“A i Nako”
“E rabuniia marawa: a i nako i marawa n ai aron te atibu.”
AIKAI mwaneweni kunaia Mote ao tibun Iteraera ngke a tabe ni bukamarua kauringan kamaiuaia ngkoa mai nanon te Nama ae Uraura, ao kamaunakia aia kairiribai ake kaain Aikubita, are taekan Barao ma ana taanga ni buaka ae korakora, ake a kakioiia.—Te Otinako 15:4, 5.
Aomata nako ake tao a nora te bwai are e riki arei, a na rangi ni mataata n te reirei ae kona n reke mai iai. Akea te aomata ae kona n teimatoa ni maiu ngkana e karitei ke e ekanako mwaakan Iehova n tautaeka. Tabeua te namwakaina imwina, ao bwakuakun Iteraera ake Kora, Natan ao Abiram, ake a boutokaaki irouia aomata aika 250 mwaitiia, a karitei nakon Mote ao Aaron, ake a anganaki te mwaaka ni kairiri mairoun te Atua.—Warekaia Iteraera 16:1-3.
I aan ana kairiri Iehova, e kauringia tibun Iteraera Mote bwa a na kerikaki man umwaia taani karitei. A rawa ni bita aia iango Natan ao Abiram, ao a iranaki irouia kaain bataia. E katanoataa ngkanne Mote bwa iai te bwai ae e na karaoia Iehova nakoia aomata, bwa a aonga n oota raoi n aroaroia mwaane aikai are a a bon tia n “riba Iehova.” Ni bon te tai naba arei, ao e a katabwenaa naba aontano Iehova are te tabo are a tei iai. “Ao ngaiia, ma aia bwai ni kabane, a i nako nako Tiore: ao e a manga bono aontano i aoia.” Ao tera aron Kora ma taani karitei ake tabeman? “E otinako te ai mairoun Iehova, ao e kania uabubua ma nimangaun te aomata ake a anga te karea are boiarara.”—Warekaia Iteraera 16:23-35; 26:10.
A bane ni kamaunaki Barao ma ana taanga ni buaka, n ikotaki naba ma naake a karitei ni kabane n te rereua, kioina ngke a kakeaa bongan mwaakan Iehova n tautaeka, ao nanona ni mutiakini aroaroia ana aomata. Aomata ni kabane aika a kani kawakinaki iroun Iehova i nanoni boong aika kaitira aikai, a riai ni kaumakiia bwa a na reirei taekan Iehova ma n ongeaba irouna, kioina ngkai boni ngaia “Teuare Moan te Rietata” ao “Teuare Moan te Mwaka.” Ni karaoan aei, a kona ngkanne ni mutiakin ana taeka ni karaunano Iehova aikai: “A na bwaka tenga te aomata i rarikim, ao terebu i angaataim; ma e na aki kaaniko. Ane ko na ti taratara ni matam, ma n nora karekeani kaiia akana buakaka. [Bwa ko kangai] Boni neu ni kamaiu Ngkoe ae Iehova! Ko taua Teuare Moan te Rietata ba nem ni maeka.”—Taian Areru 91:1, 7-9.