Taromauria Iehova n Am Utu

N aron ae ko a tia n reiakinna n te boroutia aei ao a bati booto n reirei man te Baibara aika ko kona ni buokaki iai ma am utu. E tangiriko Iehova bwa ko na kukurei. E berita bwa “a na karekeaki baikai nakoim” ngkana ko moanibwaia taromauriana. (Mataio 6:33) E tangiriko bwa ko na riki bwa raoraona. Kamanena te tai ae bati ae angaraoi ni karikirakea iai am iraorao ma te Atua. Aio bon te kakabwaia ae kona ni karekea te aomata.​—Mataio 22:37, 38.

1 KAKORAKORAA AM IRAORAO MA IEHOVA

TE BAE E TAEKINAKI N TE BAIBARA: “‘N na riki ba Tamami, ao ngkami kam na riki ba natiu mwaane ma natiu aine,’ bon ana taeka Iehova.” (2 I-Korinto 6:18) E tangiria te Atua bwa ko na riki bwa raoraona ae rangi ni kaan. Te anga teuana ibukini karaoan anne bon te tataro. E kaoko Iehova bwa ko na “tataro n aki toki.” (1 I-Tetaronike 5:17) E ingainga ni kan ongoraei baika ko iaiangoi ao n tabeaianga iai. (I-Biribi 4:6) Ngkana ko tataro ma am utu, a na noria iai bwa ko kakoauaa raoi te Atua.

Irarikin ae ko taetaenikawai ma te Atua, ko riai naba ni kakauongo irouna. Ko kona ni karaoa aei ngkana ko reirei man ana Taeka ao booki aika boto man te Baibara. (Taian Areru 1:1, 2) Kananoa am iango i aoni baike ko reiakin. (Taian Areru 77:11, 12) E kainnanoaki bwa ko na katoatai ni kakaaei bobotaki ni Kristian ngkana ko kan ongora iroun te Atua.​—Taian Areru 122:1-4.

Te anga teuana naba ae rangi ni kakawaki ibukini kakorakoraan am iraorao ma Iehova, bon tataekinana nakoia tabemwaang. Ngkana ko kabatiaa am tai n tataekinna ao ko na rangi ni kaan riki ma ngaia iai.​—Mataio 28:19, 20.

TE BAE KO KONA NI KARAOIA:

• Kamwawaa am tai ni katoabong ni wareka te Baibara ao n tataro

• Ko riai ni moanibwai riki mwakuri ibukin Iehova n am utu nakoni kaakibotu ao kaokirii

2 KAKUKUREIKO N AM TAROMAURI N UTU

BAE E TAEKINAKI N TE BAIBARA: “Kaania te Atua, ao ane e na kaaningkami.” (Iakobo 4:8) Ko riai ni karaoa am babaire ao n ira nanona ni kaineti ma am kaetieti n am taromauri n utu. (Karikani Bwaai 18:19) Ma e bati riki ae kainnanoaki. Ko riai n iaiangoa te Atua ni maium ni katoabong. Kakorakoraa aia iraorao am utu ma te Atua rinanon tataekinana, “ngkana ko tekateka i nanon am auti, ao n nakonakom i nanon te kawai, ao ni wenem, ao n teirakem.” (Te Tua-Kaua 6:6, 7, BG) Kateia bwa tiam ae ko na katotonga Iotua are e kangai: “Ao ngai ma kaaini batau, ti na toro iroun Iehova.”​—Iotua 24:15, BG.

TE BAE KO KONA NI KARAOIA:

• Karaoa am babaire ibukin am reirei ae aki bibitaki ni koreani baika a kainnanoia kaain am utu n tatabemania nako