Namɛi Ji Nefilim Lɛ?
Hetoo ni Biblia lɛ kɛhãa
Nefilim lɛ ji oblaŋi ni ŋwɛibɔfoi fɔji ni kɛ gbɔmɛi abiyei baná bɔlɛ yɛ Noa beiaŋ lɛ fɔ, amɛhe wala kwraa fe gbɔmɛi, ni amɛyitseiaŋ wala hu.a
Biblia amaniɛbɔɔ lɛ kɛɛ akɛ, “anɔkwa Nyɔŋmɔ lɛ bihii lɛ na akɛ, gbɔmɛi abiyei lɛ ahe yɛ fɛo.” (1 Mose 6:2) Nyɔŋmɔ bihii ni awie amɛhe nɛɛ ji mumɔŋ bɔɔ nii ni tse Nyɔŋmɔ hiɛ atua be ni “amɛshi amɛ diɛŋtsɛ amɛshihilɛhe lɛ” yɛ ŋwɛi lɛ. Amɛbaŋɔ adesai agbɔmɔtsei ni “amɛŋɔŋɔɔ [gbɔmɛi abiyei lɛ ateŋ] mɛi fɛɛ ni amɛsumɔɔ lɛ akɛ amɛŋamɛi.”—Yuda 6; 1 Mose 6:2.
Bii ni nakai ŋwɛibɔfoi kɛ yei lɛ fɔ lɛ yɛ srɔto kwraa. (1 Mose 6:4) Nefilim nɛɛ ji kakalɔi ni yitseiaŋ wala waa, yiwalɔi ni hã shikpɔŋ lɛ nɔ yi obɔ kɛ yiwalɛ. (1 Mose 6:13) Biblia lɛ wie amɛhe akɛ “kãkãlɔi ni hi shi yɛ blema lɛ, hii ni he gbɛ́i lɛ.” (1 Mose 6:4) Nɔ ni amɛshi yɛ sɛɛ ji yiwalɛ nifeemɔi kɛ gbeyeishemɔ.—1 Mose 6:5; 4 Mose 13:33.b
Susumɔi ni ejaaa ni mɛi hiɛ yɛ Nefilim lɛ ahe
Susumɔ ni ejaaa: Nefilim lɛ yɛ wala mli lolo yɛ shikpɔŋ lɛ nɔ ŋmɛnɛ.
Anɔkwa sane: Yehowa hã nu afua ko ni ba jeŋ fɛɛ lɛ kpãtã nakai blema je lɛ, ni awuiyeli hé shi yɛ mli lɛ hiɛ. Akpãtã Nefilim lɛ kɛ mɛi fɔji fɛɛ ahiɛ. Nɔ ni tamɔɔɔ nakai lɛ, Noa kɛ eweku lɛ ahiɛ ba nyam yɛ Yehowa hiɛ, ni amɛ pɛ amɛyi ná wala nakai be lɛ mli.—1 Mose 6:9; 7:12, 13, 23; 2 Petro 2:5.
Susumɔ ni ejaaa: Nefilim lɛ atsɛmɛi lɛ gbɔmɛi ji amɛ.
Anɔkwa sane: Atsɛ amɛtsɛmɛi lɛ akɛ “anɔkwa Nyɔŋmɔ lɛ bihii.” (1 Mose 6:2) Biblia lɛ kɛ wiemɔi nɛɛ nɔŋŋ tsu nii kɛhã ŋwɛibɔfoi. (Hiob 1:6; 2:1; 38:7) No mli lɛ, ŋwɛibɔfoi yɛ nyɛmɔi ni hãa amɛnyɛɔ amɛtsɔmɔɔ amɛhe gbɔmɛi. (1 Mose 19:1-5; Yoshua 5:13-15) Bɔfo Petro wie “mumɔi ni awo amɛ tsuŋ lɛ, mɛi ni tsutsu lɛ amɛgbo toi be ni Nyɔŋmɔ toɔ etsui shi kɛmɛɔ yɛ Noa gbii lɛ amli lɛ” ahe. (1 Petro 3:19, 20) Be ni Biblia ŋmalɔ Yuda wieɔ sane ni tamɔ nakai nɔŋŋ he lɛ, etsɔɔ mli akɛ ŋwɛibɔfoi komɛi “eyaaa nɔ amɛhiii amɛgbɛhe ni akɛhã amɛ lɛ.”—Yuda 6.
Susumɔ ni ejaaa: Nefilim lɛ ji ŋwɛibɔfoi ni jɛ ŋwɛi amɛgbee shi.
Anɔkwa sane: Sane ni awieɔ dani abawie sane ni yɔɔ 1 Mose 6:4 lɛ tsɔɔ akɛ Nefilim lɛ, jeee ŋwɛibɔfoi ji amɛ, moŋ lɛ, amɛji bii ni ŋwɛibɔfoi ni tsɔmɔ amɛhe gbɔmɛi ni amɛkɛ gbɔmɛi abiyei baná bɔlɛ lɛ fɔ. Be ni ŋwɛibɔfoi lɛ ‘ŋɔŋɔɔ gbɔmɛi abiyei lɛ ateŋ mɛi fɛɛ ni amɛsumɔɔ lɛ akɛ amɛŋamɛi’ lɛ, Yehowa wie akɛ yɛ afii 120 mli lɛ, ebaagbala nakai jeŋ fɔŋ lɛ toi. (1 Mose 6:1-3) Biblia lɛ tsɔɔ akɛ, “nakai gbii lɛ amli lɛ,” ŋwɛibɔfoi ni batsɔmɔ amɛhe gbɔmɛi lɛ “tee nɔ amɛkɛ gbɔmɛi abiyei lɛ ná bɔlɛ” ni amɛfɔfɔɔ “kãkãlɔi ni hi shi yɛ blema lɛ,” ni ji Nefilim lɛ.—1 Mose 6:4.
a Abaanyɛ atsɔɔ Hebri wiemɔ ni atsɔɔ shishi akɛ “Nefilim” lɛ shishi akɛ “Mɛiashitswialɔi.” Wolo ni ji, Wilson’s Old Testament Word Studies lɛ kɛɛ akɛ, wiemɔ nɛɛ damɔ shi kɛhã “mɛi ni kɛ yiwalɛ shɔ̃ɔ mɛi anibii yɛ amɛdɛŋ, ni amɛhãa mɛi lɛ gbeɔ shi.”
b Ekã shi faŋŋ akɛ Israelbii ni yakpá shikpɔŋ shi amɛkwɛ, ní awie amɛhe yɛ 4 Mose 13:33 lɛ na mɛi komɛi; ni mɛi ni amɛna lɛ akwɔlɛ kɛ amɛtilɛ hã amɛkai Nefilim ni gboi afii ohai komɛi ni tsɔ hiɛ lɛ asane lɛ.—1 Mose 7:21-23.