1 Rongorongo

12 Aikai mwaane ake a roko iroun Tawita i Tikeraka+ ngke e a aki kona n rangi ni mwamwananga ibukin Tauro+ are natini Kiti, ao a mena naakai i buakoia taani buaka aika korakora ake a boutokaia n te buaka.+ 2 A taubobonga n te kainikatebe, ao a kona ni kauaanga+ ngkana a bana n atibu+ ke a katebenakoi kanoan te kainikatebe. Bon tarin nako Tauro bwa kaain te baronga are Beniamin.+ 3 Te mataniwi bon Aietera, n ikotaki ma Ioaati, ake natin Teimaa are te I-Kibea,+ Ietiera ao Berete ake natin Atimaweta,+ Beraka, Ieu are te I-Anatota, 4 Itimaia are te I-Kibeon,+ ae te tia buaka temanna ae korakora i buakoia naake teningaun+ ao e mena i aoia naake teningaun, ao Ieremia naba, Iaatiara, Ioaanan, Iotabata ae te I-Keteraa, 5 Erutai, Ierimota, Bearia, Temaria, Tebatia are te Aribaite, 6 Erekana, Itiaa, Atareru, Ioetera, ao Iatiobeam, ake tibuni Kora,+ 7 ao Ioeraa ao Tebaria, ake natin Ieroam are te I-Ketora.

8 Ao a nako tabeman mai buakoia tibuni Kata nakon ana itera Tawita n te nono n te rereua.+ Bon taani buaka aika korakora ngaiia, aika tautia aika kataneiaaki ibukin te buaka, aika tei n tauraoi ma te otanga ae bubura ao te kainiwai, aika titeboo moaia ma raian ao a birimwaaka n ai aroia katere* riaoni maunga. 9 Etia bon te mataniwi, Obaria te kauoman, Eriaba te kateniman, 10 Mitimanna te kaaman, Ieremia te kaniman, 11 Atai te kaonoman, Eriera te kaitiman, 12 Ioaanan te kawaniman, Eretabata te karuaman, 13 Ieremia te katengaun, ao Makebannai te katengauni ma temanna. 14 Akanne bon tibuni Kata,+ ake mataniwi n te taanga ni buaka. Te kabanea ni mangori irouia e kona ni konai aoia tautia aika 100, ao are te kabanea ni korakora e kona ni konai aoia 1,000.+ 15 Mwaane akanne ake a rinanon te Ioretan nakon iterana are teuana n te moan namwakaina ngke e a taorake i mataniwina, ao a kakioianako te koraki ni kabane ake a maeka n aaba aika aoraoi, nako mainiku ao nako maeao.

16 A roko naba mwaane tabeman aika tibuni Beniamin ao aika tibun Iuta iroun Tawita n ana nono.+ 17 Ao e otinako Tawita i mataia ao e taku nakoia: “Ngkana kam roko irou ma te raoi bwa kam na buokai, ao e na katiteuanaaki nanou ma ngkami. Ma ngkana kam na boni kamwaneai nakoia taani kakaitaraai ngkai bon akea ana bure baiu, ao ke e nora anne Atuaia ara bakatibu ao ni karaoa te motikitaeka iai.”+ 18 Ao e roko taamnein te Atua i aon* Amatai,+ are te mataniwi irouia naake teningaun ao e taku:

“Bon am aomata ngaira, ngkoe ae Tawita ae natin Iete+ ao bon raora ngkoe.

Te raoi, bon am bwai te raoi, ao te raoi nakon teuare buokiko.

Bwa e buokiko Atuam.”+

Mangaia are e butimwaeiia Tawita ao e mwiokoiia i buakoia mataniwi n te taanga ni buaka.

19 Ao tabeman mai buakon te baronga are Manate a nako naba nakon Tawita ngke e roko ma I-Biritia bwa a na buakana Tauro, ma e aki roko n te buokiia I-Biritia, bwa imwin te kaai ni maroro, ao a a kanakoa teuaei aia toka I-Biritia+ ao a kangai: “E na boni kitanira nakon ana toka ae Tauro, ao a na bon ruanikai maiura.”+ 20 Ngke e nako Tikeraka,+ ao a nakoina naakai man te baronga ae Manate: Atana, Iotabata, Ieriaera, Mikaere, Iotabata, Eriu, ao Tiretai, ake mataniwi i aoia kaka teuana tenga n aia baronga tibuni Manate.+ 21 A buoka Tawita n ekiianako taani kuribwai, ibukina bwa boni mwaane ngaiia ni kabane aika korakora ma n ninikoria,+ ao a a riki bwa mataniwi n te taanga ni buaka. 22 A teimatoa n roko aomata ni katoabong nakon Tawita+ ni buokia, ni karokoa ae e a riki bwa te taanga ni buaka ae rangi ni korakora, n ai aron ana taanga ni buaka te Atua.+

23 Aikai mwaitiia taani buaka aika taubobonga nakon te buaka, ake a roko iroun Tawita i Eberon+ bwa a na rairaanako te nakoa n uea are iroun Tauro nakoina, n aron are e tua Iehova.+ 24 Mwaane aika tibun Iuta aika uouota te otanga ae bubura ao te kainiwai bon 6,800, aika taubobonga nakon te buaka. 25 Mai buakoia tibun Timeon aika mwaane aika korakora ma n ninikoria aika kaain te taanga ni buaka, bon 7,100.

26 Mai buakoia tibun Rewi, bon 4,600. 27 Ieoiata+ bon te tia kairiri irouia tibun Aaron,+ ao raona bon 3,700, 28 ao raoia naba Tatoka+ ae te rorobuaka n ataei ae korakora ma n ninikoria, n ikotaki ma 22 mataniwi ake ana koraki mairoun tamana.

29 Mai buakoia tibuni Beniamin, ake tarin Tauro,+ bon 3,000, ma a rangi ni mwaiti riki i buakoia ake a kakaonimaki nakon Tauro ma kaain ana utu. 30 Mai buakoia tibun Eberaim, iai mwaane aika korakora ma n ninikoria aika 20,800 aika tanoata taekaia i buakoia aia koraki mairoun tamaia.

31 Mai buakon te itera ni baronga ae Manate, bon 18,000 ake a rineaki n araia bwa a na roko ni kaueaa Tawita. 32 Iai mataniwi aika 200 mai buakon te baronga ae Itakara, aika a ota n taian tai ao a atai baike a riai ni karaoi tibun Iteraera, ao a bane ni mena tariia i aan aia kairiri. 33 Mai buakon te baronga ae Teburun, bon 50,000 ake a kona ni kaaina te taanga ni buaka, ao a baireiia raoi ni baireaia taani buaka ma bwaai ni buaka ni kabane, ao a bane n raona Tawita ao a kaotiota te kakaonimaki n te aro ae tabwanin raoi.* 34 Mai buakon te baronga ae Nabetari, iai mataniwi aika 1,000, ao iai raoia aika 37,000 aika iai irouia otanga aika bubura ao kainiwai. 35 Mai buakoia tibun Tan, te koraki ake a baireiia raoi ni baireaia taani buaka bon 28,600. 36 Ao mai buakon te baronga ae Atera ake a kona ni kaaina te taanga ni buaka ao ni baireiia raoi ni baireaia taani buaka, bon 40,000.

37 Man iteran te Ioretan+ ao iai tibun Reuben, tibuni Kata, ao te itera ni baronga are Manate, aika tautia aika 120,000 ma aia bwai ni buaka n aekaia nako. 38 Te koraki aikai ni kabane boni mwaane aika taani buaka, aika a kaai n ikotaki n te taanga ni buaka, ao a roko i Eberon ma te nano ae tabwanin raoi bwa a na kaueaa Tawita i aoia tibun Iteraera ni kabane, ao nikiraia tibun Iteraera ni kabane a katiteuanaaki naba ni kani* kaueaa Tawita.+ 39 Ao a tiku ikekei iroun Tawita i nanon tenibong, n amwarake ao ni moi, bwa a a tia tariia akekei ni katauraoi ibukia. 40 Ao te koraki ake a uakaan ma ngaiia, ao ake i abaia tibun Itakara, tibun Teburun, ao tibun Nabetari, a uotii amwarake i aoia taongki, kamero, miure, ao kaao, aika tianaki aika burawa, taiani biiku aika bati aika buabuaaki aika mwau ma taiani kureebe aika bati aika buabuaaki aika mwau, te wain, te oera, ao kaao ma tiibu aika mwaitikurikuri, bwa e a boo atin te kimwareirei i Iteraera.