Rongorongon te Tautaeka n Uea Na. 37

Te Rongorongo ae na Kabutaaki ni Katobibia te Aonnaba

E A Kaan Tokiia Aaro Aika Kewe!

▪ A na kanga ni kinaaki Aaro aika kewe?

▪ Tera aron tokiia?

▪ Tera aron rotakim iai?

A na kanga ni kinaaki Aaro aika kewe?

Ko rotakibuaka ni mwakuri n iowawa aika irekereke iai Aaro? E maraki nanom n taiani buaka, kakeru, ao babakanikawai aika a kaakaraoaki irouia aomata ake a taku bwa a toro iroun te Atua, ao e uruaka am namakin ni kaineti ma te bwai ae eti? E aera ngkai a a taraaki Aaro bwa oin rikin kangaanga aika rangi ni bati? A aki riai ni bukinaki Aaro ni kabane iai, ma tii Aaro aika kewe. Te aomata ae rangi ni karineaki irouia Aaro, ae Iesu Kristo, e katereterea bwa Aaro aika kewe, a kairiia aia aomata nakon kaakaraoan mwakuri aika bubuaka, n aron ae e “kariki ua aika a bubuaka te kai ae e buakaka.” (Mataio 7:15-17, BK) Baikara uaa aika riki mairouia Aaro aika kewe?

Aaro Aika Kewe A . . .

◼ IREKEREKE MA TE BUAKA AO WAAKI N TAUTAEKA: E kangai te beeba ni kaongora ae te Asiaweek: “N te aono n Atia ao aaba tabeua riki, a karaoa ae ribuaka taani kairiri aika mwangainrang ni kani kabatiaa riki mwaakaia, ngkai a kataia n tautaekana aia iango aomata ni kaineti ma aia Aro, bwa a aonga ni karaoa ae a tangiria.” N tokina e a kauring ni kangai te beeba anne: “E a taraa ni moanna ni mangao te aonnaba.” E taku mataniwin te Aro ae kakannato n te United States: “Kam riai n tiringia taani kakeru aika tiritiri bwa e aonga n toki aia tiritiri.” Aei katokan te kangaanga irouna: “Tiringia ni kamaunaia ni kabane n aran te Uea.” Ma e taku te Baibara ni kaitaraa anne: “Ngkana e kangai temanna, I tangira te Atua, ao ngkana e riba tarina, ao bon te tia kewe ngaia.” (1 Ioane 4:20) E taku naba Iesu: “Kam na tangiriia ami kairiribai.” (Mataio 5:44) Mwaitira Aaro aika a ira te buaka kaaia?

◼ KABUTII NAKO REIREI AIKA KEWE: Angiia Aaro a reirei bwa te taamnei bon iteran rabwatan te aomata ae aki nonoraki, ae maiu nako naba imwin maten te rabwata. A bati Aaro aika a kamanena te reirei aei n anai nanoia kaaia, bwa a na kabwakamwane bwa e na tataro te aba ibukin te taamnei are e nako arei. Ma e kaokoro ana reirei te Baibara i aon aei. “Akana maiu a bon ataiia ba a na mate: ma a bon aki ata te bwai teuana akana mate.” (Te Minita 9:5) E reirei Iesu bwa a na manga kautaki maate, ae te waaki ae na aki manena ngkana ngaia bwa iai taamneia aomata aika a aki mamate. (Ioane 11:11-25) E reirei am Aro bwa e aki mamate te taamnei?

◼ AKI KATINANIKUIA TAANI KAAKARAOA TE WENE NI BURE: N aaba tabeua, iai Aaro aika kariaia bwa a na riki bwa mitinare mwaane aika iein ma mwaane ao aine ma aine, ao a kaumaka te tautaeka bwa e na kariaia mareia mwaane ma mwaane ao aine ma aine. Iai naba Aaro aika kabuakakaa te wene ni bure, ma a kariaia bwa a na teimatoa ni mitinare mataniwina e ngae ngke a a tia n tauia ataei. Ma tera ana reirei te Baibara ibukin aei? E teretere iai ae kangai: “Kam na tai burebureaki: e aki reke uean te Atua irouia taani wene ni bure, ma taan taromauri boua, ma taani kimoa bun te aomata, ma mwaane aika baka ni kan aine, ao mwaane aika bo ma mwaane.” (1 I-Korinto 6:9, 10) Ko atai Aaro aika a aki katinanikuiia kaaia aika kaakaraoa te wene ni bure?

Tera aroia n taai aika a na roko, Aaro aika karikii uaa aika bubuaka? E kauring ni kangai Iesu: “Kaai nako aika aki kariki uaa aika raraoi a koreaki, ao a teweaki nako n te ai.” (Mataio 7:19) Eng, a na boni koreaki nako Aaro aika kewe ao ni kamaunaki! Ma n te aro raa ao n ningai? E kaekaa anne te taetae ni burabeti ae miitaraeaki, ae koreaki ni bokin te Baibara ae Te Kaotioti, mwakoro 17 ao 18.

Tera aron tokiia Aaro aika kewe?

Iangoa te taamnei aei. E tekateka te kabekaau i aon te man ni kaakang ae kakamaaku. Itua atun te man ni kaakang aei ao tebwina korona. (Te Kaotioti 17:1-4) E tei ibukin antai te kabekaau? Iai mwaakana “i aoia uean aonaba.” E kunikainna n te uraroo, ao e kabonganai baika boiarara, ao e rangi ni kaubwai. Irarikin anne, ‘a bane ni mwamwanaki botannaomata’ n ana tabunea. (Te Kaotioti 17:18; 18:12, 13, 23) E buokira te Baibara bwa ti na ataia bwa te kabekaau aei bon te botaki n Aro ae katobibia te aonnaba. E aki tei ibukin te Aro ae tii teuana, ma e tei ibukia Aaro nako ake a bubuaka uaaia.

Te man ni kaakang are e toka i aona te kabekaau, e tei ibukin taian tautaeka n te aonnaba.a (Te Kaotioti 17:10-13) E toka te botaki n Aro ae kewe aei i aon te man ni kaakang ae tei ibukin taian tautaeka, bwa a kataia Aaro aika kewe ni babairea aia motinnano taian tautaeka ao ni kaiririia.

Ma, e na waekoa n riki te bwai ae kamimi. “Kooro ake tengaun, ake ko nori, ma te man arei, a na riba te kabekaau, ao a na urua, ao a na buuta karabana, ao a na kana irikona, ao a na kabuokia n te ai ni kabanea.” (Te Kaotioti 17:16) N te aro ae karina, a na manga okiriia Aaro aika kewe tautaekan te aonnaba, ao ni kamaunaia ni kabane! Tera ae kairiri nakon karaoan aei? E kaekaa anne bokin te Baibara ae Te Kaotioti ni kangai: “Te Atua E kaki i nanoia te kan toua mwin nanona.” (Te Kaotioti 17:17) Eng, e na karekei kaia Aaro aika kewe te Atua, ibukin aia mwakuri aika a rangi ni buakaka ake a karaoi n arana. E na karaoa te kaetitaeka ae kororaoi, ni kabongana raoraon te kabekaau are taian tautaeka, bwa e na manga boni kamaunaia Aaro aika kewe.

Tera ae ko na karaoia ngkana ko aki kan rotakibuaka n rekenikaia Aaro aika kewe? E kaumaki ana tia uarongorongo te Atua ni kangai: “Au aomata, kam na oti nako mai nanona.” (Te Kaotioti 18:4) Mangaia are aio raoi te tai ni birinako man Aaro aika kewe! Ma ko na biri nakea? Tiaki nanona bwa ko nang kakeaa te Atua, bwa akea naba mwin aei nakon taai aika a na roko. (2 I-Tetaronike 1:6-9) Te tabo ni kamanomano ae tii teuana boni kaainakin te Aro ae koaua. Ko na kanga ni kinaa te Aro ae koaua?

Aroni kinaakin te Aro ae koaua

Baikara uaa aika raraoi ake e riai ni karekei te Aro ae koaua?​—Mataio 7:17.

Te Aro ae Koaua . . .

◼ A ITANGITANGIRI KAAINA: “Tiaki ana bwai te aba” kaain te Aro ae koaua, a aki kakaokoro ibukin aia reeti ke aia katei, ao a kaotiota te “i tangitangiri” i marenaia. (Ioane 13:35; 17:16; Mwakuri 10:34, 35) A aki tiritiri ma a itangitangiri ni koaua, n te aro are a tauraoi n anga maiuia ibukia tariia.​—1 Ioane 3:16.

◼ A ONIMAKINA ANA TAEKA TE ATUA KAAINA: E aki reiakini ‘katei ni kawai’ te Aro ae koaua ke ‘aia taeka n reirei aomata,’ ma e kabotoi ana reirei i aon Ana Taeka te Atua ae te Baibara. (Mataio 15:6-9, BK) Bukin tera? Ibukina bwa “e anganaki te aba te Baibara ni kabanea iroun Tamnein te Atua, ao e manena nakon te reirei, ao nakoni kaotan ana buakaka te aomata nako ina, ao nakoni manga-kaetana.”​—2 Timoteo 3:16.

◼ E KAKORAKORAIA UTU AO E KAUNGAIA NAKON TE AROARO NI MAIU AE ITIAKI:

E kataneiaia buu-mwaane te Aro ae koaua bwa a na ‘tangiriia buuia n ai aron tangiran oin rabwataia,’ e buokiia buu-aine bwa a na karikirakea ‘karineaia buuia,’ ao e reireia ataei bwa a na ‘ongotaeka irouia aia karo.’ (I-Ebeto 5:28, 33; 6:1) Irarikin anne, a riai ni bwaina te aroaro ni maiu ae riai taani kairiri ake a mwiokoaki iai.​—1 Timoteo 3:1-10.

Iai te Aro ae maiuakini kaetieti aikai? E taekinaki ae kangai n te boki ae Holocaust Politics, ae boretiaki n 2001: “Ngkana a bati aomata aika a kaakaraoa are a tataekinna Ana Tia Kakoaua Iehova ma ni maiuakinna, ao e na bon aki riki ngkoa te mwakuri n tiritiri are te Holocaust, ao akea naba kamateaia kaain te reeti teuana ma teuana ni katobibia te aonnaba.”

Ni koauana, a aki tii uarongorongoa ana kaetieti te Baibara Ana Tia Kakoaua Iehova n aaba aika 235, ma a maiuakinna naba. Ti kaumakiko bwa ko na tuangia Ana Tia Kakoaua Iehova, bwa a na buokiko n reiakini taekan baike e tangiri te Atua mairoum, bwa e aonga ni butimwaea am taromauri. Aio ngkai am tai ni karaoa aei. Tai tabwarabwara. E a kaan tokiia Aaro aika kewe!​—Tebania 2:2, 3.

Ngkana ko kan ataa riki rongorongon te Baibara are a tataekinna Ana Tia Kakoaua Iehova, tai tabwara ma koroboki nakoia ni kabongana te atureti ae i nano.

□ I bubutii katoton te boroutia ae Kamarurungingkami n Tantani!

□ Taiaoka n reitaki ma ngai ibukin waakinan te reirei n te Baibara, ae aki kabooaki.

[Kabwarabwara ae nano]

[Kabwarabwaraan n iteraniba 3]

“Au aomata, kam na oti nako mai nanona”

[Kabwarabwaraan n iteraniba 3]

A mwaaka Aaro aika kewe “i aoia uean aonaba”