Reirei 1

E Kaoko te Atua bwa Ko na Riki bwa Raoraona

Te Atua e tangiriko bwa ko na raoraonna. Ko a tia n iangoia ae ko kona n riki bwa raoraon te Aomata ae te kabanea ni kakannato n te iuniweeti? Aberaam are e maiu ngkoangkoa, e aranaki bwa raoraon te Atua. (Iakobo 2:23) Tabeman riki ake a taekinaki n te Baibara a nora naba kakukurein raoraonakin te Atua, ao a rangi ni kakabwaiaki iai. Ni boong aikai, aomata man iteran nako te aonnaba, a a tia n riki bwa raoraon te Atua. Ngkoe naba, ko kona n riki bwa raoraon te Atua.

Raoraonakin te Atua e tamaroa riki nakon raoraonakiia aomata nako. Te Atua e aki kona ni kamaneangia raoraona aika a kakaonimaki. (Taian Areru 18:25) Te iraorao ma te Atua e tamaroa riki nakon karekean te kaubwai. Ngkana e mate te aomata ae kaubwai, tabeman a na manga anaa ana mwane. Ma te koraki ake a kukurei n iraorao ma te Atua, bon iai kaubwaia ae akea ae e kona n anaia mairouia.​—Mataio 6:19.

Tabeman aomata a na kataia ni katokiko man reireinakim taekan te Atua. Tabeman mai buakoia raoraom ao am utu a kona ni karaoa anne. (Mataio 10:36, 37) Ngkana iai aika a ngareakiniko ke a taetaeraaiko, titirakiniko ni kangai, ‘Antai ae I tangiria ni kakukureia​—aomata ke te Atua?’ Iangoa aei: Ngkana e tuangko temanna bwa ko na katoka amwarakem, ko na ongo irouna? Ko na bon aki! Ko kainnanoa te amwarake bwa ko aonga ni maiu. Ma te Atua e kona ni karikiko bwa ko na maiu n aki toki! Ngaia are tai kariaia temanna bwa e na katokiko man reiakinam arom ae ko na riki iai bwa raoraon te Atua.​—Ioane 17:3.