Reirei 4

Ko na Kanga n Reireiniko Taekan te Atua

Ko kona n reireiniko taekan Iehova ni warekan te Baibara. Ngkoangkoa, te Atua e rineia aomata tabeman bwa a na korea ana iango. Koroboki akanne, a aranaki bwa te Baibara. Ni boong aikai, ti reiakina taekan te Atua ni warekan te Baibara. Ibukina bwa kanoan te Baibara bon ana taeka Iehova, ke ana rongorongo, e aranaki naba bwa ana Taeka te Atua. Ti kona ni kakoaua are e taku te Baibara, ibukina bwa Iehova e aki kona ni kewe. “E aki kona te Atua ni kewekewe.” (Ebera 6:18) Kanoan ana Taeka te Atua bon te koaua.​—Ioane 17:17.

Te Baibara bon teuana mai buakon ana bwaintangira te Atua ae e rangi ni kakawaki ibukira. Kangaa, ai aron te reta mairoun te karo ae e tatangira nakoia natina. E kaota nakoira taekan ana berita te Atua are e na bita te aonnaba aei nakon te tabo ni maeka ae kamimi​—ae te baretaiti. E tuangira bwa tera ae e a tia ni karaoia n taai aika a nako, tera ae e karaoia ngkai, ao tera ae e na karaoia n taai aika a na roko ibukia natina aika a kakaonimaki. E buokira naba ni katoki ara kangaanga, ao ni kunea te kakukurei.​—2 Timoteo 3:16, 17.

Ana Tia Kakoaua Iehova bon raoraon te Atua; a kona ni buokiko ni kaotako bwa tera ana reirei te Baibara. Tii tuangia ae ko kan reiakina te Baibara. A aki kabooaki n te mwane ibukin aei. (Mataio 10:8) Irarikin anne, ko kona ni kaei botaki ni Kristian. A booaki n taabo n taromauri aika a aranaki bwa Maneaba n Uea. Ngkana ko kakaei botaki ni Kristian, ko na waekoa ni karikirakea riki am atatai ibukin te Atua.

Ko kona n reiakina taekan te Atua man bwaai ake e a tia ni karaoi. N te katoto teuana, e taku te Baibara: “E karika karawa ma aonaba te Atua.” (Karikani Bwaai 1:1) Ngke E karika “karawa” Iehova, ao e a karaoa naba taai. Ngkanne, tera otara n te mwakuri anne ibukin te Atua? E tuangira bwa e rangi ni korakora Iehova. Bon tii ngaia ae e kona ni karaoa te bwai ae rangi ni korakora n aron taai. E tuangira naba bwa e wanawana Iehova, kioina ngke e kainnanoaki te wanawana ibukin karaoan taai, are e reke mai iai te kabuebue ao te ota, ao e aki kona n urarake.

Ana karikibwai Iehova a kaotiota tangirara irouna. Iangoi aeka ni uanikai nako aika a mena n te aonnaba. Iehova e kona ni karekea tii teuana te aeka ni uanikai ibukira​—ke tao bon akea. Ma e ngae n anne Iehova e anganira uanikai aika bati aekakiia, ma aron nako teia, tiaitiia, karaia, ao kangkangia. E oti ikai bwa Iehova bon te Atua ae e aki tii tatangira, ma e rangi n tituaraoi naba, e mwamwannano, ao e akoi.​—Taian Areru 104:24.