E a Manga Maiu te Teinnaine!

E noria Iairo bwa e a marurung te aine arei iroun Iesu man aorakina are te nraraa. E kakoauaa bwa e kona naba Iesu ni buoka natina, e ngae ngke e namakinna bwa ‘e a bae n tia ni mate ngkai natina te aine.’ (Mataio 9:18) E kona n reke buokana?

Ngke e tabe ni kakaraki Iesu ma te aine are e a tia ni kamarurungnga, ao a a roko tabeman mwaane mani mwengan Iairo ao a taku: “E a mate natim!” A a manga taku riki: “E aera bwa ko na katabea riki te tia Reirei?”​—Mareko 5:35.

Ai kauruakinanora te rongorongo aei! E rangi ni bwara nanon te mwaane ae korakora karineana aei irouia aomata. E a mate natina ae ana rikitemanna. Ma e ongo Iesu te rongorongo aei ao e rairaki nakon Iairo ao e kaungaa ni kangai: “Tai maaku, ma ko na tii onimaki.”​—Mareko 5:36.

E a airi ngkanne Iesu ma Iairo nakoni mwengana. Ngke a a roko ao e a rangi ni bati te karongoa. A bwaebwaeti ao a tanginiwenei aomata ake a botaki ikanne ao a ororei bwanibwania ibukin nanokawakia. E rinnako Iesu ao e a kakubanakoia aomata n ana taeka ngke e taku: “Kai e aki mate te teinnaine bwa e matu.” (Mareko 5:39) A ngareakina Iesu aomata ngke a ongo te taeka arei, bwa a ataia ae e a boni mate. Ni kamanenaani mwaakana are e anganna te Atua, e nang kaotia iai Iesu bwa a kona ni manga kautaki aomata man te mate n aron ae a kona ni kautaki man te mwanionako ni matu.

E a kaotinakoia ngkai aomata nako Iesu ma tii Betero, Iakobo, Ioane, ao ana karo neiei, ake a tiku. E kairiia naaka niman aikai nakon te tabo are e wene iai neiei. E taua baina ao e taku nakoina: “‘Tarita koumi,’ ae nanona ngkana e rairaki: ‘Te teinnaine ae uarereke, I tuangko bwa ko na teirake!’” (Mareko 5:41) E teirake ngkekei naba ao e a nakonako. Iangoa te kimwareirei ae bati iroun Iairo ma buuna ngke a nora aei! Ibukini kakoauaan ae e a boni maiu neiei, e a tuatua Iesu bwa e na anganaki kanana.

Ni kaineti ma baike a riki mai mwaina, e tua Iesu nakoia te koraki ake e kamarurungia bwa a na aki kaokaota te baere e karaoia ibukia, ao e a manga tuangia naba kaaro aikai. E ngae n anne, a kabutaanako te rongorongo “n te aono anne” kaaro aika rangi ni kukurei aikai ao tabeman riki. (Mataio 9:26) Ngkana ko nora temanna ae tangiraki iroum bwa e a kautaki man te mate, tiaki ko na bae ni maroroakina taekana ma te kukurei? Aio te kauoua ni kautiuti ae koreaki taekana are e karaoia Iesu.