E Marurung Man Ringan Ana kunnikai Iesu

E butanako rongorongon okin Iesu mai Tekabori i buakoia I-Iutaia ake a maeka i meangimaeaon Namani Kariraia. Tao a bati ake a a tia n ongo taekani katokan te angibuaka are e a tibwa tia n riki ngke e katoka te ang ma te nao Iesu, ao tabeman a bae n ataa are e kamarurungia mwaane ake a taniaki irouia taimonio. Ngaia are a ikotaki “aomata aika uanao” i rarikin te nama, tao n aononi Kaberenaum ni butimwaea Iesu ngke e a oki. (Mareko 5:21) Ngke e a toko waena ma mataniwin te aba, ao e a korakora ingaingan nanoia ao aia kakantaninga.

Temanna i buakoia ake a kakantaningaa Iesu bon Iairo ae te mataniwi temanna n te tinakoka, tao i Kaberenaum. E katorobubua i rarikini waen Iesu ao e kaokioka ana bubutii ni kangai: “E a kakaiaki aorakin natiu te aine ae uarereke. Taiaoka nakomai ao kaaki baim i aona bwa e aonga ni marurung ao e na aki mate.” (Mareko 5:23) E na kangaa Iesu ni kaekaa ana bubutii Iairo ibukini buokan natina ae ana rikitemanna, are ai tibwa 12 ana ririki ao e rangi ni mamate nanona irouna?​—Ruka 8:42.

Ngke e a mwananga Iesu nakon ana auti Iairo, ao e a kaaitara ma te bwai ae riki are e namakinna. A bati aomata aika ira Iesu ake a ingainga, ao a iangoia bwa a kona ni manga noria ni karaoa te kakai riki teuana ke a aki. Ma e kaatuua iangoan aorakina ae kakaiaki te aine temanna i buakoia.

E karawawataaki n te nraraa te aine ae te I-Iutaia aei i nanon 12 te ririki. E a tia ni kakawariia taokita aika kakaokoro, ni kabanea ana mwane ibukini bwainnaorakiana, ma e tuai man reke buokana. Ni koauana, “e a korakora riki” ana kangaanga.​—Mareko 5:26.

Ko bae n ataia bwa e aki tii mamaara neiei n te aoraki aei, ma e kamaamaea naba ao ni kamangoria. E kamatauninga taekinan te aeka n aoraki aei i buakoia aomata. Irarikin anne, e taekinaki n te Tua Rinanoni Mote bwa e aki itiaki te aine ngkana e waanako raraana, ao a riai ni kaitiakiia aomata ake a ringa neienne, ke a ringi ana kunnikai ake a teke n raraana, ao a na tiku n aki itiaki ni karokoa te tairiki.​—Nakoaia Ibonga 15:25-27.

E a tia neiei n “ongo rongorongon Iesu,” ao e a ukoukoria ngkai. Ibukina bwa e aki itiaki, e a kabanea ana konaa n ribuakoia aomata n aki ataaki ao e taku: “Ngkana I tii ringa ana kauaatao, ao I a marurung naba.” Ngke e a ringa buruburun ana kunnikai Iesu, ao e a namakina naba ngkekei tokin nraraana! E a “marurung man aorakina ae korakora.”​—Mareko 5:27-29.

E taku ngkanne Iesu: “Antai ae ringai?” N am iango, tera ana namakin neiei ngke e ongo taeka akanne? E kaeka Betero ao n taraana e kaeta Iesu ni kangai: “Kai a otabwaniniko te koraki ma ni karibwako.” Ma bukin tera ngke e titiraki Iesu ni kangai: “Antai ae ringai?” E kabwarabwaraa Iesu ni kangai: “Iai ae e ringai bwa I ataia bwa e otinako te mwaaka mairou.” (Ruka 8:45, 46) Eng, e otinako te korakora mairoun Iesu n te kamarurung are e a tia n riki.

Ngke e noria neiei bwa e aki kona ni karabaa, ao e a katorobubua naba i matan Iesu n ruru ni maaku. E taekina te koaua i mataia aomata ni kabane ibukin aorakina are e a tibwa marurung ngkai mai iai. E kabebetea nanon neiei Iesu ma te akoi ao e taku nakoina: “Natiu, e kamarurungko am onimaki. Naako ma te rau, ao ko na marurung man aorakim ae korakora.”​—Mareko 5:34.

E teretere bwa bon te aomata ae atataiaomata Teuare e rineia te Atua bwa e na tautaekana te aonnaba, are e aki tii tabeakinia aomata ma iai naba mwaakana ni buokiia!