Ta Miiya Nɔ Yɛ Israel Kɛ Ehewɔ Maji Lɛ Ateŋ​—⁠Mɛni Biblia Lɛ Kɛɔ Yɛ He?

Mɛi ni yɔɔ je lɛ mli hei srɔtoi lɛ ehao waa yɛ béi ni miiya nɔ yɛ United States, Israel, kɛ Iran teŋ lɛ hewɔ. Ani béi nɛɛ mli baawu aahu akɛ eebatsɔ ta ni baasa maji krokomɛi hu ahe? Ani nɔyelii lɛ baanyɛ aku béi nɛɛ anaa koni amɛhã toiŋjɔlɛ aba je lɛ mli?

Ekolɛ mɛi ni amɛnu Biblia gbalɛ loo amɛkane lɛ baabi amɛhe akɛ, ‘Ani béi ni miiya nɔ yɛ Israel kɛ ehewɔ maji lɛ ateŋ lɛ ji nɔ ni baaje Harmagedon ta ni Kpojiemɔ wolo lɛ wie he lɛ shishi?’

Mɛni Biblia lɛ kɛɔ yɛ he?

Ani nɔyelii lɛ baanyɛ afo ta ni miiya nɔ yɛ Israel kɛ ehewɔ maji lɛ asɛɛ?

Biblia lɛ kɛɔ akɛ: “Nyɛkɛ nyɛhiɛ akafɔ̃a lumɛi anɔ, loo gbɔmɔ bi ko, ni yiwalaheremɔ ko bɛ edɛŋ lɛ nɔ.”​—Lala 146:3.

Wɔleee kɛji nɔyelii lɛ baanyɛ afee nɔ ko yɛ nɔ ni yaa nɔ yɛ maji nɛɛ ateŋ lɛ he, ni ehã toiŋjɔlɛ aba jɛi lo. Kɛ̃lɛ, Biblia lɛ feɔ lɛ faŋŋ akɛ, maŋkwramɔ hiɛnyiɛlɔ ko, adesai anɔyeli ko, loo kuu ko nyɛŋ afo ta sɛɛ ni amɛhã toiŋjɔlɛ ahi shi daa. Nyɔŋmɔ pɛ ji mɔ ni baanyɛ ‘efo tai asɛɛ yɛ shikpɔŋ lɛ nɔ fɛɛ.’​—Lala 46:9.

• Kɛ́ ootao ole enɛ he saji krokomɛi lɛ, kanemɔ Buu-Mɔɔ ni hiɛ saneyitso akɛ“Ani Tai Asɛɛ Baafo Kɛ̃?” lɛ.

Ani ta ni yaa nɔ yɛ Israel kɛ ehewɔ maji lɛ amli lɛ ji gbalɛ mlibaa?

Biblia lɛ kɛɔ akɛ: “Nyɛbaanu tai kɛ tai amaniɛbɔi ahe. . . . Jeŋmaŋ baate shi awo jeŋmaŋ, ni maŋtsɛyeli baate shi awo maŋtsɛyeli”​—Mateo 24:6, 7.

Béi ni miiya nɔ yɛ Israel kɛ ehewɔ maji lɛ amli lɛ ji “je lɛ naagbee gbii lɛ he okadi lɛ” eko ni eji odaseyeli ni tsɔɔ akɛ wɔyɛ “naagbee gbii lɛ amli.” (Mateo 24:3; 2 Timoteo 3:1) Tai ni miiya nɔ ŋmɛnɛ lɛ tsɔɔ akɛ etsɛŋ tsɔ Nyɔŋmɔ baafee nɔ ko kɛfo tai kɛ nibii fɛɛ ni gbaa adesai anaa lɛ asɛɛ.

• Kɛ́ ootao ole enɛ he saji krokomɛi lɛ, kanemɔ sane ni ji “Mɛni Ji ‘Naagbee Gbii Lɛ’ Ahe Okadi Lɛ?”

Ani Harmagedon baaje shishi yɛ Middle East, ni ji Israel kɛ ehewɔ maji lɛ amli?

Biblia lɛ kɛɔ akɛ: “Amɛbua maŋtsɛmɛi lɛ anaa kɛtee he ko ni atsɛɔ jɛmɛ yɛ Hebri mli akɛ Harmagedon”​—Kpojiemɔ 16:16..

Harmagedon ta lɛ jeee ta ni baaya nɔ yɛ adesai anɔyelii ateŋ, ni ejeŋ shishi yɛ Middle East. Eji ta ni baasa je lɛ fɛɛ he, ni ebaaya nɔ yɛ adesai anɔyelii lɛ fɛɛ ni efee ekome kɛ Nyɔŋmɔ teŋ.

• Kɛ́ ootao ole enɛ he saji krokomɛi lɛ, kanemɔ sane ni ji “Mɛni Ji Harmagedon Ta Lɛ?”

Mɛni baaye abua wɔ koni wɔkaye wɔtsui be ni nibii gbohii miiya nɔ?

Biblia lɛ kɛɔ akɛ: “Nyɛkayea nyɛtsui yɛ nɔ ko nɔ ko he, shi moŋ yɛ nɔ fɛɛ nɔ mli lɛ, nyɛtsɔa sɔlemɔ, kɛ fai ni akɛ hiɛdɔɔ kpaa, kɛ shidaa nɔ nyɛhãa Nyɔŋmɔ alea nyɛnibimɔi lɛ”​—Filipibii 4:6.

Yehowaa Nyɔŋmɔ miisumɔ ni wɔsɔle wɔhã lɛ. Akɛni Nyɔŋmɔ susuɔ wɔhe hewɔ lɛ, kɛ́ wɔsɔle lɛ ebaabo wɔ toi ni ebaaye ebua wɔ koni wɔkaye wɔtsui tsɔ. (1 Petro 5:7) Gbɛ kome ni etsɔɔ nɔ eyeɔ ebuaa wɔ koni wɔkaye wɔtsui ji, ehãa wɔleɔ nɔ hewɔ ni tai yaa nɔ, bɔ ni ebaafee efo tai asɛɛ, kɛ nibii ni ebaafee koni ejie piŋmɔi kɛ nɔnai kɛje shihilɛ mli ni wɔná miishɛɛ.​—Kpojiemɔ 21:3, 4.

• Kɛ́ ootao ole gbɛ ni Nyɔŋmɔ tsɔɔ nɔ eyeɔ ebuaa wɔ lɛ he saji krokomɛi lɛ, kanemɔ sane ni ji “Ani Manyɛ Maná Saji Yɛ Biblia Lɛ Mli Ni Baashɛje Mimii?.”