“Bane Mai Nako Iu, . . . Ao N Na Motiki Rawami”

Botaki Aika A Kaungaa te Tangira ma Mwakuri Aika Raraoi

MAI Toronto nako Tokyo, mai Moscow nako Montevideo, mirion ma mirion mwaitiia Ana Tia Kakoaua Iehova ma raoraoia, aika a bane n raanga nakon aia tabo n taromauri, tabeua te tai ni katoa wiki. I buakoia aomata aikai iai kaaro aika nimamate imwin aia kakorakora ni mwakuri ni kabongnga; buu-aine ao tiina aika tataningamarau ni mwakuri a irianaki irouia natiia aika uarereke; rooro-n-rikirake aika korakora aika kabwanina aia bong n reirei; kaara aika mamaara aika waeremweremwe ibukin te maraki; aine aika ninikoria aika a a tia ni mate buuia ao ataei aika akea tamaia ke tinaia; ao aomata aika a bwara nanoia ao a kainnanoa te karaunano.

Ana Tia Kakoaua Iehova aikai a kabonganai aeka ni bao ni mwamwananga aika mwaiti, n aron te turein ae rangi ni butimwaaka, te aati, te motokaa ae buti ni kawai i aantano aika wariki, ao ai te turaki. Tabeman a rinanon karaanga aika on n taiani korokorotaire, ao tabeman a kananomwaakaia e ngae ngke a maraa ni baoia aika buti ni kawaini kaawa aika bubura. Bukin tera bwa aomata aikai a rangi ni kabanei korakoraia iai?

Oina raoi, bwa kaaean botaki ni Kristian ao karaoan te ibuobuoki iai bon te anga teuana ae kakawaki ibukin taromaurian Iehova ae te Atua. (Ebera 13:15) E taekina naba bukina teuana riki te abotoro Bauro ngke e korea aei: “Ti na i taratara n iangoi arora ba ti aonga ni keiakinira ni karika te tangira ma makuri aika raraoi. Ao ti na tai kaki te bobotira, . . . ma ti na taetae n i kauungaira i roura; ni kakorakoraira riki iai n te aro ane kam nora te Bong arei ba e a kan roko.” (Ebera 10:24, 25) Bauro e katotonga ikai aron ana namakin te tia areru are Tawita ngke e anenea aei: “I kukurei ngke a kangai nako iu, Ti na nako ni maneaban Iehova.”​—Taian Areru 122:1.

Bukin tera bwa a kimwareirei Kristian n rokoia n aia botaki? Ibukina bwa naake a roko bon tiaki tii taan ongora, ma e a reke aia tai naba n ikikina riki i marenaia. Ma ae moamoa riki, botaki aikai a karekei aia tai n anganga, ao tiaki tii n ae a na anganganaki. Ao a kona ni kaungaia i marenaia bwa a na kaotiota te tangira ma ni karaoi mwakuri aika raraoi. Aio are e kariki bobotaki bwa taai ni kaunganano. Irarikin anne, botaki ni Kristian boni ngaia naba te anga teuana are e a koro bukin ana berita Iesu iai: “Bane mai nako Iu, . . . ao N na motiki rawami.”​—Mataio 11:28.

Te Tabo ni Kabebetei Naano ao ni Mwaneaki

Bon iai bukina aika raraoi irouia Ana Tia Kakoaua Iehova ngkai a iangoa aia bobotaki bwa taai ni kamarurung. Bukina teuana, bwa ni bobotaki aikai a aki toki n anganganaki iai kanaia n taamnei n te tai ae riai, iroun “te toro ae kakaonimaki ae wanawana.” (Mataio 24:45) Botaki aikai a kataneiaia naba ana toro Iehova bwa a na mwaatai n anga reirei n ana Taeka te Atua ma te ingainga n nano. Iai n te Maneaba n Uea raao aika tatangira, aika mwamwannano, ao a tauraoi ma ni kukurei ni buokia aomata aika taonaki n te rawawata.​—2 I-Korinto 7:5-7.

Aio ngkanne ana namakin Nei Phillis ae te aine ae e a tia ni mate buuna, ngke a uarereke natina, bwa temanna waniua ana ririki ao are temanna, nimaua ana ririki. E kabwarabwaraa aron kabebeteana ma natina are e reke man taian bobotaki ni Kristian ni kangai: “Boni moan te karaunano kawaran te Maneaba n Uea ibukina bwa a aki toki ni kakaotiota iai aia tangira ao aia mwamwannano raao n onimaki n aron te irabwati, taekinan te kibu teuana man te Baibara, ke te taubai ni kamauri. Bon aei te tabo ae I kan tiku iai n taai nako.”​—1 I-Tetaronike 5:14.

Imwin karaoan te korokoro ae rangi ni bubura nakon Nei Marie, e tuangnga ana taokita bwa e na mao manekana imwin onoua te wiki, ao i nanon te tai aei, e a bon aki kona ni kaakaei ana botaki Nei Marie. E noria ana taokita bwa ai tiaki aron kukurein neiei, ao ngke e a ataia bwa e riki anne ibukina bwa e tuai man kaakaea ana botaki, ngaia are e a kaungaa bwa e na roroko iai. E kaeka Nei Marie bwa ngkai tiaki kaain ana Aro buuna, e aki kona ni kariaia bwa e na kaea ana botaki ibukin aorakina. Mangaia are e a korea ana ota te taokita, n “tuatua” bwa e na nako Nei Marie nakon te Maneaba n Uea ibukin kaungan nanona n te iraorao ae raoiroi. E kangai ana kabanea n taeka Nei Marie: “Imwin kaean teuana te botaki irou, I a namakina te marurung riki nakon are mai imwaina. I a moanna n amwarake, I matu ni kangaina n te tairiki anne, e a kerikaki mwaitin bwainnaoraki ni katoka te maraki aika I kainnanoi, ao I a manga ngarengare n arou are mai imwaina!”​—Taeka N Rabakau 16:24.

Te tangira ae kaotiotaki ni bobotaki ni Kristian e a noraki naba irouia aomata ake i tinanikun te ekaretia. Temanna ataein te kuura ae rietata e rineia Ana Tia Kakoaua Iehova bwa e na korea rongorongoia bwa kanoan ana ethnology class. Ni kaineti ma taraakin te botaki irouna, e korea ae kangai: “Aron butimwaeau . . . e rangi ni katika nanou ma au kaantaninga . . . Te nano n iraorao i marenaia Ana Tia Kakoaua Iehova, boni ngaia te aroaro ae kai noraki ao e rangi ni kakawaki.”​—1 I-Korinto 14:25.

N te aonnaba ae karuanikai aei, te ekaretia ni Kristian bon te nne ni kamaiu ni kaineti ma bwaai n taamnei. Boni ngaia te tabo ni katantan ae rau ao e mena iai te tangira. Ao n rorokom n taiani botaki ko kona ni kakoaua iai ana taeka te tia areru ae kangai: “Noria, ai raoiroi ra ao ai rerei ra maekaia taari n te tabo ae ti teuana ni kabo nanoia!”​—Taian Areru 133:1.

[Te bwaoki/Taamnei n iteraniba 21]

TE KARAUNANO AE OKORO

A na kanga aomata aika a bonotaningaia ni karekei kakabwaia mani kaean bobotaki ni Kristian? Ni katobibia te aonnaba ngkai, Ana Tia Kakoaua Iehova a tabe ni katei ekaretia aika e kamanenaaki iai te taetae n te bai. I nanon ririki aika 13 aika a a tia n nako, a kateaki n te United States ekaretia aika 27 mwaitiia ao 43 te kurubu aika a kamanenaa te taetae n te bai. N aaba riki tabeua aika 40 tabun, iai naba ekaretia aika kamanenaa te taetae n te bai aika 140 tabun mwaitiia. A a tia ni karaoaki booki ni Kristian i aoni viteo n te taetae n te bai aika kaokoro aika 13 mwaitiia.

Te ekaretia ni Kristian e kaoiia naba ake a bonotaningaia bwa a na kamoamoaa Iehova. Nei Odile, ae kaain te Katorika rimoa i Buranti are e aki toki n taonaki n te rawawata n nano ao iaiangoan bakaburean maiuna, e rangi ni kakaitau ibukin te reirei man te Baibara are e a tia n reke irouna man bobotaki ni Kristian. “E a manga oki marurungin rabwatau ao te kukurei ni maiu,” e taku neiei. “Ma ae moamoa riki, e a reke irou te koaua. Bon iai manenani maiu ngkai.”