Karekean Te Koaua I Aon Mangautin Iesu

“I kona n tuangngkami ma te koaua, bwa e ngae ngkai ti kona ni kakoaua raoi bwa e a tia ni maiu Iesu . . . , ma ti aki kona ni kakoaua raoi bwa ti ataia bwa e a tia ni kautaki Ngaia man te mate iroun te Atua.” Anne are e taekinna te mataniwi n te Aro n Engiran ae te Ebikobo mai Canterbury.

TE KRISTIAN ae te abotoro Bauro, e aki nanokokoraki iai. N te ka 15 ni mwakoro n ana moan reta are e kairaki koreana, e korea ae kangai Bauro nakoia Kristian ake i Korinto: “Ba I anganingkami moa are I anganaki naba, ba E mate Kristo i bukin ara bure n ai aron taekana n te Baibara; ao ba E taunaki, ao ba E a manga uti n te kateni bong n ai aron taekana n te Baibara.”​—1 I-Korinto 15:3, 4.

Bon onimakinan manga-utin Iesu Kristo are e a kairiia ana reirei bwa a na tataekina te rongorongo ae raoiroi ni kabutaa te aonnaba ae tautaekanaki iroun Rom ao Kuriti​—ae “i aonaba ni kabane aika i aani karawa.” (I-Korote 1:23) Ni koauana, manga-utin Iesu, bon ngaia boton te onimaki ni Kristian.

Ma a kaman nanokokoraki ke a aki kakoaua manga-utin Iesu, aomata man te moan tai. Irouia angiia I-Iutaia, a taetae ni bakanatua taan rimwin Iesu ngke a taku bwa te aomata are e tauraki n te kai bon te Mesia. Ao angiia kaaini Kuriti ake a wanawana imwin reiakinaia, a kakoaua aki-mamaten te taamnei ao a iangoa taekan te manga-uti bwa te reirei ae e riai n riribaki.​—Mwakuri 17:32-34.

Taan Nanokokoraki ni Boong Aikai

N ririki aika a tibwa nako, tabeman taan rabakau ake a taku bwa Kristian ngaiia, a a tia ni boretii booki ma kaongora aika a kakeaa koauan mangautin Iesu ao man taku bwa bon te karaki ae oteaki irouia aomata, ao e korakora te kauntaeka ae riki ma iai. Ngke a kakaaea “rongorongoni maiun Iesu,” taan rabakau tabeman a taku bwa rongorongo ake a taekinaki n taian Euangkerio n aron te rua ni mate are akea kaaina, ao kaotin Iesu imwin matena, bon baika a karioaki, ake a tibwa oteaki imwin matena, n te aro bwa e na boutokoa te kakoaua ibukin mwaakana i karawa.

N aron anne, iangoa ana koaua te tia rabakau ae te I-Tiaman ae Gerd Lüdemann, are te professor i aon te Nu Tetemanti, ao te tia korea te boki ae What Really Happened to Jesus​—A Historical Approach to the Resurrection. E kauntaekaia bwa manga-utin Iesu bon ‘tiaki te koaua,’ ao e riai ni kakeaaki irouia aomata aika “a ataa rabakaun aon te aonaba aio.”

Professor Lüdemann e taekinna bwa Kristo are e kautaki are e kaoti nakon Betero, bon te miitara are e a reke man rawawatan nanon Betero, ma maakuna ibukin kakeaan Iesu irouna. Ao n ana iango naba Lüdemann, kaotin Iesu nakoia taari aika 500 tabun ni bon tii te norakina, bon te rongorongo ae oteaki “ngke a roko nanoia aomata aika mwaiti.” (1 I-Korinto 15:5, 6) Ni kauarerekeana, a mwaiti taan rabakau aika a taku bwa rongorongon Iesu are e kautaki man te mate, bon bwaai aika a riki n aia iango aomata, ake a manga kaungai nanoia taan rimwin Kristo nakon bwaai n taamnei, ao a kaingaingai nanoia nakon aia mwakuri ni mitinare.

Te koaua bwa a mwaiti aomata aika a aki tabe ma te kakaborabakau. Ma e ngae n anne, ti riai ni bane n tabeakina taekan manga-utin Iesu. Bukin tera? Ibukina bwa ngkana arona bwa e aki kautaki man te mate, te aro ni Kristian e a boto ngkanne i aon te kairua. Ni kaitara ma anne, ngkana manga-utin Iesu bon te bwai ni koaua ae riki, ao te aro ni Kristian e a boto ngkanne i aon te koaua. Ngkana ngaia anne, ao a aki tii kakoauaki ana taeka Kristo iai, ma a kakoauaki naba ana berita nako. Ao ngkana iai te manga-uti, te mate bon tiaki te tia tokanikai i aora, ma bon ngaia te kairiribai ae e kona ni kataeaki ana kai.​—1 I-Korinto 15:55.

[Picture Credit Line n iteraniba 3]

From the Self-Pronouncing Edition of the Holy Bible, containing the King James and the Revised versions