“A Aki Namakina Te Bai Teuana”

E KONA n riki te kabuanibwai ngkana a aki mutiakinaki taeka ni kauring.

E waakinaki te kakatauraoi ibukin boong ni motirawa ni kaawan Aotiteria ae Darwin n te ririki 1974, ngke e a katangaki iai te buu bwa kaotan ae e a kaan roko te angibuaka. Ma e tuai man rotaki buaka mai mwaina te kaawa ae Darwin n te angibuaka teuana i nanon ririki aika 30, mangaia are tao e na bon aki urubwai naba te angibuaka aei. A aki kakoauaa angiia taani maeka n te tabo aei bwa e na riki te kabuanibwai ae korakora, ni karokoa ae e a tii baibati naba te ang ae rangi ni korakora ni koutii kaabwan taubukin auti ao n taebabai nako oon auti ake a kiribobotaki i nanona aomata ibukin te maaku ae korakora. N te ingabong are imwina ao e a bon urubekebeke te kaawa aei.

E koburake te warekeno i Colombia n Nobembwa n te ririki 1985. A a ran taian tino ao aiti iai ao e a riki ni bokaboka tanon te maunga anne ni karokoa e a ingunako n taona nako te kaawa ae Armero. E a raka i aon 20,000 mwaitiia aomata aika a mate iai. Te koaua bwa e aki katanoataki te kauring imwain rikin aei? E a bon tia n ruru nako naba te maunga anne i nanon namwakaina tabeua. Ma e ngae n anne, ao a aki tabeakina aei kaain Armero kioina ngke a a bon taneiai ni maeka i rarikin te warekeno. A a boni kaman kaongoaki bwakuaku taekan te kabuanibwai ae nang waekoa n roko aei, ma e karako aia mwakuri ni kaineti ma katanoatan rokona nakoia aomata. A nako taian katanoata i aon rerio ni karaui nanoia aomata bwa a aonga n aki maaku. E kamanenaki ana bwai n taetae te umwantabu, ibukin katanoatan karauan nanoia aomata bwa a na tiku n rau. Ngke e a tairiki, ao a roko rebwetau aika uoua aika kanakonano. Ngke arona bwa ko mena iai, ao ko na kaaki taekan am bwai ma ni biri nako n rawea maium, ke ko na aki? Tii tabeman aomata aika a a tibwa kakamwakuri, ma a a oimwi.

N taai tabetai a kona taan rabakau ibukin tanon te aba, n taekin taabo ake a na riki iai mwaeiei, ma e burenibwai ae a na taekina raoi te tai are e na riki iai. N te ririki 1999, ao mwaeiei aika riki ni katobibia te aonnaba a tiringia aomata aika 20,000 tabun mwaitiia. A mwaiti mai buakoia ake a mate iai, aika a taku bwa e aki kona n riki anne nakoia.

Tera Arom Nakon Kauring ake Mairoun te Atua?

E a kaman kabwarabwarai raoi taekan bwaai ake a na kanikinaei boong aika kaitira te Baibara. N reitaki ma anne, e kaumakira naba bwa ti na iaiangoa “te tai are e maiu iai Noa.” “Ni bong ake i main te ieka,” ao a tabetabe aomata ma aroaron te maiu are a taneiai ni kaakaraoia, e ngae ngke a boni bae n tabeaianga naba ibukin taabangakin te iowawa. Iai ana kauring te Atua are e angania rinanon ana toro are Noa, ma a bon “aki namakina te bai teuana ni karokoa te tai are e roko iai te ieka ni uotiia nako ni kabaneia.” (Mataio 24:37-39, BK) Ngke arona bwa ko mena iai, ko na mutiakina te kauring anne? Ko boni mutiakini kauring ngkai?

E na tera arom ngke arona bwa ko maeka i Totom are uakaan ma Taari ae Mate n ana tai ni maiu Rota are ai natin Aberaam? E rangi ni kaubwai te kaawa, ao taraan te marenaua ai aron te baretaiti. A kukurei aomata ao akea te bwai ae a raraomaeakinna. N ana bong Rota, “a amamarake, ao a momoi, ao a kabobwai, ao a bobwai, ao a ununiki, ao a katei baata.” Ma e korakora naba te wene ni bure irouia kaain te kaawa anne. Ko na mutiakina te kauring ni kaineti ma mwakuri aika bubuaka ake e taekini Rota, ngke arona bwa ko mena iai? Ko na kakauongo raoi nakoina ngke e tuangko bwa e a tia ni karekea nanona te Atua bwa e na urua te kaawa ae Totom? Ke ko na iangoia bwa te manikangare, n aroia buuia natin Rota ake aine? Ko na boni moanna ni biri nako mai iai, ma tao ko na manga tanrikaaki n aron buun Rota? E ngae ngke a aki mutiakini taeka ni kauring aomata, ma n te bong are e otinako iai Rota mai Totom, e boni “bwaka te karau ae te ai ma te burimton mai karawa, ao e kamaunaia ni kabaneia.”​—Ruka 17:28, 29.

Angiia naba aomata n ara bong aikai, bon akea naba kubaia. Ma a tia ni karauaki ni kawakinaki katoto aikai i nanon ana Taeka te Atua bwa bwaai ni kauring nakoira, ao ni kaungaira naba bwa ti na KAMARURUNGIRA N TANTANI!

[Bwaoki/Taamnei n iteraniba 22]

Te Koaua bwa bon Iai te Ieka Ngkoa are Kabutaa te Aonnaba?

A mwaiti taan tiribure aika a taku bwa Akea. Ma e taku te Baibara bwa Iai.

E bon taekinna naba Iesu Kristo, bwa iai ngaia ngke e riki te Ieka ao e boni mataku mai karawa.

[Bwaoki/Taamnei n iteraniba 23]

Te Koaua bwa A Kamaunaki Totom ma Komora?

E boutokaki te rongorongo aei irouia taan rabakau ni bwain rimoa ake a kuneaki i aantano.

E taekinaki naba rongorongona n rongorongon rimoa aika koreaki.

E kakoauaki naba iroun Iesu Kristo, bwa baika riki iai a taekinaki ni bokin te Baibara aika 14.