Kɛ́ Akɛɛ ‘‘Okɛ Woo Ahã Opapa Kɛ Omami” Lɛ, Te Atsɔɔ Tɛŋŋ?
Hetoo ni Biblia lɛ kɛhãa
Kitã ni akɛhã akɛ ‘‘okɛ woo ahã opapa kɛ omami” lɛ jeɔ kpo shii abɔ yɛ Biblia lɛ mli.” (2 Mose 20:12; 5 Mose 5:16; Mateo 15:4; Efesobii 6:2, 3) Enɛ biɔ nifeemɔi titrii ejwɛ komɛi.
Ohiɛ Asɔ Amɛ. Kɛ́ ohiɛ sɔɔ nɔ fɛɛ nɔ ni opapa kɛ omami efeɔ amɛhãa bo lɛ, no tsɔɔ akɛ okɛ woo miihã amɛ. Kɛfata he lɛ, kɛ́ oboɔ amɛgbɛtsɔɔmɔi atoi ni okɛtsuɔ nii lɛ, no tsɔɔ akɛ ohiɛ sɔɔ amɛ. (Abɛi 7:1, 2; 23:26) Biblia lɛ woɔ bo hewalɛ koni ona ofɔlɔi akɛ ‘onunyam’, no ji ohã amɛsane akã otsui nɔ waa.—Abɛi 17:6.
Kpɛlɛmɔ nɔ akɛ amɛyɛ hegbɛ yɛ onɔ. Titri lɛ, kɛ́ gbekɛ ji bo ni okpɛlɛɔ hegbɛ ni Nyɔŋmɔ kɛhã opapa kɛ omami lɛ nɔ lɛ, no tsɔɔ akɛ okɛ woo hãa amɛ. Kolosebii 3:20 lɛ kɛɔ gbekɛbii lɛ akɛ: “Nyɛ bii lɛ, nyɛboa nyɛfɔlɔi atoi yɛ nɔ fɛɛ nɔ mli, ejaakɛ enɛ sa Nuŋtsɔ lɛ hiɛ jogbaŋŋ.” Yesu po be ni eji gbekɛ lɛ, ejɛ esuɔmɔ mli ebo efɔlɔi atoi.—Luka 2:51.
Okɛ amɛ aye yɛ bulɛ mli. (3 Mose 19:3; Hebribii 12:9) Bei pii lɛ, enɛ kɔɔ nɔ ni owieɔ kɛ bɔ ni owieɔ lɛ ohãa lɛ he. Eji anɔkwale akɛ bei komɛi lɛ, fɔlɔi komɛi feɔ nibii ni hãa ewaa akɛ, akɛ bulɛ baahã amɛ. Fɛɛ sɛɛ lɛ, kɛ́ bii lɛ kɛ amɛfɔlɔi ewieee wiemɔi ni bulɛ bɛ he, ni amɛfeee nibii hu ni bulɛ bɛ he lɛ, no tsɔɔ akɛ amɛkɛ woo miihã amɛfɔlɔi lɛ. (Abɛi 30:17) Biblia lɛ tsɔɔ akɛ, mɔ fɛɛ mɔ ni jɛɔ epapa loo emami lɛ, etɔ̃ tɔmɔ ni yɔɔ hiɛdɔɔ.—Mateo 15:4.
Kwɛmɔ ofɔlɔi lɛ atsiabo. Kɛ́ ofɔlɔi gbɔlɔ lɛ, yelikɛbuamɔ he baahia amɛ. Kɛ́ obɔ mɔdɛŋ waa ni ohã amɛ nibii ni he hiaa amɛ lɛ, no hu tsɔɔ akɛ okɛ woo miihã amɛ. (1 Timoteo 5:4, 8) Akɛ nɔkwɛmɔnɔ lɛ, be ni eshwɛ fioo ni Yesu baagbo lɛ, eto gbɛjianɔ koni mɔ ko akwɛ emami tsiabo.—Yohane 19:25-27.
Susumɔi ni ejaaa ni mɛi hiɛ yɛ woo ni esa akɛ akɛhã papa kɛ mami lɛ he
Susumɔ ni ejaaa: Kɛ́ akɛɛ okɛ woo ahã opapa kɛ omami lɛ, no tsɔɔ akɛ esa akɛ ohã amɛ amɛtsɔɔ bo nɔ ni esa akɛ ofee yɛ ogbalashihilɛ lɛ mli.
Anɔkwa sane: Biblia lɛ tsɔɔ akɛ, wu kɛ eŋa teŋ ekomefeemɔ lɛ ji nɔ ni he hiaa titrii, dani weku saji krokomɛi. Biblia lɛ wie yɛ 1 Mose 2:24 lɛ akɛ: “Nuu baashi epapa kɛ emami ni ebaakpɛtɛ eŋa he.” (Mateo 19:4, 5) Kɛ̃lɛ, mɛi ni ebote gbalashihilɛ mli lɛ baanyɛ aná ŋaa ni amɛfɔlɔi loo amɛshaahiimɛi kɛ shaayeimɛi baawo amɛ lɛ he sɛɛ. (Abɛi 23:22) Fɛɛ sɛɛ lɛ, wu kɛ eŋa baanyɛ afo husu awo bɔ ni amɛbaasumɔ ni amɛwekumɛi kɛ amɛhe awo amɛgbalashihilɛ mli saji amli ahã lɛ he.—Mateo 19:6.
Susumɔ ni ejaaa: Opapa kɛ omami ji mɛi ni yɔɔ hegbɛ ni fe fɛɛ yɛ onɔ.
Anɔkwa sane: Eyɛ mli akɛ Nyɔŋmɔ kɛ hegbɛi komɛi hã fɔlɔi yɛ weku lɛ mli moŋ, shi hegbɛ fɛɛ hegbɛ ni adesai yɔɔ lɛ husu yɛ he—hegbɛ ni Nyɔŋmɔ yɔɔ lɛ nɔ kwɔ kwraa fe amɛnɔ lɛ. Akɛ nɔkwɛmɔnɔ lɛ, be ni saneyelihe wulu ko fã Yesu bɔfoi lɛ koni amɛkɛ Nyɔŋmɔ gbɛtsɔɔmɔ akatsu nii lɛ, amɛhã hetoo akɛ: “Esa akɛ wɔbo Nyɔŋmɔ moŋ toi akɛ nɔyelɔ fe gbɔmɛi.” (Bɔfoi 5:27-29) Agbɛnɛ hu, bii boɔ amɛfɔlɔi atoi “yɛ Nuŋtsɔ lɛ mli,” ni tsɔɔ akɛ kɛ́ fɔlɔi lɛ agbɛtsɔɔmɔi lɛ eteee shi ewooo Nyɔŋmɔ mlai lɛ, esa akɛ bii lɛ abo toi.—Efesobii 6:1.
Susumɔ ni ejaaa: Kɛ́ akɛɛ okɛ woo ahã opapa kɛ omami lɛ, no tsɔɔ akɛ esa akɛ okɛ amɛ ahi jamɔ kome mli.
Anɔkwa sane: Biblia lɛ woɔ wɔ hewalɛ koni wɔtao nii amli wɔkwɛ akɛ nɔ ni atsɔɔ wɔ lɛ ji anɔkwale lo. (Bɔfoi 17:11; 1 Yohane 4:1) Mɔ ni feɔ nakai lɛ, sɛɛ mli lɛ, ekolɛ ebaahala jamɔ ni soro no yɛ efɔlɔi lɛ anɔ he. Biblia lɛ tsĩ Nyɔŋmɔ tsuji anɔkwafoi komɛi atã akɛ amɛhala jamɔ ni esoro no yɛ amɛfɔlɔi anɔ lɛ he; amɛteŋ mɛi komɛi ji Abraham, Rut, kɛ bɔfo Paulo.—Yoshua 24:2, 14, 15; Rut 1:15, 16; Galatiabii 1:14-16, 22-24.
Susumɔ ni ejaaa: Kɛ́ akɛɛ okɛ woo ahã opapa kɛ omami lɛ, no tsɔɔ akɛ esa akɛ okɛ ohe awo blematsɛmɛi ajamɔ loo wɔŋjamɔ kusumii amli.
Anɔkwa sane: Biblia lɛ kɛɔ akɛ: “Yehowa, o-Nyɔŋmɔ lɛ, esa akɛ ojá, ni lɛ pɛ esa akɛ okɛ sɔɔmɔ krɔŋŋ ahã.” (Luka 4:8) Mɔ ni jáa blematsɛmɛi loo wɔji lɛ, eefee Nyɔŋmɔ nihiinii. Agbɛnɛ hu, Biblia lɛ kɛɛ, “mɛi ni egboi lɛ leee nɔ ko nɔ ko kwraa.” Amɛnaaa nibii ni mɛi feɔ kɛtsɔɔ akɛ, amɛkɛ woo miihã amɛ lɛ ateŋ eko kwraa; ni amɛnyɛŋ amɛye amɛbua hiɛkãlɔi lɛ loo amɛye amɛ awui.—Jajelɔ 9:5, 10; Yesaia 8:19.