1 Tamuera
29 A ikotiia aia taanga ni buaka ni kabane I-Biritia+ i Abeki, ngke a kaembwa tibun Iteraera i rarikin te koburake n ran i Ietireera.+ 2 Ao a mwananga aia toka I-Biritia ma aia tautia aika kaokoroaki nakoni kaka tebubua ao kaka teuana tenga. Ao a mwananga Tawita ma ana rorobuaka mai buki i rarikin Akiti.+ 3 Ma a taku aia toka I-Biritia: “A aera ikai taian Ebera aikai?” E kaeka Akiti nakoia aia toka I-Biritia ni kangai: “Bon Tawita aei are ana toro Uean Iteraera are Tauro, ae e a tia ni mena i rarikiu i nanon teuana te ririki ke e nako riki.+ I aki kunea te bure teuana irouna man te bong are e nako iai ao ni kawarai, ni karokoa te bong aei.” 4 Ma a un aia toka I-Biritia iroun teuaei ao a taku nakoina: “Kaoka teuanne.+ Ke e okira te tabo are ko kamaekaa iai. Tai kairia ma ngaira nakon te buaka, bwa e kaawa ni manga rairaki n ekiranako n tain te buaka.+ Bwa iai riki te anga ae raoiroi ae e na karekea iai akoana iroun ana toka i rarikini kamateaia ara rorobuaka? 5 Tiaki bon Tawita aei are a aneneia ni kangai ngke a mwaie:
‘E kamateia aiana aika nga ma nga Tauro,
Ao Tawita tatabebwi tenga’?”+
6 Ibukin anne ao Akiti+ e a wetea Tawita ao e taku nakoina: “Ngkai bon iai Iehova, ao ko raoiroi, ao I kukurei ngkai ko mwananga nakon te buaka ma au taanga ni buaka,+ bwa I aki kunea te bure teuana iroum man te bong are ko roko iai irou ni karokoa te bong aei.+ Ma a aki onimakiniko tooka aikai.+ 7 Mangaia ae ko na oki ngkai ma te rau, ao tai karaoa te bwai teuana ae a na aki kukurei iai aia toka I-Biritia.” 8 Ma e taku Tawita nakon Akiti: “Bukin tera, tera ae I a tia ni karaoia? Tera te bure ae ko kunea iroun am toro man te bong are I roko iai iroum ni karokoa te bong aei? E aera ngkai I aki riai n iriko ao ni buakania aian au toka ae te uea?” 9 E kaeka Akiti nakon Tawita ni kangai: “Irou ngai ao ko raoiroi kaanga ai aron ana anera te Atua.+ Ma a a tia ni kangai aia toka I-Biritia, ‘Tai kaira teuanne ma ngaira ni waerake nakon te buaka.’ 10 Kautimwaakako n te moaningabong ma ana toro am toka ake raom n roko. Teirake ao moantaai n nako n te ingabong n te tai naba are e oota iai.”
11 Mangaia are a utimwaaka n te moaningabong Tawita ma ana rorobuaka bwa a na okira abaia I-Biritia, ao a waerake I-Biritia nako Ietireera.+