Te Tai ae Riai Ibukin Kaotan te Bwai ae Karabaki Ngkoa
Kawakinan bwaai tabeua aika raba n aki taetaekin, e kona ni karekea te rau ma n totokoa te kauntaeka. Ma, iai te tai ae e riai ni kaotaki iai te bwai are karabaki taekana ngkoa? Nora ae e taekinna te burabeti ae Amota ni kaineti ma Atuana: “E na bon aki karaoa te bwai teuana te Uea ae Iehova, ngkana e aki kaota moa nanona ae raba nakoia ana toro aika burabeti.” (Amota 3:7) Bon iai reireiara n taeka aikai, ni kaineti ma bwaai aika raba. Iehova e kona ni karabai bwaai tabeua n aki kaotii i nanon tabeua te tai, ma imwina riki, e kona ni manga boni kaotia nakoia tabeman. Ti na kanga ngkanne ni kona ni katotonga Iehova iai?
A a tia n noria taani kawakina te ekaretia aika rineaki, bwa iai taai tabeua ae e raoiroi riki ngkana a aki kaotaki moa bwaai tabeua nakoia kaain te ekaretia ni Kristian. (Mwakuri 20:28) N aron anne, ibukin iangoan kabwaian te ekaretia, a kona ni baireia bwa a na aki kaotaki moa babaire ke bitaki ibukin mwioko tabeua i nanon te ekaretia, ni karokoa te tai are e a tia ni katauaki bwa a na kaotaki iai.
Ngkana e karaoaki anne, e riai ni kaotaki nakoia aomata aika irekereke iai bwa e na kaotaki anne nakoia kaain te ekaretia ke e na aki. Ao ngkana e na kaotaki, e na baireaki bwa n ningai, ao n te aro raa. A na kona ni buokaki aomata bwa a na aki tataekina te bwai are karabaki, ngkana a ataa te tai are e riai n taekinaki iai.—Taeka N Rabakau 25:9.