Mutiakina Ana Mwakuri Te Atua Aika Kamimi
“Iawe ae Atuau, ai bati ra baika ko karaoi! Akea ae e botau ma ngkoe, a maiti kamimi ake ko iangoi i bukira.”—TAIAN ARERU 40:5 (BK).
1, 2. Baikara bwaai ni kakoaua ake ti noria ake a kakoaua ana mwakuri aika kamimi te Atua, ao tera ae ti riai ni kairaki iai bwa ti na karaoia?
NGKANA ko wareka te Baibara, ko na kai noria iai ae te Atua e karaoi mwakuri aika kamimi ibukia ana aomata rimoa ake tibun Iteraera. (Iotua 3:5; Taian Areru 106:7, 21, 22) E ngae ngkai e aki tabe n tabarea aia mwakuri aomata Iehova ngkai n aron are e karaoia ngkoa, ma a mwaiti bwaai ake ti nori aika a kakoauaa ana mwakuri aika kamimi. Mangaia are iai bukina ae ti na botii bwanara ma te tia areru ni kangai: “Iehova, ai bati ra am makuri! Ko kabane baikai ni karaoi n te rabakau: A on aonaba n am bwai nako.”—Taian Areru 104:24; 148:1-5.
2 A mwaiti aomata n taai aikai aika a aki tabe ma bwaai ni kakoaua ni kaineti ma ana mwakuri te tia Karikiriki, ke a bon rarawa nako iai. (I-Rom 1:20) Ma ti karaoa ae riai ngkana ti iaiangoi kakoaua aikai ma ni karekea raoi ataakin nnera ae riai i matan te tia Karaoira, ao baera irouna. Iobi mwakorona 38 nakon 41, boni bwaai n ibuobuoki aika moanibaan te raoiroi, bwa ni mwakoro aikai, Iehova e taekin bwaai tabeua mai buakon Ana mwakuri aika kamimi nakon Iobi. Iangoi bwaai tabeua aika kakawaki ake a taekinaki iroun te Atua.
Mwakuri Aika Korakora ma ni Kamimi
3. N aron are e koreaki n Iobi 38:22, 23, 25-29, baikara bwaai ake e titiraki taekaia te Atua?
3 E titirakina Iobi te Atua ni kangai: “Ko a tia n rin ni nen te tinoo n ikotaki, ao ko a tia n nora nen te karau ae te aiti n ikotaki, aika I kawakin i mwaini bongin te rawawata, i mwaini bongin te bo ma te buaka?” Te tinoo, te karau, ao te aiti boni bwaai aika a katoa bong n nonoraki n taabo aika mwaiti i aon te aonnaba. E reitia ni kangai te Atua: “Ai antai ae bwenaua nen te karanga ae te karau, ao kawain itin te ba; Ba e na kabwaka te karau i aon te aba ae akea kaaina; i aon te rereua, ae akea te aomata iai; ba e na kanuaia aontano ae uruaki ae kamaroa; ao ba e na karikirakea te uteute ae maraurau? Iai taman te karau ke akea? Ao ai antai ae kariki timtim n te aoi? E oti nako te aiti mai nanoni biroton antai? Ao te aoi ae te aiti ae bwaini karawa, antai ae bungia?”—Iobi 38:22, 23, 25-29.
4-6. N te aro ra ae e kona n taekinaki iai bwa e aki bwanin aia atatai aomata i aon te tinoo?
4 Aomata tabeman ake a maiu n taabo ake e bati iai te katabetabe ao a kainnanoa te mwamwananga n aki tutukaki, a kona n iangoa te tinoo bwa te bwai n tutuki. Aomata aika mwaiti riki a iangoa te tinoo bwa te bwai ni kakukurei ae tamaroa n tain te mwaitorotoro are e kona n reke naba iai karaoan bwaai aika kakaokoro. Ni kaineti ma ana titiraki te Atua, te koaua bwa ko bon ata raoi taekan te tinoo, ke tao aron taraakina? Tao ti rangi n ataa aron tarakin te tinoo, bwa tao ti a tia n noria n taian taamnei, ke ti a tia n nora te tinoo ae bati. Ma tera aroni mwakorokoro n tinoo ake a uarereke? Ko ataa aron tarakiia, ke tao ko a tia n ukoukoria ni nneia are a karaoaki iai?
5 Bon iai aomata tabeman aika a a tia n neneri ma n rawei taamnein mwakorokoro n tinoo i nanon ririki aika mwaiti. Teuana te mwakoro n tinoo e kona ni karaoaki man mwakorokoron te aiti aika te bubua mwaitiia, aika a rangi ni kan taraakiia. E kangai te boki ae atuna Atmosphere: “E bon rangi n ataaki aroni kakaokoron nako tein mwakorokoro n tinoo aika mwaiti kurikuri, ao e ngae ngke a taku taan rabakau bwa bon akea te bwai ae na tuka rikin taiani mwakorokoro n tinoo bwa e na titeboo teia, ma e bon teimatoa naba n tuai ni kuneaki taiani mwakorokoro n tinoo aika uoua are e na titeboo teia. E waakinaki iai te kakae teuana ae moan te ananau iroun. . . Wilson A. Bentley, are e kabanea ana tai ae raka i aon 40 te ririki, n neneri ma n rawei taamnein mwakorokoro nako n tinoo, ma e bon aki roko n te kunea uoua ae a titeboo teia.” Ao e ngae naba ngkana e a reke uoua ae a taraa n tii te arona aroia, ma te koaua bwa e aki kamimi, aron taiani mwakorokoro n tinoo aika kakaokoro nako teia?
6 Uringa ana titiraki te Atua aei: “Ko a tia n rin ni nen te tinoo n ikotaki?” A mwaiti aomata aika a iangoia bwa taian nang boni nnen te tinoo ae ikoikotaki iai. Ko kona n iangoia bwa aongkoa ko na nakon taabo aikai bwa ko na warebwaia taiani mwakorokoro n tinoo aika kakaokoro nako, ma ni kakaaea aron rikiia? E taekina ae kangai te encyclopedia teuana i aon rabakaun te aonnaba: “E bon tuai man ataaki raoi aron rikin ao tein mwakorokoro n aiti aika a kainnanoaki ibukin kamwaitoroan ran aika a mena i nanon naang, nakon te mwaitoro ae -40°F (-40°C).”—Taian Areru 147:16, 17; Itaia 55:9, 10.
7. Tera aron rababan aia atatai aomata i aon te karau?
7 Tera aron te karau? E titirakina Iobi te Atua ni kangai: “Iai taman te karau ke akea? Ao ai antai ae kariki timtim n te aoi?” Te encyclopedia i aon rabakaun te aonnaba arei e a manga kangai: “Ibukin aron butin te ea ae kakaokoro ma ni kangaanga, ao korakoran te kaokoro n aron mwaitin te buane ao bwaai aika a mena n te ea, e aki kona n oteaki iai te iango ae tii teuana ae kona ni kabwarabwara aron rikin taian nang ao te karau.” N taekana aika uarereke, taan rabakau a a tia ni karaua ni kabwarabwara aia iango i aon bwaai aikai, ma n etina, a aki kona ni kabwarabwara raoi aron te karau. Ma e ngae n anne, ko bon ataia bwa e bwabwaka te karau are e rangi ni kainnanoaki, bwa e na teboka te aonnaba, e na kamaiui aroka, ao e na kateimatoa te maiu ma ni karikia bwa e na kakukurei.
8. Bukin tera ngkai a raraoi ana taeka Bauro ake a koreaki ni Mwakuri 14:17?
8 Tiaki te koaua bwa e na boraoi nanom ma motin ana iango te abotoro Bauro? E kaungai nanoia aomata tabemwaang bwa a na tarai bwaai aika kamimi aikai bwa bwaai ni kakoaua aika kaotiota Teuare karaoia. E kangai taekan Iehova ae te Atua iroun Bauro: “Ma E aki katikua Ngaia ngke akea kaotiotana, ba E karaoa ae raoiroi, ao E anganingkami te karau mai karawa ma boongi ni mari aika ababaki, ao E kaon nanomi n te amarake ma te kimareirei.”—Mwakuri 14:17; Taian Areru 147:8.
9. A kanga ana mwakuri aika kamimi te Atua ni kaota mwaakana ae bati?
9 Akea te nanououa bwa te tia Karaoi mwakuri aika kamimi ma ni manena aikai e rangi ni wanawana ma ni mwaaka. Ni kaineti ma mwaakana, ao iangoa aei: E taekinaki bwa tao iai te angibuaka ma te iti ao rebwen te baa ae 45,000 mwaitiia ni katoa bong [aika a riki ni katobibia te aonnaba], are nanona bwa te mwaiti ae raka riki nakon 16 te mirion ni katoa ririki. Nanon aei bwa ni katobibia te aonnaba ao bon iai rebwen te baa ae 2,000 mwaitina ae e a bon tabe naba n riki ngkai n te tai aei. E mwamwakuri i nanon taian nang aika a kakaokoro ake a reitaki ma rebwen te baa, n te korakora ae boraoi ma korakoran tao tebwi tabun te boom ae aekakin taiani boom aika mwaakaroiroi ake a kabwakaki n te Kauoua ni Buaka are Kabuta te Aonnaba. Ko nora teutana te korakora anne n taian iiti. Irarikin arona ae kamimi, taian iiti a buoka aron karikakin te kaeti ae te nitrogen, ae rinnako n te tano ao e a riki iai bwa kanan taian aroka. Mangaia are te iti bon te korakora ae nonoraki, ma iai naba manenana.—Taian Areru 104:14, 15.
Tera Aron Rotakim Iai?
10. Ko na kanga ni kaekai titiraki ake a kuneaki n Iobi 38:33-38?
10 Iangoia bwa aongkoa ngkoe Iobi are ko titirakinaki iroun te Atua are Moan te Mwaaka. Tao ko kakoaua naba bwa angiia aomata a aki bati n tabeakin ana mwakuri te Atua aika kamimi. Iehova e tabeki titiraki nakoira aika ti wareki n Iobi 38:33-38. “Ko atai tuani karawa ke ko aki? Ko kona ni kateimatoa ueana i aonaba ke ko aki? Ko kona n tabeka bwanam nakon naang ni kanenea, ba a na rabuniko raan aika bati, ke ko aki? Ko kona ni kanako iiti ba a na nako, ao a na kangai nako im, Aikai ngaira? Ai antai ae kaki te rabakau i nanoia aomata? Ao antai ae angan te nano te ataibwai? Ai antai ae kona ni wareki maitin naang n te rabakau? Ao antai ae kona ni kabaro batoroni karawa, ngkana e raanga bubun te tano n riki ni banin, ao a i nimnim iibe n taano?”
11, 12. Baikara bwaai tabeua ake a kakoaua bwa te Atua bon te tia Karaoi mwakuri aika kamimi?
11 Ti a tia ni maroroakin bwaai tabeua ake a tabekaki nakon Iobi iroun Eriu, ao ti a tia naba n nori titiraki tabeua ake e tabeki Iehova nakon Iobi bwa e na kaekaa iai, ‘n te nano ni mwaane.’ (Iobi 38:3) Ti kangai bwa titiraki “tabeua,” ibukina bwa n Iobi mwakorona 38 ao 39, te Atua e kamataata taekan ana kariki bwai tabeua riki. N aron anne, e taekini nna n itoi ake i karawa. Ai antai ae e ataa tuan ma bairean bwaai aikai? (Iobi 38:31-33) Iehova e kaira ana iango Iobi nakoia maan tabeman—n aron te raian ao te reeben, te kooti ao te aoti are kakawaaki kunna, te kao ae katamanti ao te aotireti, ao ai te aoti ma te ikare. Ai aron ae e titirakina Iobi te Atua bwa boni ngaia are e angania maan aikai aroia aika kakaokoro nako ma ni bairea maiuia ao kamwaitakiia ke tiaki. Tao ko kukurei n neneri mwakoro aikai, ao e a moamoa riki ngkana ko tatangiriia aoti ke maan riki tabeman.—Taian Areru 50:10, 11.
12 Ko kona naba n neneri mwakoron Iobi aika 40 ao 41, ike Iehova e titirakina iai Iobi bwa e na kaeka ana titiraki ni kaineti ma maan aika uoman. Ti atai maan aikai bwa te ibobatemati (Beemota) ae e bubura ma n aintoa, ao te man ae kakamaaku ae te korokorotaire (Ribaietan) are e memena i rarikin te karaanga ae te Naire. Maan aika uoman aikai boni bwaai aika karikaki aika iai irouia aroia aika kamimi aika a kakaokoro ake a riai n iangoaki iroura. Ti na iangoi ara kabanea n iango ake ti riai ni karokoira iai ngkai.
13. E a kanga aron rotakin Iobi n ana titiraki te Atua, ao tera naba aron rotakira ae riai iai?
13 Iobi mwakorona 42 e kaota aron rotakin Iobi nakoira n ana titiraki te Atua. Rimoa, Iobi e bon mutiakina riki oin nanona ao nanoia aomata, nakon mutiakinan te Atua. Ma, ngke e butimwaea kaetana ae oti n ana titiraki te Atua, Iobi e a bita ana iango. E kaota ae kangai: “I ataiko [Iehova] ba Ko konai bwaai ni kabane ni karaoi, ao e aki konaki n tukaki nanom teuana. Ai antai teuae karaba te taetae ni kawanawana te aba, ao akea naba ana ataibwai? Ma ngaia ae I atonga ae I babanga arona, aika bwaai aika bati ni kamimi i rou, aika I aki atai.” (Iobi 42:2, 3) Eng, ngke e a tia ni mutiakin ana mwakuri te Atua aika kamimi, e taku Iobi bwa a rangi n riao aron kamimin bwaai aikai irouna. Ngkana ti a tia ni mutiakin bwaai aika kamimi aika karikaki aikai, ao a riai naba n anaaki nanora ni wanawanan ao mwaakan te Atua. Ao ibukin tera? E na kamimira iai ni mwaakan Iehova ae korakora ao ana konabwai? Ke iai riki te bwai ae ti riai ni kairaki nako iai?
14. Tera aroaron Tawita ni kaineti ma ana mwakuri te Atua aika kamimi?
14 N Taian Areru 86, iai taeka tabeua aika a irekereke ma ngaia ake a taekinaki iroun Tawita, are e kangai n te areru teuana: “A tataekina mimitongin te Atua taiani karawa; ao a kaotiota ana makuri baina taian itoi. E atoatonga te taeka te ngaina ae koraki, ao e kaotiota te ataibwai te bong ae koraki.” (Taian Areru 19:1, 2) Ma iai riki ana taeka tabeua Tawita. Ti wareka ae kangai n Taian Areru 86:10, 11: “Ba Ko kakanato Ngkoe, ao Ko karaoi bwaai ni kamimi: Bon ti Ngkoe te Atua. Iehova, Ko na kotea kawaim nako iu; N na nakonako n am koaua: Katiteuana nanou ba e na maka aram.” Anaakin nanon Tawita n ana mwakuri te tia Karikiriki aika kamimi, e a karika irouna te maaku ma te karinerine naba. Ko kona n ota n anne. Tawita e aki tangiria bwa e na karaoa te bwai teuana ae e na aki kakukureia nanon Teuare karaoi bwaai aika kamimi aikai. Ngaira naba ti riai ni karaoa anne.
15. Bukin tera bwa e riai maakakin ao karinean te Atua iroun Tawita?
15 E ataia Tawita bwa kioina ngkai iai iroun te Atua te mwaaka ae rangi ni korakora, ao e kona naba ni kabongana n oroiia iai aomata aika a riai n aki-akoaki irouna. E kaotaki iai tokiia ae kakamaaku. E titirakina Iobi ni kangai te Atua: “Ko a tia n rin ni nen te tinoo n ikotaki, ao ko a tia n nora nen te karau ae te aiti n ikotaki, aika I kawakin i mwaini bongin te rawawata, i mwaini bongin te bo ma te buaka?” Te tinoo, te karau ae te aiti, bwakan te karau ae korakora, te ang, ao taian iiti, kaanga, boni bwaai ake e kona ni kabonganai te Atua bwa ana bwai ni buaka. Ao ai korakora ra bwaai aikai!—Iobi 38:22, 23.
16, 17. Tera ae kaotiota raoi aron korakoran mwaakan te Atua, ao e kanga ni kabongana mwaakana anne n taai ake a a tia n nako?
16 Tao ko kona n uringa te kabuanibwai teuana are e riki n te tabo teuana ae reitaki ma teuana mai buakon bwaai aikai—tao te ukeukennanti, te angibuaka, bwakan te karau ae te aiti, ke te ieka are e karina n roko. Ibukin kabwarabwaran anne, ngke e a kaani bane te ririki ae 1999, e karina n orea maiakin maeaon Eurobe te angi buaka ae korakora. E aki naba kaantaningaki rokona irouia taan rabakau ake a tabe ma tauan kanoan te bong. Te angibuaka ae korakora aei, ae butina 125 te maire n te aoa, e koubabaai taubukin auti aika ngaa ma ngaa mwaitiia, e kabwakai bouaniiti, ao e karangai kaa aika bubura. Kataia n iangoa taamnein aei: Te angibuaka aei e a taeki ke e kamwakorouai kaai n te mwaiti ae 270 te mirion—ake 10,000 mai buakoia ake a mena n te tabo ni kamaangaang ae tii teuana, n te kaawa ae Versailles, are e uakaan ma Paris. Mirion ma mirion mwaitin mwenga ake a mate aia iti iai. E kaania 100, mwaitiia aomata ake a mate iai. Kabuanibwai aikai a bane n riki man te angibuaka ae aki maan taina aei. Ai boni korakora ra!
17 Aomata a kona n arani angibuaka bwa bwaai aika riki n aki baireaki ke ni kairaki. Ma tera ae na riki ngkana Teuare moan te mwaaka e karaoi mwakuri aika kamimi aikai n te aro are e kabonganai n te aro ae baireaki ma ni kairaki raoi? E karaoa ae ai aron anne n ana bong Aberaam, are te aomata are e kaongoaki bwa te tia Moti ibukin te aonnaba ni kabuta, e a tia ni motika taekan te buakaka are waakinaki ni kaawa aika uoua, aika Totom ma Komora. A rangi ni buakaka kaawa aikai n te aro are tangitang ake bon taekaia a roko iroun te Atua are e a buokiia iai aomata ake a raoiroi bwa a na birinako mani kaawa aika a tia ni motikaki taekaia aikai. E ribootinaki ae kangai n rongorongon te aonnaba rimoa: “Iehova E kabwaka te burimton ma te ai n ai aron te karau mai karawa,” i aon kaawa akekei. Bon te mwakuri ae kamimi aei, are a kamaiuaki iai aomata aika raoiroi, ao a kamaunaki iai aomata aika a tangira te buakaka.—Karikani Bwaai 19:24.
18. Baikara bwaai aika kamimi ake a taekinaki n Itaia mwakorona 25?
18 Imwina riki, te Atua e motika taekan kaawan Baburon rimoa, are tao ngaia te kaawa are e taekinaki n Itaia mwakorona 25. E taetae ni burabeti te Atua n taekinna ae e na kamaroaeaki te kaawa anne: “Ko onika te kawa ba te tabuki n atibu; te kawa ae nonoaki ba te kawa ae kabwakaki; te bareti ae neia ianena ba te bwai ae tiaki te kawa; e na aki manga kateaki.” (Itaia 25:2) N taai aikai aomata ake a kawara te tabo are e mena i Baburon rimoa, a kona ni kakoaua iai kakoroan bukin taeka aikai. Ma te koaua bwa e manennanti kamaunakin Baburon? E aki. Ma ti kona ni kakoaua ana taeka Itaia iai: “Iehova, bon Atuau ngkoe; N na neboiko, N na karaoiroa aram; ba Ko karaoi bwaai ni kamimi, ake am taeka ake ngkoangkoa, ma te kakaonimaki ma te koaua.”—Itaia 25:1.
Mwakuri Aika Kamimi Nakon Taai Aika Imwaira
19, 20. Tera aron kakoroan bukin Itaia 25:6-8 ae ko kona ni kaantaningaia?
19 E kakoroa bukin te taetae ni burabeti ae taekinaki i eta te Atua n taai aika nako, ao e na karaoi naba mwakuri aika kamimi nakon taai aika imwaira. Ni kaineti ma aei, ngke Itaia e taekin ana “bwai ni kamimi” te Atua, ti nora te taetae ni burabeti teuana ae kona n onimakinaki ae e na kakoroaki bukina n taai aika imwaira, n aron naba are e kakoroaki bukin te motiki taeka i aon Baburon rimoa. Tera te “bwai ni kamimi” ae beritanaki? E kangai Itaia 25:6: “Ao Iehova Tabaota E na karaoa te amarake ae moan te kangkang i aon te maunga aei, ba kanaia aomata ni kabaneia, ma te ninima ae te wain i aoni baninin benna, ma te amarake ae moan te kangkang ae nenea, ae te wain i aoni baninin benna ae raumeaki.”
20 Te taetae ni burabeti aei e na boni koro bukina n te aonnaba ae boou are beritanaki iroun te Atua, ae e mena imwaira ngkai. N te tai anne, a na kamaiuaki aomata man kangaanga aika a karawawata te botannaomata ngkai. Ni koauana, te taetae ni burabeti n Itaia 25:8, 9 e kakoaua ae te Atua e na kabongana mwaakana ni karikibwai, ni karaoa te mwakuri teuana ae kamimi riki nakon mwakuri ake a a tia ni karaoaki: “E oongaki te mate i Rouna n aki toki; ao E na kaoi rannimata te Uea ae Iehova mani maata ni bane; ao E na uota nako kamaamaaean ana botanaomata mai aonaba ni bane: ba bon ana taeka Iehova.” Imwina riki te abotoro Bauro e mwanewea te kibu anne ao e kamanena ni kaineti ma manga kamaiuaia maate, iroun te Atua, ae kautakia man te mate. Ai kamimi ra te mwakuri anne!—1 I-Korinto 15:51-54.
21. Baikara mwakuri aika kamimi ake e na karaoi te Atua ibukia maate?
21 Bukina teuana riki are a na mauna rannimata aika a nako man te nanokawaki, bwa a na kamaunaki naba aorakiia aomata. Ngke e mena i aon te aonnaba Iesu, e kamaiuia aoraki aika mwaiti—e kanorabaia akana a mataki, e kauki taningaia aomata aika bonotaninga, ao e kakorakoraia mwauku. Ioane 5:5-9 e karakina ae e kamaiua te mwaane ae e a tia ni mwauku i nanon 38 te ririki. Taani mataku iai a atonga te mwakuri anne bwa te kakai, ke te mwakuri ae kamimi. Ma boni ngaia raoi anne! Ma Iesu e taekina te bwai ae kamimi riki, ae manga-utiia maate: “Kam na tai mimi n aei: ba e na bon roko te aua, ae a na bane iai n ongo bwanana aomata ake a mena i nanon ruaia ni mate, ao a na oti nako; akana karaoa ae raoiroi, nakon te manga-uti are ana bwai te maiu.”—Ioane 5:28, 29.
22. Bukin tera ngkai aomata aika raarikin ao ake a karawawataki a kona ni kaantaninga reken ae raoiroi nakon taai aika a na roko?
22 E na boni bae ni kakoroaki nanon anne, bwa te tia berita iai bon Iehova. Karaua nanom n ataakin ae ngkana e bairea aron kabonganakin mwaakana ni kakamaiu, ao e na riki iai bwaai aika kamimi. Te Areru 72 e kaotii bwaai ake e na karaoi rinanon Natina are te Uea. E na rikirake iai te aomata ae raoiroi. E na taabangaki te rau. Te Atua e na kamaiuia aomata aika raarikin ao ake a karawawataki. E berita ni kangai: “Ane e na bati te uita i aon te aba i aon taubukini maunga; E na maeiei uaana n ai aron Rebanon [rimoa]: Ao a na maiu akana kaain te kawa n ai aron uteuten aontano.”—Taian Areru 72:16.
23. Ana mwakuri te Atua aika kamimi a riai ni kairira nakoni karaoan tera?
23 E teretere ngkanne bwa iai bukina aika mwaiti aika ti riai ni mutiakina iai ana mwakuri aika kamimi Iehova ni kabane—ake e karaoi rimoa, mwakuri ake e tabe ni karaoi ngkai, ao ake e na karaoi naba nakon taai aika a na roko. “E na karaoiroaki Iehova ae te Atua, ae Atuaia Iteraera, ae kakaraoi bwaai ni kamimi n ti Ngaia: ao e na karaoiroaki arana ae mimitong n aki toki; ao a na buta aonaba ni bane ni mimitongina. Amene, ao Amene.” (Taian Areru 72:18, 19) Boni ngaia anne te bwai ae ti riai n ingainga ni kan maroroakinna ma ara koraki ao aomata tabemwaang. Eng, ti bia “tataekina neboakina i buakoia botanaomata, ao ana makuri aika kamimi i buakoia aomata ni kabaneia.”—Taian Areru 78:3, 4; 96:3, 4.
Ko na Kanga ni Kaekaa?
• A kanga titiraki ake e titirakinaki iai Iobi ni katereterea tian aia atatai aomata?
• Baikara katoto n aron ana mwakuri te Atua aika kamimi ake a kateretereaki n Iobi mwakorona 37 nakon 41 ake a a tia n anaa nanom?
• Tera aroarora ae riai ngkai ti a tia ni mutiakin ana mwakuri te Atua aika kamimi tabeua?