Ko Kona ni Karaoiroa Riki te Aonnaba? — Watchtower ONLINE LIBRARY

Ko Kona ni Karaoiroa Riki te Aonnaba?

“Taiani waaki n tautaeka a aikoa kona ni manga karaoiroa riki ana waaki te natannaomata. Waaki n tautaeka aikai a aikoa tau ni manga kaoki aroaro ni maiu aika bwainaki rimoa. E ngae ngkai a katei kainibaire aika raraoi, ma a bon aki kona naba ni manga kaoki aroaro aika riai ni kaineti ma te iraorao ni kareke-tangira ao te mare, ao a aikoa kona naba ni kairia kaaro bwa a na tabeakinia natiia, ma ni manga kaoka namakinan te bwai are kamaamaa ngkoa irouia . . . Angiini kangaanga aika reitaki ma te aroaro ni maiu ae riai, a aikoa kona ni katokaki n taian tua.”

KO NANO n taeka aikai, aika ana taeka te bwakuaku n tautaekan te U.S. rimoa? Ngkana ngaia, ao tera ae e na kaetii kangaanga aika mwaiti n taai aikai aika a boto i aon te mataai ni kanibwaibwai, te babakaine n te utu, kakeaan te aroaro ni maiu ae riai, te babanga, ao bwaai tabeua riki aika a tabe n urua ana waaki te botannaomata? Aomata tabeman a taku bwa a aki kona n toki kangaanga aikai, mangaia are a a boni keiaki ni waaki n aron aia kona. Tabeman riki a kaantaninga bwa n te bong teuana e na kaoti te tia kairiri temanna ae wanawana ae tatangiraki, ae tao te mataniwi n te Aro teuana, ae e na kairia aomata nakon te kawai ae eti.

Uoua tengaa te ririki n nako, aomata a tangiria ni karika Iesu Kristo bwa aia uea, ibukina bwa a ataia bwa e kanakomaiakaki iroun te Atua, ao e na rangi ni mwaatai ni waakina te tautaeka. Ma ngke e nora nanoia Iesu, e waekoa ni kitana te tabo arei. (Ioane 6:14, 15) “Tiaki mai aon te aba ueau,” e kabwarabwaraa nakon te kowana ae te I-Rom, rimwi riki. (Ioane 18:36) Ma ni boong aikai, a karako mwaitiia aomata ke mataniwin Aaro aika aongkoa taan rimwin Iesu, aika a kakairi n arona anne. Ao tabeman mai buakoia a a tia ni kataia ni karaoiroa riki te aonnaba, n aroia ni kataia ni kaira ana iango te tautaeka, ke n aroia n riki bwa kaain te tautaeka. Ti kona ni kakoauaa aei ngkana ti tarai bwaai aika riki man 1960 tabun ni karokoa 1970 tabun.

Aia Kekeiaki Aaro ni Kataia ni Karaoiroa Riki te Aonnaba

N uakaan ma 1970, taan reirei n te Aro tabeman n aban Amerika Maiaki a kataia ni buokia aomata aika raarikin, ao aika a karawawataki. N aron anne, a otea te iango ae te liberation theology, are e taekinaki iai bwa Kristo e aki tii kamaiuia aomata n te aro ae taekinaki n te Baibara, ma e kamaiuiia naba man kangaanga ni kaineti ma aia tautaeka aomata ao te kataumwane. N te United States, a mwaiti mataniwi n Aro aika a rangi n raraoma ibukin kamaunan te aroaro ni maiu ae riai, ao a katea te botaki ae arana, te Moral Majority. Ana waaki te botaki aei, bwa e na karekeia taan tautaeka aika a na katei tuua aika a na kaoka te aroaro ni maiu ae riai ibukia taian utu. N aron naba anne, n aaba ni Mutirim aika mwaiti, bon iai botaki tabeua ake a a tia ni kataia n totokoa te babakanikawai, n te aro ae a kaungai nanoia aomata bwa a na kakairi riki n ana boki ae tabu te Aro ni Mutirim, ae te Koran.

Ko kakoauaa bwa e a raoiroi riki ngkai te aonnaba imwin te kekeiaki aei? Taiani koaua a kaotia bwa a a tabe ni mauna aroaro aika riai, ao e a korakora riki aki-boraoia maiuia aomata aika kaubwai ao aika raarikin, ao e a riki naba aei n aaba ake e a rangi ni bwainaki iai ngkoa te liberation theology.

Ibukina bwa e a aki koro bukin ana waaki te botaki ae te Moral Majority n te United States, te tia katea te botaki anne ae Jerry Falwell, e a manga kamauna te botaki anne n 1989. Bon iai riki botaki tabeua ake a onea mwina. Ma e ngae n anne, Paul Weyrich, are ngaia ae otea te ara ae te “moral majority,” e korea ae kangai n te maekatin ae Christianity Today: “E ngae ngkana ti tokanikai n tautaeka, ma tokanikai aikai a aki kariki kainibaire aika kakawaki iroura.” E korea naba ae kangai: “E a rikirake ni buakaka riki te maiu aei, n te aro are ti a aki kona ni kabotaua bwa ai buakaka ra, ao tautaeka a aikoa kona naba ni karaoiroia.”

Te tia koro rongorongo ae Cal Thomas e kaota te kairua ae reitaki ma karaoiroan te botannaomata rinanon te waaki n tautaeka ngke e taekinna: “A na reke bitaki ni koaua tii ngkana a bitaki nanoia aomata, ao tiaki man rineakia tautaeka aika boou. Bukin aei bwa ara kangaanga aika korakora riki a aki reitaki ma akean te mwane ke buakakan te tautaeka, ma a bon reitaki ma te aroaro ni maiu ae riai ao tangiran bwaai n taamnei.”

Ma ko na kanga ni kaetii kangaanga n te aroaro ni maiu ao ni bwaai n taamnei, ngkana akea te kaetieti ae tii teuana ae bwainaki, ma a bane kaain te aonnaba n tannako ni bairea ae raoiroi ao ae buakaka i bon irouia? Ngkana a aki kona ni karaoiroa te aonnaba bwakuaku aika raoiroi ao aomata aika taua te Aro, ao antai ngkanne ae e na kona ni karaoiroia? E kona ni kaekaaki te titiraki anne, n aron ae ti na noria n te kaongora are imwin aei. Ao kaekaana e a boto i aon bukina are e taku Iesu bwa ana Tautaeka n Uea, bon tiaki mai aon te aba aei.

[Picture Credit Line n iteraniba 3]