A Kona ni Manga Maiu Am Koraki Aika Tangiraki Iroum!

E karika te nanokawaki ao te rawawatannano ae korakora te mate. Anne bukina ae e arana te mate te Baibara bwa te tia kairiribai. (1 I-Korinto 15:26) N Reirei 27, ko reiakinna iai ae e na boni kataenikaia te tia kairiribai aei Iehova. Ma tera ae e na riki nakoia naake a a kamani mate? N te reirei aei, ko na nora ana berita riki teuana Iehova ae moan te tamaroa ae e na kautiia aomata aika birion ma birion bwa a na manga maiu ni kukurei n aki toki. E na boni kautiia! E boni kona n riki anne? A na kautaki bwa a na maiu i karawa ke n te aonnaba?

1. Tera ae e kani karaoia Iehova ibukia ara koraki aika tangiraki iroura ake a a tia ni mate?

E kariariaa te tai Iehova are e nang kautiia iai naake a a tia ni mate. E kakoauaa raoi te mwaane ae kakaonimaki ae Iobi bwa e na bon aki mwanuokinna te Atua ngkana e mate. E taku nakon te Atua: “Ko na wewete, ao N na kaekako [man te Ruanimate].”​—Wareka Iobi 14:​13-15.

2. Ti kangaa n ataia ae a kona ni manga kautaki maate?

Ngke e mena Iesu n te aonnaba, ao e anganna te mwaaka te Atua ni kona ni kautiia aomata. E kauta te teinnaine Iesu ae 12 ana ririki ao te roronga temanna ae natin te aine ae e a tia ni mate buuna. (Mareko 5:​41, 42; Ruka 7:​12-15) Imwina, e a mate raoraon Iesu ae Rataro. E ngae ngke e a maan ni mate Rataro bwa ai abong ana bong, ma e a manga boni kautia Iesu. Ngke e tia n tataro Iesu nakon te Atua, ao e a takarua naba ni kangai: “Rataro, otinako!” Ao “e a otinako teuare mate.” E a uti Rataro! (Ioane 11:​43, 44) Iangoa kimwareireia ana utu ao raoraon Rataro!

3. Tera te kantaninga ibukia am koraki aika tangiraki ake a a tia ni mate?

E berita ni kangai te Baibara: “A na boni mangauti.” (Mwakuri 24:15) A bon aki nako karawa naake e kautiia Iesu rimoa. (Ioane 3:13) A boni kukurei ngke a kautaki bwa a na manga maiu n te aonnaba aei. N aron naba anne, e na boni waekoa ni kautiia birion ma birion Iesu bwa a na maiu n aki toki n te aonnaba ae bwaretaiti. E taekinna bwa a na boni kautaki “aomata ake a mena i nanon taian ruanimate,” e ngae naba ngkana aomata aika taraa ni mwanuokinaki, ma a boni mena n ana ururing te Atua.​—Ioane 5:​28, 29.

REIAKINA AE BATI RIKI

4. E kaotia raoi Iesu bwa e kona ni kautiia maate

Reiakina ae bati riki ni kaineti ma te baere e karaoia Iesu nakon raoraona are Rataro. Wareka Ioane 11:​14, 38-44, ao maroroakin titiraki aikai:

• Ti kangaa n ataia bwa e boni mate raoi Rataro?​—Nora kibuna 39.

• Ngkana ngaia bwa e bon nako karawa Rataro, n am iango e na boni kautia Iesu bwa e na manga maiu n te aonnaba?

Kaota te TAAMNEI.

TAAMNEI: E Kauta Rataro Iesu (1:16)

5. A bati aika a na kautaki!

Wareka Taian Areru 37:​29, ao maroroakina te titiraki aei:

• A na maeka ia naake a na kautaki ake birion ma birion mwaitiia?

A bati riki ake a na kautaki iroun Iesu ma tiaki tii taan taromauria Iehova. Wareka Mwakuri 24:​15, ao maroroakina te titiraki aei:

• Antai ae ko kan noria ngkana e kautaki?

Iangoa aei: E bebete iroun Iesu kautakin temanna n aroni bebeteni kautakin te teei ae matu iroun tamana

6. E kona ni kabebeteko te mangauti ao n anganiko te kantaninga

A kabebeteaki aomata aika nanokawaki ao ni kaungaaki n rongorongon natin Iairo te aine ae n te Baibara. Wareka te karaki ane koaua anne n Ruka 8:​40-42, 49-56.

Imwaini kautan natin Iairo te aine, e tuanga taman te teinnaine Iesu ni kangai: “Tai maaku, ma ko na tii onimaki.” (Nora kibuna 50.) E na kangaa ni buokiko te kantaninga ae te mangauti . . .

• ngkana e mate ae tangiraki iroum?

• ngkana e a ruanikai maium?

Kaota te TAAMNEI, ao maroroakina te titiraki aei.

TAAMNEI: E Kangaa ni Karikirakea te Ninikoria te Kantaninga Ibukin te Mangauti? (3:21)

• A kangaa ni kabebeteaki ao ni kaungaaki ana karo Phelicity n te kantaninga ae te mangauti?

KAKIMOTOTOANA

E berita te Baibara bwa a na kautaki aomata aika birion ma birion. E tangiriia Iehova bwa a na manga maiu, ao e a tia n angan Iesu te mwaaka bwa e na kautiia.

Kauring

• Tera aia namakin Iehova ao Iesu ni kautakia naake a mate?

• A na maeka ia aomata aika birion ma birion aika kautaki, i karawa ke n te aonnaba? E aera ngkai ko taekina anne?

• Tera ae kairiko bwa ko na kakoauaa ae a kona ni manga maiu naake a tangiraki iroum?

NORI NABA AIKAI

Reiakini mwaneka aika manena ake ko kona ni kekeiaki iai ma nanokawakim.

“Buokaia Aika A Rawawata Nanoia” (Taratara! Na. 3 2018)

E kona ana boto n reirei te Baibara ni buokiia aika a rawawata nanoia?

Ngkana E Mate ae Tangiraki Iroura (5:06)

A na kangaa ataei ni kekeiaki ma maten ae tangiraki irouia?

Te Kaboomwi (2:07)