Reirei 7
Te Reirei ni Kauring man Rongorongon Rimon
Iehova e na bon aki kariaia aomata aika buakaka bwa a na urua te Baretaiti. Tii raoraona aika a na maeka iai. Tera ae e na riki nakoia aomata aika buakaka? Ni kakaean te reke, iangoa te karaki ae koaua, ae rongorongon Noa. Noa e maiu iraua tenga te ririki n nako. Bon te mwaane ae raoiroi ngaia ae e kekeiaki ni kani kakaraoa nanon Iehova. Ma aomata tabemwaang ake n te aonnaba, a boni karaoa ae buakaka. Ngaia are Iehova e tuanga Noa bwa E nang karokoa te ieka, ae e na kamaunaia aomata aika buakaka ni kabane. E tuanga Noa bwa e na kabaa te aake, n te aro are ngaia ma ana utu, a na aki mate n rokon te Ieka.—Karikani Bwaai 6:9-18.
Noa ma ana utu a kabaa te aake. Noa e reireinia aomata aron tauraoia man tuangia taekan te Ieka are e nang roko, ma a aki kan ongo irouna. A bon waakinanako naba karaoan ae buakaka. Imwin tian te aake, Noa e karinia maan inanona, ao imwina e a rinnako ngaia ma ana utu. N te tai anne, Iehova e a karokoa te buaka ae korakora. E bwaka te karau i nanon 40 te ngaina ao 40 te bong. E a rabunanako aon te aba ni kabutaa te ran.—Karikani Bwaai 7:7-12.
A bua maiuia aomata aika buakaka, ma Noa ao ana utu a boni kamaiuaki. Iehova e kamanoia ribuakon te Ieka nakon te aonnaba are e a tia ni kaitiakaki mai iai te buakaka. (Karikani Bwaai 7:22, 23) E taku te Baibara bwa e na roko te tai are Iehova e na manga kamaunaia iai aomata ake a rawa ni karaoa ae raoiroi. Aomata aika raoiroi a na aki kamaunaaki. A na maeka n aki toki n te Baretaiti i aon te aonnaba.—2 Betero 2:5, 6, 9.
A mwaiti aomata ni boong aikai, aika a karaoi mwakuri aika bubuaka. Te aonnaba e a onrake n taiani kangaanga. Iehova e teimatoa ni kakanakoia ana tia Kakoaua bwa a na reireinia aomata, ma e ngae n anne angiina, a rawa n ongora n ana taeka Iehova. A rawa ni bita aroaroia. A rawa ni kariaia ae e taku te Atua ibukin ae eti ao ae kairua. Tera ae e na riki nakoia aomata aikai? A na bitaki imwin tabeua te tai? A mwaiti i buakoia aika a na aki bitaki. E nang roko te tai are a nang kamaunaaki iai aomata aika buakaka, n aki manga kamaiuaki riki.—Taian Areru 92:7.
E na bon aki kamaunaaki te aonnaba; ma e na boni karaoaki bwa te baretaiti. Te koraki ake a riki bwa raoraon te Atua, a nang maeka n aki toki n te Baretaiti i aon te aonnaba.—Taian Areru 37:29.