Mɛni Biblia Lɛ Kɛɔ Yɛ Makeup Kɛ Jwinei Ni Ji, Toiiaŋnii, Kuɛnii Kɛ Amɛhenɔi Ni Awoɔ Lɛ Ahe?
Hetoo ni Biblia lɛ kɛhãa
Eyɛ mli akɛ Biblia lɛ ewieee sane nɛɛ he fitsofitso moŋ, shi ewieee eshiii makeup ni awoɔ, toiiaŋnii, kuɛnii kɛ amɛhenɔi lɛ, loo nibii krokomɛi ni awoɔ kɛsaa he lɛ. Kɛ̃lɛ, nɔ najiaŋ ni Biblia lɛ baagbala jwɛŋmɔ kɛya bɔ ni wɔyɔɔ yɛ kponɔgbɛ lɛ nɔ lɛ, ewoɔ wɔ hewalɛ ni wɔkwɛ “tsuiŋ gbɔmɔ ni akɛtee, yɛ mumɔ ni yɔɔ kpoo ni he jɔ lɛ hewulamɔ ni fiteee lɛ” mli lɛ moŋ.—1 Petro 3:3, 4.
Biblia lɛ eteee shi ewooo makeup ni awoɔ, toiiaŋnii, kuɛnii kɛ amɛhenɔi lɛ, loo nibii krokomɛi ni awoɔ kɛsaa he lɛ
Yei anɔkwafoi ni yɔɔ Biblia lɛ mli lɛ kɛ nibii nɛɛ ekomɛi wula amɛhe. Rebeka, mɔ ni kɛ Abraham bi nuu Isak hĩ shi lɛ, wo shika tsuru gugɔŋ ga, shika tsuru nineshi nii, kɛ jwinei krokomɛi ní jara wawai ní eshaanuu kɛke lɛ lɛ. (1 Mose 24:22, 30, 53) Nakai nɔŋŋ, Ester kpɛ̃lɛ ni akpa lɛ mui srɔtoi ‘koni ehe afee fɛo waa’ ni akɛsaa lɛ ni anyɛ awo lɛ maŋnyɛ yɛ Persia. (Ester 2:7, 9, 12) Eenyɛ efee akɛ “hesaamɔ mui,” loo “makeup henɔi srɔtoi” fata nibii ni akɛsaa yei nɛɛ koni amɛhe ahe afee fɛo waa lɛ ahe.—New International Version; Easy-to-Read Version.
Nɔkwɛmɔnii ni Biblia lɛ kɛtsu nii yɛ jwinei ahe lɛ, ewieee eshiii kuɛnii, toiiaŋnii kɛ amɛhenɔi lɛ. Akɛ nɔkwɛmɔnɔ lɛ, akɛ mɔ ko ni woɔ ŋaa kpakpa lɛ to “shika tsuru toiiaŋnii . . . kɛhã mɔ ni boɔ lɛ toi lɛ” he. (Abɛi 25:12) Nyɔŋmɔ diɛŋtsɛ hu kɛ bɔ ni ekɛ Israel maŋ lɛ ye ehã lɛ to wu ko ni kɛ nineshinii, kuɛnii, kɛ toiiaŋnii wulaa eyemforo lɛ he. Hewulamɔ nii nɛɛ hã maŋ lɛ ‘he fee fɛo waa.’—Ezekiel 16:11-13.
Susumɔi ni ejaaa ni ahiɛ yɛ makeup kɛ jwinei ni ji, kuɛnii, toiiaŋnii kɛ amɛhenɔi lɛ ahe
Susumɔ ni ejaaa: Yɛ 1 Petro 3:3 lɛ, Biblia lɛ wie eshi “yigbɔɔ kɛ shika tsuru nibii ni akɛwulaa he.”
Anɔkwa sane: Sane ni awieɔ he dani awie enɛ lɛ hãa wɔnaa akɛ, Biblia lɛ kɛ mligbɛ hefɛo miito kponɔgbɛ hefɛo loo hesaamɔ he kɛmiitsɔɔ akɛ, mligbɛ hefɛo ji nɔ ni he hiaa waa. (1 Petro 3:3-6) Saji krokomɛi yɛ Biblia lɛ mli ni maa anɔkwa sane nɛɛ nɔ mi.—1 Samuel 16:7; Abɛi 11:22; 31:30; 1 Timoteo 2:9, 10.
Susumɔ ni ejaaa: Maŋnyɛ Yezebel, yiwalɔ lɛ, kɛ nibii kpa ehiŋmɛi sɛɛ loo ewo “eye shadow,” ni no tsɔɔ akɛ eji tɔ̃mɔ akɛ abaawo makeup.
Anɔkwa sane: Akpãta Yezebel ni eji ŋkunyaayelɔ kɛ gbɔmɔgbelɔ lɛ hiɛ yɛ yiwalɛ nibii ni efee lɛ hewɔ, shi jeee bɔ ni esaa ehe ehã lɛ hewɔ.—2 Maŋtsɛmɛi 9:7, 22, 36, 37.