A Kangaa Kukune Aika Boou N Rota Arom N Iaiango?
A tatangiria aomata n reireinia baika bati, tao ibukin aia bwai n reirei, aia mwakuri, ke bwaai riki tabeua. A rangi n ibuobuoki n te itera anne kukune aika boou. A a rangi ni kai reke ngkai rongorongo aika bati, mani mwengara ke man te tabo ae ti mena iai.
Ma a bati aika a rangi ni kakamanenai kukune aika boou aikai, ae a noria bwa . . .
e kangaanga irouia bwa a na katuuaa aia iango ngkana a wareware.
e kangaanga bwa a na katiaa aia mwakuri teuana imwin teuana.
a kai botu ngkana a tiku n tii ngaiia.
TE BAE KO RIAI N ATAIA
TE WAREWARE
Tabeman taani wareware aika kakabonganai aia tareboon ke aia kaombiuta, a aki toki ni wareware ni katawe bwa a tii kan ataa te boto n iango n te karaki.
Tao e nakoraoi te aeka ni wareware anne ngkana ko tii kani kakaaea kaekaan te titiraki teuana. Ma e aki nakoraoi anne, ngkana ko kan ota raoi n ae nanonaki n te baere ko warekia.
IANGOA AEI: Ko kona ni wareka te rongorongo ae abwabwaki? Ko na kangaa n rikirake riki ngkana ko wareware ni karaurau?—TAEKA N RABAKAU 18:15.
KAATUUA AM IANGO
A taku tabeman bwa a kona ni karaoi baika uoua n te tai teuana ni kamanenaani kukune aika boou. N te katoto a kona ni kanakorongorongo nakoia raoraoia ao ni kamatebwai n te tai ae tii teuana. Ma a boni katabetabeaki aia iango ao bon akea teuana ae tia, bwa a aikoa kona ni kaatuua aia iango.
Kaatuuan am iango e kainnanoa kataneiaakim i bon iroum, ao e rangi ni materaoi karaoana. E taku te roro n rikirake ae Grace: “E karako riki iai am kairua ao tabeaiangam. I a tia n noria bwa e raoiroi riki ae ko kaatuua am iango i aon te bwai ae tii teuana, ao ko na aki mangaongao iai.”
IANGOA AEI: E uruanaki am konabwai ni kaatuua am iango ao n uringi baike ko kamatebwai i aoia, ni kamanenaani kukune aika boou?—TAEKA N RABAKAU 17:24.
KO TIKU N TII NGKOE
Iai tabeman aika botu ngkana a tiku n tii ngaia n te tabo ae mabu, ao irouia e na toki botuia ni kamanenaani kukune aika boou. E taku Olivia: “Ngkana I aki tuoa au tareboon ke au tablet ke ni kamaiua au TV i nanon 15 te miniti, ao I a botu naba.”
Ma e kona n reke am tai ni kananoa am iango n te tai are ko tiku iai n tii ngkoe, bwa anne te bae kakawaki ngkana ko kan reireiniko te bwai teuana. E aki tii kaineti anne nakoia ataei ma bon ikawai naba.
IANGOA AEI: Ko kona ni kamanenai raoi taai ake ko tiku iai n tii ngkoe?—1 TIMOTEO 4:15.
TE BAE KO KONA NI KARAOIA
TUOA AROM NI KAMANENAI KUKUNE AIKA BOOU
N aanga raa aika ko kona ni kamanenai iai kukune aika boou ni karikirakea am konabwai n iaiango? Ao a na kangaa n uruana arom ni kaatuua am iango ao n reiakina te bwai teuana?
ANA BOTO N REIREI TE BAIBARA: “Kawakina te wanawana ao te konabwai n iaiango raoi.”—TAEKA N RABAKAU 3:21.