REIREI 21
E Kangaa n Tataekinaki te Rongorongo ae Raoiroi?
E a kaan te tai are e nang kamaunai iai ara kangaanga ni kabane Iehova, rinanon ana Tautaeka n Uea. E rangi n raoiroi te rongorongo aei ao a riai n ongo aomata. E tangiriia taan rimwina Iesu bwa a na tibwaa te rongorongo aei nakoia aomata nako! (Mataio 28:19, 20) Tera aroia Ana Tia Kakoaua Iehova nakon te bae e tua Iesu aei?
1. E kangaa ni kakororaoaki Mataio 24:14 ni boong aikai?
E a kamani kangai Iesu: “E na tataekinaki te rongorongo ae raoiroi aei ae taekan te Tautaeka n Uea, n te aonnaba ni kabutaa.” (Mataio 24:14) A kukurei Ana Tia Kakoaua Iehova n uataboa te mwakuri ae kakawaki aei. Ti tataekina te rongorongo ae raoiroi aei ni katobibia te aonnaba n taetae aika raka i aon 1,000 mwaitiia! Te mwakuri ae abwabwaki aei e boni kainnanoa te kakorakora ae bati ao te botaki teuana. E aki kona ni karaoaki n akean ana ibuobuoki Iehova.
2. Tera ae ti kakorakoraira ni karaoia bwa ti aonga n uarongorongo nakoia aomata?
Ti uarongorongo n taabo nako ake ti boo iai ma aomata. N aroia Kristian n te moan tienture, ti uarongorongo “n te auti teuana ma teuana.” (Mwakuri 5:42) Te aeka n uarongorongo aei are e a karokoira irouia mirion ma mirion aomata ni katoa ririki. Kioina ngkai iai naba taai ake a aki mena iai n aia auti aomata, ti uarongorongo naba n ana tabo te botannaomata. Ti kakakaaei aanga ake ti na kona iai ni kaongoia aomata taekan Iehova ma ana kantaninga.
3. Antai tabena tataekinan te rongorongo ae raoiroi?
Bon tabeia Kristian ni koaua ni kabane tibwaan te rongorongo ae raoiroi nakoia aomata. E rangi ni kakawaki iroura tabera aei. Ti katoatai n uarongorongo n aron ae ti kona, bwa ti ataia ae e kona n reke kamaiuia iai aomata. (Wareka 1 Timoteo 4:16.) Ti aki kabooaki ngkai ti karaoa te mwakuri aei, bwa e kangai te Baibara: “Kam anganaki n akea boona, aanga naba n aki kabooaki.” (Mataio 10:7, 8) A aki bane aomata ni butimwaea ara rongorongo. Ma ti teimatoa n uarongorongo ngkai bon iteran naba ara taromauri, ao e kakukureia Iehova.
REIAKINA AE BATI RIKI
Nora riki aroia Ana Tia Kakoaua Iehova ni kakorakoraia n uarongorongo ni katobibia te aonnaba ao aron Iehova ni buokira.
Te uarongorongo ni katobibia te aonnaba: (A) Costa Rica, (B) Amerika, (C) Benin, (D) Thailand, (E) Yap, (F) Sweden
4. Ti kakorakoraira ni karoko irouia aomata nako
A kakorakoraia Ana Tia Kakoaua Iehova n tataekina te rongorongo ae raoiroi nakoia aomata n taabo nako. Kaota te TAAMNEI, ao maroroakina te titiraki aei.
Tera ae anaaki iai nanom ni kaineti ma aia kakorakora Ana Tia Kakoaua Iehova n uarongorongo?
Wareka Mataio 22:39 ao I-Rom 10:13-15, ao maroroakin titiraki aikai:
E kangaa n oti n ara mwakuri ni minita bwa ti tangiriia aomata nako?
Tera ana namakin Iehova irouia naake a tataekina te rongorongo ae raoiroi?—Nora kibuna 15.
5. Bon raon te Atua ni mwakuri ngaira
A bati rongorongo aika kaotia bwa bon Iehova ae kairira ara mwakuri. N te katoto, iai te tari temanna i New Zealand ae arana Paul, ae kaitiboo ma te aine temanna n tain te mwakuri n te auti teuana ma teuana n te bwakantaai teuana. N te ingabong raoi anne, ao e tataro te aine aei nakon te Atua ni kamanena aran te Atua ae Iehova, ao e bubutii kawarana.” E taku Paul: “Tenua te aoa imwina ao I a roko n ana mataroa.”
Wareka 1 I-Korinto 3:9, ao maroroakina te titiraki aei:
E kangaa n oti man rongorongo aika ai aron are i New Zealand, ae e boni kaira te mwakuri n uarongorongo Iehova?
Wareka Mwakuri 1:8, ao maroroakina te titiraki aei:
E aera ngkai ti kainnanoa ana ibuobuoki Iehova ni kakororaoan ara mwakuri ni minita?
Ko ataia?
Ni katoa wiki n ara taromauri are i nanon te wiki, ao ti kataneiaaki iai nakon te uarongorongo. Ngkana ko kaakaei botaki aikai, tera am iango n te kataneiai aei?
6. Ti ongeaba n ana tua te Atua ae ti na uarongorongo
A kataia taani kakaaitara n te moan tienture ni katoka aia uarongorongo taan rimwin Iesu. A katea bukin riaia n uarongorongo Kristian n te moan tienture, n aroia ‘ni kamatoaa te rongorongo ae raoiroi i matan te Tautaeka.’ (I-Biribi 1:7) A karaoa naba anne ngkai Ana Tia Kakoaua Iehova.a
Wareka Mwakuri 5:27-42, ao maroroakina te titiraki aei:
E KONA NI KANGAI TEMANNA: “A aera Ana Tia Kakoaua Iehova ngkai a kawari auti nako?”
Ko na kangaa ni kaeka?
KAKIMOTOTOANA
E anga te kaetieti Iesu nakoia taan rimwina bwa a na tataekina te rongorongo ae raoiroi nakoia natannaomata nako. E buokiia ana aomata Iehova ni karaoan te mwakuri aei.
Kauring
E kangaa n tataekinaki te rongorongo ae raoiroi ni kabutaa te aonnaba?
E kangaa n oti n ara mwakuri ni minita bwa ti tangiriia aomata nako?
N am iango e kona te mwakuri n uarongorongo ni karekea nakoira te kukurei? Bukin tera?
NORI NABA AIKAI
Nora aroia Ana Tia Kakoaua Iehova n uarongorongo nakoia aomata ni kaawa aika bubura.
Te Uarongorongo ae Okoro n Ana Tabo te Botannaomata i Paris (5:11)
A kangaa Ana Tia Kakoaua Iehova ni karoko irouia taani birinako mai abaia?
Karekeani Baika Kainnanoi n te Onimaki Taani Birinako Mai Abaia (5:59)
Ongora bwa e aera neiei ngkai e rangi ni kukurei ni kabanea maiuna n uarongorongo.
Nori boowi tabeua ake ti tokanikai iai, ao ni kona n tataekina te rongorongo ae raoiroi.
a Bon te Atua ae tua bwa ti na uarongorongo, ngaia are a aki kainnanoa te kariaia mairouia tautaeka n aomata Ana Tia Kakoaua Iehova.