Mwakoro 11
E a Tabe ni Waboboaki Ngkai Aan teWaaki ae Boou 28 I Aon te Aba
1, 2. Tera ae ti noria ni kaineti ma kakoroan bukin te taetae ni burabeti man te Baibara aei?
TE BWAI naba ae tamaroa, bon te koaua ae e a tabe ni waboboaki ngkai aan ana waaki ae boou te Atua i aon te aba, e ngae ngke e a kakaiaki buakakan ana waaki Tatan. Ti noria bwa e a ikoikotiia ngkai aomata te Atua man baronga nako, ao e a karikiia bwa aan te waaki ae boou i aon te aba, ae nang tauraoi n onea mwin te botannaomata ae mangaongao ni boong aikai. E aranaki te botannaomata ae boou aei n te Baibara n 2 Betero 3:13, bwa te “aonaba nabangkai.”
2 E taku naba te taetae ni burabeti: “Ni boong aika kaitira [boong aika ti maeka iai aikai] . . . a na nako natanaomata aika bati ao a na kangai, kam na kaaraki, ao ti na ararake nakon ana maunga Iehova [taromauriana ae koaua], . . . ao ane E na reireira ana aro nako, ao ti na nakonako ni kawaina nako.”—Itaia 2:2-3.
3. (a) E tabe ni kakororaoaki ana taetae ni burabeti Itaia i buakoia antai? (b) E kanga ni kabwarabwaraa anne te kabanea ni boki n te Baibara?
3 E a tia ni kakororaoaki te taetae ni burabeti anne i buakoia te koraki ake a aantaeka nakon ‘aron nako te Atua ao n nakonako ni kawaina nako.’ E taekina te botaki ae kaainaki irouia aomata aika tangira te rau man reeti n aomata nako, te kabanea ni boki n te Baibara bwa “te koraki ae uanao, . . . mai buakoia botanaomata ni kabaneia, ma baronga ma natanaomata ma taian taetae ni bane.” Bon te botaki n itaritari ni katobibia te aonnaba ae katiteuanaki ni beku ibukin te Atua. E taku naba te Baibara: “Bon aika nako mai buakon te rawawata are korakora.” A na boni kamaiuaki n tokin te waaki ae buakaka i aon te aba.—Te Kaotioti 7:9, 14; Mataio 24:3.
Te Botaki n Itaritari ni Koaua ni Katobibia te Aonnaba
4, 5. E aera ngkai a riki Ana Tia Kakoaua Iehova bwa te botaki n itaritari ae katobibia te aonnaba?
4 Mirion ma mirion ngkai Ana Tia Kakoaua Iehova aika kataia ni maiuakina ana reirei te Atua ma ana babaire. A kaantaningaa te maiu n aki toki i aan ana waaki ae boou te Atua i aon te aba. Man ongeabaia ni katoabong n ana tua te Atua, a kaota iai kukurein nanoia n aantaeka nakon ana kairiri ngkai ao ngkana e a roko te waaki ae boou i aon te aba. A ongeaba ni kaetieti naba aika kaotaki aikai iroun te Atua n taabo nako ake a mena iai rinanon ana Taeka, n aki ongea kaokoron abaia ke aia reeti. Anne bukina ae a riki iai bwa te botaki n itaritari ae katobibia te aonnaba, ae kaain te waaki ae boou i aon te aba ae kateia te Atua.—Itaia 54:13; Mataio 22:37, 38; Ioane 15:9, 14.
5 A aki kamoamoaia Ana Tia Kakoaua Iehova ni kakabwaiaaia ae a okoro n riki bwa te botaki n itaritari ni katobibia te aonnaba. A ataia ae e riki aio man ana mwakuri taamnein te Atua ae rangi ni mwaaka ni kairiia aomata bwa a na aantaeka nakon ana tua. (Mwakuri 5:29, 32; I-Karatia 5:22, 23) E bon riki aei mairoun te Atua. E taku Iesu bwa “baike a aki konaki irouia aomata ao a boni konaki iroun te Atua.” (Ruka 18:27) Mangaia are e kona naba te Atua are karikii bwaai ni kabane, ni kateimatoaia kaain te waaki ae boou i aon te aba.
6. E aera ngkai e kona n taekinaki aia botaki n itaritari Ana Tia Kakoaua Iehova bwa ai aron te kakai?
6 Mangaia are e kona n noraki aron Iehova ni kairiri n te waaki ae boou i aon te aba, n te bwai ae e karaoia ngkai ni katean aana. Ai aron te kakai ana mwakuri ae e a tia ni karaoia ni kaineti ma ana tia Kakoaua. Bukin tera? Ibukina bwa e a tia ni karaoiia Ana Tia Kakoaua Iehova bwa te botaki n itaritari ni koaua ae katobibia te aonnaba, ae akea ae kona n uruania n te kaiangatoa ni kakaokoron te aba, te reeti ke te tauaninne n te Aro. E ngae ngke a mena Ana Tia Kakoaua Iehova n aaba aika raka i aon 200, ma a katiteuanaki n te aro ae a aki kona n iraraure. Eng, ai aron te kakai mairoun te Atua te botaki n itaritari aei ae katobibia te aonnaba, ae akea n ai arona.—Itaia 43:10, 11, 21; Mwakuri 10:34, 35; I-Karatia 3:28.
Kinaakia Ana Aomata te Atua
7. E kanga Iesu n taekina aron kinaakia taan rimwina ni koaua?
7 E na kanga n ataaki raoi bwa aomata raa aika kabonganaki iroun te Atua, bwa aan ana waaki ae boou i aon te aba? Iangoia bwa antai ae kakoroa bukin ana taetae ni burabeti Iesu n Ioane 13:34, 35? E taku: “I anganingkami te tua nabangkai, ba kam na i tangitangiri; n ai arou ngke I tangiringkami, ba kam na i tangitangiri naba. Ane a na ataingkami aomata ni kabaneia ba au reirei ngkami n aei, ngkana kam i tangitangiri.” A kakoauaa ana taeka Iesu aei Ana Tia Kakoaua Iehova ao a karaoa nanona. A ira nanon te reirei man Ana Taeka te Atua n aroia ni ‘kabatiai aia itangitangiri.’ (1 Betero 4:8) A “karina te tangira i aoni baikai ni kabane, are te bwai ni kabaebae are e riki ni moan te raoiroi te aomata iai.” (I-Korote 3:14) Mangaia are te itangitangiri n tari bon te “bwai ni kabaebae” ae katiteuanaia ni katobibia te aonnaba.
8. E kanga 1 Ioane 3:10-12 ni buoka kabwarabwaraaia ana aomata te Atua?
8 E taku naba 1 Ioane 3:10-12: “A kaotaki natin nako te Atua ma natin nako te riaboro n aei: ane aki karaoa ae raoiroi ao tiaki mairoun te Atua, ao ai uana naba [ma] ane aki tangira tarina. Ba aio te taeka are kam ongo ma ngke kam moa n reireiaki, ba ti na i tangitangiri: tiaki aroni Kain are mairoun teuare buakaka, are kamatea tarina.” Mangaia are ana aomata te Atua boni kaain te botaki n itaritari ae katobibia te aonnaba, ae a aki tiritiri.
Aron Kinaakia Naba Teuana
9, 10. (a) Te mwakuri raa ae a na kinaaki iai ana toro te Atua ni boong aika kaitira? (b) A kanga Ana Tia Kakoaua Iehova ni kakororaoa are taekinaki ni Mataio 24:14?
9 Iai riki te anga ae a na kinaaki naba iai ana toro te Atua. N ana taetae ni burabeti Iesu ibukin tokin te waaki i aon te aba, ao e taekin iai baika bati ake a na kanikinaea te tai aei bwa boong aika kaitira. (Nora Mwakoro 9.) E taekinaki kanoan te kanikina aei teuana, ni Mataio 24:14: “Ane e na tataekinaki euangkerion uean te Atua aei i aonaba ni bane ba te bwai ni kaotioti nakoia botanaomata ni kabaneia; ao ngkanne e na roko naba iai te toki.”
10 Ti a tia n nora kakoroan bukin te taetae ni burabeti anne? Eng. Ni moanakin boong aika kaitira n 1914, a a tia Ana Tia Kakoaua Iehova n tataekina te rongorongo ae raoiroi ae taekan Ana Tautaeka n Uea te Atua ni katobibia te aonnaba ni kawaran mwengaia aomata, n aron are e tuangia Iesu. (Mataio 10:7, 12; Mwakuri 20:20) Mirion ma mirion Ana Tia Kakoaua Iehova ake a a tia ni kawariia aomata ni baronga nako, ni maroroakina ma ngaiia taekan te waaki ae boou i aon te aba. Ibukin aia mwakuri ao e a kona n reke iroum te boroutia aei, bwa e irekereke naba aia mwakuri Ana Tia Kakoaua Iehova ma te boreeti ao tibwatibwan booki aika birion ma birion mwaitiia aika taekina Ana Tautaeka n Uea te Atua. Iai riki ae ko ataia ae waakina tataekinan Ana Tautaeka n Uea te Atua man te auti teuana nakon teuana ni katobibia te aonnaba? E kaotia Mareko 13:10 bwa e riai ni katiaaki “moa” te mwakuri n uarongorongo ao n angareirei aei, imwain rokon te toki.
Kaekan te Kauoua ni Bukibuki ae Kakawaki
11. Tera riki uaan aia aantaeka Ana Tia Kakoaua Iehova nakon ana kairiri te Atua?
11 Iai riki uaan aia aantaeka Ana Tia Kakoaua Iehova n ana tua ao n ana reirei te Atua. A kaotia iai bwa bon te tia kewe Tatan ngke e bukibuki bwa a aki kona ni kakaonimaki aomata nakon te Atua ngkana a kataaki, mangaia are e a irekereke iai kaekan te kauoua ni bukibuki ae taekan aia kakaonimaki aomata. (Iobi 2:1-5) A kaotiia taani Kakoaua aika mirion ma mirion mwaitiia mai buakoia botannaomata ni kabane, bwa te rabwata ngaiia ni kabane ae tii teuana, ae kakaonimaki nakon ana kairiri te Atua. E ngae ngke a aki kororaoi, ma a tei n ana itera te Atua ni kaineti ma te bukibuki ibukin riain ana tautaeka te Atua i aoni bwaai ni kabane, e ngae ngke e kabatiaa ana kakatai Tatan.
12. A katotonga antai taani Kakoaua ni kakaonimaki?
12 A reita aia kaotioti ni boong aikai Ana Tia Kakoaua Iehova aika mirion ma mirion mwaitiia, ma taani kakoaua aika bati rimoa ake a a tia ni kaotiota te kakaonimaki nakon te Atua. Tabeman mai buakoia bon Abera, Noa, Iobi, Aberaam, Tara, Itaaka, Iakoba, Tebora, Ruta, Tawita, ao Taniera. (Ebera, mwakoro 11) E arania te Baibara bwa ‘taani kaotioti aika uanao aika kakaonimaki.’ (Ebera 12:1) A kateimatoa aia kakaonimaki nakon te Atua naakai n ikotaki naba ma taan rimwin Iesu tabemwaang. Ma e karaoa te katoto ae tamaroa riki Iesu n arona ni kateimatoa kororaoin ana kakaonimaki.
13. Baikara ana taeka Iesu ibukin Tatan ake a noraki bwa a koaua?
13 E kaotaki n aei bwa e koaua are e taekinna Iesu ibukin Tatan nakoia mataniwin Aaro ngke e kangai: “Kam ukoukora kamateau, Ngai ae te aomata ae I tuangngkami te koaua, are I ongo mairoun te Atua . . . Mairoun tamami are te riaboro ngkami, ao kam kani karaoi baike a tangiraki iroun tamami. Te tia kamamate ngaia ma rimoa, ao e aki tei n te koaua, ba akea te koaua i nanona. Ngkana e atonga te kewe, ao e atong n ana bwai; bwa te tia baranikewe ngaia, ao taman te kewe.”—Ioane 8:40, 44.
Tera Am Rinerine?
14. Tera ae riki ngkai nakon aan te waaki ae boou i aon te aba?
14 E a ririkirake ni korakora aan te waaki ae boou i aon te aba are e kateia te Atua, ni kaineti ma aia botaki Ana Tia Kakoaua Iehova ni katobibia te aonnaba. Ni katoa ririki ao bubua ni ngaa aomata ake a kabonganai inaomataia n rinea ae a na karaoia, ni butimwaea ana kairiri te Atua ae boto man te atatai ae koaua. A a riki bwa kaain te botannaomata ae boou, ae tei n ana itera te Atua ni kaineti ma te bukibuki ibukin riain te tia tautaeka i aoni bwaai ni kabane, ao ae kakoauaa Tatan bwa bon te tia kewe.
15. Tera te mwakuri ni kamaenako are e na karaoia Iesu n ara bong aikai?
15 N rinean ae a na mena i aan ana kairiri te Atua, a a tau iai ni mena i ‘angaatain’ Kristo ngkana e kamaenakoia “tiibu” ma “kooti.” E taetae ni burabetiia ae kangai Iesu ibukin boong aika kaitira: “A na bane ni botaki botanaomata i matana: ao E na karaureia te korakina ma te korakina n ai aron te tia kawakin-tiibu ngkana e karaureia tiibu ma kooti: ao ane E na kakia tiibu i angaataina, ao kooti i angamaingina.” Tiibu bon aomata aika nimamannei aika reitaki ma tarin Kristo ao a boutokaiia, n aantaeka nakon ana kairiri te Atua. Kooti bon aomata aika imanono aika rawa nakoia tarin Kristo, ao a aki boutokaa ana kairiri te Atua. Tera mwina? E taku Iesu bwa “e na nako te koraki aei [kooti] nakon reken te kai are aki toki: ma e na nako te koraki ae raoiroi [tiibu] nakon te maiu are aki toki.”—Mataio 25:31-46.
16. Tera ae ko riai ni karaoia ngkana ko kani maeka n te Baretaiti ae na roko?
16 Ni koauana, e bon tabeakinira te Atua! N te tai ae waekoa e nang karaoa te aonnaba bwa te baretaiti ae kakukurei. Ko kani maeka n te Baretaiti anne? Ngkana ko kani maeka iai, kaota am kakaitau n te bae e karaoia Iehova, n reiakinan taekana ao ni maiuakina reireiam. “Ukoukora Iehova ngkae E na reke, kam na weteia ngkae E a kaan: ke e kitana arona nikawai te aomata ae buakaka, ao nanona te aomata ae iowawa: ao ke e okira Iehova, ao ane E na nanoangaia.”—Itaia 55:6, 7.
17. E aera ngkai akea te tai ni kabanetai n rinean ae ko na toro irouna?
17 Akea te tai ni kabanetai. E a rangi ni kaan ngkai tokin te waaki aei. E reirei Ana Taeka te Atua ni kangai: “Tai tangira aon te aba, ao tai tangiri naba bwain aon te aba. Ngkana e tangira aon te aba te aomata, ao e aki mena tangiran te Tama i nanona . . . e kume ni mauna aon te aba ma kaibabaruna: ma ane kakaraoa ae E tangiria te Atua, ao e teimatoa n aki toki.”—1 Ioane 2:15-17.
18. Tera te mwakuri ae na kairiko bwa ko na kariaa te maeka i aan ana waaki ae boou te Atua i aon te aba?
18 A a kataneiaki ngkai ana aomata te Atua ibukin te maiu n aki toki n te waaki ae boou i aon te aba. A reiakinaki te onimaki ao rabakau riki tabeua ake a kainnanoaki ibukin kanakoraoan te baretaiti. Ti kaumakiko bwa ko na rinea te Atua bwa am tia Kairiri, ao ko na boutokaa te mwakuri ni kakamaiu, ae kaakaraoaki ngkai ni katobibia te aonnaba. Reirei n te Baibara ma Ana Tia Kakoaua Iehova, bwa ko aonga n ataa te Atua are e rangi n tabeakiniko, ao are e nang katoka te karawawataki. N te aro aei, ko a kona n riki naba iai bwa kaain te botaki ae aana te waaki ae boou i aon te aba. Ao ngkanne ko na kona ni kariaa akoam iroun te Atua, ma ni maeka n aki toki i aan te waaki ae boou ae tamaroa i aon te aba.
[Taamnei n iteraniba 31]
Aia botaki Ana Tia Kakoaua Iehova bon te botaki n itaritari ni koaua ni katobibia te aonnaba