Mwakoro 4
E Kaongoira te Atua Ana Kaantaninga
1, 2. Ti kanga n ataia bwa e katauraoa kaekaaia aomata te Atua, aika korakora nanoia nakoina?
E KAOTIOTA ana kaantaninga te Atua ae tatangira nakoia te koraki ake e korakora nanoia n ukoukoria. E kaotaia aomata aika kan ataia bwa e aera ngkai e tuai ni katoka te karawawataki.
2 E taku te Baibara: “Ngkana ko ukeria [te Atua] ao e na kaotia nakoim.” “Iai te Atua i karawa ae kakaotioti baika raba.” “E na bon aki karaoa te bwai teuana te Uea ae Iehova, ngkana e aki kaota moa nanona ae raba nakoia ana toro aika burabeti.”—1 Rongorongo 28:9, BK; Taniera 2:28; Amota 3:7.
A Mena Iia Kaeka?
3. Ti na kunea iia kaekaan ae e aera ngkai e tuai ni katoka te karawawataki te Atua?
3 A kuneaki kaekaan titiraki n aron ae e aera ngkai e tuai ni katoka te karawawataki te Atua ao tera ae e na karaoia iai, n te boki ae kairaki koreana iroun taamneina ibukin kabwaiara. Te koroboki anne bon ana Taeka, ae te Baibara ae Tabu. “E anganaki te aba te Baibara ni kabanea iroun Tamnein te Atua, ao e manena nakon te reirei, ao nakoni kaotan ana buakaka te aomata nako ina, ao nakoni manga-kaetana, ao nakoni kawanawanana n te raoiroi: ba e aonga ni moan te raoiroi ana aomata te Atua, ao e na kabaneaki ni kataeaki nangina nakoni makuri aika raraoi ni bane.”—2 Timoteo 3:16, 17.
4, 5. Tera ae e okoro iai te boki ae te Baibara?
4 Te Baibara bon te boki ae okoro. E rangi n eti kanoana ae taekan te botannaomata rimoa, n ikotaki ma rongorongon taai ake imwain karikaia aomata. A manena naba rongorongona n taai aikai bwa a kakororaoaki raoi iai taetae ni burabeti n ara tai aikai ao n taai aika a a kaan roko.
5 Akea riki te boki ae kona n onimakinaki rongorongon rimoa ake i nanona, irarikin te Baibara. N te katoto, tii tabeua katoton booki ni kawai aika tanoata taekaia aika tiku iroura ni karokoa te bong aei. Ma a mwaiti katoton te Baibara ae bwanin ke mwakorona, ake a tiku iroura ni karokoa ngkai. E katautauaki bwa iai 6,000 mwaitin katoton te Baibara n Ebera (te “Oo Tetemanti” ae kanoana booki aika 39) ao 13,000 katoton te Baibara n Erene ni Kristian (te “Nu Tetemanti” ae kanoana booki aika 27).
6. E aera ngkai ti koaua raoi bwa titeboo kanoan te Baibara ae ngkai ma are e moani kairaki koreana iroun te Atua?
6 E taraia te Atua ae Moan te Mwaaka are kaira korean te Baibara, bwa e na kateimatoaki raoi etin koreana. Mangaia are titeboo kanoan ara Baibara ae ngkai ma te moani Baibara are kairaki koreana. Te koaua teuana ae boutokaa aei, bwa iai ngkai katoton bokin te Baibara n Erene tabeua ake a kaeweaki ngkoa imwain koron tebubua te ririki, imwin korean te moani Baibara n Erene. Angiin katoton booki ni kawai aika tanoata taekaia aika koreaki irouia aomata, a a tibwa kaeweaki tao irabubua te ririki imwin moani korean booki aikai.
Ana Bwaintangira te Atua
7. Tera aron taotiran te Baibara?
7 Moan te taotira te boki ae te Baibara ma rimoa. E a tia ni boretiaki katotona aika tenua tabun te birion. Akea te boki teuana ae e kaania te mwaiti anne. E a tia naba n rairaki te Baibara ke mwakorokorona nakon taetae aika 2,000 tabun. Mangaia are e katautauaki bwa e nakon 98 te katebubua mwaitiia kaain te aonnaba aika kona ni wareka te Baibara.
8-10. Baikara tabeua bukin materaoin neneran te Baibara?
8 E na materaoi neneran te boki ae taekinaki iai bwa e nako mairoun te Atua, ao ae iai bwaai ni kakoaua i nanona ao n taabo tabeua, aika boutokaa koauana.a E kabwarabwaraa manenan te maiu, ae nanonaki ni baika riki n te aonnaba ngkai, ao taekan taai aika imwaira. Akea riki te boki ae ai arona.
9 Eng, te Baibara bon ana anga n itoman te Atua nakoia aomata. E kaira koreana ni mwaakana ae kakammwakuri ke taamneina, ni kabonganaia aomata aika 40 mwaitiia bwa a na koreia. Mangaia are e taetae te Atua nakoira rinanon ana Taeka, ae te Baibara ae Tabu. E korea ae kangai te abotoro Bauro: “Ngke kam kaeka mai roura ana taeka te Atua, ao kam kaki i nanomi ba tiaki aia taeka aomata, ma n ai aron ae boni koaua, ba bon ana taeka te Atua.”—1 I-Tetaronike 2:13.
10 E arana te Baibara Abraham Lincoln, ae te ka-16 ni beretitenti n te United States bwa, “te bwaintangira ae te kabanea n tamaroa ae anga te Atua nakoia aomata . . . Bwa ti aki kona n ataa ae eti ao ae kairua ngke arona bwa akea.” Ma tera ngkanne ae kaongoira te bwaintangira ae rangi ni kakawaki aei ni kaineti ma moan rikin te karawawataki, ao e aera te Atua ngkai e tuai ni katokia, ao tera ae E na karaoia iai?
[Kabwarabwara ae nano]
a Ibukin te rongorongo ae bwanin ni kaineti ma koauan te Baibara, nora te boki ae The Bible—God’s Word or Man’s?, ae boretiaki n 1989 irouia kaain te Watchtower Bible Tract Society of New York, Inc.
[Taamnei n iteraniba 10]
Te Baibara ae kairaki koreana iroun te Atua, bon ana anga n itoman nakoia aomata