te babaire ibukin taromauriana rinanon Iesu Kristo. (Ebera 8:1-5; 9:2-10, 23) E a tia Iehova ni kaota ana kaantaninga ae e na katamaroaa te tembora n taamnei anne, rinanon ikoikotakia aomata mai buakoia botannaomata nako bwa a na roko n taromauri iai. (Akai 2:7) E a kaman nora te koraki ae uanao aei Itaia mai buakoia botannaomata nako, bwa a raanga nakon ana maunga n taromauri Iehova ae karietataki. (Itaia 2:1-4) Tebubua tabun te ririki imwina, ao te abotoro Ioane e a nora “te koraki ae uanao, ae e aki kona temanna ni warekia, mai buakoia botanaomata ni kabaneia, ma baronga ma natanaomata ma taian taetae ni bane.” Te koraki aei a tei “i nanoaan ana kaintokanuea te Atua; ao a toro i Rouna ni ngaina ao ni bong ni maneabana.” (Te Kaotioti 7:9, 15) Ngkai a a tabe ni kakoroaki bukin taetae ni burabeti aikai, ao ti a kona n noria bwa e a tia ni katamaroaki ana tembora Iehova.
5. Tera te bitaki ae moan te raoiroi are e reke irouia natin Tion?
5 Ai korakora ra te rikirake ae e a tia n riki nakon Tion! E taku Iehova: “Ngkai ko kitanaki ma n ribaki, ae akea temanna ae ri nukam iai, ao N na karikiko ba te bwai ae moan te raoiroi ae akea tokina, ae te bwai ni kakatonga irouia rooro ma rooro.” (Itaia 60:15) Ni kaania tokin te moani buaka are kabuta te aonnaba ao a rinanon te tai ni kamaroaa “ana Iteraera te Atua.” (I-Karatia 6:16) E namakina ‘te maroaa’ ana Iteraera te Atua, ibukina bwa a aki mataata raoi n nanon te Atua, natina ake i aon te aba. Ma e a manga kamarurungia ana toro Iehova aika kabiraki n 1919, ao mai ikanne are e a kakabwaiaia naba ni kaubwai n taamnei aika kamimi. E aki ngkanne kaingaingaa te nano te berita ae taekinaki n te kibu aei? Iehova e na taraa Tion bwa “te bwai ae moan te raoiroi.” Eng, a na uaia ni kakatonga natin Tion ao Iehova iroun Tion. E na riki Tion bwa “te bwai ni kakatonga” ae e karika te kimwareirei ae bati, ae e na teimatoa. Akoakin Tion, are e rabwatanaki irouia natina ake i aon te aba, e na teimatoa “irouia rooro ma rooro.” Bon akea tokina.
6. Tera aroia Kristian ni koaua ni kabonganai aia bwaikoraki te natannaomata?
6 Ongora nakon ana berita te Atua ae teuana aei. E taku Iehova nakon Tion: “Ane ko na mammaa rannimammaia botanaomata, ma ni mammaa naba rannimammani banibania uea: ao ko na ataai ba bon am tia kamaiu Ngai ae Iehova, ao te tia kaboko, ae Atuaia Iakoba ae Mwaka.” (Itaia 60:16) E a kanga Tion ni “mammaa rannimammaia botanaomata ma ni mammaa naba rannimammani banibania uea”? N te aro are Kristian aika kabiraki ao raoia aika “tiibu tabemang” a kabonganai aia bwaikoraki te natannaomata ibukin kanakoraoan te taromauri ae itiaki. (Ioane 10:16) Bwaintangira aika aki-tebonaki, a buoka aron waakinan te mwakuri n uarongorongo ni katobibia te aonnaba ao te mwakuri n angareirei. Kabonganan rabakau aika boou e a buoka aron boretiakin Baibara ao booki aika aanaki n te Baibara, n taetae aika mwaiti. Ni boong aikai, e a rababa nako riki reken te koaua man te Baibara irouia aomata, nakon are mai mwaina. A mwaiti aomata aika a tabe n reiakinna bwa Iehova are e kainaaomataia ana toro aika kabiraki man te tautoronaki n taamnei, boni ngaia te tia Kamaiu.
Katamaroan Taiani Babaire Ibukin Waakinan Ara Botaki
7. Tera te katamaroa ae rangi ni kamimi are a namakinna natin Tion?
7 E a tia Iehova ni katamaroaia ana aomata n te anga teuana. E a tia ni kakabwaiaiia ni kaineti ma katamaroan aia babaire ibukin waakinan aia botaki. E taku Itaia 60:17: “N na uota mai te koora n onea mwin te burati, ao N na uota mai te tirewa n onea mwin te biti, ao N na onea mwin te kai n te burati, ao N na onoi mwin atibu n te biti: ao N na karaoa te Raoi ba am tia tautaeka, ao te Raoiroi ba te tia taua arom.” Onean mwin te burati n te koora, bon te katamaroa, ao ai tii te arona naba ma ake tabeua ake a taekinaki iai. Ni kaineti ma aei, a a tia ni katamaroaki taiani babaire ibukin waakinan aia botaki ana Iteraera te Atua, teutana imwin teutana i nanoni boong aika kaitira aikai. Iangoi katoto tabeua.
8-10. Kabwarabwarai katamaroa tabeua ake a karaoaki ni kaineti ma babaire ibukin waakinan ara botaki, ake a a tia ni kanakoraoaki man 1919.
8 Imwain 1919, aia ekaretia ana aomata te Atua, a kairaki irouia unimwaane ma riikan, ake a rineaki n te kaotinano irouia kaain te ekaretia. Ma ni moa man 1919, “te toro ae kakaonimaki ae wanawana” e a rinea te mataniwi ibukin te mwakuri ni katoai ekaretia nako, ae ngaia ae e na tararuaa te mwakuri n uarongorongo. (Mataio 24:45-47) Ma e aki nakoraoi te babaire anne n ekaretia aika mwaiti, ibukina bwa tabeman unimwaane a aki boutokaa tataekinan te euangkerio. Ngaia are n 1932, ao a a kaongoaki ekaretia nako bwa a na aki manga rineia unimwaane ma riikan n te kaotinano. N onean mwin anne, a nang bon rineia mwaane aika a na beku bwa kaain te komete ibukin te mwakuri, aika a na uaia ni beku ma te mataniwi ibukin te mwakuri. Anne ai aron “te burati” ae e onea mwin “te kai,” are oti iai te katamaroa ae korakora!
9 N 1938, ekaretia nako ni katobibia te aonnaba, a iangoia bwa a na kabongana te babaire ae nakoraoi riki aei, are e a botau riki ma ana taeka te Baibara. E a tararuaki ana waaki nako te ekaretia iroun te mataniwi ae te tia babaire ao taari tabeman ake a rineaki iroun te toro ae kakaonimaki ae wanawana. Ai akea riki te kaotinano, bwa kateaia aomata nakon te nakoa n te ekaretia, e a waakinaki i aan ana kairiri te Atua! Ao anne ai aron “te biti” are e onea mwin te “atibu,” ao “te koora” are e onea mwin “te burati.”
10 Mai ikanne are e a waakinako iai te katamaroa. N te katoto, n 1972 e noraki bwa tararuakin taian ekaretia iroun te rabwata n unimwaane ae kateaki i aan ana babaire te Atua, e a boraoi riki ma are waakinaki i nanon aia ekaretia Kristian n te moan tienture. Mangaia are akea temanna te unimwaane i buakoia ae e mwaaka riki nakoia unimwaane ake tabeman. Irarikin anne, tao uoua te ririki n nako ao e a manga karaoaki te katamaroa riki teuana. Iai te bitaki ni kaineti ma kaain te baba n tararua ni botaki tabeua ake a kabonganaki iroura aika kinaaki iroun te tautaeka. E karaoaki aei bwa e aonga ni boni kona te Rabwata n Tautaeka, n tararuai riki kainnanoia ana aomata te Atua n te itera n taamnei, nakon are e nang tii tabeakin naba waakinan botaki aikai.
11. Antai ae e boutokaa katamaroan taiani babaire ibukin waakinan aia botaki ana aomata Iehova, ao tera uaan te katamaroa aei?
11 Antai ae e boutokai bitaki aikai? Bon Iehova ae te Atua. Bwa boni ngaia are kangai: “N na uota mai te koora.” Ao bon ngaia naba are e reitia ni kangai: “N na karaoa te Raoi ba am tia tau-taeka, ao te Raoiroi ba te tia taua arom.” Eng, bon Iehova ae tabe ma tararuakia ana aomata. Katamaroan taiani babaire ibukin ana botaki ake a taetae ni burabetinaki, bon teuana naba ana anga Iehova ni katamaroaia iai ana aomata. Ao ibukin anne, a mwaiti kakabwaia ake a a tia n reke nakoia Ana Tia Kakoaua Iehova. Bwa ti wareka ae kangai n Itaia 60:18: “Ane e na aki manga ongo te aba te tiritiri i abam, ma te ururu ma te urubwai i nanon tiam; ma ko na aran am nono ba Kamaiuaki, ao am mataroa ba Kamoamoaki.” Ai tamaroa ra taeka aikai! Ma a na kanga ni kakoroaki bukiia?
12. E a kanga te rau n riki bwa anuani maiuia Kristian ni koaua?
12 A rangi ni kani kairaki Kristian ni koaua n ana kaetieti Iehova ao ana kairiri, ao uaan kani kairakiia, e a taetae ni burabetinaki iroun Itaia ni kangai: “A na bane natim n reireiaki iroun Iehova; ao e na korakora aia rau natim.” (Itaia 54:13) Irarikin naba anne, e mwamwakuri taamnein Iehova i aoia ana aomata, ao uaan te taamnei anne teuana bon te rau. (I-Karatia 5:22, 23) Aroia ana aomata Iehova n rau, e a karikiia bwa kaanga nne ni katantan aika raraoi n te aonnaba ae karuanikai aei. Te rau i marenaia Kristian ni koaua aikai are e boboto i aon aia itangitangiri, boni bannan te maeka n te aonnaba ae boou. (Ioane 15:17; I-Korote 3:14) Akea te nanououa bwa ngaira ni kabane, ti kani kimwareirei ao ni kateimatoaa te rau are e na karekea neboan ao karinean Atuara, ao ngaia naba te aroaro are e boboto i aona reken te maiu n te baretaiti n taamnei!—Itaia 11:9.
E na Teimatoa ni Kaotaa Ootana Iehova
13. Bukin tera bwa ti kona ni kakoauaa ae e na bon aki toki ootan Iehova i aoia ana aomata?
13 E na teimatoa ootan Iehova i aoia ana aomata? Eng, bwa ti wareka ae kangai n Itaia 60:19, 20: “Ao tiaki ootam rimwi taai ni ngaina; ao e na aki mama naba namakaina nako im ba raneaneam: ma bon ootam ae akea tokina Iehova, ao karineam Atuam. Ane e na aki manga bung am taai, ao e na aki uotaki nako am namakaina: ba bon ootam ae akea tokina Iehova, ao a na toki am bong n tang.” Ngke e a roko n tokina ‘tangia’ taan taenikai n taamnei n 1919, ao Iehova e a moana naba kaotaan ootana i aoia. E a raka ngkai i aon 80 te ririki imwin anne, ao ae a bon teimatoa naba ni kimwareirei n akoaia iroun Iehova, ngkai e teimatoa ni kaotaa ootana i aoia. E na bon akea tokin ootana. Ni kaineti ma taan taromauria ni koaua, e na aki ‘toki ootan’ Atuara n ai aron taai ke n ‘toki maamana’ n aron namwakaina. E na kaootaia n aki totoki. Ai raoiroi ra ataakin aei iroura kioina ngkai ti maeka n te aonnaba ae mena n te rotongitong!
14, 15. (a) N te aro raa ae a “raoiroi” iai ana aomata te Atua ni kabaneia? (b) Ni kaineti ma Itaia 60:21, tera riki kakoroan bukin te taetae ni burabeti aei ae kakawaki, are a kakaantaningaia tiibu tabemwaang?
14 Ongora n ana berita riki Iehova ae e taekinna, ni kaineti ma taan tei ibukin Tion aika mena i aon te aba, ae taekaia ana Iteraera te Atua. E taku Itaia 60:21: “Ane a na bane naba n raoiroi am aomata, a na abana te aba n aki toki; ae te bwebwe ae I unikia, ae ana makuri baiu, ba I aonga n neboaki.” E rangi n okoro aroia Kristian aika kabiraki ake a kamarurungaki n 1919 bwa a na manga waakina aia mwakuri. A a “karaoiroaki” ibukin korakoran onimakinan ana karea ni kaboomwi Kristo Iesu, e ngae ngke a mena n te aonnaba ae korakora iai te bure. (I-Rom 3:24; 5:1) Ao ngkanne, a katotongia tibun Iteraera ake a kainaaomataki man te tautoronaki i Baburon, n aroia ni karekea “te aba” n taamnei, ke te tabo ni mwakuri ae a na kukurei iai n te baretaiti n taamnei. (Itaia 66:8) E na bon aki bua tamaroan te aba anne, ibukina bwa te natannaomata ae ana Iteraera te Atua, e na bon teimatoa ni kakaonimaki, n tiaki aroia tibun Iteraera ngkoa. Aia onimaki, nanomwaakaia, ao ingaingan nanoia, e na karekea te neboaki nakon aran te Atua n aki totoki.
15 Kaain te natannaomata n taamnei anne ni kabane, a a tia n riki bwa kaain te berita ae boou. A a bane ni karinaki i nanoia ana tua nako Iehova, ao e a tia naba Iehova ni kabwarai aia bure rinanon ana karea ni kaboomwi Iesu. (Ieremia 31:31-34) E karaoiroia ma n atongia bwa ‘natina,’ ao e mwakuri ma ngaiia n aroia aomata aika a kororaoi. (I-Rom 8:15, 16, 29, 30) E a tia naba ni kabwaraki aia bure raoia ake tiibu tabemwaang rinanon ana karea ni kaboomwi Iesu, ao n ai aron Aberaam, a a tia n atongaki bwa a raoiroi n riki bwa raoraon te Atua, ibukina bwa a onimaki. “A teboki niniraia, ao a kamainainai n raraan te Tiibutetei.” Te koraki n tiibu aei, a a kaantaningaa ngkai te kakabwaia ae kamimi ae mena imwaia. Imwin kamaiuaia man “te rawawata are korakora” ke imwin manga-utiia, ao a nang bon nora raoi kakoroan bukin ana taeka Itaia 60:21, ngkana e a onikaki te aonnaba ni kabuta nakon te baretaiti. (Te Kaotioti 7:14; I-Rom 4:1-3) N te tai anne, “a na abana te aba akana nimamanei; ao a na kukurei ni kabatian te raoi.”—Taian Areru 37:11, 29.
E Waaki Nako te Rikirake
16. Tera te berita ae moan te kamimi are e karaoia Iehova, ao e a kanga n tia ni kakoroaki bukina?
16 Ni kabanean kibun Itaia 60, ao ti wareka ana kabanea ni berita Iehova n te mwakoro aei. E taku Iehova nakon Tion: “Ane e na riki bwa tenga temanna ae uarereke, ao temanna ae karako e na riki ba te botanaomata ae korakora. N na barekia ni bongina Ngai ae Iehova.” (Itaia 60:22) E a tia ni koro bukin ana berita Iehova i nanoni boong aikai. Ngke a a manga kamarurungaki Kristian ake a kabiraki, n 1919, ao e boni karako mwaitiia, bwa ai aron “temanna ae uarereke” ngaiia. Ma e a rikirake mwaitiia ngke a a manga raonaki riki irouia I-Iteraera n taamnei tabeman ake a ikoikotaki ma ngaiia. Ao imwina, tiibu tabemwaang a a moanna n raanga nakoia n te mwaiti ae e a korakora riki. Aroia ana aomata te Atua n rau n aia baretaiti n taamnei are i ‘abaia,’ e a tia n atikia aomata aika mwaiti aika raoiroi nanoia, n te aro are e a riki iai “temanna ae uarereke” bwa “te botanaomata ae korakora.” “Te botanaomata” aei e kaainaki irouia ana Iteraera te Atua ao “ianena” aika katabuaki, ae e a riaon onoua te mirion ngkai mwaitiia. Mwaitiia kaain te botannaomata aei e a bati riki nakon mwaitiia kaain aaba aika bati. (Itaia 60:10) A bane kaaina ni kaotaa ootan Iehova, ao aroia anne e a karekea tamaroaia i matan Iehova.
17. Tera aron rotakin nanom ni maroroakinan Itaia mwakorona 60?
17 Eng, e a kakorakoraki ara onimaki n neneran reirei aika kakawaki riki ake n Itaia mwakorona 60. E karaunano ataakin ae Iehova e a kaman ataia bwa a na kabureaki ana aomata n te aro n taamnei, ao man kainaaomataki imwina. E kamimi naba bwa Iehova e a kaman ataia ae e na rikirake mwaitiia taan taromauria ni koaua ni boong aikai. Ao ai raoiroi ra riki ururingan are e na bon aki kitanira Iehova! Ai bati ra te tangira ae kaotaki nakoira ni kakoauan ae e na teimatoa n uki mataroan “te kawa” bwa a aonga ni butimwaeaki te koraki “ake a rineaki nakon te maiu are aki toki”! (Mwakuri 13:48) E na teimatoa Iehova ni kaotaia ana aomata. E na teimatoa ni kakatonga Tion ngkai a a karababa nako te oota natina. (Mataio 5:16) Akea te nanououa bwa a korakora nanora ni kani kateimatoaa ara iraorao ma ana Iteraera te Atua, ma n taku bwa ti kakabwaiaki ngkai ti kona ni kaotiota ana oota Iehova!
Ko Kona ni Kabwarabwaraa?
• Tera ae ti rangi ni kakoauaa, e ngae ngkana ti kaaitara ma waaki n totoko?
• A kanga natin Tion ni “mammaa rannimammaia botanaomata”?
• E kanga Iehova n “onea mwin te kai n te burati”?
• Baikara aroaro aika uoua ake a kateretereaki n Itaia 60:17, 21?
• E a kanga “temanna ae uarereke” n “riki ba te botanaomata ae korakora”?
[Te bwaoki/Taamnei n iteraniba 16]
ANA TAETAE NI BURABETI ITAIA—Te Oota Ibukia Aomata Nako
Angiin reirei aika i nanoni kaongora aikai a kaotaki n te kabwarabwara are e karaoaki n te Bwabwaro n Aono n 2001/02, ae atuna “Taan Angareirei n Ana Taeka te Atua.” N angiin taabo ake a karaoaki iai kabwarabwara aikai, ao te tia kabwarabwara, e katanoataa te boki ae boou ae Isaiah’s Prophecy—Light for All Mankind, Volume Two. N te ririki are mai mwaina, ao e katanoataki te boki ae boou ae Isaiah’s Prophecy—Light for All Mankind, Volume One. E a toamau ngkai maroroakinan angiin kibun nako Itaia, ngkai e a otinako te boki ae boou aei. Booki aika uoua aikai, a rangi n ibuobuoki n te aro are a a karikirakea riki ara atatai ao ara kakaitau, ibukin ana taetae ni burabeti Itaia ake a kakorakoraa riki ara onimaki.
[Taamnei n iteraniba 13]
E ‘katamaroaia ana aomata Iehova n te maiu,’ e ngae ngke a bwainikirinaki
[Taamnei n iteraniba 14]
Ana aomata te Atua, a kabonganai aia bwaikoraki te natannaomata ibukin karikirakean te taromauri ae itiaki
[Taamnei n iteraniba 15]
E a tia Iehova ni kakabwaiaia ana aomata ngke e katamaroai taiani babaire ibukin waakinan aia botaki, ao e angania te rau