Kakoroani Bukin Ana Taetae ni Burabeti Itaia

E nako Namani Kariraia Iesu ma taan rimwina ngke e a ataia bwa a a bairea kamateana Baritaio ma ana koraki Erote. A a iraki ngkai irouia aomata aika uanao mai Kariraia, Turo ao Titon, mai mainikun te Karaanga are Ioretan, mai Ierutarem ao Itumia nako maiaki. E bati ake e kamarurungia Iesu. N tokina a a bati aoraki aika kakaiaki ake a ikekeebuti bwa a kani kamarurungaki. A aikoa tataningaa ringakia irouna ma a a kan “ringnga.”​—Mareko 3:9, 10.

E a rangi ni bati te koraki ngaia are e a tuangia taan rimwina Iesu bwa a na karekea te booti ae uarereke bwa e na toka iai ao e na kararoaaki teutana ma mataniwin te aba bwa e aonga n aki karibwaaki irouia aomata. E kona naba n reireinia aomata mai aon te booti ke n ienako riki nakon te tabo teuana ni buokiia riki aomata iai.

E korea taekan ana mwakuri Iesu te tia rimwina ae Mataio are e a “kakororaoaki [iai] te baere e taekinaki rinanon Itaia are te burabeti.” (Mataio 12:17) Tera te taetae ni burabeti ae e kakoroa bukina ikai Iesu?

“Noria! Au toro ae I rineia ae tangiraki irou, ae I kakatonga irouna! N na anganna taamneiu, ao e na kamataataa te kaetitaeka ae riai nakoia natannaomata. E na aki mwamwangaingai ao e na aki tatakarua, ao akea ae e na ongo bwanaana, i nanoni kawai. Akea te maunei ae einako ae e na kamanatuaa, ke ni kamatea te taura ae bubu wikina, ni karokoa te tai are e a tokanikai iai ni karekea te kaetitaeka ae riai. Eng, e boto kantaningaan ae raoiroi irouia natannaomata i aon arana.”​—Mataio 12:18-21; Itaia 42:1-4.

Bon te tabonibai Iesu ae tatangiraki iroun te Atua. E kabwarabwaraa ae nanonaki raoi Iesu n te kaetitaeka ae riai, are e a kabwaouaaki n aia katei Aaro aika kewe. Ibukin aroia Baritaio n ribuaka ni kamanena ana Tua te Atua n oin nanoia, a aikoa kona ni buoka te aomata ae aoraki n te bongi n Taabati. E katereterea Iesu raoiroin ana kaetitaeka ae riai te Atua ao e kaotia naba bwa e mena irouna taamnein te Atua, n arona ni kabebeteia aomata aika karawawataaki ni katei aika ribuaka. Ao ibukin anne, a a kani kamatea Iesu mataniwin te Aro. Ai boni buakakara aroia anne!

Tera ae nanonaki n ae “e na aki mwamwangaingai ao e na aki tatakarua, ao akea ae e na ongo bwanaana, i nanoni kawai”? Ngke e kamarurungia aomata Iesu ao e aki kariaia te koraki aei ke taimonio bwa a na “kaota taekana.” (Mareko 3:12) E aki tangiriia aomata bwa a na reiakina taekana rinanoni katanoataana i nanoni kawai ke ni bwarantikoaki ma te ingaingannano n te aro ni kewe irouia ­aomata.

E uouota naba ana rongorongo Iesu ae kabebetea te nano nakoia aika kaikonakaki bwa maunei aika einako aika bobaraaki ma n toubekaaki. A katotonga te taura ae bubu wikina are e nangi mate. E na aki toubeka te maunei ae einako Iesu ke n tiringa te taura ae nimamate, ma e mwaatai ni kateirakeia akana nimamannei ma te mwamwannano ao te tangira. Ni koauana a kona natannaomata n onimakina Iesu!