Katokana ae Teimaan n Aki Toki
Mirion ma mirion aomata aika tia ni maiuakini booto n reirei ake a taekinaki ni kaongora ake mai mwaina, ao a a kona n taeka wakaan te riribai mai nanoia. Ma ni koauana, ti aki kona ni katoka te riribai n aekana nako, i bon iroura. Ma nanona bwa e a bon aki kona n toki te riribai?
Te Tautaeka ae Kororaoi
E tuai kona aia tautaeka aomata ni katoka raoi te riribai. Ma e nanonaki n anne bwa ai akea te tautaeka ae kona ni kamauna te riribai?
Te tautaeka ae kona ni katoka te riribai e riai ni
1. Kairiia aomata bwa a na kani bita aia iango ao aia namakin ibukia tabemwaang
2. Katoka te maraki are e a kairiia aomata bwa a na riribai naba.
3. Kateiia taani kairiri aika kakaonimaki n te aro ae eti ao n aki kakaokoroia aia aomata.
4. Katiteuanaia aomata man natannaomata nako.
E karaui nanora te Baibara bwa e a tia ni katea te tautaeka anne te Atua. Ao e aranaki bwa “ana Tautaeka n Uea te Atua.”—Ruka 4:43.
Iangoi baika e na uotii te tautaeka anne.
1. Reiakinan te Aroaro ni Maiu ae Riai
“A [na] reiakina te raoiroi kaain te aba.”—ITAIA 26:9.
“Bon te rau mwin te raoiroi ni koaua, ao uaan te raoiroi ni koaua bon te rau ma te mweraoi ae teimatoa.”—ITAIA 32:17.
Tera ae e nanonaki n aei? E na reireinia aomata te bwai ae eti Ana Tautaeka n Uea te Atua. Ngkana a ataa ae eti ao ae kairua aomata, n aron te riribai ao te kaetitaeka ae riai, e na boni bitaki ngkanne aroaroia i marenaia. A na bane n ataia ae te bwai ae eti bon tangiraia aeka n aomata nako.
2. Katokan te Riribai
“E na kaoa te rannimata ni kabane mai mataia [te Atua], ao e nang akea riki te mate, ke te nanokawaki ke te tang ke te maraki. A a mauna bwaai rimoa.”—TE KAOTIOTI 21:4.
Tera ae e nanonaki n aei? E na katoki maraki nako Ana Tautaeka n Uea te Atua, aika riki man te riribai. A nang aki manga namakina te riribai naake a karawawataaki ngkoa n te riribai.
3. Te Kairiri ae Raoiroi
“E na aki motikitaeka n te baere noria ni matana, ao e na aki naba boaa te aba tii ni kaineti ma te baere a ongo taningana. E na motiki taekaia akana mangori n te aro ae riai, ao e na boaa te aba n te raoiroi ibukia akana nimamannei n te aonnaba.”—ITAIA 11:3, 4.
Tera ae e nanonaki n aei? E na tautaekana te aonnaba Iesu Kristo are ngaia te Uea n Ana Tautaeka n Uea te Atua, n te aro ae riai n akea te inanonano. E aki tangira riki te natannaomata teuana nakon are teuana Iesu, ao e kona n taraia raoi bwa a na maiuakinaki ana tua aika raoiroi n te aonnaba ni kabutaa.
4. Te Katiteuanaaki
E na reireinia aomata Ana Tautaeka n Uea te Atua bwa a na ‘kaboraoi aia iango, ao ni bwaina te tangira ae tii te arona, ao ni katiteuanaaki raoi, ao n iango n te iango ae tii teuana.’—I-BIRIBI 2:2.
Tera ae e nanonaki n aei? A na boni katiteuanaaki raoi aomata ake a mena i aan Ana Tautaeka n Uea te Atua. A na “katiteuanaaki raoi” ibukina bwa a na tangiriia raoi i marenaia.