Aia Ribooti Taan Ua Rongorongo Ibukin Te Tautaeka N Uea

“E rangi ni bati am atatai i aon te Baibara”

NGKE ai tibwa 12 ana ririki ni maiu Iesu ao e ninikoria n taetae ma mataniwi n te Aro i Ierutarem, “a bane ni mimi n rabakauna ma ana taeka nako” aomata ake a ongora irouna.” (Ruka 2:47) N aron anne, taan toro iroun Iehova aika ataei riki a ninikoria ni maroro ma aia tia reirei ao raoraoia n reirei ibukin te Atua ao te Baibara, ao a mwaiti uaa aika raraoi aika a rereke irouia.

Nei Tiffany, ae 14 ana ririki ni maiu, e kaaina te koraki ike e a waakinaki iai te maroro i aon te taetae ni burabeti man te Baibara ae taekan wiiki aika ririki aika 70, ae taekinaki n Taniera 9:24-27. Te tia reirei e taekin koaua tabeua ibukin te kibu anne, ao e waekoa ni kitana te maroro anne.

E iremwe moa Nei Tiffany n tabeka baina iai. “Ma I aki ataa bukina,” e taku, “bwa e aki rau nanou ngkai e a aki kabwarabwaraki raoi kiibu aikai. Ngaia are I a tii tabeka naba baiu.” E mimi te tia reirei n noria bwa iai te aomata ae e kan taetae i aon te reirei anne, kioina ngke e kangaanga irouia angiia ataei, karekean otaia iai.

E anganaki ana tai Nei Tiffany ni kabwarabwara te taetae ni burabeti aei, ao e teirake ni kabwarabwara, n akea te katauraoi moa. Ngke e a tia, ao e kainababu te koraki n reirei. E nako nanon Nei Tiffany teutana. Ao ngkanne, kaain te koraki arei a uboubo.

“Ti rangi ni mimi n anne Tiffany,” e kaokioka taekinan anne te tia reirei. E kaotia n ana atatai bwa a bati riki kabwarabwara i aon kiibu aikai, ma ai tibwa Nei Tiffany are e kona ni kabwarabwara nakoina n te aro ae rangi ni mataata. Ni bwaran te reirei, ao e titirakina Nei Tiffany bwa e kanga ni bubura ana atatai i aon te Baibara.

“E reke anne ibukina bwa bon kaain Ana Tia Kakoaua Iehova ngai,” e kaeka. “A okioki au karo ni kabwarabwara te taetae ni burabeti nakoiu, ao I a tibwa ota iai.”

A mimi naba raona n reirei ni buburan ana atatai i aon te Baibara. Temanna mai buakoia e kangai nakon Nei Tiffany: “I tibwa ataia bwa bukin tera ngkai Ana Tia Kakoaua Iehova a nakonako man te auti teuana nakon te auti teuana; kam karaoa anne ibukina bwa e bati ami atatai i aon te Baibara.” Tabeman riki a berita bwa a na aki manga kaenaenaa neiei ibukin ana koaua.

Ngke e kaongoia ana karo Nei Tiffany taekan bwaai aika a riki, ao a tuangnga bwa e na anga te boki ae te Knowledge That Leads to Everlasting Life nakon ana tia reirei. Ngke e karaoa anne, ao e kaota naba te mwakuri are kabwarabwara ana taetae ni burabeti Taniera, ao e kukurei ni butimwaea te boki ana tia reirei ao e karabwarabwa nakoina.

Te koaua bwa ngkana kaain te roro-n-rikirake ni Kristian a ninikoria n tataekin bwaai ake a reiakinaki irouia aia karo ibukin te Atua ao te Baibara, ao a karekea neboan ao karinean Iehova iai, ao kakabwaiaia.​—Mataio 21:15, 16.