“Bwaai Aika Tatangiraki” A Tabe Ni Kaona Maneaban Iehova

“[Iehova e] na ioioiia botanaomata ni kabaneia, ao a na roko bwaai aika tatangiraki aika aia bwai botanaomata ni kabaneia, ao N na kaona te maneaba aei n te mimitong.”​—AKAI 2:7.

1. Bukin tera bwa ti na tabeakiniia riki ara koraki aika ti tangiriia, n tain te kabuanibwai?

BAIKARA bwaai aika a tatangiraki iroum aika a kaona am auti? Bon iai bwain am auti aika moanibaan te tamaroa, te kombiuta ae bwain ngkai, ao te kaa ae boou? Ao e ngae ngkana a a tia n reke bwaai aikai iroum, ao tiaki te koaua bwa n am iango, bwaai aika kakawaki riki aika a mena n am auti, bon aomata ake a mena iai—aika kaain am utu? Iangoia bwa n te tairiki teuana ko a kautaki ngke ko aroka boin te bwai ae bue. E a urarake am auti, ao ai tii tabeua te miniti am tai n rawea maium! Tera te moanibwai ae ko na tabeakinna? Bwain am auti? Am kombiuta? Am kaa? Tiaki te koaua bwa ko na iangoia moa am koraki ake ko tangiriia? Boni ngaia, bwa a kakawaki riki aomata nakon taiani bwai.

2. Tera aron buburan ana karikibwai Iehova, ao tera te karikibwai ae tatangiraki riki iroun Iesu?

² Iangoa ngkai taekan Iehova ae te Atua ma Natina ae Iesu Kristo. Iehova bon Teuare “karaoa karawa, ma aonaba, ma marawa, ma bwaai ni kabane ake a mena i nanoia.” (Mwakuri 4:24) Natina, are “te tia makuri ae rabakau” bon te aomata are e kabonganaki iroun Iehova ibukin karaoan bwaai ni kabane riki. (Taeka N Rabakau 8:30, 31; Ioane 1:3; I-Korote 1:15-17) Te koaua bwa Iehova ao Iesu a taku bwa a kakawaki bwaai ni kabane ake a karikaki. (Kabotaua ma Karikani Bwaai 1:31.) Ma tera te karikibwai ae kakawaki riki irouia—bwaai, ke aomata? E kangai Iesu, are e kaotiota te wanawana ae bati: “I kukurei irouia natiia aomata,” ke n aron are e taekinaki n ana rairai William F. Beck, e “kimwareirei irouia aomata” Iesu.

3. Tera te taetae ni burabeti are e taekinna Iehova rinanon Akai?

³ Akea te nanououa bwa Iehova e iangoa maiuia aomata bwa te bwai ae moan te kakawaki. E kaotaki aei n taeka ni burabeti ake e taekin n te ririki are 520 B.C.E. rinanon ana burabeti are Akai. E kangai Iehova: “N na ioioiia botanaomata ni kabaneia, ao a na roko bwaai aika tatangiraki aika aia bwai botanaomata ni kabaneia, ao N na kaona te maneaba aei n te mimitong. . . E na maiti riki mimitongin te maneaba aei ae mimitongina ae rimwi nakon are rimoa.”​—Akai 2:7, 9.

4, 5. (a) Bukin tera bwa e aki riai kakoauan ae te kibu n taeka ae “bwaai aika tatangiraki” e taekin bwaikoraki aika tamaroa? (b) Ko na kanga ni kabwarabwarai “bwaai aika tatangiraki,” ao bukin tera?

⁴ Baikara “bwaai aika tatangiraki” aika a na kaon maneaban Iehova ma ni karekea te mimitong ae moan te bati nako iai? Boni bwain nanona aika moan te tamaroa ma n tikiraoi? Taiani koora, tirewa ao atiibu aika kakawaki? E tara n aki boraoi ma te riai anne. Uringa bwa te tembora are rimoa, ae katabuaki nimabubua tabun te ririki mai imwaina, bon te auti ae boona e rooti tabeua te birion te taara!a E aki kona Iehova ni kaantaningaia bwa I-Iutaia aika a kaokaki nakon abaia, aika a karako mwaitiia, bwa a na kona ni katea te tembora ma tamaroana ae mimitong riki nakon ana tembora Toromon!

⁵ Tera ngkanne “bwaai aika tatangiraki” ake a na kaona maneaban Iehova? E teretere bwa bon aomata. Bwa tiaki te tirewa ma te koora ake a kakukureia nanon Iehova, ma e kukurei irouia aomata ake a beku irouna ibukina bwa a tangiria. (Taeka N Rabakau 27:11; 1 I-Korinto 10:26) Eng, Iehova e tatangiria mwaane, aine, ao ataei ake a taromauriia n te aro ae riai. (Ioane 4:23, 24) Aikai bon “aomata aika tatangiraki,” ao moan te kakawaki riki ngaiia iroun Iehova nakoni bwaai aika tamaroa ni kabaneia ake a mena n ana tembora Toromon.

6. Tera manenan ana tembora te Atua rimoa?

⁶ E ngae ngke e teimatoa te kairiribai, ma e katiaaki te tembora n 515 B.C.E. Te tembora are i Ierutarem e teimatoa ni kabonganaki bwa nibwan te taromauri ae itiaki ibukin “bwaai aika tatangiraki” aika mwaiti, aika taekaia I-Iutaia ao Tientaire aika a rairaki nakon te Aro n I-Iutaia, ni karokoa tain ana karea Iesu. Ma te tembora arei e tei ibukin te bwai ae moanibaan te kakannato riki nakon anne, ae ti na noria ngkai.

Kakoroan Bukin Nanona n te Moan Tienture

7. (a) Tera ae kaikonakaki n ana tembora te Atua rimoa are e mena i Ierutarem? (b) Kabwarabwara ana mwakuri te ibonga ae rietata n te Bong ni Kabwara Buure.

⁷ Te tembora are i Ierutarem e tei ibukin te babaire ibukin te taromauri ae kakannato riki. E tei ibukin ana tembora n taamnei te Atua, are e kateia Iehova n 29 C.E., ao Iesu bon te Ibonga ae Rietata iai (Ebera 5:4-10; 9:11, 12) Iangoa aron kabotauan ana mwakuri te ibonga ae rietata i Iteraera, ao ana mwakuri Iesu. Ni katoa ririki, n te Bongi ni Kabwara Buure, te ibonga ae rietata e kaania te baonikarea ae mena inanon te oo ae itinanikun te tembora, ao e kareana te kao-te-tei ae te mwaane ibukin aia bure ibonga. Imwina riki, e rin nakon te tembora ma raraan te kao-te-mwaane, e rinanon inanon mataroa aika a kaokoroa te oo ae itinaniku ma te Ruu ae Tabu, ao e a manga rinanon te roki ae mena imarenan te Ruu ae Tabu ao te Ruu ae Moan te Tabu. Ngke e roko inanon te Ruu ae Moan te Tabu, te ibonga ae rietata ae katimtimwa te raraa imatan te ati ni berita. Imwina, e a manga karaoa te aro anne ngke e kareana te kooti temanna ibukin kabwaran aia bure ana baronga Iteraera aika 12 aika tiaki baronga n ibonga. (Nakoaia Ibonga 16:5-15) Tera irekereken te waaki aei ma ana tembora n taamnei te Atua?

8. (a) N te aro ra are e kareanaki Iesu ni moa man 29 C.E.? (b) Tera te iraorao ae kaokoro imarenan Iesu ma Iehova inanon ana tai ni karaoa ana mwakuri ni minita i aon te aonnaba?

⁸ Kaanga, e kareanaki Iesu i aon te baonikarea ae taekan nanon te Atua, ngke e babetitoaki ma ni kabiraki iroun taamnein te Atua ae raoiroi, n 29 C.E. (Ruka 3:21, 22) Te bwai are e a riki iai e kanikinaea moan waakinan te maiu ae te karea iroun Iesu ae maanna tenua ma te itera te ririki. (Ebera 10:5-10) Inanon te tai anne, Iesu e iraorao ma te Atua n ai aron te aomata ae natinaki n te taamnei. Te iraorao aei ae kaokoro, ae imarenan Iesu ao Tamana are i karawa, e aki kona n ataaki raoi irouia aomata tabemwaang. Ai aron ae iai te roki ae rabuna matan nanoia n te aro ae a aki ota iai, n ai aron ae iai ngkoa te roki ae karaba te Ruu ae Tabu mairouia aomata ake a mena n oon te uma n rianna ae tabu.​—Te Otinako 40:28.

9. Bukin tera Iesu ngke e aki kona n rin nako karawa n arona n aomata, ao e a kanga ni kaetaki anne?

⁹ E ngae ngke bon Natin te Atua ngaia ae kabiraki iroun te taamnei, ma e aki kona, te aomata ae Iesu, n roko i karawa. Bukin tera? Ibukina bwa e aki kona ni karekea ana Tautaeka n Uea te Atua i karawa, te iriko ma te raraa. (1 I-Korinto 15:44, 50) Kioina ngke irikon Iesu e totokoa rokona iai, e a riai ngke e kaikonakaki n te roki ae kaokoroa te Ruu ae Tabu ma te Ruu ae Moan te Tabu, ae mena n ana tembora te Atua rimoa. (Ebera 10:20) Ma tenua te bong imwin matena, ao e kautaki Iesu iroun te Atua bwa te taamnei. (1 Betero 3:18) Ao ngkanne, e kona n rin nakon te Ruu ae Moan te Tabu are e mena n ana tembora n taamnei te Atua—ae taekan karawa. Ao boni ngaia are e a riki. E korea ae kangai Bauro: “Ba e aki rin Kristo i nanon te tabo ae tabu [are e taekinna te Ruu ae Moan te Tabu] ae karaoaki ni baiia aomata, ae katotongan te tabo ni koaua; ma E bon rin i karawa, ba E aonga ni kaoti i matan te Atua i bukira.”—Ebera 9:24.

10. Tera are e karaoia Iesu ngke e a manga okira karawa?

¹⁰ Ngke e roko i karawa, Iesu e ‘katimtimwa raraan’ ana karea, n te aro ae e a kaotia nakon Iehova, manenan raraana ae kona ni kabooia aomata. Ma e bati riki are e karaoia Iesu iai. Bon tii teutana imwain matena, ao e tuangia taan rimwina ae kangai: “I nako ni katauraoi nemi i mwaimi. Ao ngkana I nako ni katauraoi nemi i mwaimi, ao I a manga nako mai ni kairingkami nako Iu; ba ike I mena iai ao kam na mena naba iai.” (Ioane 14:2, 3) Mangaia are ngke e roko Iesu nakon te Ruu ae Moan te Tabu are karawa, e kauka te kawai nakoia aomata tabeman bwa a na rimwina nako iai. (Ebera 6:19, 20) Aomata aikai, ake a na warekaki mwaitiia bwa 144,000, a na beku bwa ibonga naba aika ibuobuoki n ana babaire te Atua ae te tembora n taamnei. (Te Kaotioti 7:4; 14:1; 20:6) N ai aron te ibonga ae rietata i Iteraera ngke e uota moa raraan te kao-te-mwaane nako nanon te Ruu ae Moan te Tabu ibukin kabooan mwiin aia bure ibonga, manenan raraan Iesu ae katutuaki e a kamanenaki moa nakoia ibonga aika ibuobuoki aikai, aika 144,000 mwaitiia.b

“Bwaai Aika Tatangiraki” n Taai Aikai

11. Te ibonga ae rietata i Iteraera e kareana te kooti ibukia antai, ao bannan tera anne?

¹¹ N taraana, e a tia ikoikotakiia taani kabiraki n te ririki are 1935.c Ma e a tuai n tia ana mwakuri Iehova ni kaona maneabana n te mimitong. Bwa a na iai riki “bwaai aika tatangiraki” aika a na rin nako iai. Uringa bwa te ibonga ae rietata i Iteraera e kareani uomani man—ae te kao-te-mwaane ibukin aia bure ibonga, ao te kooti ibukin aia bure baronga aika tiaki baronga n ibonga. Kioina ngke ibonga a tei ibukia taani kabiraki ake a na mena ma Iesu n te Tautaeka n Uea i karawa, antai aika a kaikonakaki irouia baronga aika tiaki baronga n ibonga? E kaekaki anne n ana taeka Iesu n Ioane 10:16: “Bon iai au tiibu tabemang, ake tiaki kaain te ne aei: ao e riai ba N na kairiia, ao a na ongo bwanau; ao a na ti te nanaina, ao ti temanna te tia kawakin-tiibu.” Mangaia are raraan Iesu ae katutuaki e manena nakoia koraki n aomata aika uoua—te moan, boni Kristian ake taani kaantaninga bwa a na uea ma Iesu i karawa, ao te kauoua, te koraki ake a kaantaninga te maiu n aki toki i aon te aonnaba ae te baretaiti. E teretere bwa te kaua koraki aikai a kaikonakaki irouia “bwaai aika tatangiraki” aika a taekinaki n ana taetae ni burabeti Akai.​—Mika 4:1, 2; 1 Ioane 2:1, 2.

12. A kanga “bwaai aika tatangiraki” aika mwaiti n tabe ni kairaki nakon maneaban te Atua n taai aikai?

¹² “Bwaai aika tatangiraki” aikai, a tabe naba ni kaona maneaban Iehova ngkai. N ririki ake a tibwa nako, a kamaunaki kaetieti aika katabua te mwakuri i Eurobe Mainiku, aban Aberika tabeua, ao aaba tabeua riki, ae e kariaia iai rikiraken uaan euangkerion ana Tautaeka n Uea te Atua ae e a tia n tei ngkai, n aaba ake e aki tataekinaki iai rimoa. Ngkana aomata aika tangiraki aikai, a tabe n rin nakon ana babaire n tembora te Atua, a keiaki naba ngaiia ni kataia ni kakiritiania riki aomata, bwa a ongeaba iai n ana tua Iesu. (Mataio 28:19, 20) Ao ngkana a karaoa anne, a kaitiboo ma aomata aika mwaiti aika a kara ao aika a ataei riki, aika a kona n riki bwa “bwaai aika tatangiraki” aika a na kabatia mimitongin maneaban Iehova. Iangoi katoto tabeua aika a kaota aron rikin anne ngkai.

13. E a kanga te ataeinaine ae uarereke i Bolivia ni kaota aron ingaingan nanona ibukin kabutan rongorongon te Tautaeka n Uea?

¹³ I Bolivia, te ataeinaine ae ai nimaua ana ririki ni maiu ae e kaikawaaki irouia ana karo aika taani Kakoaua, e bubutii taekana iroun ana tia reirei bwa e na aki reirei inanon bongin te wiki are e na kawaraki aia ekaretia iroun te mataniwi ibukin te circuit. Bukin tera? E tangiria n ira te mwakuri ni minita inanon te wiki ni mwakuri ae kaokoro anne. A mimi iai ana karo, ma a kukurei ngke e kaota nanona ae raoiroi aei. Te ataeinaine ae uarereke aei e kairi reirei n te Baibara aika nimaua ma aomata, ao tabeman mai buakoia ake a kaei bobotaki ni Kristian. E a tia naba ni kaira ana tia reirei man te kuura, nakon te Maneaba n Uea. Tao imwin tabeua te tai, aomata tabeman ake e reirei ma ngaiia n te Baibara a na kaotiia bwa “bwaai aika tatangiraki” aika a na kamimitonga maneaban Iehova.

14. I Korea, e a kanga aron uaan botumwaakan te tari-te-aine temanna ngke e maroro ma te aomata ae e tara n aki kan ongora?

¹⁴ Ngke e tataninga n te tabo n turein, te aine ae te Kristian i Korea, e kaania ataein te reirei ae tabe n ongora n te katangitang n ana walkman. “Bon iai am Aro?” e titiraki neierei. “I aki kona n tabe ma te Aro,” e kaeka ataein te reirei. E aki bwara nanon te tari-te-aine iai. E reitia ni kangai: “Ngkana e bwaka nako te tai, tao te aomata e na tangiria n rinea ana Aro teuana. Ma ngkana akea ana atatai i aon te Aro, ao e kona n rinea ae kairua.” E bitaki moan te ataei arei, ao e moanna ni kakauongo iroun te tari-te-aine. E kaota nakoina te boki ae Is There a Creator Who Cares About You? ao e taku bwa te boki aei e na rangi n ibuobuoki nakoina n te tai are e na tangiria n rinea ana Aro. E kukurei ni butimwaea te boki anne. N te wiki are imwina, e moanna n reirei n te Baibara ma Ana Tia Kakoaua Iehova, ao ngkai, e kakaei bobotaki n te ekaretia.

15. E a kanga ni karekei reirei n te Baibara aika boou, te ataeinaine temanna i Tiaban, ao tera uaan ana kekeiaki aei?

¹⁵ I Tiaban, Nei Megumi, ae ai 12 ana ririki ni maiu, e iangoa ana kuura bwa te tabo ae e rangi n nakoraoi iai tataekinan te rongorongo ao reiakinaia aomata. E a tia naba ni kona ni karekei reirei n te Baibara aika mwaiti. E a kanga ni karaoa anne Nei Megumi? Kioina ngke e wareka te Baibara ke e karaoa ana katauraoi ibukin botaki n tain te tawanou, raoraona n reirei a aki toki n titirakinna bwa tera are e karaoia. Tabeman a titirakina Nei Megumi bwa bukin tera ngke e aki iri waaki tabeua aika a karaoaki n te kuura anne. E kaekai aia titiraki Nei Megumi, ao e tuangia bwa iai aran te Atua. A mwaiti aomata aika a anaaki nanoia ni kan ongora ibukin aei. Ao ngkanne, e tuangia bwa a kona n reirei n te Baibara ma ngaia. N te tai aei, Nei Megumi e kairi reirei n te Baibara aika 20 mwaitiia—ao 18 mai buakoia a kairaki ma raoraona n reirei.

16. E a kanga aron te tari-te-mwaane temanna i Cameroon ni karekea te reirei n te Baibara ma aomata tabeman aika a mena ibuakoia taani kakaniko?

¹⁶ I Cameroon, mwaane aika waniman ake a mwakuri n te tabo teuana a wewete nakon te tari-te-mwaane are e tabe n tibwatibwai booki ibukin te Baibara nakoia aomata aika a riirarikina. A tangiria ni kakanikoa te tari-te-mwaane arei ao a titirakinna bwa bukin tera ngke e aki kakoaua te Temanna-n-teniman, te ai ni moone, ke aki-mamaten te taamnei. E kabongana te Baibara ni kaeka aia titiraki teuarei. Ibukin anne, teniman mai buakoia mwaane akekei a butimwaea te reirei n te Baibara. Temanna mai buakoia are arana Taniera, e moanna ni kaei botaki ao e kamaunai ana bwai n tabunea ni kabane. (Te Kaotioti 21:8) E uarereke riki nakon teuana te ririki ao e a babetitoaki naba.

17. A kanga taari tabeman i El Salvador ni kabongana te wanawana ibukin tataekinan te rongorongo nakon te mwaane are e aki kan ongora taekan rongorongon te Tautaeka n Uea?

¹⁷ I El Salvador, te mwaane temanna e karaoa te mwaan ae e roona ana kamea ae tiritiri imatan mataroan ana auti ngke e noriia Ana Tia Kakoaua Iehova ni mwakuri n ana tabo. Aron teuare bwa e tataninga ni karokoa ae a a tia ni kitana te tabo anne taani Kakoaua, ao ngkanne, e na manga karina ana kamea inanon ana auti. E aki reke iai aia tai taari ni kona ni maroro ma te mwaane arei. Mangaia are n te taina, a kataa te aro ae kaokoro. A ataia bwa te mwaane arei e kona n ongo n aia taetae ni kawai, ao a baireia bwa a na tataekina te rongorongo nakon te kamea arei. A kawara te auti, a kamauri ma te kamea ao a taekinna bwa a kukurei ngke e a reke aia tai ni maroro ma ngaia. A maroroakina te tai are e na roko te baretaiti i aon te aonnaba, ike akea te aomata iai ae e na un—ao a na rau naba taiani man. Ao ngkanne a kaboo ma te kamaea arei ao a tannako bwa a na oti nako mai iai. Ma a mimi ngke e otinako mai nanon ana auti te mwaane arei, ao e kabwara ana bure nakoia ibukina bwa e a tuai n angania taani Kakoaua aia tai ni maroro ma ngaia. E butimwaei maekatin, ao e a moanaki te reirei n te Baibara ma ngaia. Te mwaane arei e a riki bwa tarira ngkai—ae temanna mai buakon “bwaai aika tatangiraki”!

“Tai Maku”

18. Baikara kangaanga aika a kaitara ma Kristian aika mwaiti, ma tera aron tarakiia taan taromauri iroun Iehova?

¹⁸ Ko a tabe ni buoka te mwakuri ae moan te riai ae tataekinan ao reiakinaia aomata n taekan te Tautaeka n Uea? Ngkana ngaia, ao ko a rangi ni kakabwaiaki. Bwa Iehova e kabongana te mwakuri aei ni kairia “bwaai aika tatangiraki” nako nanon maneabana. (Ioane 6:44) Te koaua bwa n taai tabetai ko na kua iai ke e na bwara nanom. N taai tabetai tabeman—ao tabeman naba aika a kakaonimaki n toro iroun Iehova—a kona n namakina naba a aki tau iai. Ma e na tai bwara nanom! Iehova e iangoia taan taromauriia n tatabemania nako bwa bwaai aika tatangiraki, ao e rangi n tabe ma kamaiuam.​—2 Betero 3:9.

19. Tera te kaunga nano ae katauraoaki iroun Iehova rinanon Akai, ao a kanga ni kona ni kakorakoraira naba taeka aikai?

¹⁹ Ngkana a bwara nanora ibukin te kairiribai, ke bwaai aika aki raraoi aika a riki, a kona ni kaungai nanora ana taeka Iehova nakoia I-Iutaia ake a kaokaki nako abaia. Ti wareka ae kangai n Akai 2:4-6: “Ao ngkai, ko na korakora, Terubabera, bon ana taeka Iehova; ao ko na korakora, Iotua, ae natin Ieotataka, are mataniwiia ibonga; ao kam na bane ni korakora, ngkami aika aomatan aon te aba ni kabaneingkami, bon ana taeka Iehova, ao kam na makuri: ba I memena i roumi, bon ana taeka Iehova Tabaota, n ai aron te taeka are I atongnga ni beritaia ma ngkami ngke kam oti nako mai Aikubita. Ao e maeka Tamneiu i buakomi: kam na tai maku. Ba E kangai ana taeka Iehova Tabaota: Ai ti teuana riki te tai, ai ti teutana riki maanu, ao N na kamwaeieia karawa, ma aonaba, ma marawa, ma aontano.” Taraia bwa Iehova e aki tii kaunga nanora bwa ti na korakora, ma e anganira naba te ibuobuoki ae ti kona ni kakorakoraira iai. Ni kanga? Tarai taeka aika a kaunga nano aikai: “I memena i roumi.” Ai korakora ra ara onimaki ngkai ti ataia bwa e memena irarikira Iehova ni kangaanga ni kabane aika ti kaitara ma ngaai!​—I-Rom 8:31.

20. N te aro ra ae e a tabe ni kaonaki maneaban Iehova n te mimitong ae bati riki ngkai?

²⁰ E a tia ni kakoaua bwa e mena irarikia ana aomata Iehova. E a riki ae taekinaki rinanon Akai rimoa: “E na maiti riki mimitongin te maneaba aei ae mimitongina ae rimwi nakon are rimoa. . . . N na anga te rau nakon te tabo aei.” (Akai 2:9) Te koaua bwa te mimitong ae korakora riki ni boong aikai, e kona n reke n ana tembora n taamnei Iehova. Bwa bubua ni ngaa mwaitiia aomata ake a roko ni kaea te taromauri ae itiaki iai ni katoa ririki. A kaamwarakeaki raoi n te amwarake n taamnei aomata aikai, ao e ngae ngkai a maeka n te aonnaba ae aki rau, ma iai irouia te rau ae e na tii kona ni kabatiaki riki n ana aonnaba ae boou te Atua.—Itaia 9:6, 7; Ruka 12:42.

21. Tera ae ti riai ngkai ni motika nanora nako iai?

²¹ E nang roko tain ioioakin taiani botannaomata iroun Iehova n Aremaketon. (Te Kaotioti 16:14, 16) Ti bia kabongana nikiran te tai ngkai ibukin kamaiuaia aomata aika mwaiti riki. Ti bia kakorakora ma n onimakina raoi Iehova. Ti bia motika nanora bwa ti na teimatoa n taromauri n ana tembora n taamnei ae kakannato, ma ni kaona ni “bwaai aika tatangiraki” aika mwaiti riki, ni karokoa te tai are e taku Iehova bwa e a tia ara mwakuri iai.

[Kabwarabwara ae nano]

Ko Uringnga?

• Tera ae tatangiraki riki iroun Iehova nakon bwaikoraki aika kakawaki?

• Antai koraki n aomata aika uoua aika a kakabwaiaki man raraan Iesu ae katutuaki?

• Antai “bwaai aika tatangiraki” aika a na kaona maneaban Iehova n te mimitong?

• Tera kakoaua aika a kaotia nakoira bwa e a tabe ni kakoroaki bukin ana taetae ni burabeti Akai n taai aikai?

[Diagram n iteraniba 16]

(Ibukini bitakin taeka, nori booki)

Ko ataa nanon ae kaikonakaki n ana tembora Iehova rimoa?

Te Roki

Te Ruu ae Tabu

Te Bao ni Karea

Te Ruu ae Moan te Tabu

Te Kaman

Oon Nanoa

[Taamnei n iteraniba 25]

Te ibonga ae rietata e kareana te kao te mwaane ibukin aia bure ibonga, ao te kooti ibukin aia bure barongan Iteraera aika tiaki baronga n ibonga

[Taamnei n iteraniba 26]

Tataekinan te Tautaeka n Uea ni katobibia te aonnaba e a tabe ngkai ni kairia aomata aika uanao nakon maneaban Iehova