Teimatoa Ni Kakaonimaki Iroun Iehova

TE KAKAONIMAKI, bon te aroaro ae kaotiotaki irouia ana toro te Atua ae koaua ae Iehova, e ngae ngke e karako norakina irouia angiia aomata ni boong aikai. Te aomata ae kakaonimaki, e teimatoa n nene ngkana e kataaki, ao e aki mwemwe e ngae ngke e a tia ni bwaka nako te tai ae maan. Iangoa aron te Uea ae Etekia ae raoiroi. “Akea temanna i mwina ae ai arona i buakoia uean Iuta ni kabaneia, ao akea naba temanna i buakoia ake i mwaina,” e taku te Baibara. Bukin tera ngke e rangi ni kaokoro Etekia? E “nimnimta Iehova,” e ngae ngke e otabwaniniaki irouia taan taromauria te atua ae kewe ae Moreka. Eng, Etekia e “aki nako man iran [nanon Iehova], ma e kakawakin ana tua.”​—2 Uea 18:1-6.

Temanna riki are e kakaonimaki iroun Iehova bon te abotoro Bauro. Rongorongon ana mwakuri ni minita are e noraki n te Baibara n Erene ni Kristian, e kaota raoi aron teimatoan Bauro ni bebeku iroun te Atua ma nanona ni kabane. Ngke e a kaan tokini maiuna, ao e kona ni kangai Bauro ni bon taekana: “I a tia ni buaka n te buaka are raoiroi, I a tia ni biribiri, I a tia ni kawakina te onimaki.”​—2 Timoteo 4:7.

Ai raoiroi ra aia katoto naka Etekia ao Bauro n aron te kakaonimaki! Ti bia katotonga aia onimaki n te aro ae ti teimatoa ni kakaonimaki iroun Atuara ae Kakannato ae Iehova.​—Ebera 13:7.