“Bon Tiaki te Koaua!”

E TAKU TEMANNA te mwaane mai New York (U.S.A.): “E nako natiu ae ten Jonathan ni kawariia raoraona ae raroan aia tabo tabeua te maire. E aki kukurei n nakona nako ikekei buu ae Valentina. E raraoma n taai nako neiei n te buti i nanon te kawai. Ma e kani mwamwakuri teuaei ma baika maiu man te iti ao e kona ni kataneiai n aia tabo ni mwakuri raoraona akekei. I tiku ni mwengara i Manhattan maeao, New York. Akea buu bwa e kawariia ana koraki i Puerto Rico. I tabe n iango, ao I taku: ‘E a aki-aaua n oki ngkai Jonathan.’ Akea bwa e a tang naba beeron te mataroa. ‘E a roko, boni ngaia aei.’ Ma tiaki, bwa bon te bureitiman ao taani kuakua. E titiraki te bureitiman ni kangai: ‘Ko kinaa te aomata ae ana raitienti aei?’ ‘Eng, bwa ana raitienti natiu ae Jonathan.’ ‘Iai te rongorongo ae kananokawaki nakoim, bwa iai te kabuanibwai ae riki, ao . . . e boni mate . . . natim.’ Te moanibwai are I iangoia, ‘Bon tiaki te koaua!’ Te bwai ae kauruakinano aei, e kammaraka buroora ao e bon teimatoa naba ngkai ni maneka e ngae ngke ai iraua te ririki n nako.”

E korea ae kangai te karo i Barcelona (Tibein): “I Tibein ngkoa n 1960 tabun, ao e rangi ni kakukurei ara utu. Kaaina boni buu ae María, ao natira aika teniman, aika David, Paquito, ao Isabel, ao aia ririki bon 13, 11, ao 9.

“N te bong teuana ni Maati 1963, ao e a oki Paquito man ana reirei ma marakin atuna ae rangi ni korakora. Ti aki kona n ota bwa tera bukin marakina, ma e aki maan. Tenua te aoa imwina ao e a mate naba. E toki maiuna man tinakon te raraa i nanon ana kaburoro.

“Ai 30 tabun ngkai te ririki imwin maten Paquito. Ma e ngae n anne, e bon teimatoa naba marakira ni karokoa te bong aei. Akea te tai ae a na aki namakina iai karawawatan buan natia kaaro, n aki ongeia bwa ai maanra, ke mwaitira natiia ake a a manga riki imwina.”

Rongorongo aika uoua aikai ae taekan mateia natiia kaaro, e katereterea aron te rotakibuaka ao teimatoan manekan te nano ngkana e mate te nati. Ai koaua ra are e koreia te taokita temanna ni kangai: “E kananokawaki riki maten te nati ao e kauruakinano riki nakon maten te ikawai, ibukina bwa e bon aki kaantaningaki n te utu bwa e na mate moa te nati. . . . Ni maten natim ao e a bua iai kaantaninga tabeua, n aron kabatiaan te utu [reken buun natim, tibum], te iraorao ma ngaiia . . . aika a aikoa koro bukiia.” E kona naba ni kaineti te aeka n rawawata ae kakaiaki aei, nakoia aine ake e a tia ni bwaka natiia.

E taku te aine ae nanokawaki imwin maten buuna: “E mwakuri ngkoa kaainnabau ae Russell bwa te tia kuakua ibukia taani buaka n aonon te Betebeke n tain te Kauoua ni Buaka ae Katobibia te aonnaba. E ooi buaka iai aika kakaiaki aroia ma e teimatoa ni maiu. E a okira te United States imwina, are e a mwengaraoi riki iai. Imwina ao e a manga beku bwa te tia tataekina Ana Taeka te Atua. Ngke ai tibwa 60 tabun ana ririki, ao e a moanna ni mamaara buroona. Ma e boni kataia naba ni kamarurungnga. N te bong teuana n Turai 1988, ao e a roko korakoran aorakin buroona ike e a mate iai. Moan te kauruakinano matena. E aki reke au tai ni kaboo ma ngaia. I aki taraia bwa tii buu, ma bon raoraou naba. Ai 40 ara ririki n taanga. Ngkai e a taraa n ae ai bon iriani maiu te tiku ni mamaroaa.”

Ngaa ma ngaa kabuanibwai aika kananokawaki n aron aikai, aika rotakibuaka iai utu ni katoabong n te aonnaba. Angiia aomata ake a nanokawaki imwin maten natia, buuia, aia karo, ke raoraoia, a na tuangko ae e eti ana taeka te tia koroboki ae te Kristian ae Bauro, ae te mate bon “te kairiribai are te kaitira.” N te moantai angiia a aki kona ni kakoauaa te rongorongo ae kauruakinano aei ao a kona ni kangai: “Bon tiaki te koaua! I aki kakoauaa.” Ma imwina riki ao e a kona ni manga bitaki aia namakin n aron ae ti na noria.​—1 I-Korinto 15:​25, 26.

Mangaia are imwain ae ti iangoa te namakin ae te nanokawaki ibukin te mate, ti na kaekai moa titiraki tabeua aika kakawaki. Nanona ai bon tokin naba te aomata ngkana e mate? Iai te kaantaninga bwa ti na manga kaitiboo ma ake ti tangiriia ake a a tia ni mate?

Iai te Kaantaninga ni Koaua

E kaota te kaantaninga ibukin tokin te mate te tia korea te Baibara ae Bauro ngke e korea ae kangai: “Te kabanea ni kairiribai ae e na kamaunaki, bon te mate.” (1 I-Korinto 15:​26, BK) E aera ngkai e rangi ni koaua raoi n anne Bauro? Ibukina bwa e a tia n reireiaki iroun teuare kautaki man te mate, ae Iesu Kristo. (Mwakuri 9:​3-19) Anne bukina naba are e korea ae kangai Bauro: “Ngkae e mamate te aba iroun te aomata [Atam], ao a na manga uti naba maate iroun te aomata [Iesu Kristo]. Ba aroia aomata, ngkai a bane ni mate iroun Atam, ao ai aroia naba ba a na bane ni kamaiuaki irouni Kristo.”​—1 I-Korinto 15:​21, 22.

E rangi n nanokawaki Iesu ngke e kaitiboo ma te aine ae e a tia ni mate buuna ae kaain Nain, ngke e nora natin neierei ae mate. E tuangira ae kangai te Baibara: “Ao ngke [Iesu] E kaania mataroan te kawa [ae Nain], ao noria, e uotaki nako te mate, ae ana rikitemanna tinana, ao neierei te aine ae e mate buna: ao a iria kaain te kawa aika bati. Ao te Uea, ngke E noria, ao E nanoangaia, ao E kangai nako ina, Tai tang. Ao E kaania ma n ringa te bao: ao a tei uake a uotia. Ao Ngaia E kangai, Te roronga, I tuangko ba ko na uti. Ao teuare mate e tekateka, ao e taetae. Ao Iesu E angan tinana. Ao e roko te maku i rouia ni kabaneia: ao a kamoamoa te Atua, ni kangai, E kaoti te burabeti ae kakanato i buakora: ao, E kawariia ana aomata te Atua.” Nora aron Iesu ni kairiraki n ana nanoanga, ngaia are e a kauta iai natin te aine arei! Iangoia bwa tera ae na riki nakon te tai ae imwaira ae oti man anne!​—Ruka 7:​12-16.

E kauta te mate arei i mataia aomata Iesu n te aro ae aki kona ni mwanuokinaki. Bon te katoto ibukin kakoauaan rokon te manga-uti are e a kamani burabetinaki ae te manga maiu i aon te aba i aan te “karawa nabangkai.” E taekina ae kangai Iesu ni kaineti ma te tai anne: “Kam na tai mimi n aei: ba e na bon roko te aua, ae a na bane iai n ongo bwanana aomata [“ake a uringaki,” NW] ake a mena i nanon ruaia ni mate, ao a na oti nako.”​—Te Kaotioti 21:​1, 3, 4; Ioane 5:28, 29; 2 Betero 3:13.

Ake a a tia naba n nora kautan te aomata, boni Betero ma tabeman i buakoia uake 12 ake a ira Iesu ni mwanangana. A ongo naba bwanan Iesu imwin utina man te mate, ngke e taetae nakoia n Namani Kariraia. E kangai te rongorongo: “E taku Iesu nako ia, Mai amarake. Ao akea ana reirei temanna ae aki maku n titirakinna ni kangai, Antai Ngkoe? ba a kina ba te Uea. E roko Iesu, ao E anaa te berena, ao E angania, ma te ika. Ao aei katenuani kaotin Iesu nakoia ana reirei, i mwin utina mai buakoia maate.”​—Ioane 21:​12-14.

Mangaia are e koaua raoi Betero ngke e korea ae kangai: “E na karaoiroaki te Atua ae Taman ara Uea are Iesu Kristo, are a manga karikira n ai aron ana nanoanga ae bati nakon te kaantaninga ae kamaiu ni manga-utin Iesu Kristo mai buakoia maate.”​—1 Betero 1:3.

E katereterea ana kaantaninga te abotoro Bauro ae koaua raoi iai ni kangai: “I iriri nanoni bwaai ni kabane ake a koreaki n te Tua ao irouia burabeti nako: ao bon iai ae I kaantaningaia mairoun te Atua, ae a kaantaningaia naba te koraki aei, ae manga-utiia akana raoiroi ao akana aki raoiroi.”​—Mwakuri 24:​14, 15.

Mangaia are mirion ma mirion aomata aika a kona ni kakoauaa raoi, ae a na manga kaitiboo ma ake a tangiriia i aon te aba aei. Ma e na rangi ni kaokoro aron te maiu n te tai anne. Tera aron taai akanne? E na kamatataaki riki ana kaantaninga te Baibara ibukia ake a mate ake ti tangiriia, ni kabanean mwakoron te boroutia ae atunaki n “Te Kaantaninga Ibukia Maate ae Kona n Onimakinaki.”

Ngkai ti na rinanon titiraki tabeua aika tao a na rio n am iango ngkana ko nanokawaki imwin maten ae ko tangiria: E riai bwa N na rangi n nanokawaki iai? N na kanga ni kekeiaki ribuakon nanokawakiu? A na kanga ni buokai iai tabemwaang? N na kanga naba ni buokiia ake a nanokawaki? Ma ae moamoa riki, Tera te kaantaninga ni koaua ibukia maate n te Baibara? N na kona ni manga kaitiboo ma aika I tangiriia? Ao iia?

Iangoi Titiraki Aikai

Tera aroaroia angiia aomata ni maten ae tangiraki?

Tera are e karaoia Iesu ibukin ainen Nain are e a tia ni mate buuna?

Tera ana berita Iesu ni kaineti ma maate?

A kanga Betero ao Bauro ni kakoauaa te manga-uti?

Baikara titiraki aika a kainnanoaki kaekaaia?

[Kabwarabwaraan n iteraniba 4]

‘Iai te rongorongo ae kananokawaki nakoim, bwa iai te kabuanibwai ae riki, ao . . . e boni mate . . . natim.’