KEKEIAKI MA RIKIRAKENI BOONI BWAAI

Kantaningaia Bwa A na Bon Nakoraoi Bwaai

A a tabe n rikirake booni bwaai i abam ma e uarereke am karekemwane? Ko tabeaianga ni karekeani baike ko kainnanoi ao kainnanoia naba am utu? Ngkana anne ae riki, ko na bae n tabeaianga naba ibukin taai aika a na roko. E ngae ngkana a riki kangaanga n aron akanne, ma kantaningaia bwa a na bon nakoraoi bwaai.

BUKINI KAKAWAKINA

A aki tii tangiri rikini baika raraoi aomata aika kantaningaia bwa a na bon nakoraoi bwaai. Ma a kaungaaki n aia kantaninga bwa a na mwakuri ao ni kabanea aia konaa ni kanakoraoi baike a riki n te tai anne. N te katoto, a kaotaki ni kukune tabeua bwa aomata aika kantaningaia bwa a na bon nakoraoi bwaai . . .

a nanomwaaka nakoni baika riki aika kangaanga
a kona ni karaoi bitaki ngkana a na kaangaraoiia
a kakaraoi motinnano aika raraoi ake a na buokaki iai ni kamarurungaki ao n nakoraoi riki maiuia

TE BAE KO KONA NI KARAOIA

Te moan, iangoa aron te Baibara ni kona ni buokiko ngkai. Iai n te Baibara aanga n ibuobuoki aika manena ake a na buokiko ni kekeiaki ma rikirakeni booni bwaai. A kona ni buokiko bwa ko na bwaati aroni maium ao n namakinna bwa ko a kona n taubobonga riki n tarai kangaanga nakon taai aika a na roko.

“E na kamanoko te iangoraoi; e na tararuaiko te ataibwai.”—Taeka N Rabakau 2:11, New Century Version.

Te kauoua, iangoa ana taeka te Baibara ibukin taai aika a na roko. Ngkana ko a ataa kakawakin te wanawana are mena n te Baibara, ko na bae ni kairaki iai bwa ko na iangoa riki te bae taekinaki iai ibukin taai aika a na roko. N te katoto, ko na reiakinna iai bwa e aki tii tangiriko te Atua bwa e na reke iroum “te bwai ae raoiroi nakon taai aika a na roko ao te kantaninga,” ma e katauraoa naba te bwai ae rangi n raoiroi ae ko na boni kakoauaa iai te kantaninga anne. (Ieremia 29:11) Te bwai anne bon Ana Tautaeka n Uea te Atua.

TERA ANA TAUTAEKA N UEA TE ATUA, AO TERA AE E NA KARAOIA?

Ana Tautaeka n Uea te Atua bon te tautaeka ae e na taua taekan te aonnaba ni kabutaa. (Taniera 2:44; Mataio 6:10) Ngkana e a kairiri mai karawa, e na boni karokoa n tokina te rawawata ao te maiu ni kainnano, ao n onei mwia n te rau ao n rekeni bwaai aika bati, n aron ae taekinaki ni kiibu aikai.

“Ko na kukurei ma n toronibwai.”—Taian Areru 128:2.

“A na aki korakai [naake a mena i aan te Tautaeka n Uea] ibukin te akea.”—Itaia 65:23.

“E na bati te uita n te aonnaba.”—Taian Areru 72:16.

A kakoauaa raoi aomata aika mirion ma mirion aika onimakini berita aikai, bwa e bon “aki kona ni kewe” te Atua. (Tito 1:2) Ngaia are e aera ko aki nenera kanoan te Baibara? Ko na kakorakoraaki n te kantaninga are iai bwa ko na kekeiaki ma kangaanga ni kaineti ma te mwane, ao n onimakina raoi ae a na bon nakoraoi kanoan taai aika a na roko.