Yiwalɛ Nifeemɔ Nyɛŋ Atsu Naagbai Ahe Nii Kɛmɔ Shi

Ŋmɛnɛ lɛ, mɛi babaoo susuɔ akɛ kɛ́ béi te shi loo naagba ko ba lɛ, yiwalɛ nifeemɔ ji gbɛ ni hi fe fɛɛ ni amɛbaanyɛ amɛtsɔ nɔ kɛtsu he nii. Shi susumɔ nɛɛ teɔ shi ewoɔ nibii ni Yesu tsɔɔ, kɛ bɔ ni ehi shi ehã lɛ. Hã wɔsusu saji ni ewie kɛ nibii ni efee lɛ ekomɛi ahe wɔkwɛ.

Nibii ni Yesu wie

Yɛ Yesu Gɔŋ Nɔ Shiɛmɔ ni ehe gbɛ́i waa lɛ mli lɛ, etsɔɔ etoibolɔi lɛ akɛ, kɛ́ niiashishinumɔ ko eyabaaa loo naataamɔ ko te shi lɛ, jeee mlifu, mlila, kɛ yiwalɛ nifeemɔi akɛtsuɔ he nii. Naa nɔkwɛmɔnii fioo komɛi.

• “Nɔ fɛɛ nɔ ni nyɛtaoɔ akɛ mɛi afee ahã nyɛ lɛ, nyɛ hu nyɛfea nakai nɔŋŋ nyɛhãa amɛ.” (Mateo 7:12; Luka 6:31) Ŋaawoo nɛɛ woɔ wɔ hewalɛ koni wɔkɛ mɛi aye tamɔ bɔ ni wɔbaasumɔ ni amɛkɛ wɔ aye lɛ.a Akɛni wɔteŋ mɔ ko sumɔŋ ni aye lɛ awui hewɔ lɛ, ani esaaa akɛ wɔkɛ mɛi fɛɛ yeɔ yɛ bulɛ kɛ mlihilɛ mli, kɛ́ wɔkɛ amɛ kpãaa gbee po?

• “Mɔ fɛɛ mɔ ni baagba oninejurɔ toiŋ lɛ, tsɔ ekroko lɛ hu ohã lɛ.” (Mateo 5:38, 39; Luka 6:29) Nɔ ni Yesu wie nɛɛ etsɔɔɔ akɛ mɛi ahã afee amɛ niseniianii. Moŋ lɛ, no mli lɛ eejaje susumɔ ko ni ejaaa ni jamɔŋ hiɛnyiɛlɔi komɛi tsɔɔ lɛ; amɛkɛɛ tɔ̃mɔ bɛ he akɛ kɛ́ mɔ ko fee bo nɔ ko lɛ, bo hu obaafee lɛ eko kɛtse. Ekɛ enɛ tsɔɔ ekaselɔi lɛ akɛ, kɛ́ mɔ ko fee amɛ nɔ ko ni egbá amɛnaa lɛ, amɛkafee mɔ lɛ eko kɛto najiaŋ, shi moŋ, amɛkɛ lɛ aye yɛ mlijɔlɛ mli.b

• “Nyɛyaa nɔ nyɛsumɔa nyɛhenyɛlɔi.” (Mateo 5:43, 44; Luka 6:27) Yesu tsɔɔ akɛ, wɔkɛ wɔhenyɛlɔi loo mɛi ni amɛkɛ wɔ yeee jogbaŋŋ lɛ aye yɛ mlihilɛ mli. Etsɔɔɔ akɛ wɔfi nibii gbohii ni amɛfeɔ lɛ asɛɛ.c Shi kɛ́ wɔjie mlihilɛ kpo wɔtsɔɔ wɔhenyɛlɔi lɛ, ekolɛ no baahã amɛhe ajɔ, ni amɛ hu amɛkɛ wɔ aye yɛ mlihilɛ naa.

Nibii ni Yesu fee kɛ nibii ni ebaafee

Yesu tsɔɔ akɛ, jeee yiwalɛ nifeemɔ ni akɛbaatsu naagbai ahe nii lɛ ji nɔ ni kɛ toiŋjɔlɛ baaba​—ni ekɛ enifeemɔ tsɔɔ nakai. Gbi gbɛkɛ ni amɔ lɛ lɛ, esɛɛnyiɛlɔi lɛ ateŋ mɔ kome pila mɔ ko koni ekɛfã Yesu he, shi Yesu kɛɛ lɛ akɛ: “Okɛ oklante lɛ awo etoohe, ejaakɛ mɛi fɛɛ ni gbalaa klante lɛ, klante naa amɛbaagbo yɛ.” (Mateo 26:52) Yesu kɛ ehenyɛlɔi lɛ ahe ke amɛ, ni esɔle po ehã amɛ; efee enɛ kɛtsɔɔ akɛ esumɔɔ amɛ!​—Luka 23:33, 34; 1 Petro 2:23.

Biblia lɛ ewo shi akɛ etsɛŋ, Yesu, ni ji Toiŋjɔlɛ Lumɔ lɛ, baafo yiwalɛ nifeemɔi fɛɛ asɛɛ. (Yesaia 9:6, 7) Kɛ́ ootao ole wɔsɛɛ be ni bafee miishɛɛ waa lɛ he saji krokomɛi lɛ, kanemɔ sane ni ji “Bɔ Ni Baafee Ni Tai Asɛɛ Afo.”