2 Rongorongo

2 E a tua ngkai Toromon bwa e nang kateaki te auti ibukin aran Iehova+ ao te auti* ibukin oin ana tautaeka n uea.+ 2 Ao e karekeia mwaane aika 70,000 Toromon bwa ana toro aika bekutata,* mwaane aika 80,000 bwa ana tia koro atibu n taiani maunga,+ ao aika 3,600 bwa mataniwi i aoia nakanne.+ 3 Ao e kanakotaeka Toromon nakon Iram+ are uean Turo ni kangai: “Karaoa nakoiu te aro are ko karaoia nakon Tawita are tamau, ngke ko kanakoi nakoina kaai aika tiira bwa e na katea te auti* ae e na maeka iai.+ 4 N nang katea ngkai te auti ibukin aran Iehova ae Atuau bwa N na katabua nakoina, ao N na kabueka te karea ae boiarara+ i matana, ao ibukin naba te bwerena* are kauaataoaki n taai nako,+ ma karea ni kabuekaki n te ingabong ao n te tairiki,+ ni boongi n Taabati,+ ni bongin nako otin namwakaina,+ ao n tain taian toa+ ibukin Iehova ae Atuara. Aio bon tabeia tibun Iteraera ae teimatoa. 5 E na bon rangi n rianako te auti ae N nang kateia aei, bwa e boni kakannato riki Atuara nakoia atua ni kabane. 6 Ao antai ae tauraoi nakon te mwakuri ni katea ana auti? Bwa e aki kona karawa ma karawani karawa ni kamwaneauaa,+ mangaia ae antai ngai ngkai I riai ni katea ana auti? Bwa I tii kona ni katea te tabo ibukini kabuekani karea ni kabubui i matana. 7 Ao ko na kanakoa nakoiu te tia karaobwai ae mwaatai ni mwakurian te koora, te tirewa, te buraati,+ te biti, te karai ae beboo ae buraen te tiibu, te karai ae uraroo, ao te karai ae buruu, ma ane e ataa aroni koreani baika kaaraki. E na mwakuri ma au tia karaobwai aika mwaatai i Iuta ao i Ierutarem, ake e a tia n rineiia Tawita are tamau.+ 8 Ao kanakoi nakoiu kaai aika tiira, mwaiango,+ ao arekam*+ mai Rebanon, bwa I ataia raoi bwa a rangi ni mwaatai am toro ni korei ni kabwakai kain Rebanon.+ A na mwakuri au toro ma am toro+ 9 ni katauraoi ibukiu kaai aika mwaitikurikuri, bwa te auti ae N nang kateia e na bon akea kabotauan tamaroana. 10 Ao noria! N na karekei kanaia am toro,+ ake taani korokai ake a korei kaai ni kabwakai, ae 20,000 te kore* ni uita, 20,000 te kore ni baare, 20,000 te bwate* ni wain, ao 20,000 te bwate n oera.”

11 Ngaia are e kororeta Iram are uean Turo ao e kanakoa nakon Toromon, ni kangai: “E tangiriia ana aomata Iehova ngaia ae e karikiko bwa aia uea.” 12 Ao e taku Iram: “E bia karaoiroaki Iehova ae Atuan Iteraera, ae karaoa karawa ma te aonnaba, ibukina bwa e a tia n angan te Uea are Tawita natina ae wanawana,+ ae iai irouna te ataibwai ma te rabakau,+ ae e na katea te auti ibukin Iehova ao te auti ibukin oin ana tautaeka n uea. 13 I a kanakoa ngkai te mwaane ae te tia karaobwai ae mwaatai ae iai irouna te atatai, ae Iramabi,+ 14 ae natin te aine ae tibun Tan, ma tamana bon te I-Turo. E mwaatai ni mwakuria te koora, te tirewa, te buraati, te biti, taian atibu, taiani kai, te karai ae beboo ae buraen te tiibu, te karai ae buruu, kunnikai aika raraoi, ao te karai ae uraroo.+ E kona ni kaari ni katanei aeka n taamnei nako, ao ni mwakuria taamnein te bwai ae e anganaki.+ E na mwakuri ma am tia karaobwai aika mwaatai ao ana tia karaobwai aika mwaatai au toka are Tawita are tamam. 15 E bia kanakoa ngkai au toka, te uita, te baare, te oera, ao te wain, ake e a tia ni beritan nakoia ana toro.+ 16 Ao ti na korei ni kabwakai kain Rebanon,+ ni kabatiai n aron are ko kainnanoia, ao ti na uotii nakoim n ebaebani bwa a na ritaari nako Iobe,+ ao ko na anai ni waerake nako Ierutarem.”+

17 E warekiia ngkanne mwaane ni kabane Toromon aika taani maeka n iruwa n te aba ae Iteraera,+ imwin te wareaomata are e karaoia Tawita are tamana,+ ao bon 153,600 mwaitiia. 18 Mangaia are e karekeia 70,000 mai buakoia bwa ana toro aika bekutata,* 80,000 bwa ana tia koro atibu+ n taiani maunga, ao 3,600 bwa mataniwi ake a na kammwakuriia aomata.+